Ads by Google X

رواية اسميتة جاسر الفصل الثالث 3 بقلم الاء السيد مصباح


 رواية اسميتة جاسر الفصل الثالث 

"يعني ايه اتجوز بالغصب ؟! " 
_ شش وطي صوتك جدك برا 
"مش هوطي صوتي الجواز مش بالغصب " 
الجد فجأة : لع بالغصب يا بنت السيد 
_ الاء متقصدش حاجة يا حاج صدقني 
الجد : ولا تجصد مفارجش ، حديتي سيف علي رجابيكوا انتوا التنين 
" اشمعنا انا يا جدي ؟ " 
الجد: عشان تصلحي غلط أبوكي زمان 
" بتسمي جواز ابويا بامي غلطة !! "
الجد : ابوكي جصر رجبتي وخرچ عن طوعي 
" اهو ماات ماات وانت حتي مكنتش جمبه عاش وحيد ومات وحيد انت.."  
الجد بنبرة عالية : صوتك ميعلاش واني موچود ، انتي اتخبلتي ف عجلك ايااك 
" بترفع ايدك عليا يا جدي " 


الجد : واكَسِر عضمك كَمان ، جدامك عشر دجايج انتي واياها وتكونوا چاهزين ، العربية واجفة تحت عشان توصلنا البلد 
" اناا.." 
_ اتفضل انت يا حاج وعشر دقايق ونكون جاهزين 
الجد : عجلي بنتك يا مرات ولدي ، احسن ما اعجلها اني 
وقفت مكاني من الصدمة 
بحسرة " ليه سكتي يا ماما ؟ ليه متكلمتيش ؟ دي حياتي انا " 
مسكت وشي بكفوفها _ انا اسفة يا بنتي سامحيني مش بايدي حاجة ، جدك مش قاسي زي ما انتي فاكرة لكن  هياخدك مني بالغصب لو عندتي ،انا معاكي وجمبك وهحاول والله مش هسكت بس نسايره الاول يا الاء و م..مش يمكن ي.. يعني يكون خ..خير 
بعدت ايديها " انا كبش فدا مش اكتر ولا اقل "

جهزنا الشنط ونزلنا لجدي عيني جت ف عينه شوفت شوفت حنان لثواني لكن غلاف القسوة غالب ، جدي مش هينسي غلط ابويا مهما حصل وانا لازم أثبت للكل ان ابويا مش غلطان . من حق كل شخص يختار شريك حياته. ولو فشلت حتي ابقي حققت وصيته اني عشت ف وسط عيلتي زي ما كان بيتمني . 

بعد ٥ ساعات.
واخيرا وصلنا البيت ، كان بيت كبير وحواليه غفاير كتير لكنه بيت انيق بديكور قديم كلاسيك يخطف القلب ، كنت معتقدة اني هخاف لكن الغريب ف الموضوع اني مرتاحة !!!

في حاجات بتتشاف بالقلب مش بالعين ، في حاجات بتأسر مش بس بتأثر زي كل حاجة قديمة ليها علاقة بالماضي لان الماضي ما هو إلا رحلة ميخوضهاش الا كل حزين ، والذكري زاد مبينتهيش . 

دخلنا البيت كانت العيلة كلها متجمعة ، العيلة اللي معرفش فيها حد ، منكرش اني حسيت بالخوف لكن ماما مسكت ايدي وشدت عليها بمعني متخافيش .

جدي : دي مرات ولدي الله يرحمه ودي الاء حفيدتي ، محدش يچرب يجول لها كلمة ماسخة أو عاطلة 
ولاحظت اني جدي بيتكلم وهو عينه ع فرد معين لكن معرفش مين الست دي ! وليه بتبصلي بكره كدا .
عمي : اهلا ببنت الغالي ، نورتي البلد حدانا يا زينة البنات 
بصيت لجدي وع وشي علامات الاستفهام 
جدي : عمك الكبير عبدالرحمن 
بصيت لعمي تاني لقيته ع نفس الابتسامة فمديت ايدي اسلم شدني لحضني 


عمي : اخوي مخلف فلجة جمر . 
بخفوت " شكرا " 
جدي : هملي انتي وهي اياك 
..: نورتوا البيت ، بيتكم ومُطرحكم 
جدي : دي مرات عمك نچيبة واللي واجفين حداها دول ولاد عمك چاسر وعمر و ندى . 

