#البارت_التاني.
#أحببتُ_قلبًا_بالحلالِ.
-عمر:- خد عندك يا صاحبي والخطة هي( هتروح وراها وتوصل لحد ما تدخل باب قاعة المحاضرة بتاعتها، وأحضر معاها شوف طريقتها مع الدكاترة وزمايلها وهل هي من النوع النحنوح ولا قطة بتخربش من اللي بيقربلها (وغمزله وضحك)، المهم يا أسورة حاول تفتح معاها حوار مرة واتنين وتلاتة ونشوف هتوصل لإيه وبعدها نحط خطة جديدة اتفقنا يا مان!)
-أسر بإندهاش من تفكير صاحبه:- دا أنت شيطان يا راجل، دا إبليس يقولك يا سيدي.
-عمر بضحك:- كله من تربيتك والله يا صاحبي.
-أسر:- أنت ياض ايه شغل المراهقين دا؟!
-عمر:- هو في دكتور محترم بيقول ياض!!
(عمر بيلف يشوف أسر ملقهوش)، هو الواد فص ملح وداب ولا إيه.
( أسر راح ورا وتين زي ما الكتاب قال(عمر يعني)، دخلوا المحاضرة وعرف إنها في تانية آداب، وبعد المحاضرة سمع طالب بيقول لزميله:- أنا هاخد المحاضرة من وتين لإنها بتكتبها بشكل جميل أوعى كدا، أسر أخد باله إن الطالب رايح ناحية صاحبة البوك(وتين))
-أسر في نفسه:- دي أسمها وتين، هي الصاروخ دي أسمها وتين، وتين يعني شريان في القلب، قريب يا وتين هتبقي مش مجرد شريان في قلبي، لاء دا أنتِ هتبقي قلبي كله
-أسر:- آنسة وتين.
-وتين:- أفندم!
-أسر:- مش فاكراني، أنا أسر اللي عطالك البوك فاكرة؟!
-وتين:- اه أفتكرت حضرتك، عن إذنك متأخرة يلا يا سمر.
-أسر:- وتين ق ق قصدي آنسة وتين.
-وتين:- نعم!! حضرتك لو محتاج حاجة أطلبها من الشباب عن إذنك وياريت متناديش تاني.
-سمر:- يا دبلة الخطوبة عقبالنا كلنا تيرارارا.
-وتين:- بس يا سمر بطلي هبل، الواد دا أنا مش مرتحاله.
-سمر:- تعالي يا وتين نشرب عصير مانجا ونقعد نرتاح شوية ونتكلم.
(وطبعًا أسر قابل عمر وراحوا ورا البنات وقاعدوا في الترابيزة اللي وراهم).
-عمر:- إيه يا مان المزاميز دول!
-أسر باستغراب:- مزاميز؟!
-عمر بضحك:- أه مزاميز جمع مزموزة
-أسر بنرفزة:- عمررر مش ناقصك أتنيل أسكت.
-عمر:- شكل القطة بتخربش.
-أسر بنفاذ صبر:- بتخربش جامد يلا، دا أنا حاسس إنها هتبلعني.
-عمر:- طب والصاروخ اللي جنبها بتهبش ولا قطة مغمضة.
-أسر:- يا شيخ هو أنا ناقصك.
(عند وتين وسمر)
-سمر:- تينو.
-وتين:- يا نعم!
-سمر:- قوليلي يا وتين هي إيه مواصفات فتى أحلامك؟
-وتين:- هي الحلوة جيبالي عريس ابن حلال ولا هنفضل عوانس؟
-سمر:- هنفضل عوانس يا تينو هههههههههه
-وتين:- سمر قومي هاتي العصير.
-سمر:- قايمة متزوقيش ألاااه.
(قامت سمر وفتحت وتين الفون وشافت قدامها جملة(بدايةً كيف تُريديه؟)).
