رواية شقيقتي للبيع الفصل الثامن8 بقلم محمد مالك
رواية شقيقتي للبيع
البارت الثامن
للكاتب المصري محمد مالك
جميع الحقوق محفوظة
عماد اخو رؤوف يتقبل العزاء في زوجته سمية واولاده في احد قاعات المناسبات الكبري ويبدوا عليه الحزن والاسي والالم الشديد وفي حالة انهيار واضحة وبكاء علي فقدهم المفاجئ وبعد انتهاء العزاء يجلس عماد علي الكرسي في حالة اعياء ورؤوف يواسية
رؤوف غاضب ولا يصدق .. شد حيلك يا عماد هما في مكان احسن دلوقتي
عماد .. ونعم بالله .. انا مش قادر اصدق اللي حصل ولادي ومراتي يتقتلوا بالطريقة البشعة دي وفي يوم واحد وفين في القصر بتاعك يا رؤوف ؟!
رؤوف .. هو يعني القصر بتاعي ده قلعة محصنه ولا متحجب عشان مفيش حرامي ولا هجام يقدر يهوب ناحيته !! وبعدين دا اجلهم يا اخي .. اصبر واحتسب واجرك ع الله
عماد .. ونعم بالله يا سيدي .. بس انت مش حاسس بالوجع اللي انا فيه دلوقتي لأن دي مش مراتك ولا دول ولادك.. انا غلطان اني خليتهم ينزلوا في القصر عندك ياريتني كنت خليتهم نزلوا في فندق .. ياريت
رؤوف .. انا قولتلك وانت رفضت
عماد .. وبضرب نفسي بالجزمة دلوقتي
رؤوف .. شد حيلك يا عماد وربنا يعوضك خير ان شاء الله انا مضطر امشي دلوقتي لأن عندي اجتماع مهم مع وفد الماني هاكلمك في التليفون .. شد حيلك ( ثم يضمه الي صدره )
وبعد ان ينصرف يحادث نفسه قائلا .. اه يا بنت الكلب يا حنان .. زي القطط بسبع ترواح بس ورحمة سمية وولادها وشرف اختي من قبلهم لأدفعك التمن غالي اوي.. اوي
ونذهب الي ناهد حيث تجلس في شقتها تنتظر رؤوف يحادثها او يرد عليها علي احر من الجمر لأنها انقطعت اخباره هو وحنان منذ يومين
ناهد .. وبعدين بقي .. حنان ورؤوف تليفونهم مقفول بقاله يومين والزفت اللي اسمه نجم فص ملح وداب !! ومش عارفة ايه اللي حصل .. ياتري قتلها ولا مقتلهاش ولا ايه اللي حصل بالظبط ؟!
وفجأة يرن تليفون ناهد والمتصل حنان
ناهد متعجبة .. حنان !! هي لسة عايشة ؟! يمكن رؤوف بيرن من تليفونها .. الو
حنان بحزن شديد .. ايوه يا ناهد
ناهد .. ازيك يا حنان .. اخبارك ايه ؟
حنان .. زفت صدقيني وحاسة اني هموت بجد
ناهد .. ليه خير مالك ايه اللي حصل ؟
حنان .. سمية مرات عماد اخو جوزي وولادها الاتنين اتقتلوا عندنا هنا في القصر اول اومبارح
ناهد .. ايه ومسكوا اللي قتلهم ؟! قصدي ازاي ده حصل
حنان .. صدقيني مش قادرة اتكلم خالص وماسكة التليفون بالعافية .. اعصابي كلها منهاره .. لو تقدري تجيني دلوقتي يبقي كتر خيرك
ناهد .. اه وماله يا حبيبتي .. اجيلك علي عيني .. مسافة السكة واكون عندك .. سلام
حنان .. مع السلامه
ناهد تحادث نفسها قائلة
ناهد .. يخرب بيتك وبيت اللي يعرفوكي .. دا انتي لو معملوك حجاب من اولي اولياء الصالحين مش هايحصل كده ابدا !!
ونذهب الي رؤوف حيث ذهب الي راقصة اسمها نونه تزوجها عرفي منذ ستة شهور
نونة .. خلاص بقي ياخويا متحرقش في دمك .. اجلهم خلص خلاص
رؤوف .. انا مش زعلان عليهم ولا حاجة يا نونة .. ده فعلا اجلهم وخلص لحد كده والله يكون في عون عماد اخويا ويصبره علي ما بلاه .. انا كل اللي حارق دمي من بنت الكلب دي اللي اسمها حنان .. مرتين ومش عارف اعلم عليها والمصيبة بتيجي في اقرب الناس ليا !!