بصيت لهم وحركت راسي بمعني اهلا ، ردت البنت بابتسامة جميلة وكذلك الشاب اللي جمبها ، لكن الشاب التاني كانت ملامحه مبهمة بالنسبالي ، كأنه بلا تعابير ودب الخوف جوايا من تاني ، لاني مقدرتش احدد مين اللي هيبقي صاحب النصيب .

" البت لولد عمها " 
عُرف من سنين طويلة ، ومش محتاجة تفكير طويل جدي جابني هنا عشان ميكسرش العادات والتقاليد ، وكأني عروسة بخيوط بتتحرك . 

جدي : بت يا نعيمة ، طلعي ست هانم و زينة البنات ع اوضهم فوج . 
" اانا ع..عايزة امي تبات معايا ف نفس الاوضة " 
سمعت الرد بسخرية 
_ حدانا إهنا مبنعضش بالليل ولا بنجتل حريمنا !! 
التفت لناحية الصوت كان نفس الشخص بالملامح المبهمة لكن بملامح غضب المرة دي 
" انا مقصدش " 
_ ولا تقصدي يا بت عمي مش فارجة كَتيير 
جدي : اطلعي فوج يا الاء ومتخافيش ، چاسر معاه حج احنا مبنعضش إهنا 
كنت لسه هتكلم لكنه كمل : اوضتك واسعة تاخد مرات ولدي گمان . 
" حاضر يا جدي " 
طلعت ع السلم مع امي تحت أنظار الجميع ، لكن قبل ما اختفي من قدامهم بصيت له بنظرة تحدي واتأكدت أنه اللي جيت عشانه 
قلت ف نفسي " اسمك جاسر مش وحش يا بن عمي ، بكرا تعرف مين انا والايام ما بينا  "

-------------------------
وقت الغدا : 

جدي بهدوء : البيت عچبكم اياك ؟
ماما : جميل بسم الله ما شاء الله 
اكتفيت بإيماءة براسي وبس 
مرات عمي : مجولتيش حاچة يا الاء ، البيت معچبكيش ولا اي ؟ سمعينا حسك 
" هقول اي يا مرات عمي اكيد رأيي من رأي امي وطالما البيت بيت جدي يبقي اكيد حلو اصل كل اختياراته حلوة شبهه حتي اسأليه ، مش كدا يا جدو ؟ "
اكيد انا فهمت انها مش طيقاني ولا طايقة امي ، ف ليه منتسلاش شوية ف قعدتنا ؟ 
جدي بابتسامة : صُح يا جلب جدك 
انا شامة ريحة حريق يا جماعة تفتكروا جاي منين ؟
جدي وهو بيقف : شكل الايام اللي چاية هتبجي واعرة گتيير جوي 
" جدو ممكن بعد اذنك تاخدني معاك اشوف البلد ؟ " 
جدي : چاسر اهني ياخدك مُطرح ما تحبي 
بصيت بسرعة ناحيته لقيته بص لجدي بصدمة 
_ احم ورايا شغل گتير يا چدي 
جدي : الشغل يتأچل شوي واهو فرصة تعرف الاء 
_ اللي تشوفه يا چدي ، تحبي دلوقيت ؟ 
وقفت بابتسامة " وليه لأ ، ثواني وهجهز " 

بعد ١٠ دقايق 
بعصبية _ بجالك گتير ، مش تحت طوعك اني 
" اولا متعليش صوتك عليا تاني ، ثانيا انا مأخدتش وقت دول عشر دقايق ، ثالثا ف حدود ف الكلام الاحسن منتخطهاش يا ريت " 
مسك ايدي بقوة _ انتي هتعلميني اتحددت كيف اياك ؟ فوجي يا بنت البندر 
بعدت ايده بعنف ورفعت صابعي ف وشه 
" ايدك لو لمستني تاني هقطعهالك يا بن عمي ، واوعي تكون فاكر اني هخاف منك بالشويتين دول  بنت البندر اللي مش عجباك دي بميت راجل ومتقبلش ابدا لحد يقل منها " 
رميت الكلام ف وشه وطلعت الاوضة بسرعة 
كانت ملامحه غريبة مقدرتش افسرها يمكن متوقعش ردة فعلي أو يمكن بالغت لكن لازم يعرف انا مين وع اي كويس اوي .

