رواية يونس الفصل العاشر

 رواية يونس الفصل العاشر

فجأة لقوا باب الحمام مقفول علي صفوة وفاقدة الوعي جري يونس شالها ودخلها على السرير وبدأ يفوق فيها على دخلة كريم ، اتلفت يونس لمح شاب كان مستخبي وخرج يجري على السلم .. شاور لكريم يفوق هو صفوة وجري يونس ورا الشاب اللي كان نازل وبعد معاناة قدر يمسكه وراح بيه على *المكان السري* واللي بيروحه في أوقات

الزنقة وبعد ضرب استمر اكتر من نص ساعة من يونس للواد دا ..

يونس : انت مين ياد انت ومين اللي باعتك ؟؟؟؟

الشاب : .......

يونس : هتتكلم وأكمل عليك لحد مااجيب اخرك

الشاب : خلاص والله ، انا تبع ع ... عصام محفوظ ياباشا

يونس : وكان عايز ايه سي عصام المرة دي !!!

الشاب : في الحقيقة هو كان باعتني اخدر والدتك واشيلها أنزل بيها على تحت واوديهاله وهو يتصرف معاها بقا

يونس : وايه اللي جد ياحبيبي ؟؟؟

الشاب : اللي جد إن لسان حالي قالي لو انت جاي تعمل كدا عشان تنقذ امك من ايد عصام باشا محفوظ فالست دي كمان ليها إبن يخاف عليها ،، مقدرتش غير اني اخدرها وسيبتها وجريت

يونس : طب بص بقا يامخ ، من اللحظة دي ورايح ولاءك هيبقي ليا انا .. هترجع لعصام تقوله المهمة فشلت لأي سبب تخترعه وهترجع تشتغل معاه من تاني ، بس ولاءك لمييييين

الشاب : ليك طبعا ياباشا

يونس : ولو اخليت بالاتفاق دا هكمل عليك اللي مكملتهوش دلوقتي انا هعتقك لوجه الله بس عشان ضميرك صحي في آخر لحظة ، إسم الباشا ايه بقا ؟؟

الشاب : امين .. إسمي أمين .

يونس : ماشي ياامين هسيبك دلوقتي وهروح مشوار في ربع ساعة واجي اديلك تليفون جديد بخط جديد ودا اللي هتتواصل معايا منه .. أمين يا أمين ؟

امين : امين ياباشا هستناك

*بعد ساعة في بيت يونس *

طالع يونس علي السلم يجري .. فتح باب الشقة ودخل على أوضة امه زي المجنون ، صفوة نايمة على السرير ومفتحة عينها وحواليها كريم وجنة

يونس : حمدالله على سلامتك ياحبيبتي انا كنت هتجنن لما شوفتك في الحالة دي ، بس وحياتي عندك لأجيبلك حق كل اللي حصل فيكي النهاردة وقبله

صفوة : ياحبيبي انا مش عايزة غير سلامتك بس ، وكتر خير كريم اخو جنة هو اللي لحقني وفوقني وجابلي دكتور اداني أدوية شالت مفعول المخدر دا من جسمي في ساعتها .. ربنا يكرمه يارب ونفرح بيه

كريم : على ايه بس هو انا عملت ايه انتي زي والدتي

يونس : كتر خيرك ياكريم انت عيل جدع وانا من أول يوم شوفتك فيه حسيتك مننا ومن طينتنا ، ومن اليوم اللي ساعدت أمي فيه دا اعتبر كل طلباتك مجابة

كريم : انا مش عايز أي حاجة غير اننا نكمل المشوار اللي بدأناه ونطلع منه منتصرين بس .

جنة : طب ايه هنقف نتساير ساعتين بقا ولا هنروح ناكل .. دا انا عملالكو أكل ريحته هتدوخكوا

يونس : ايه دا عملتي أكل بدراعك اللي واجعك دا ياجنة !!

جنة : نسيت اقولك دراعي بقاله يومين متحسن كتير على حس الجلسات اللي بتعملهالي كل يوم .. انا مش عارفة أودي جمايلك دي كلها فين يايونس والله

يونس : دي مسمهاش جمايل ياجنة ، انتي قاعدة في بيتي وكل حاجة تخصك أمانة في رقابتي وبالأخص سلامتك

*في بيت عصام *

*عصام : الو .. أيوة ياجلال موصلتش لأمين كل دا ؟!

