#البارت_الخامس.
#أحببتُ_قلبًا_بالحلالِ.
-أسر:- قبل ما حضرتك تبهدلني، والله بنت حضرتك قامت بالواجب ولو حضرتك عايز تكمل أتفضل معنديش مانع دا حقكم بس أنا غلطت وبعتذر لحضرتك، أنا طالب إيد آنسة وتين يا عمي، من فضلك سيبلي فُرصة واحدة.
-الحاج محمد:- أنا مبسوط بصراحتك يا أسر يا ابني وحد غيرك مكنش هيفكر إنه يعمل اللي أنت عملته دا، لكن ميمنعش إني أعاتبك عالغلط، ومش هقولك غير كلمة واحدة كله إلا وتين بنتي يا أسر كله إلا هي، وتين خط أحمر.
-أسر بوعد:- بوعدك يا عمي هتفضل خط أحمر وأوعدك هحافظ عليها من نفسي.
-الحاج محمد بسعادة من ذاك الشاب:- بتمنى يا ابني.
-أسر بأمل:- يعني أجي أطلب إيد وتين يا عمي، ق ق قصدي إيد آنسة وتين.
-الحاج محمد:- تنورنا يا أسر يا ابني.
-أسر بسعادة بالغة:- ربنا يباركلك يا حاج، ربنا يباركلك يا حاااج، ربنا يجبر بخاطرك يا حاج والنعمة أنت حمىٰ سُكرة وأنا حبيتك.
-الحاج محمد بضحك:- شكلك بكاش زي وتين.
-أسر بفرحة وضحك:- أنا مش بكاش والله لكن لو وتين بكاشة فأعتبرني من هنا ورايح أكبر بكاش فيكِ يا أسكندرية.
( اتفق أسر مع الحاج محمد إنه هيجي يتقدم في وقت وتين تكون فيه برا البيت يعني من الآخر يطرقوها شوية علشان متطفش أسر من أول ما تقابله وانتهت مكالمة الحاج محمد مع أسر وكان أسر طاير من الفرحة وكإنه شوية هيقول للطيور أنا من فرحتي هطير زيكم، وعمر وسمر فرحانين من خطوة أسر الجريئة وأتفق عمر مع أسر وسمر إن سمر هتاخد وتين وتخترع أي حجة وتخرجها من البيت وفعلًا تمت الخطة بنجاح)
((باك))
-أسر بأمل:- طب حضرتك قولت ايه يا عمي، حضرتك موافق؟!
-الحاج محمد ببسمة صافية:- إن شاء الله خير يا أسر يا ابني وطبعًا الرأي في الأول وفي الآخر يرجع لوتين.
-أسر:- طبعًا يا عمي، بس بما إن حضرتك بتقولي يا ابني فأكيد معتبريني ابنك وابنك هيطلب منك طلب صغير ممكن حضرتك تحاول تهدي آنسة وتين من ناحيتي علشان الأمور تتيسر.
-الحاج محمد بموافقة:- إن شاء الله يا ابني.
(وتين رجعت البيت وعمالة تتطبل على باب الشقة، ومامتها فتحتلها)
-وتين بصوت عالي:- يا أهل الدار أنا جعااااانة هموت وأكل يا ماما أنا جعانة.
-زينب برقتلها وبصوت واطي:- بس يا بنت المفاجيع عندنا ضيوف فضحتينا.
-وتين بصدمة:- ضيوف!! دا وقت غدا يا ماما، بصي أنا مش داخلة عندهم أنا رايحة أكل والنعمة أنا هفتانة
-زينب بنرفزة:- أقسم بالله لو ما دخلتي تلبسي وتظبطي نفسك كدا وتدخلي باحترام عند الضيوف هخلي أبوكي يبهدلك.
-وتين بطاعة لكلام والدتها:- حاضر يا ماما داخلة أهو.
(لبست ودخلت عند الضيوف ومعاها صنية الشاي.)
-وتين بأدب وهي بتحط الصنية:- السلام عليكم.
-الجميع:- وعليكم السلام.
(-وتين بتبص على الضيوف اتفاجأت بأسر)
وتين لأسر:- أنت بتعمل ايه هنا، أنت مهدتش بعد القلم اللي أخدته، شكلك عايز بابا يبهدلك.
-وتين لوالدها:- بابا هو دا اللي حكيتلك عليه هو دا الواد الملزق يا بابا.
-الحاج محمد:- وتين عيب كدا، الراجل محترم وغرضه شريف وكلمني وأعتذر عن اللي عمله وجاي يتقدملك.
-وتين بزعل:- بس يا بابا أنا
-الحاج محمد قاطعها:- مبسش يا وتين، أقعدي معاه يا حبيبتي ولو أرتحتوا لبعض فعلى بركة الله ولو مرتحتوش يبقى مفيش نصيب.
-وتين بخضوع:- حاضر يا بابا.
-الحاج محمد:- قوم يا مصطفى يا ابني ونسيبهم مع بعض شوية.
-أسر بحب:- أزيك يا وتين.
