رواية يونس الفصل الرابع عشر

فتح يونس عينيه وبص في عين جنة بدأت دموعها تنزل زيادة بس المرة دي من الفرحة
جنة : حمدالله على سلامتك يا يونس ، انت متتخيلش انا اترعبت عليك قد ايه اقسم بالله 


يونس : الله يسلمك ياجنة  قولتلك قبل كدا ان ربنا حافظني طول الوقت ومش هيجرالي حاجة مصدقتينيش 
جنة : هو انا كان فيا دماغ ساعتها أصدق ولا اكدب يا يونس دا انا كنت هموت وربنا .. مكنتش متخيلة إنك ممكن تمشي وتسيبني يا يونس بعد ما قطعنا الطريق دا كله سوا 
يونس بتوتر : يلا الحمدلله بقا اديني زي الحصان قدامك اهو ، مدروخ بس شوية من الحادثة بس ١٠ دقايق وهقوم اجري دلوقتي 

قاطعتهم صفوة ودخلت تجري علي يونس وهي منهارة عياط خدته بالحضن
صفوة وهي بتفتش في جسمه كله : قلب امك ايه اللي حصلك يا ضنايا قولي عملوا فيك ايه ولاد الكلب انت 
يونس : اهدي ياامي احم احم اهدي بس فيه ايه الموضوع أبسط من كدا 
صفوة : أبسط من كدا ايه بس يااخي حرام عليك يامااا قولتلك ابعد عن السكة دي انا قلبي مش هيستحمل يجرالك حاجة واديك أهو كنت هتروح في الرجلين 
يونس : ياصفوة انتي اللي ربيتيني اني مينفعش أخاف واكش من حاجة ، هتيجي دلوقتي تقوليلي لا خاف ؟ 
صفوة : في الحاجات دي من خاف سلم ياابني ولو الحمدلله المرة دي عدت علي خير ياعالم الجاية هتكون ازاي
يونس : اهدي بس متقلقيش عليا 
مصطفى داخل من الباب وفي ايده شنط عصاير كتير واكل : ايووووة بقا انا قولتلهم باشا مصر دا هيقوم زي القرد ولا هيتأثرررر  حمدالله على سلامتك ياصاحبي
يونس : الله يسلمك يا مصطفى تسلم ع الحاجات دي
مصطفى : على ايه بس يابني ، تقوم بس بالسلامة وانا ههد الدنيا لحد مااعرف مين اللي عمل فيك كدا يا يونس عليا الحرام من ديني أيا كان هو مين لاسففه التراب على الحركة دي 
يونس : لا لا شيل ايدك من الحوار دا انا هتصرف ، أهم حاجة بس خلي بالك اوي من صفوة وجنة الفترة الجاية دي عشان شكله كدا رفع أعلام الحرب .. عايزها حرب يلا بيننا 
جنة : كفاااااية بقا يايونس كفاية حرام عليك نفسك انت مش قادر تقف على رجلك ولسة مقومتش من السرير حتي وبتفكر في الحروب انت ايه بقيت مريض بالانتقام 
صفوة : جنة معاها حق يا يونس 
يونس : فات أوان الكلام دا من زمان اوي ياجماعة ، دلوقتي خلينا في الفعل

*بعد مرور أسبوع .. في بيت يونس *

صفوة : ياجننننة بتعملي ايه ياحبيبتي انا جهزت الفطار من بدري ، يلا يا يونس يلا ياكريم
مصطفى : كل يوم نتذنب ع الفطار ٣ ساعات كدا علي ما يخلصوا 
جنة جاية بتمد : خلاص خلاص جيت اهو 
بتبوسها من خدها : حقك عليا ياصفوتي ياقمر انتي 
صفوة : يابنتي انا بس قلبي بياكلني عليكي كل يوم تتأخري لحد ما كلنا نخلص اكل وتنزلي ع الشركة من غير فطار
يونس : بتروح تاكل في الشركة ياصفوة متقلقيش عليها 
جنة : اناااا  انت اول ما خفيت هتشد حيلك بقا وتتبلى عليا
كريم : اه بيتبلى عليكي ، دي أمي يا بت اللي قربت تيجي تاكلني 
جنة : اااااه دا انتو كلكوا اتجمعتوا عليا بقا  طيب انا مش هرد عليكوا عشان انا محترمة هقوم أغسل ايدي بقا عشان نلحق ننزل 
خرج كريم البلكونة يرد علي التليفون ويونس وجنة نزلوا عشان يروحوا الشركة ومصطفى دخل الحمام ..
صفوة قامت تنزل كرتونة من فوق الدولاب وبعد محاولات كتير جدااا منها الكرتونة كانت هتقع علي دماغها ، على خروج كريم من البلكونة رمى التليفون اللي في ايده وجري عليها وراح شاقط الكرتونة قبل ما تقع علي دماغها
كريم : مش تخلي بالك ياطنط الكرتونة كانت هتنزل علي دماغك وياعالم كانت هتعمل ايه 
صفوة بخضة : يالهوي دا انت جيتلي في الوقت المناسب انا قولت هطب ساكتة دلوقتي 
كريم : بعد الشر عنك متقوليش كدا دا احنا كنا نلوص من غيرك ياامي ، خدي بالك من نفسك اكتر من كدا والنبي 
صفوة بابتسامة : حاضر ياحبيبي ، ربنا يحميك لشبابك يارب 

*في عربية يونس *

جنة : الشركة هتنور أخيراً لما تروحها 
يونس : متحسسينيش اني كنت نايم في البيت يعني منا كنت متابع الشركة من هناك 
جنة : ياعم بقولك كلمة حلوة مشيهااااا دا انت رزل 
يونس : إلا قوليلي ياجنة ، نفسك في ايه عايزة تحققيه ؟
جنة : اشمعنا !
يونس : عادي يعني بسألك عشان احققلك الحاجة اللي بتتمنيها 
جنة : هو انا ليه مش مرتاحة لسؤالك ؟
يونس : ليه يعني 
جنة : مش عارفة كأنك عايز تعمل اللي عليك كدا 
يونس : لا انتي فاهمة غلط 
جنة : وايه هو الصح ؟
يونس : الصح هتعرفيه في الوقت المناسب
جنة : يونس انت مش من حقك تعمل اللي بتعمله دا .. احنا من يوم خطوبتنا لا قولتلي كلمة حلوة ولا اتعاملت معايا زي اي واحد مرتبط بواحدة دا انت حتى مفكرتش تمسك ايدي ولا مرة لو بالغلط حتى كأني غريبة عنك ، مش تصرفات واحد هيتجوز واحدة خالص ، ما تفهمني فيه ايه 
يونس : صدقيني هتعرفي كل حاجة في الوقت المناسب بس طاوعيني اليومين دول لحد ما نخرج من الموقف دا وهقولك كل حاجة من البداية
جنة : ماشي يا يونس لما أشوف اخرتها 
نزلوا من العربية دخلوا الشركة ومجرد ما دخل يونس وجنة من باب الشركة جه عصام 
عصام بعصبية : عملت اللي في دماغك يا يونس وهديتها فوق دماغ الكل ؟
الفصل الخامس عشر من هنا