رواية يونس الفصل الحادي عشر

 رواية يونس الفصل الحادي عشر

رفعت جنة عيونها اللي بتلمع وبصت بخجل في عيون يونس ، مصدومة ومش مصدقة اللي هو قاله .. وبعد نظراتهم في عيون بعض دقيقة وكل الأضواء متجهة عليهم

جنة : نعم ! مش فاهمة

يونس : تقبلي تكوني نصي التاني وتكملي معايا حياتك وتبقى حبيبتي و زوجتي واختي وبنتي و جنتي .. وتكون كل الناس دي شاهدة إني من اللحظة دي هشيلك في عيني

بعد تفكير شوية كمان وهي بتبص حواليها بكسوف فظيع ووشها أحمر

جنة بخجل :

*موافقة *

بدأت الناس تسقف وصوت الاحتفالات يعلى والأضواء تزيد في كل مكان ويعلى صوت الموسيقى المناسبة مع الموقف واللي رتبها يونس قبل الحفلة ... لبسها خاتم الخطوبة ولف وشه للناس

• ودي كانت أهم حاجة جيت أعلن عنها قدام كل الموجودين في الحفلة

بدأت عيون عصام ينط منها شرار النار اللي قايدة جواه وهو شايف المشهد دا وبنرفزة مشي بعيد عن الاستيدچ ووراه جلال طبعاً .. وبعد ما وصلوا مكان مفيهوش ناس ، عصام لطش جلال قلم رن على وشه

عصام : انت غبي ؟! ازاي حاجة زي كدا تحصل وانت نايم في ماية البطيخ !! انطططططططق

جلال بعصبية مكبوتة : حضرتك انا عملت كل اللي أمرتني بيه ومشيت كل حاجة زي ما قال الكتاب ، مكنتش أعرف بقا ان هشام مطاوع هو رئيس مجلس إدارة الشركة الجديد .. غصب عني

عصام : اااااه غصب عنك ، طب بص بقا ياجلال ، عليا الحرام من ديني لو ما ركزت في اللي هقوله وغلطت غلطة واحدة تانية لا هكون ماحيك من علي وش الأرض ، أمين ؟؟؟

جلال : أمين ياباشا ، اؤمر ؟

* الناحية التانية*

صفوة : بقا كدا ياولد ياجبان تبقى ناوي علي خطوبة ومتقولش لامك

يونس : كنت عاملهالك مفاجأة ياحبيبتي

صفوة : ماااشي حسابك معايا بعدين بس اقولك حاجة .. انا كنت حاسة وربنا

يونس : مكشوف عنك الحجاب ها

صفوة : ياواد انت هضربك كنت حاسة من طريقتكوا انكو مشدودين لبعض وفيه لينك كدا

بص يونس على جنة اتكسفت وهي بتبتسم ووشها احمر وبدأت تبص في أي إتجاه تاني عشان تداري كسوفها

كريم خدها بالحضن : ألف مبروك ياروح قلبي متتخيليش فرحة بيكي قد ايه لما يونس قالي قبل الحفلة

جنة : الله يبارك فيك ياحبيبي عقبالك يارب

صفوة بابتسامة : عقبالك ياكريم ياحبيبي ، انا متأكدة ان انت كمان هتلاقي بنت الحلال قريب اوي وهتفرحنا بيك

كريم : بإذن الله ياامي .. تسحميلي أقولك ياامي ؟؟

صفوة : اسمحلك طبعا ياحبيبي دا انت زيك زي يونس بالظبط

سابتهم جنة وبدأت تتمشى في الحفلة واحدة واحدة مع نفسها .. ترفع ايديها وتبص لمحبس الخطوبة وتفتكر اللي حصل وتفكر باستغراب ياترى ليه يونس عمل كدا بالسرعة دي ، وحتي مكانش باين عليه أي بوادر قبلها

ووسط تفكيرها وهي ماشية شنطتها اتشبكت في كرسي فاتشدت منها ووقعت علي الأرض .. جت توطي جنة عشان تجيب الشنطة لقت حد بيعدلها تاني

يونس : ميصحش توطي طالما فيه حد مسؤول عند يقدر يوطي هو

جابلها الشنطة ادهالها وبدأوا يتمشوا في جنينة الحفلة ، عينيها لمعت من فرحتها بعد الموقف اللي حصل وقالت