نونة .. بقولك ايه يا خويا .. مادام مش طايقها اوي كده طلقها وسيبها تروح لحال سبيلها من غير اذي
رؤوف .. اطلقها ؟! بسهوله كده ؟!! وبعد اللي جرالي من تحت راسها .. دا انا ناويلها بس اصبري عليا يا نونة
نونة .. ما كفاية لحد كده يا رؤوف محدش عارف ممكن يحصل ايه تاني .. البنت دي شكلها والله اعلم من اهل الكرامات
رؤوف .. بس اسكتي بلاش تخاريف .. بلا اهل كرامات بلا اهل سلامات .. وحياتك عندي ل هاتسمعي خبر عنها قريب يفرح قلبك وابقي سلميلي ع الكرامات
نونة .. انا مالي يا اخويا انت حر انا نصحتك وعملت اللي عليا .. بقولك ايه مش ناوي تكتب عليا رسمي ؟!
رؤوف .. تاني الكلام ده ؟! هو احنا مش اتكلمنا في الموضوع ده مليون مرة قبل كده !!
نونة .. بصراحة انا عاوزة عيال يا رؤوف انا مش هينفع اعيش عمري كده من غير واد ولا بت اسند عليهم .. انا نفسي اكون ام يا رؤوف
رؤوف .. وماله هو يعني لازم نتجوز رسمي عشان تخلفي .. يا ستي انا موافق هاتي العيل اللي نفسك فيه
نونة .. بجد .. انت موافق اني احمل منك عادي ؟!
رؤوف .. اه موافق يا ستي .. فضينا من السيرة دي بقي
نونة .. بجد انا فرحانه اوي .. رؤوف
رؤوف .. نعم .. في ايه تاني ؟!
نونة .. اقولك ع حاجة ومتزعلش ؟
رؤوف .. قولي
نونة .. انا بصراحة من اول يوم اتجوزنا فيه وانا مش باخد اي موانع حمل
رؤوف .. ايه !! انتي مش قولتيلي انك بتاخدي حبوب حمل ؟!
نونه .. الصراحة لا .. كنت بكدب عليك .. يا رؤوف انا بحبك ونفسي اخلف منك ولد ولا بنت وانت خلاص سمحتلي اهوه .. سا محني بقي ارجوك
رؤوف غاضب .. عذر اقبح من ذنب !! ع العموم سامحتك يا نونة
نونة .. رؤوف
رؤوف .. وبعدين بقي .. في ايه تاني ؟!
نونة .. احنا بقالنا ست شهور متجوزين ازاي ماحملتش منك لدلوقتي ؟!
رؤوف .. عادي جداا .. وسنة واتنين كمان وميحصلش وناس بتقعد سنين طويلة ومبيحصلش برده وممكن يكون عندك موانع مثلا
نونة .. لا انا كشفت والدكتورة قالت انا زي الفل وبصراحة عاوزة تشوفك
رؤوف .. دا انتي مرتبة كل حاجة بقي !!
نونة .. رؤوف والنبي متزعلش مني .. انا بحبك يا رؤوف ..
رؤوف .. بحبك يا رؤوف .. طيب يا ستي هاروح معاكي للدكتورة عشان بس اثبتلك اني ميت حصان مش حصان واحد
نونة .. مش مصدقاك بصراحة .. ههههههه
رؤوف .. طب تعالي وانا اوريكي عشان تصدقي .
وتذهب نونة ورؤوف الي الطبيبة وبعد الفحص
رؤوف .. ايه يا دكتورة .. اكيد طبعا مش مصدقة ولا بروك لبسنر بتاع المصارعة .. ههههه
الطبيبة .. هو حضرتك عندك اولاد ؟
رؤوف .. اه عندي ولد وبنت .. اشمعني ؟!
الطبيبة .. ازاي وحضرتك عندك ضمور في الخصيتين ودا واضح انه عيب خلقي مولود بيه ومستحيل تخلف مع العيب ده
رؤوف .. انتي بتقولي ايه يا ست انتي ؟! دي دكتوره دي ولا ست مهبوشة في دماغها
الطبيبة .. احترم نفسك
رؤوف .. قال عندي ضمور قال .. انتي بتخرفي تقولي ايه يا ست انتي .. اومال الواد والبت دول اللي انا مخلفهم جم ازاي ؟!
الطبيبة .. انا قولتلك الحقيقة .. انت مستحيل تخلف مع وضعك ده وللتأكيد اعمل التحليل ده وروح بيه لدكتور تاني لأني مش هاسمحلك تدخل العيادة عندي تاني واتفضل من غير مطرود
رؤوف .. في ستين داهية انتي وعيادتك يلا يا بت با نونة .............
#محمد_مالك
