رواية يا كابتن يا كابتن..، انت يا عسل الفصل الثاني
واقفين كدا ليه علي السلم؟
=دكتور أدهم
-بلاش دكتور دي احنا مش في الجامعة وكمان الفرق بينا مش كتير
=حاضر
-انت واقف كدا ليه يا حازم
-مفيش لسه جاي من الدرس وطالع اهو
=درس؟ انت في سنة كام
-انا في ثالثة ثانوي،كنت فاكراني قد ايه
=الطول دا كله وفي ثانوي
-انتي اللي قصيرة يا اوزعة
=انا اللي قصيرة ولا انت اللي عامل زي النخلة وعلي فكرا انا طلعت اكبر منك والمفروض تحترمني
-احترمك ليه شوفي فرق الطول اللي بينا
-طب طلعوني وبعدها اتخانقوا براحتكوا
وسعنا له وطلع وانا كنت سرحانة فيه وهو طالع
-عاجبك
=اه جدا
-بتحبيه؟اجوزهولك
=ياريت
فوقت من سرحاني علي صوت حازم وهو بيضحك بصوت عالي،حسبي الله،سبته وطلعت اجري علي السلم وهو بيقولي هقوله وانا شكلي بقا وحش اوي.
عدي فترة وانا حازم بقينا اصحاب وناقر ونقير في نفس الوقت،ولو طلب مني حاجة وانا رفضت بيهددني ويقولي هروح اقول ل أدهم انك بتحبيه وبوافق في الاخر،وأدهم بقينا اصحاب نوعا ما لو عوزت حاجة مش فاهماها بروحله وبيشرحهالي.
=ممكن تقوم لو سمحت دا مكاني
-اقوم ليه انا مش شايف اسمك مكتوب عليه
=بس انا كنت قاعدة هنا ودي شنطتي اهي
-خلاص يا شهد تعالي نقعد في مكان تاني
-اسمعي كلام صاحبتك وروحي اقعدي في مكان تاني
كنت لسه هتكلم لقيت دكتور أدهم دخل
=لو سمحت يا دكتور ممكن تخليه يقعد في مكان تاني عشان دا مكاني
-ما تقعدي في اي مكان يا آنسة احنا مش في حضانة هنا
خدت حاجتي وروحت قعدت في مكان تاني وانا حابسة دموعي بعد ما زعقلي قدام المدرج كله، كنت في الكلية وبعدين سبت حاجتي وشنطتي وقومت اجيب حاجة،رجعت لقيت شاب قاعد مكاني ومش عايز يقوم،المكان دا بقعد فيه علي طول ومش بحب اغيره لو غيرته ببقا متوترة ومش بفهم الشرح،قعدت وانا طول المحاضرة حاطة راسي في الكشكول ومش عايزة ارفعها، المحاضرة خلصت وكنت اول واحدة خارجة من المدرج.
-خلاص يا شهد معلش بقا
=طب هو بيزعقلي ليه انا مش غلطانة في حاجة
-ممكن اقعد
كان الشاب اللي قعد مكاني دا جه،اتكلمت بسخرية
=عايز ايه بعد ما الدكتور زعقلي قدام الكل
-حقك عليا مكنتش اعرف اللي انتي هتقوليله كنت فاكرك هتروحي تقعدي في مكان تاني
-هي بتحب تقعد في المكان دا عشان متعودة عليه
=هو لازم يعتذرلي عشان انا مش غلطانة
-انا اسف والله مكانش قصدي
=انا قصدي علي الدكتور مش انت
-يعني سامحتيني
أدهم كان ماشي من قصادنا وبصلي
ابتسمت=خلاص سامحتك
-يعني بقينا اصحاب خلاص
=اصحاب ليه انا بقولك سامحتك مش بقينا اصحاب
-الصراحة انا لسه منقول جديد هنا ومعرفش حد غيركوا
=خلاص تمام،انا شهد
-وانا مي
-وانا محمد
اتعرفنا علي محمد شوية والمحاضرة بدأت،خلصنا محاضرات وروحت،وانا داخلة العمارة حازم ندهلي
-شهد
=نعم
-كنت..،ايه دا مال عينك انتي معيطة؟
=لا مفيش حاجة،كنت عايز ايه
-كنت عايزك تشرحيلي حاجة في التاريخ
=مليش دعوة خلي اخوك يشرحهالك
-بس اخويا مكانش ادبي كان علمي علوم
-واقفين كدا ليه
=انا هطلع يا حازم وهكلمك بعدين
-هي مالها دي
-شهد
=نعم يا دكتور أدهم
-قولتلك بلاش دكتور دي..،انا اسف علي اللي حصل النهاردة بس انا كنت مضغوط شوية
=محصلش حاجة عن اذنك
هو فاكر انه لما يعتذر خلاص كدا،انا بكره حد يزعقلي او يعلي صوته عليا كان ممكن يطردني بس ميزعقليش قدام حد، قعدت فترة بتجاهله وبتعامل ببرود لحد ما حازم صالحنا علي بعض
=اتفضل
-ايه دا
=اشرحلي المحاضرة اللي زعقتلي فيها
-انتي مش كنتي موجودة؟
=كنت موجودة بس كنت ساعتها بعيط مش مركزة
-خلاص بقا قولتلك انا اسف
=هو انا قولت حاجة؟ انا بقولك اشرحلي
-هاتي
كان بيشرحلي والصراحة مكنتش مركزة غير فيه وفي شعره اللي واقع علي عنيه وعنده غمازتين بيظهروا وهو بيتكلم..فوقت من تخيلاتي علي صوته
-شهد فاهمة اللي بشرحه
=هااا
-هااا ايه بقولك فهمتي
=اه اه فهمت طبعا
-طب قوليلي انتي فهمتي ايه
=تعرف ان حسب المادة 395 انك لو بتحب حد ممكن تخطفه لمدة 72 ساعة والقانون هيجوزهولك
-دا اللي انا شرحته؟
=لا دا جدعنة مني،يعني انا من حقي اخطفك دلوقتي
-ايه
=ايه..،بص هات الكتب دي وانا فهمت الحمدلله سلام
خدت الكتب وطرت علي شقتنا،انا كان فاضلي شوية واتقدمله للجواز،ايه قلة الكرامة اللي عندي دي.
