#البارت_التالت.
(وفجأة وبدون مقدمات وتين ضربت أسر بالقلم)
-وتين:- أنت بتستعبط، أزاي تمسك إيدي هو أنت يعني علشان حلو وقمور لازم كل البنات تجري وراك، أنا وتين مش زي كل البنات ومش بجري ورا حد يا أستاذ، أنا ماشية بمبدأ ومش هغيره حتى لو رئيس أمريكا بنفسه جرى ورايا(أنا لحالي أحلالي وخطيبي هيخبط على بابي) لكن مش واحد كل أما أروح في حتة يجري ورايا ويروح ماسك إيدي!
(وتين سابت الكل حتى سمر ومشت، وفضل أسر وعمر وطبعا الكلية كلها بتتفرج، عمر جرى على أسر)
-عمر:- أسر تعالى نروح
-أسر:- أنا هروح أطلب إيد وتين
-عمر:- أنت بتقول إيه دي بهدلتك في المُجمع
-أسر:- أنا بحب وتين وهتجوزها دي هتبقى مراتي وأم عيالي
(عمر لمح سمر فجرى عليها)
-عمر:- أنسه يا أنسه
-سمر:- خير!! حابب تجرب اللي صاحبك جربه!
(عمر بهزار علشان يتفادى سلاح سمر العنيف اللي شكلها كدا زي وتين)
-عمر حط إيده على خده:- أنا برئ يا بيه والله غرضي شريف.
-سمر وهي بتكتم ضحكتها:- أفندم، عايز إيه يا ابو غرض شريف؟!
-عمر:- كلامنا دا مش هينفع عالواقف، إحنا نجيب اتنين لمون وشجرة ونقعد نتكلم.
-سمر:- أفندم! ألا صحيح هو إحنا هنجيب شجرة إزاي!
-عمر فطس على نفسه من الضحك:- تعالي يا أوزعة شكلك مصيبة.
-سمر:- عايز إيه ياض!
-عمر:- ياض! شكلي كنت مخدوع في جمالك صحيح الوجوه خداعة.
-سمر:- يا حرامي الجُمَل، يا حرامي الغسيل، أنا اللي بقول الوجوه خداعة وبقولك إيه يسطا أنا مش فضيالك، روح شوف صاحبك المضروب أحسن تحصله.
-عمر في سره:- عيلة دبش بصحيح، بس صاروخ أرض جو
-عمر:- يا أنسه...، هحكيلك عالسريع كدا( وحكالها كل حاجة ورغبة أسر في الجواز من وتين)
-سمر طايرة من الفرحة:- النحس هيتفك يابو جبل، النحس هيتفك يا شلة مشفتش عتريس.
-عمر فطسان ضحك من كلام سمر:- يمين بالله على أبوكي عدل والمأذون هيحصلنا في السكة أمشي يا ولية وأنتِ عايزة راجل يشكمك، جتك القرف في حلاوتك، ألا صحيح هو أنتِ أسمك ايه؟
-سمر:- سمر يا صاحب جوز صاحبتي وتين أختي.
-عمر حصله حول في دماغه:- مين صاحب جوز صاحبتك وتين أختك دا، أنتِ بتحضري تعويذة ولا إيه.
-سمر بضحك:- المهم يا عم الظريف هنروح عالمأذون امتى! ق ق قصدي هنتجوز أمتى؟ يوووه إيه اللي بقوله دا قصدي صاحبك وصاحبتي هنولع فيهم أمتى؟!
-عمر بضحك:- تعالي يا سمر نروح لأسر نشوف هيعمل إيه، وصحيح أنا أسمي عمر يا مراتشي.
-سمر:- هي مين دي اللي مراتك؟!
-عمر:- ها! ولا حاجة يلا بينا على أسر.
(أجتمع أسر وسمر والراس المُدبرة عمر أفندي)
__________________________________________
(في بيت وتين)
(وتين حكت كل حاجة لمامتها وباباها)
- الحاج محمد بفخر:- أنا ربيت صح، جدعة يا وتين وبكره أنا هشوف الموضوع دا علشان لازم الولا دا ياخد عقابه.
-وتين بمحبة لوالدها:- خلاص يا بابا أنا علمته الأدب، أنت مخلف راجل يا حاج محمد.
-الحاج محمد بمحبة:- كله إلا أنتي يا وتين محدش يكلمك بنص كلمة وأنا على وش الدنيا.
-وتين:- ربنا يباركلي فيك يا حبيبي.
-مصطفى بإنفعال:- الواد دا يا بابا لو متبهدلش أنا هتصرف.
-الحاج محمد:- تتصرف وأبوك على وش الدنيا يا مصطفى، أطلع أنت منها وأنا هتصرف.
-الحاج محمد:- ولا أنتي شايفة ايه يا أم مصطفى.
-زينب بعدم تركيز:- والله يا حاج اللي أنت شايفه مناسب أعمله، هسيبكم أنا علشان عايزة وتين في موضوع، قومي يا وتين.
(في أوضة وتين.)
-زينب بفضول:- بت يا وتين أحكيلي بالتفصيل كدا، الواد شكله ايه وقالك ايه ومسك إيدك إزاي أحكي بالتفصيل يا زفتة وسنة كام أحكي يلاااا.
-وتين باستغراب:- يالهوي يا ماما إيه كل الأسئلة دي!! محسساني إننا في المحكمة، دا شاب عادي وكان بس محتاج يتربى ووتين بنتك علمت عليه في الكلية يلا الواد القمور راحت عليه (وضحكت) إنما شكله كان إيييييه، حاجة تكسف(وفضلت تضحك على أسر).
-زينب بيأس من تفكير وتين:- بلوة وأتبليت بيها، ياختي مش بعيد الواد يكون مُعجب ودعوتي تكون استجابت ويتقدملك وأفرح بيكي يا قلب أمك.
-وتين باستغراب:- ماما حبيبتي هو أنا اللي هتجوز ولا أنتي!! أصل شايفاكي مستعجلة أكتر مني لعل المانع خير!!
-زينب وهي طالعة من الأوضة:- أتلمي يا بت، أنا بأمن مستقبلك يا خايبة، طول عمرك هبلة ومش بتفكري في مستقبلك.
-وتين لنفسها:- بفكر طبعًا يا ماما؛ لكن أنا عايزة ربنا يرزقني بابن الحلال في الوقت المُناسب، ربنا يرزقني ويرزق البنات كلها.
-وتين مسكت الفون وكتبت:- (أشتقتُ لنظرةٍ من عيناكَ تجعلني أذوب بِهمَا يا قطعة من السُّكر.)
(متىٰ تَجيبُ علىٰ رسائلي بأنكَ مُشتاق فوق الشوقِ عدةِ أشواق، وتنتظر فقط نظرةً من عينايّ؟!)
(ينبضُ قلبي بدقاتٍ مُتتالية؛ وكأنها تعلنُ الاستسلام لمن سيملُك ذاكَ الوتين)
((وقامت وتين تصلي ركعتين قيام ودعت ربنا بالزوج الصالح وإن ربنا يجبر بخاطرها))
يا ترىٰ ايه هي خطة عمر، وهل أسر هيقدر يطبق الخطة ولا ايه اللي هيحصل؟؟