بدأت وتين تكتب مواصفات فتى أحلامها في النوتة بتاعتها)
بدايةً كيف تريديه؟
فأنا أريدَهُ أن يكون محمديًا في صفاتهِ، عسلًا في كلامهِ ورقيقًا في احتوائهِ، إذا أصابني المشيب يُغازلني وكأني معشوقته، وإذا أصابني المرض يقولُ لي:"أيا محبوبتي ياليت مرضك ينتابني وتَعُودِي كفراشةٍ في منزلي" فيا الله على غزله فكيف يكون كلامه في تمامِ عفيتي؟ أريده كيوسف إذا جاءته إحداهن قال:معاذ الله، أريده أبّاً وليس زوج أريده أن يجعل عبادَتُنَا عادَتُنَا وأن يُوقظني فجرًا يُغازِلُني عِشقًا قائلًا: "فوربي ما رأيتُ ملاكًا نائمًا سواكِ؛ فاستيقظي لترضِ مولاكِ".
(أسر كل دا ملاحظ أنشغال وتين ومركز مع كل حركة بتعملها رجعت سمر وأخدت وتين وقاموا؛ لكن من حُسن حظ أسر النوتة بتاعت وتين وقعت منها.)
أسر قام بسرعة وجاب النوتة وكان هينادي على وتين إلا إن راس الحية عمر صاحب الخطط الشيطانية قاله:-
-عمر:- حااسب هتعمل إيه يا مان، دي فرصة تخليك تعرف عنها كل حاجة.
-أسر:- فكرة برضو هطير أنا يا برنس.
-عمر:- أه يا ابن اللظينة أخدت اللي عايزه وخلعت، يلا أنا كمان هخلع.
(أسر قاعد في أوضته وبدأ يتفرج على النوتة بتاعت وتينُه، وتين كانت لازقة صورتين ليها في النوتة ورسمة وحاطة حاجات مُبهجة، فضل يقرأ كتابتها ومع كل جملة بيقرأها كان بيتعلق بوتين أكتر، لحد ما وصل لأخر حاجة كتبتها وتين وهي بداية كيف تريديه؟ عاش مع خياله لمدة لحظات لحد ما قطع خياله خبط على الباب)
-سامية:- أسر يا ابني مالك سرحان في إيه
-أسر:- مش أنتِ نفسك تفرحي بيا يا سوسو؟
-سامية:- طبعًا يا ابني دا يوم المُنى لما أقابل مرات ابني اللي خلت القلب يحن واللي خلت دكتور أسر يتجن.
-أسر:- إيه يا حاجة الكلام الكبير دا، بُصي يا أمي (وحكالها كل حاجة عن وتين).
-سامية:- من كام كلمة حبيتها يا أسر!
-أسر:- الحب مش بإيدي يا أمي وهي تستاهل قلبي، وأنا عايزها ملكي، قولتي إيه يا ست الكل.
-سامية:- اللي تشوفه يا ابني خد ميعاد مع والدها ونروح نطلبها.
-أسر حضن مامته جامد:- ماما أنا بحبها أوي.
-سامية:- يا عيني عليك يا قلب أمك دا أنت مدلوق على الآخر
-أسر:- يا ست الكل هتشوفي اللي دلقتني وهتقولي الواد أدلق دلقة صح.
-سامية:- روح يا أسر يا ابن بطني يارب تكون دلقتك دلقة خير وتكون وتين نصيبك وست بيتك.
-أسر:- اللهم آمين يا ست الكل.
-سامية:- يلا يا ابني قوم كُل، أنت أكيد جعان.
-أسر:- أنا جعان نوم يا أمي، تصبحي على خير يا ست الكل.
-سامية:- وأنت من أهل الخير يا نور عيني.
___________________________________________
(في بيت وتين)
-وتين بطريقة طفولية:- النوتة راحت فين، هعيط يا ناس النوتة اتسرقت سرقوا النوتة بتاعتي ولاد الحرامية.
-مصطفى:- هي كنز يا وتين في داهية يا بنتي.
-وتين:- أنا عارفة مين اللي أخدها، أكيد دول أعداء النجاح، ولاد اللظينة يسرقوا النوتة أم عشرين جنيه ولاد ستين في سبعين.