*جلال : والله ياباشا قالب عليه الدنيا فص ملح وداب

*عصام : يعني ايه فص ملح وداب !!! انت تقب وتغطس تطلعلي بيه هو احنا بنلعب .. الواد دا لو وقع في ايد يونس ولا حد تبعه هنروح في داهية

*جلال : متقلقش ياعصام بيه انا هلاقيه بكرا بإذن الله

*تاني يوم قبل الحفلة *

خارجة جنة من اوضتها بفستان بيبي بلو سماوي موضح ملامحها الرقيقة مع عيونها العسلي و بشرتها البيضا الصافية ولوك الميك اب الهادي والجذاب في نفس الوقت .. وقف يونس موجه نظراته ناحيتها وبعد تأمل لمدة خمس دقايق متواصلين

جنة : ايه يايونس مالك

يونس : أكيد اللي سماكي كان مكشوف عنه الحجاب ، ألقى نظرة على وشك في المستقبل لما تتولدي وتكبري وملقاش إسم يليق عليكي اكتر من *جنة *

وبعد تأمل منها المرة دي ليه لمدة كذا دقيقة زيهم

يونس : بتقلديني ولا ايه

جنة : عارف إن دي أول مرة أسمع كلمة حلوة من حد واحس انها صادقة بجد ..

يونس : في الحفلة هتتأكدي إنها صادقة ..

يلا ياجماعة عشان هنتأخر كدا

*في الحفلة*

*قاعة مناسبات كبيرة اوبن اير مع ديكورات فخمة ومودرن وخدم لابسين يونيفورم

*عصام : جلال انا عايز الحفلة دي تمشي بالورقة والقلم ونعوّض فيها كل خساير الفترة اللي فاتت ،، انا ماصدقت أقف على رجلي بالصعوبة دي

*جلال : كل حاجة ماشية بالمسطرة يافندم وهتشوف كل حاجة قدامك حضرتك دلوقتي

عصام : عملت ايه في حوار أمين ؟

جلال : لسة مظهرش بس انا مش هسيبه وهيظهر يعني هيظهر .. صحيح ياباشا مش انا عرفت سبب موافقة الشركة دي إننا نتعاقد معاها بعد ما كانو رافضين تماماً

عصام : وايه هو السبب ؟

جلال : رئيس مجلس إدارة الشركة اتغير ، والجديد اول حاجة عملها بعد مااتعين إنه وافق يوقع العقد دا مع شركتنا

عصام : طب ومين بقا الجديد د... ايه دا ايه اللي جابه هنا دا

جلال : يونس بيه جاي الحفلة !!!

عصام : وكمان جايب معاه جنة ومش هامه أي حاجة .. دا اكيد هبت منه ع الآخر

من بوابة الحفلة داخل يونس ومعاه صفوة وجنة وكريم اخوها ومصطفى .. وكانت صدمة صعبة بالنسبة لعصام لانه مش عارف ايه هدف يونس من إنه ييجي الحفلة

*بعد نص ساعة *

اتقدم يونس للإستيدچ بتاع الحفلة وبدأ يتكلم ..

يونس : طبعاً كلكوا عارفين السبب الرئيسي لحفلة النهاردة وهو توقيع عقد شراكة مع بين شركتنا وشركة *المستقبل* بس دا مش هيكون السبب الوحيد ، لأن الحفلة دي عملناها نعلن فيها عدة نقاط أولهم واهمهم

• ان رئيس مجلس إدارة شركتنا اتغير وبقا إسمه *يونس محفوظ * ، واللي هو انا .. من حقكوا تستغربوا طبعا وتعملوا اكتر من كدا لان قليل منكوا اللي يعرفني أو يعرف إني ولي العهد و بالصلاحيات اللي كتبهالي والدي الله يرحمه قبل مايموت بقا من حقي استلم مجلس إدارة الشركة

عصام : نعممممم مين المتخلف اللي قال الكلام دا

يونس : كل الأوراق اللي بتثبت كلامي مع محامي أستاذ محفوظ واللي هو محامي شركتنا دي ، بعد اذنك بقا ارجع خطوة لورا عشان أكمل القرارات اللي بعلنها

• تاني حاجة هتحصل إن إسم الشركة والمصنع هيتغيروا الاسم الجديد للشركة هو *الإيمان* على إسم والدتي الحقيقية الله يرحمها ، وإسم المصنع الجديد *الصفوة* على إسم والدتي اللي ربتني واللي مديونلها بحياتي

• ودلوقتي هنبدأ توقيع العقد مع شركة المستقبل اللي رئيس مجلس ادارتها الجديد هو "هشام مطاوع " نرحب بيه

خرج هشام على الناس وبدأ الترحيب ولكن في وسط دا كله واقف عصام وشه أحمر من الغضب لأن هشام باعه وطلع شغال لحساب يونس وكل اللي كان بينهم مجرد خطة مش اكتر .. وبعد توقيع العقد .

• وجت الخطوة الأهم والاكبر من كل اللي فات ، عايز اشارككوا كلكوا ... تعالي ياجنة

• دخلت جنة علي الاستيدچ وبدأت تلمع بفستانها السماوي بعد ما الأضواء كلها اتوجهت عليها .. بدأ يونس يمشي ناحيتها بخطوات بطيئة .. مسك ايديها وطلع من جيبه خاتم وقالها

*تتجوزيني ياجنتي *

الفصل الحادي عشر من هنا

بدل ماتدور وتبحث علي الروايات خليها علي تليفونك وحمل تطبيقنا

تعديل المقال