رواية تهاني الفصل العشرون 20 بقلم تانيا محسن

 رواية تهاني الفصل العشرون 20 بقلم تانيا محسن 

"تهاني" 

قصة:- تانيا محسن .

#عاطفي #كوميدي

20- حالة رعب . . .

- وفي نفس اليوم بالمساء...

'فاطمة' قاعده في اوضتها! وهي بتفكر بطريقة تساعد ابنها 'محمود'، ازاي يتقرب من 'تهاني'، ويتخلص من سوء الفهم الحاصل بينه وبين 'تهاني'، بسبب فتنة عمته 'بدرية'، اللي بنيتها بينهم!... 

نادت 'فاطمة' على 'هناء'، وهي مشغولة في المطبخ تجهز العشاء.. 

'فاطمة' : - يا 'هناء'!.

'هناء' - بصوت عالي - : - ايوا يا ماما عايزه اية؟!.

'فاطمة' : - 'هناء' سيبي اللي في ايدك وتعالي!. 

دخلت 'هناء' اوضته مامتها، وهي بتمسح ايدها بفوطة.. 

'هناء' : - ايوا يا ماما! عايزه ايه!!..

'فاطمة' :- 'هناء' ! رني ل'تهاني' واطلبي منها تجي هنا حالاً!..

'هناء' - باستغراب - :- عاوزه منها ايه!.

'فاطمة' :- عايزه تبطل خوف! وتكون تيجي تزورنا في اي وقت!..

'هناء' :- وهنقول ايه ل 'محمود'!!.. دا لوشافها هنا!.. ممكن يزعل قوي، ويعمل لنا احراج معاها..

'فاطمة' :-يا خبتي فيكي!! المفروض انك اكثر واحدة مقربة منه وفاهمة هو عايز ايه؟

'هناء' :- تقصدي ايه؟!..

'فاطمة' :- انا الصبح زعلت منك قوي!.. وانتي بتهجمي على 'محمود' ، بدون ما تحاولي تساعديه وتفهميه هو بيلف وبيدورعلى ايه؟!..

'هناء' :- اساعده!! يعني انتي عايزه مني اوقف جنب 'محمود' ضد 'تهاني' !!!..

'فاطمة' - بفزع - : - يا لهوي! هو أنتي عايزه تخربيها فوق ما هي خربانة!! بالعكس اخوك كان عايز منك تساعديه يقرب من 'تهاني'، وأنتي استعجلتي بتسرعك وحكمتي عليه، قبل ما تفهمي هو عايز منك ايه!!!... 

حاولت 'هناء' تستوعب كلام 'فاطمة' الغريب!.. لكنها! انفجرت تضحك من النكتة!!.. 

'هناء' : -  هههه دا اللي أنتي بتفكري فيه من سابع المستحيلات!! هههههه...

'فاطمة' - بحده - : - 'هناء'! بطلي ضحك و اسمعيني!! انا بقول لك حقيقة مشاعر اخوكي 'محمود'، اللي أنتي ما قدرتيش تفهميها!.. اخوك 'محمود' طيب وميال ليها! و'تهاني' طيبه وتستاهل راجل طيب زي اخوكي!..

'هناء' : - طيب وافرضي لو انا صدقت بكلامك! وطلبت من 'تهاني' تجي! وهي جت هنا وشافها 'محمود'!! وقام يبهذِلها قدامنا!  انتي هتعملي ايه! و ازاي 'تهاني' هتسامحنا بعد الموقف ده!!..

'فاطمة' : - أنتي بس اطلبي 'تهاني'، وخليها تجي هنا! وانتي هتتأكدي من صحة كلامي!.. ولو زعل 'محمود' من زيارتها! فهو مش هيقدر يتجرأ! و ينطق بكلمة! وهي قاعده جنبي!!.. يلا روحي وهاتي موبايلك...

   # * # * # * # * # 

- وفي نفس الوقت...

و'تهاني' نايمة على الكنيه قدام الشاشة، ومنسجمه مع فيلم رومانسي قديم، بالأبيض والاسود... 

رن موبايلها، فاخذت موبايلها من فوق الطرابيزة، وشافت اسم 'هناء'...

خافت 'تهاني' من الاتصال، لو تطلب منها زيارتها!!...

'تهاني' - بقلق - : - الو! اهلاً 'هناء '!!.. 

'فاطمة' : - لا  انا مش 'هناء'! انا والدتها! ازيك حبيبتي!؟.

'تهاني' : - الحمدلله انا كويسة! اخبارك ايه يا خالتي!!..

'فاطمة' : - الحمدلله! بتعملي ايه عندك!!..

'تهاني' : - قاعده بتفرج على فيلم!..