جنة : انت حاجة حلوة اوي يايونس بجد

يونس : حاجة حلوة ازاي يعني

جنة : يعني بقوا قليلين اوي اللي زيك كدا

قليل لما تلاقي شخص جدع وشهم ومحترم وبيقدر يطيب خاطر اللي قدامه ، مبيهونش عليه يزعل حد وميسمحش بكسر قلب حد طالما يقدر علي دا .. وفوق كل دا جذاب كمان

يونس بخجل : دا من ذوقك ياجنة والله

جنة : جنتي** لما قولتها حبيتها منك اكتر

يونس : دا من ذوقك ياجنتي

جنة : مش ناوي تقولي بقا ايه الحكاية ؟

يونس : حكاية ايه ؟!

جنة : ليه عملت كدا ، ووافقت إنك تسألني سؤال زي دا قدام كل الناس مع إني ممكن موافقش

يونس : بصي هو مش غرور ، بس انا مبعملش حاجة غير لما أكون دارسها كويس و حاسب حسابها من كل الإتجاهات وعارف نسبة نجاحها ونسبة فشلها

جنة : على وضعك بس دي إجابة سؤال واحد ، فين إجابة السؤال التاني

يونس : بلاش نسبق الأحداث ، أوعدك هتعرفي كل حاجة في وقتها ... ثانية واحدة وراجع

اتقدم يونس خطوات لقدام كان فيه واحد واقف بورد ، ودا كمان من ضمن خطة يونس إنه يكون موجود في الحفلة .. وقف نقى بوكيه ورد وردة وردة وبعد ما خلص رجع بيه لحد جنة

يونس : النهاردة خطوبتك ، والأصول بتقول إني كخطيبك أقل حاجة أقدر اقدمهالك بوكيه الورد دا

جنة : اللللللله دا حلو اوي بس انت عرفت منين إني بحب عباد الشمس

يونس : مش لسة قايلك مبعملش حاجة غير وانا دارسها كويس

جنة : أيوة صح ميرسي يا يونس عجبني أوي والله

يونس : هروح البوفيه أجيب حاجة لصفوة تاكلها عشان تاخد دواها على ماانتي تاخدي جولة كدا في الحفلة

جنة : اشطة

سابها يونس ومشي وبدأت هي تتمشي لحد ما شافت طفل صغير واقف بيعيط راحتله بسرعة وسألته مالك قالها إنه تايه من أمه بدأت تمشي معاه تدور على أمه لحد ما فجأة لقت نفسها في مكان غريب وضلمة .. الطفل ساب ايديها وجري خرج على برا ، جاية تجري وراه عشان تشوف ماله لقت حد في وشها راح ماسكها من دراعتها الاتنين

جنة بوجع : ااااه انت مي... عصام !!!!

عصام : أيوة عصام

جنة : اوعى كداااا .. انت عارف لو يونس عرف إنك جايبني هنا بالطريقة دي ولا ماسكني المسكة دي هيعمل فيك ايه

عصام : سيبك بقا من عم يونس بتاعك دا وخلينا في المهم ،، قولتلك معايا معلومات هتقلب حياتك مهتمتيش !!

جنة : اه مهتمتش ومش عايزة أهتم عشان انت كل اللي جاي من ناحيتك fake أصلا

عصام : fake زي علاقتك انتي واخوكي كدا مثلاً ؟

جنة بصدمة : افندم ! هو ايه اللي علاقتك انتي واخوكي .. تقصد ايه ياعصام

عصام : هههه أقصد عمرك ما فكرتي ازاي تاريخ ميلاد كريم اخوكي قبل ما امك وابوكي يتجوزوا بسنة ؟؟

جنة : ايه دا .. انت مين اللي قالك الكلام دا ، اوعى ياعصام سيبني أمشي

عصام : هو ايه اللي تمشي انا مش هسيبك تمشي من هنا

بدأت جنة تحاول تفك ايديها منه وهو بيحاول يكتفها لحد ما فجأة خد بشومة علي دماغه من ورا .. وقع علي الأرض وبدأ يتوجع من دماغه وبيبص لفوق

