البارت التالت 
وهتقوليلهم ايه لما يسألوكِ عن سبب الطلاق!!؟
-متقلقش،هقول إن انا وانت متفقناش مع بعض.
-وانتِ
-انا ايه!!؟
-قد قرارك!!؟
-ايوا،وياريت تطلقنى دلوقت.
-اخد نفس طويل وبصلى وفضل ساكت شويه.
-انتِ طالق.
كنت بدعى جوايا إن هو يتمسك بيا وميقولهاش،لكن انا دايما بوهم نفسى.
مشيت بسرعه من قدامه دخلت اوضتى حضرت هدومى فى الشنطه وانا بعيط،خرجت بعد ما خلصت لاقيته لسه قاعد بصيتله لآخر مره ومشيت لكن نظرته ليا كانت غريبه اوى،نظره انا اول مره اشوفها،نظره ندم.
عدى شهور قليله على طلاقنا وانا ولا بشوفه ولا اعرف عنه اى حاجه،الفتره اللى عدت كان من أصعب الفترات اللى مريت بيها،كنت دايما فى اوضتى نايمه وبعيط ومنعزله عن العالم،لما عيلتى عرفوا زعلوا جدا وسألوا عن سبب الطلاق لكن انا متكلمتش،مكنش عندى طاقه للكلام اصلا.
كنت بروح الجامعه خلال الفتره دى،لكن الغريبه إن هو مبيحضر،مهتمتش اعرف حاجه عنه ولا اعرف سبب غيابه.
كنت خارجه من المحاضره لاقيت مالك ابن عمى بيكلمنى وبيقولى إن ماليكه أخته بتولد مكملتش بقيت المحاضرات و روحتلهم المستشفى،ماشاء الله العيله كلها كانت موجوده لكن الحمد لله إن هو مكنش موجود.
ماليكه خرجت والبيبى راح الحضانه،اتطمنت عليها و روحت اشوف البيبى،وقفت عند الباب الازاز اللى فى الحضانه لان مينفعش ادخل،فضلت واقفه كتير اوى لان انا بصراحه بحب الاطفال،قلبى دق بسرعه لما شميت ريحه البيرفيوم بتاعته قريبه منى.
بصيتله وضربات قلبى زادت اكتر،حاولت انسي كل اللى حصل بينا واتعامل معاه على إن هو ابن عمى وبس،هو واحشنى اوى،انا عارفه إن مش من حقى اقول كدا لكن بجد هو واحشنى.
-كنت عارف إن انا هلاقيكِ هنا.
-وبعد ما تلاقينى!!؟
-كنت عايز اقولك وحشتينى.
بصيت حواليا لأنى افتكر أن هو بيكلم واحده تانيه.
-انت بتكلمنى انا!!؟
-مفيش غيرنا فى المكان.
-بص على ايدى كدا،مفيهاش دبله صح!!؟وكمان احنا متطلقين ولا نسيت!!؟
-كُنا متطلقين.
-يعنى ايه كُنا!!؟
-يعنى انا رديتك تانى وانتِ دلوقت مراتى.
-ايه اللى انت بتقوله دا!!؟
-اهدى وانا هفهمك كل حاجه
--افهم ايه!!؟انت اتجننت!!؟ازاى تقرر حاجه زى دى ما تغير ما اعرف!!؟
-صوتك ميعلاش،واتكلمى بإسلوب احسن من كدا.
--انت عارف انت عمل ايه!!؟
-عملت اللى كان لازم يتعمل من الاول يا آيه.
-مكنش ينفعش نكون لبعض من البدايه اصلا،انا استحملت كتير اوى،استحمل برودك واهمالك ليا،استحملت وجع مفيش واحده تانيه تقدر تستحمله،استحمل إن اشوف جوزى بيفكر فى واحده تانيه واسكت واقول بكرا ينسى،وفعلا نسيت لكن نسيتنى انا ومنستهاش هى.
قولى بعد كل دا ينفع نرجع!!؟صدقنى مش هينفع،مش هينفع.
مشيت من قدامه لكن هو مسك ايدى.
-عارف إن انا غلطت فى حقك كتير اوى،وعارف إن انا اذيتك كتير،لكن والله عرفت قيمتك بعد ما مشيتى،عرفت يعنى ايه معنى وجودك في حياتي.
عيونى دمعت.
-عرفت قيمتى دلوقت!!؟عرفت إن مفيش واحده بتحبك ولا هتحبك قدى!!؟.
-عرفت وندمت صدقينى.
بعدت أيده عنى.
-روحلها يا أدم وابعد عنى،روحلها وشوف حياتك وانسانى زى ما انا نسيتك وسينى انا كمان اشوف حياتى.
قرب منى خطوه.
-نستينى!!؟لو نستينى ليه الدموع دى!!؟انتِ فعلا لو نستينى كنت انا نسيت.
-صدقنى مبقاش ينفع،انا مبقتش عايزاك ولا عايزه اى رابط يكون بينا.
-يعنى ايه!!؟
--يعنى تطلقنى يا أدم،تطلقنى وتبعد عنى.
-مقدرش.
-لا تقدر،افتكر كلامك ليا وانت تعرف انك تقدر،فاكر كلامك ليا ولا نسيته!!؟فاكر لما قولتلى متنسيش إن انا متجوزك غصب عنى،ومتنسبش كمان إن انا مبحبكيش!!؟
فاكر صح!!؟.
غمض عيونه ولف وشه الجمب التانى.
-هستنى ورقة الطلاق توصلى يا دكتور.
مشيت من قدامه ومن المستشفى كلها وسيبته واقف مكانه،مشيت ولاول مره احس إن انا انتصر عليه واخدت جزء بسيط من حقى،ايوا انا لسه بحبه وفرحت لما قالى إن انا لسه مراته لكن دى ميمنعش إن انا هقبل ارجعله تانى.انا وأدم مش هننفع نعيش مع بعض تانى.