'فاطمة' : - طب ممكن تقفلي الشاشة، وتجي عندي دلوقتي!!..

خافت 'تهاني' من الدعوة وسكتت...

'تهاني' - لنفسها - " ايوا اهو ده اللي كنت خايفه منه !! " ... 

من سكوت 'تهاني' فهمت 'فاطمة' ترددها في قبول دعوتها من الخوف!!..

'فاطمة' : - أرجوكي يا بنتي ما ترفضيش طلبي!!..

'تهاني' - بخوف - : - طلبك على عيني و راسي! لكن انا مش عاوزه انطرد وأتبهدل! كفاية اللي حصل لي مع ابنك واخت جوزك! سامحيني بقى يا خالتي! مش هقدر اجي ازورك! مش عاوزه اقابلهم!!..

'فاطمة' : - مش عايزه منك تخافي! هي عشر دقايق بس، وهترجعي تكملي تشوفي الفيلم!..

'تهاني' - باستسلام - :  حاضر يا خالتي! انا جايه... 

راحت 'تهاني' لاوضتها تلبس هدومها، وهي عايزه تبكي! - ولنفسها -  " يلا يا 'تهاني' استعدي للبهدله! دا مقدر ومكتوب!! " ... 

   # * # * # * # * # 

دخلت ' تهاني' شقة 'هناء' وقلبها بيدق بقوة! زي قوة طبل عملاق من شرق أسيا!!... 

لقت 'هناء' و'احمد' واقفين في الصالة!.. منتظرين وصولها، فسلمت عليهم، وراحت على اوضة 'فاطمة'... 

'فاطمة' - بابتسامة - : - اهلاً  يا حبيبتي! تعالي اقعدي هنا جنبي... 

قعدت 'تهاني' جنب 'فاطمة' على السرير، وهي قلقانه لو تجي 'بدرية' وتشوفها!!... 

'فاطمة' : - اسمعي يا بنتي! انا جبتك هنا، علشان ما تخديش خاطر مننا وتسيبينا!!..

'تهاني' : - وانا هروح فين يا خالتي! ما أنتوا بقيتوا زي اهلي بالضبط!! لكن المثل بيقول!!؟ و عنده حق! " ابعد عن الشر، وغني له! " ...

'فاطمة' - بضحك - : - هههه ما فيش شر ولا حاجة! أنا اوعدك يا بنتي، اني مش هسمح لاحد يقرب منك ويأذيكي!.. 

'تهاني' : - متشكره خالتي...

'فاطمة' : - طيب يا 'هناء'، قومي هاتي العشاء! 'تهاني' هتقعد معانا وتتعشى!... 

  - ومسكت 'فاطمة' ايد 'تهاني' قبل ما تهرب من دعوتها!!! -

'فاطمة' : - ما تخافيش! انا هكون جنبك لو واحد منهم جه وحاول يقرب منك!!..

قعدت 'تهاني' - ولنفسها -  " يا رب! لطفك! " ...

    # * # * # * # * # 

قربت 'هناء' العشاء في اوضة 'فاطمة'!.. وانذهلت 'تهاني' من أصناف الاكل الكثيرة اللي طبختها 'هناء'  وريحته الشهية... 

'تهاني' - ولنفسها -  " دلوقتي فهمت احساس المحكومين عليهم بالإعدام!  هم بيقدموا ليهم الوجبة الاخيرة!!!... مش عايزة أكُل! كل دقيقة بتمر بطني بتوجعني اكثر!! خايفه لما يجي عشماوي!.. قصدي 'بدرية'!! " ... 

قربت 'هناء' نفسها من ودن والدتها وهمست... 

'هناء' " ما ما! انا حاسة بتأنيب الضمير لو جرا ل 'تهاني' حاجة بسببنا!! " ...

'فاطمة' - مقاطعة - : - أسكتي! ما تخوفينيش اكثر! انا دلوقتي حاسة بندم لو ما طلعش اللي في بالي صح!! " ...

لمحت 'تهاني' الهمسات اللي بين 'هناء' و 'فاطمة'!!!...

'تهاني' - لنفسها -  " هما ما لهم خايفين كده! معقولة هما ناوين يسلموني للإعدام!!! " ... 

- و هما لسه مجتمعين بيتعشوا.. سمعوا صوت باب الشقة وهو بينفتح!

خافت 'تهاني' من صوت الباب، وبلعت لقمتها بسرعة، قبل ما تختنق من الخوف لو دخلت عليهم 'بدرية'!!..

لكن دخلت عليهم 'ايمي' وهي خايفة ومرعوبة! وعلى طول ارتمت في حضن والدتها، وانفجرت تبكي!...