طلعت اوضتي وبعدها الباب خبط 

" ادخل "
جدي : صوتك انتي وچاسر كان جايب لآخر البيت ليه ؟ 
" ما تسأله هو يا جدي " 
جدي : الصوت العالي والعصبية تسلبك حچك يا بنية 
" هو اللي بدأ بالصوت العالي ، يعني هو من حقه يعلي صوته وانا لأ  ؟ " 
جدي : الست حدانا اهنه متعليش صوتها ع چوزها واص
" بس هو مش جوزي يا جدي " 
جدي : ف اعتبار ما سيكون يا زينة البنات . 
بصيت له باستغراب شديد ، اتوقعت ردة فعل مختلفة ، اتوقعت يزعقلي أو يقف ف صفه 
جدي وهو بيملس ع شعري : عجدة حواجبك دي فكيها مش لايجة عليكي 
بتلقائية " ليه الحنية المفاجئة دي يا جدي " 
جدي بابتسامة : اوعي تكوني زعلانة مني لساتك يا بنت الغالي عشان ضربتك بالجلم وقت عصبيتي . 
" لكل فعل رد فعل وانا اسلوبي ف الكلام مع حضرتك غلط يا جدي فبلتمس ليك العذر " 
جدي بضحكة عالية : تلتمسي العذر إياك ، ضحكتيني يا زينة البنات . 
بصيت له باستغراب تاني 
جدي : اسمعي حديتي منيح يا ألاء ، انا مش جاسي زي ما انتي مفكرة ولا وحش ، ابوكي انا كنت بشوفه گتير من غير ما تعرفي ، كنت بتحچچ بالشغل وانزل اجابله ف مصر من غير ما حد يعرف عشان منفتحش ف الدفاتر الجديمة ،وحاچة تانية  لازم تعرفي ميتي تشدي وميتة ترخي  وچاسر راچل صُح و  يستحجك . 
" ما تحكيلي الحكاية يا جدي من الاول عايزة اسمعها منك " 
جدي : الحكاية برضه ولا چاسر ؟
______________________ 
من ٢٥ سنة 
كان المفروض بابا يتجوز بنت عمه والكل عارف كدا لكل كان للقدر رأي تاني . 
بحكم شغل بابا ف التجارة كان بيسافر دايما للقاهرة واتعرف ع مامتي هناك وحبها . 
بابا عارض جدي والعيلة كلها ورفض يتجوز بنت عمه فجدي خيره ما بين يقعد ما بين أهله وناسه ويتجوز بنت عمه أو يتجوز اللي بيحبها ويطلع من البلد . 
فابويا اختار امي وبالفعل سافر . 
لكن المشكلة مكنتش ف سفره كانت المشكلة ف بنت عمه اللي سابها واللي اضطر عمي أنه يتجوزها عشان متتفضحش ف البلد والناس تقول عريسها سابها.

وتمر السنين والمفروض اتجوز بن عمي وبن الست اللي ابويا رفضها زمان .
______________________ 