يونس : واضح ان الطلقة اللي خدتها في رجلك مكانتش كفيلة تهتك ياعصام .. انا بحذرك لآخرررررر مرة ياعصام لو فكرت مجرد تفكير إنك تأذي جنة تاني ولا حتى تلمس ايديها زي ما عملت دلوقتي انا هقطعلك راسك اللي بتفكر فيها وايدك اللي عايز تلمسها بيها .. مفهوم ؟؟؟؟

أول ما جنة شافته جريت ناحيته واستخبت ورا ضهره لف وطبطب عليها ومسك ايديها وخرج بيها من المكان

ركبوا العربية كلهم عشان يروحوا وطول الطريق جنة عمالة تسرح وتفكر في كلام عصام ، ويقصد بيه ايه .. قطع يونس سرحانها

يونس : ها ياجماعة جاهزين لأول يوم شغل في الشركة بكرا

مصطفى وكريم : جاهزين ياباشا مصر طبعاً

يونس : وانتي ياجنة .. جاهزة ؟

جنة : انا ايه !

يونس : جاهزة لأول يوم شغل في الشركة

جنة : ايه دا انت هتشغلني معاك في الشركة

يونس : اه طبعاً ، من هنا ورايح انا وانتي ومصطفى وكريم هنمشي الشركة وبكرا بإذن الله هقول لكل واحد منصبه ايه

جنة : طب حلو اوووي انا جاهزة من دلوقتي

مصطفى : بس كانت نمرة حلوة اوي اللي عملتها في الحفلة لما فضلت تدي عصام في اسافين ورا بعض لما جيبت أجله ياعين أمه

صفوة : متتخيلش فرحتي بيك يايونس كانت قد ايه لما شوفتك بتغير أسماء الشركة والمصنع وبتسميهم بإسمي وإسم اختي اللي هي أمك .. للحظة دمعت وكأن نفسي تكون عايشة الدقيقة دي بس عشان تشوف ابنها وهو بيجيب لأمه حقها وبيعمل العظمة دي كلها

يونس : هي أكيد شايفة وحاسة بكل حاجة ياامي ، ادعولها بالرحمة ياجماعة

**تاني يوم في الشركة **

داخل يونس ... وجنبه جنة ، ووراه كريم ومصطفى *** وقف في نص الشركة وعمل صوت عشان الموظفين كلهم يحضروا ومنهم عصام اللي جه وفضل مستني يشوف هيحصل ايه

يونس : اكيد اغلبكوا كان موجود في الحفلة امبارح وعرفتوا إني بقيت رئيس مجلس إدارة الشركة ،، جنة هتكون مديرة أعمالي و السكرتيرة الخاصة اللي هتكون رابط الوصل بيني وبين اي حد فيكم ، مصطفى هيكون المدير التنفيذي هنا وهتكون مهامه قريبة من مهامي لأن دماغه زي دماغي بالظبط ، كريم هيكون مدير الحسابات

عصام : ثواني بقا اهدى على نفسك كدا عشان الموضوع ميبهوقش منك ، رئيس مجلس إدارة ومدير أعمال ومدير تنفيذي ومدير حسابات اااااايه ياعم في ايه هي وكالة من غير بواب .. انا فين في دا كله

يونس : انت هتمسك العلاقات العامة في الشركة بقا

عصام : علاقات عامة مين ياباااشا انا كنت ماسك الشركة دي كلها ومش معنى ان معاك ورقتين مزورين هتنفي كلللللل المجهود اللي انا عملته وسيادتك نايم في بيتكو

يونس بخطوات ناحية عصام وبعد ما بص في عينيه : طيب بص بقا يابرنس ، انا قبلت اني امسكك حاجة في الشركة تاني لمجررررد إنك تكون تحت عيني وأعرف تحركاتك .. أما بالنسبة لو مش موافق علي الوظيفة انا مستعد اوريك الورقتين المزورين دول هيخلوني أعمل ايه حالا

عصام بغيظ : مااشي يا يونس ، الشطارة للي يضحك في الآخر ولسة الحرب مخلصتش

دخل يونس مكتبه ووراه جنة ، اول ما قعد ع المكتب

يونس : جهزي نفسك عشان رايحين مشوار مهم جداً ...

الفصل الثاني عشر من هنا

بدل ماتدور وتبحث علي الروايات خليها علي تليفونك وحمل تطبيقنا

تعديل المقال