(وبدأت وتين تعيط يا ماما سرقوا النوتة بتاعتي يا ماما)
-زينب:- وتين أمشي من وشي السعادي، البنات اللي في سنك شايلين عيل واتنين وتلاتة وأنتِ يا خيبتها لا محصلة العيل ولا محصلة أبوه، موكوسة فالحة تعيطيلي على نوتة، وعلى كيس شيبسي أخوكي أخده وعلى مصاصة ضاعت منك، أنتِ مفيش منك فايدة عيلة فقر بصحيح.
وتين باستغراب وضحك:- ألا صحيح يا ماما هما اللي بيشيلوا عيل واتنين وتلاتة بيشلوا كل دول إزاي، بيركبوا إيد صناعية ولا إيه نيهاهاهاهااااااي
(وهربت وتين على أوضتها تفكر في كلام مامتها وكالعادة فضلت تدعي ربنا بالزوج الصالح وإنها تجيب عيل واتنين وتلاتة).
_________________________________________
(في اليوم التاني قبل ما وتين تنزل الكلية)
-زينب:- روحي يا وتين يا بنت بطني إلهي ربنا يوعدك بدكتور ابن حلال يسعدك ويهنيكي.
-وتين:- حساكي قلبتي مامت نجيبة في( الثلاثة يشتغلونها)
-زينب:- أمشي يا وتين روحي الكلية بدل ما نتخانق عالصبح
(وصلت وتين الجامعة وقابلت سمر، وكان موجود أسر وعمر)
-عمر:- الموزة وصلت يا برنس.
-أسر:- أنت يالا لم لسانك دي تبقى مرات أخوك
-عمر:- واللي جنبها مراتي بإذن الله، يلا على بركة الله عروسة ومعاها واحدة هدية
-أسر ضحك على كلام عمر وقال:- عمر هروح أطبق الخطة يمكن الخطة دي تنجح مش زي اللي قبلها
(عمر لسه هيتكلم لاقى أسر مشىٰ)
-أسر:- وتين وتين
-وتين:- أفندم!!
-أسر:- م م ما
-سمر:- ايه يا حضرت هتمأمأ كتير ولا أيه
-أسر:- أحم، لا قصدي أه بصي لاء خلاص مع السلامة
-سمر:- إيه البلاوي اللي بتتحدف علينا دي يارب
-وتين:- ما كان عاجبك يا سمر هانم
-سمر:- ياختي دي الوجوه خداعة الواد وسيم وموز وحليوة لكن في جزمة قاعدة في دماغه
-وتين بضحك على كلام سمر:- جزمة بس! دا محل جزم بحاله قاعد في دماغه
(عند أسر وعمر)
-عمر:- إيه الأخبار الصنارة غمزت؟
-أسر:- أتنيل يا عمر ولا غمزت ولا ضحكت ولا اتنيلت خالص
-عمر:- عادي يا مان، يلا بينا ندخل على خطة اتنين
-أسر:- عمر أنا مش ناقص خططك اللي مودياني في داهية، أنا قولتلكم مش بعرف أتعامل مع البنات محدش مصدقني وأتنيلت حبيت ومش عارف أقولها كلمة واحدة حتىٰ
-عمر:- بقولك إيه يا أسر ما تروح كدا أتصرف بطريقتك بلاش خطط ووريني هتعمل إيه أنت راجل يلا وهتعرف تكلمها أنجز كدا وأتقل بلاش النحنة بتاعتك يا... دكتور(وغمزله)
-كلام عمر أثر في أسر:- شوف بقا صاحبك هيعمل إيه يا عمر.
(أسر راح ورا وتين ونادى عليها)
-أسر:- وتين وتين
-وتين:- نعم! هو أنت حرامي يا ابني، في ايه ماشي ورايا كدا ليه( ومشت وسابته)
(أسر جرى وراها وبينادي عليها ووتين مردتش عليه فاضطر يمسك إيديها)
(وفجأة وبدون مقدمات وتين ضربت أسر بالقلم)