_ بتعملي اي ف الحديقة دلوقتي ؟ 
بخضة " سلام قول من رب رحيم " 
_ مالك ؟ شفتي عفريت ولا اي ؟ 
" ا..انت بتتكلم مصري ؟ " 
بسخرية _ لا بتكلم فرنساوي 
" قصدي اللهجة الصعيدي مش بتتكلم بيها " 
_ يمكن عشان كنت بعقد ف القاهرة كتير 
" اي اللي وداك القاهرة " 
_ شغل وكلية مثلا وبعدين مجاوبتيش بتعملي اي دلوقتي ف الحديقة الوقت اتاخر اي مش خايفة ؟ 
" اولا : مجاليش نوم فقلت انزل اتمشي ، ثانيا : انا ف بيت اهلي اي الداعي من الخوف " 
_ معترفة أنه بيت أهلك يعني 
" الحقيقة حقيقة مهما كان " 
_ طب اطلعي ع اوضتك عشان الوقت اتاخر .
بابتسامة " تيجي نشرب قهوة ؟ " 
رفع حاجبه _ دلوقتي ؟ 
" القهوة ملهاش معاد ، وانت محتاج تعتذري ع الموقف البايخ بتاع الصبح فخدها فرصة "
_ اي الثقة دي ؟ 
" مش ثقة وانما فرصة تانية جدو قالي انك تستحق" 
_ جدو قولتيلي ، هو دا سبب التغير المفاجئ 
" الصراحة مش جده لوحده وموقف تاني حصل " 
بتهكم_ هتتفضلي عليا وتحكيه ؟ 
" مقلتليش تشرب قهوة ؟ " 
_ مينفعش انا وانتي نعقد ف مكان لوحدنا طول ما مفيش حاجة تجمعنا وخصوصا لو بليل .  
ابتسمت " الإجابة لأ بس بتذوقها " 
_ مش محتاج اذوق حاجة .
" وانا مكنتش مستنية إجابة غير دي يا بن عمي " 
_ افهم أن دا كان اختبار ؟
ابتسمت اكتر " ذكي والراجل الذكي خطر " 
_ الست الذكية اخطر .
" تصبح ع خير يا بن عمي " 
_________________________
بعد الفطار : 

" الاسطبل دا جميل اوي يا جدو " 
جدي : تحبي تركبي حصان ؟ 
بابتسامة " ينفع يا جدو ؟ " 
جدي : طول ما احنا ف أرضنا وبيتنا كل شي ينفع يا زينة البنات . 
" الحصان الاسود دا ممكن ؟ " 
جدي بضحكة  : الا دا مينفعش إلا بإذن صاحبه . 
باستفهام " ومين صاحبه ؟" 
جدي : صاحبه واجف هناك اهو ، روحي جوليلي وخدي الاذن منيه .  
بتعجب " جاسر ؟ "
جدي بابتسامة  : صُح 
بصيت لجدي بحيرة وللحصان ولجاسر من بعيد ومشيت ناحية جاسر اللي كان واقف مع عمر اخوه 
" السلام عليكم "
عمر بابتسامة : وعليكم السلام يا مرات اخوي 
تلقائي بصيت لجاسر لقيته مبتسم 
" بس انا لسه مبقتش " 
عمر : جريب جوي يا بنت عمي متخافيش 
قبل ما افهم أو ارد 
_ في حاجة يا الاء ؟ 
فضلت ثانيتين بصاله أول مرة ينطق اسمي .  
عمر : طب استأذن انا بقي . 
_ طريجك اخضر يا خوي . 
عمر مشي فكنت همشي انا كمان 
_ استني اهني ، كنتي چاية ترمي السلام اياك وتمشي 
" لأ الصراحة انا كنت جاية عشان اقولك أنه لو ينفع يعني اركب الحصان بتاعك عشان جدو قالي لازم اخد اذنك بس لو مش عايز خلاص " 
_ بتعرفي تركبي أحصنة من الأساس ؟ 
" ما هو انا اصل .." 
_ جولي من الاول لع وخِلصنا 
" جدو معايا هيعلمني " 
_ ولو جولت لع ، اي جولك ؟ 
" هقولك ماشي تمام وهمشي " 
_ ليه الحصان دا بالذات ؟ 
" معرفش بس حبيته " 
ابتسم _ وانا موافج 
ابتسمت " بجد ؟ شكرا ليك جدا يا جاسر " 
بصلي بنظرة غريبة فارتبكت ونزلت عيني ومشيت تجاه جدي وانا لازلت مبتسمة .
اكيد فهمت ان النظرة دي نتيجة لنطقي لاسمه مجرد من غير يا بن عمي . 
جدي : وافج ؟ 
" ايوا يا جدو " 
جدي بصوت ضحك عالي : طب يلا اركبي . 
" بتضحك ليه يا جدو ؟ " 
_ مفيش حاچة صُح يا جدي ؟
جدي : الحصان دا مبيلمسوش حد واصل غير الحبايب صُح يا چاسر .
" احم .. اركبه ازاي يا جدو "  
جدي : ساعدها يا چاسر احسن حاسس اني دايخ ومش جادر اوجف ع رجليا .
بصيت لجاسر بسرعة لاقيته بيبص لجدي ومبتسم 
هو اي حكاية الابتسامات النهاردة ؟ مالهم بجد ؟ 
_ اول حاجة متخافيش من الحصان وحسسيه بالامان عشان ميغدرش بيكي هو ، اي رايك تأكليه الاول ؟ هيت ..
بعفوية" بحب لما تغيرت لهجتك مخصوص عشاني "
رفع حاجبه _ وبتحبي اي تاني ؟ 
" ها ؟ اا..انا مش بحب ح.حاجة انا قصدي انه يعني بيبقي شي لطيف منك فاهمني ؟ "
_ كنت بقول تأكلي الحصان اي رايك ؟ 
" مش هيعملي حاجة " 
_ لا متخافيش انا معاكي 
هو ليه كل كلمة بيقولها بتربكني ؟ انا مبحبنيش وانا مرتبكة . يووووه 
_ خدي الاكل اهو جربي
" حاضر " 
عملت زي ما قالي بالظبط وفعلا مكنتش خايفة لحد ما فجأة الحصان أصدر صهيل فرجعت لورا فجأة وكنت هقع فلحقني ، ولما استوعبت الموقف زقيته بعدت فجأة . 
" أنا أنا اسفة ، انا مكنش قصدي "
_ عادي محصلش حاجة 
" أنا طالعة فوق , بعد اذنك " 
_ مش كنتي عايزة تركبي ؟ 
" مرة تانية باذن الله ، بعد اذنك تاني " 
وف ثواني معدودة كنت اختفيت من قدامه ، هو معملش شئ يذكر بس وجوده مهلك بالنسبالي معرفش ليه ؟ 
الغلط كله ع جدي ، ليه يمشي ؟ ها ؟ بس مفقوش اوي يا جدو والله . 
______________________
ف اوضتي :  الباب خبط 