'ايمي' : - هيء هيء! الحقيني يا ماما هيقتلني! الليلة انا هموت..

'هناء' - بفزع - : - هو مين اللي هيقتلك! في ايه!!.. 

'ايمي' : - خالي هو اللي هيقتلني! خاااالي!!!.

'تهاني' - بخوف - : - هو عرف اني جيت هنا!!.

'فاطمة' : - هاهاها، هو ما فيش معاه حد يقتله غيرك! اطمني! اليوم هو هيقتل 'ايمي'!.. 

دخل 'احمد' اوضة جدته.. وقطع عليهم الكلام بعد ما سمع صوت 'ايمي' العالي وهي بتبكي!!.. 

'احمد' - بقلق - : - يلا بسرعة قولي! ايه اللي انتي هببتيه! انطقي قبل ما يوصل هنا!!..

'ايمي' - وصوتها بيقطع - : - طيب اسمعوني.. اليوم العصر وانا خارجه، لقيت خالي خارج و ساب مفاتيح عربيته على الطرابيزة.. اخذت المفاتيح وقلت اخرج اتمشى شويه مع صاحباتي بعربيته، وارجع البيت قبل ما هو يرجع!..

'هناء' : - يا خبر! وايه اللي حصل! كملي!!.

'ايمي' : - واحنا راجعين خبطتنا عربية! سواق العربيه تعب وجاله هبوط، وما قدرش يسيطر على عربيته، فخبط بعربيه خالي! وتجمعوا علينا الناس، واسعفوه ولاد الحلال للمستشفى، واحنا رحنا معاهم! لكن السواق المسكين دخل في غيبوبة، فما قدرناش نتكلم معاه، يصلح لِنا العربية..

'هناء' : - يا مصيبتنا السودا! أنتي عارفه خالك ما بيحبش حد يلمس عربيته! فليه اخذتيها!.. دلوقتي هنعمل ايه! ازاي هنقدر نصلحها بسرعة قبل ما يجي 'محمود'!..

'فاطمة' : - وانتي ليه ما خرجتيش تتفسحي بعربية اخوكي!؟..

'ايمي' - بحده - : - ومن إمتى 'احمد' بيسمح لي اخذ عربيته!!؟..

'احمد' -  بسخريه - : - وهو انا مجنون علشان اخليها تسوق عربيتي!.

'ايمي' - بعصبية - : - شفتي يا تيته!! اهو أنتي سمعتي بودانك، ازاي هو بيرفض اخذ عربيته!!؟.. 

'هناء' - بتفكر - : - طب ازاي هيعرف 'محمود '، انك سبب خبطة عربيته! ليه ما يفكرش انه في واحد ماشي بعربيته، وخبط في عربيته، وهي واقفه مكانها في الموقف!!. واحنا هنقول له الحقيقة لما يهدا،  ونصلحها! فكرة كويسة، صح! انتوا معايا!!..

'ايمي' : - ماما!! صعب نخبي عليه الحقيقة!!! في المستشفى هم عملوا محضر بالحادثة، واكيد هيعملوا له استدعاء، لانها عربيته!!..

ولولت 'هناء' - بصوت عالي - : - يا ريتك اخذتي عربيتي! وما حصلش اللي حصل!!..

'ايمي' : - اسفه يا ماما! ما جاش في بالي اخذ عربيتك، لما شفت عربية خالي الغالية.. 

بتسمع 'تهاني' حوارهم، وبتتمنى لو تسيبهم وتجري لشقتها! لكن من الواجب تواسيهم دقايق قبل ما تستاذن وتمشي... 

مشي 'احمد' يتفرج من البلكونة، لقى خاله جنب العربيه، وبيلمس بأيده مكان الخبطه...

'احمد' - برعب - :- الحقي يا ماما!! خالي شاف الخبطه... ودلوقتي هو طالع يقتلنا!..

خافت 'تهاني' من كلامه وقامت بسرعة...

'تهاني' :- خلاص انا هروح، واسيبكم تتفاهموا مع بعض...

'هناء' :- لا لا خليك معانا...

'احمد' :- ايوا خليكي وشوفينا واحنا بننضرب!..

'تهاني' - بخوف - :- هو خالك بيضرب!!!..

'هناء' :- لا لا 'محمود' ما بيضربش!..

'احمد' - بمزاح- :- هو بس بيضرب، لو هو راجع شربان!...

'تهاني' - وعينيها بتتسع- :- هو خالك بيشرب!!!

ضريت 'هناء' كتف 'احمد' بقوة...

'هناء' :- ما تصديقيش ده واد اهبل! اخويا 'محمود' حتى دخان ما بيشربش!..

'تهاني' :- اومال أنتوا خايفين منه كده ليه!..