-بتعملي ايه
=نايمة وانت جيت صحتني من النوم عايز ايه
-انتي نايمة وأدهم تحت بيعملكوا امتحان مفاجي
=احلف
-انا حذرتك وخلاص وخليكي فاكرة انك هتشرحيلي تاريخ
=يا عم غور بقا انت والتاريخ بتاعك دا، كرهتني في محمد علي وعياله وبعدين اخوك هيسقطني وانت بتقولي تاريخ فين الدم؟
-اومال انا جاي اعمل ايه؟ما انا جاي اقولك ذاكري عشان ميتعلمش عليكي
=تصدق انا اللي هعلم عليك لو مامشتش من هنا امشي يالاااا
تبقا في حالك نايم لا بيك ولا عليك وفجأة يتقالك انك بيتعملك امتحان في الكلية،وبعدين النهاردة الجمعة أدهم دا مش بيستريح،انا لازم اعرف ايه هو الامتحان يا اما هسقط.
غسلت وشي وفوقت وفطرت وبعدين نزلت عندهم خبطت وطنط هي اللي فتحتلي،هي بتحبني وبتعتبريني زي بنتها
=ازيك يا سوسو عاملة ايه
-الحمدلله يا حبيبتي
=دايما يارب، اومال فين أدهم
-جوا في اوضته ادخلي
=تمام
دخلت وخبطت عليه،وهو فتحلي
-شهد في حاجة ولا ايه
=سوسو عايزاك
-سوسو مين
=قصدي طنط سعاد عايزاك
-طيب انا هروح اشوفها عايزة ايه
خرج وانا دخلت اوضته،لقيت اوراق كتير علي مكتبه ومش فاهمة حاجة فيها لدرجتي انا معرفش حاجة في الكلية...
-بتعملي ايه
اتخضيت=انا ب ب بعمل....
كان بيقرب مني وانا برجع لوراء
-مش عيب تضحكي عليا وتقوليلي سوسو عايزاك ومتطلعش عايزاني
=سوسو مين
-طنط سعاد
=طب مش عيب تقول علي ماما سوسو
-وانتي مش عيب تفتشي في حاجة مش بتاعتك
بيقدم عليا وانا برجع
=بس انا مش بفتش
-اومال بتعملي ايه
=خلاص استني وانا هقولك
-طب ما تقولي هو انا ماسكك
=ما انت م....
-انا موترك اوي كدا
=دا انت ملخبطني وموترني
-للدرجادي
اهدي يا شهد انتي كدا هتعترفي وناقص بس تقولي بحبك
=الصراحة حازم قالي اللي انت عاملنا امتحان مفاجئ
-عشان كدا طالعة تقولي كلم سوسو وتطلع مش عايزاني وبتفتشي في الورق
=انا ملحقتش افتش حاجة وحتي اسأل الورق يعني حتي لو كتبت الامتحان فا انا مشوفتش حاجة صدقني
-طيب وانتي خايفة ليه لو عملت امتحان
اتكلمت بثقة=مين دي اللي تخاف لا وكمان من امتحان توء توء مش انا اللي تخاف
-طب اعملي حسابك بقا ان في امتحان علي اللي خدتيه من اول الترم لحد اخر محاضرة
هعيط=لا والنبي انا كنت بهزر
-وانا مش بهزر ممكن تخرجي بقا عشان اشوف شغلي
خرجت من اوضته ومن الشقة كلها وعايزة اعيط،قابلت حازم في وشي
-ايه دا كنتي عندنا
اتكلمت بتهديد=شوف يا حازم لو الامتحان جه مش حلو انسي ان انا اذاكرلك تاريخ تاني اشطاا
-الله وانا مالي يا لمبي
=هو كدا
ايوا عشان يبقا عدل ربنا مش هو يسقطني ومن الناحية التانية اذاكر ل اخوه.
عدي يومين محصلش فيهم حاجة غير اللي انا مش عارفة اذاكر حاجة في مادته ولا في اي مادة الصراحة،روحت الكلية وقولت ل مي ومحمد،مي مذاكرة شوية ومحمد مذاكر كله،صحابي حلوين اهو وبيذاكروا اومال انا فاشلة لمين،اتفقنا نقعد جمب بعض ويغششوني والصراحة اعتمدت عليهم،أدهم دخل
-انا عاملكوا النهاردة امتحان
اول ما قال كدا القاعة كلها اتكلمت ب لا ومحدش قالنا،ما هو بردوا كان لازم يقول
زعق-ششش سكوت انا عامل الامتحان دا عشان اشوف بتفهموا من شرحي ولا لا واحتمال يضاف في درجات اعمال السنة
بدأ يوزع الورق،وهو بيديني الورقة كان في عنيه نظرة خبث او تحدي مش عارفة اميزها بالظبط،اول ما بصيت في الورقة
بدل ماتدور وتبحث علي الروايات خليها علي تليفونك وحمل تطبيقنا