'ايمي' - بخوف - :- خالي عصبي جداً، ما بيعرفش يسيطر على اعصابه.. ولما تتعب اعصابه! بيكسر في الحاجات!!.. 

ارتعبت 'تهاني' من حالة 'محمود'.. فهربت تجري بسرعة ناحية باب الشقة، تنقذ نفسها..

مسكتها 'هناء' وجذبتها ناحيتها، قبل ما تخرج..

'هناء' : - لا يا 'تهاني'! مش هتروحي!!.. 

بقت'تهاني' مش بوعيها من الخوف، فحاولت تحرر نفسها من ايد 'هناء'، وتخرج بسرعة... 

'تهاني' - بقلق - : - سيبيني اخرج! انتي عايزه مني ايه!!..

'هناء' - بعتاب - : - كده يا 'تهاني'! هتهربي وتسيبينا!!..

'تهاني' : - وانا مالي! مشاكل عائلية، حلوها مع بعض!!. 

جري 'أحمد' ناحية الباب، ووقف قدامه.. يمنع 'تهاني' من الخروج!!.. 

'تهاني' - برعب - : - ايوا!! دلوقتي انا فهمت! دا أنتوا طلعتوا متفقين من بعض! ومضبطين كل حاجة! و عاوزين مني اشيل الليلة عنكم!! والله ده حرام!!!..

'ايمي' - برجاء - : - اطمني مش هيحصل لك حاجة! خليكي واقفة جنبنا.. احتياط بس!!..

'تهاني' : - ايمي!!! هو انتي شايفاني مجنونة!! هقبل على نفسي اكون كبش الفداء!!!..

'ايمي' : - صدقيني خالي هيستحي منك! ومش هيعمل حاجة!!.. 

خافت 'هناء' من 'ايمي' لو تزل لسانها.. وتفضح قدام 'تهاني' مشاعر 'محمود'! قبل ما يتاكدوا من صحة نظرية 'فاطمة'!!..

'هناء' : - 'ايمي'! ادخلي على اوضتك، و ما تخرجيش الا بعد ما نتفاهم مع خالك.. 

استمعت 'ايمي' لكلام والدتها.. وجريت بسرعة لاوضتها، وقفلت على نفسها الباب بالمفتاح.. 

'تهاني' - وهي لسه بتحاول تحرر نفسها - : - ما تفتكريش لأني بعيده عن اهلي! انكم هتقدروا!!!!.. 

قاطعت 'هناء' كلامها : - انتي مش محتاجة لأهلك!! اعملي بس زي ما عملتي معاه، لما تهجم عليكي مع عمتي!!..

'تهاني' - بخوف - : - لا  مش هقدر!..

'هناء' - بستغراب - : - ليه!!!..

'تهاني' - بخجل - : - اصلها كانت "لحظة قوة"!..

'هناء' - بدهشة - : - قولتي ايه!! "لحظة قوة"!! هو انا سمعت كلامك صح!!! هههههه، انا اعرف الناس بتجي لها "لحظة ضعف"!، لكن اول مرة اسمع عن "لحظة القوة"دي!! هههه، أنتي جيتي وقلبتي قانون الطبيعة!حتى انك حلوة! لكن!!..

'تهاني' : - ايه! عانس!!عايزة تقولي كده!!!.

'هناء' : - لاااا! أنتي خلاص عديتي مرحلة العنوسة بمراحل!! ههههه! كنت اقصد انك حلوه قوي، وغريب توصلي للعمر ده و أنتي بدون جواز!!! هو في ايه!!..

'تهاني' : - قلت لك سيبيني اخرج و ما لكيش دعوة في حياتي!..

' احمد ' - بمزاح - : - والله صح! قلبت قانون الطبيعة! حتى النظرة الشرعية كانت بفستان مكشوف! ولما هتتجوز اكيد هتكون متغطية!! هههههه...

'تهاني' - بدهشة - : - لكن محدش شافني بفستان وتجوزته!!..

'هناء' - بغمزة - : - أنتي متأكدة ! ! ! . . . 

سمعوا صوت الباب بينفتح بقوة!.. وخاف الكل من اللي هيحصل معاهم!!.. 

التفت 'تهاني' ل 'هناء'، وحررت ايدها من قبضتها.. 

'تهاني' - بحزم - : - أقسم بالله! لو سمعت اهانة واحدة، لكون انا مكسرة حاجاتكم بدال اخوكي!!!... 

وجريت 'تهاني' بسرعة لاوضه 'فاطمة' تحتمي جنبها!!...

                  الحلقه الواحد والعشرون من هنا

لمتابعة باقي الرواية زوروا قناتنا على التليجرام من هنا