" ادخل " 
جدي : لونك مخطوف إكده ليه يا جلبي ؟ 
" ها أنا ، مخطوف ازاي "
جدي : مخابرش مش يمكن حاچة تانية اللي انخطفت گمان . 
بارتباك " حاجة اي يا جدو ، مش فاهمة " 
جدي : اللي خطفك إكده عايز يكتب الكتاب الليلة ، وجعتي ولد ولدي كيف يا زينة البنات ؟ 
بصيت للأرض بكسوف وقلبي دق بسرعة ، بسرعة لدرجة اني خفت لجدي يسمعه . 
جدي وهو بيحضني : يبجي موافجة ، زغرطي يا ام العروسة 
وطبعا امي متأخرتش زغرطت وعيطت .
________________________

" بارك الله لكما وبارك عليكما وجمع بينكما في خير "

رفعت راسي واخيرا عايزة اشوف نظرة عينه مش اكتر لقيته مبتسم ابتسامة هادية تشبهله تمام . 
لقيته قرب ف وسط زحمة الموجودين وهمسلي 

_ مستنيكي ف الجنينة نشرب قهوة 

جدي : مُطرح ما يكون چوزك تكوني معاه ، لساتك واجفة ؟ 
ابتسمت ومشيت وراه مشي أشبه بالجري 

"ج..جاسر "
_ مبروك يا زينة البنات  
"... 
ضحك _ لسانك الطويل راح فين ؟ طب احكيلي طيب موقف اي اللي غيرك من نحيتي 
اخدت نفس وبدأت احكي 
" يوم ما اتخانقنا ، جدي كان عندى ف الاوضة فنسي سبحته رحت عشان ارجعها ، فسمعتك انت ومرات عمي بتتكلموا بالصدفة والله ، سمعتك وانت بتدافع عني وبتقولها انك انت الغلطان وانها لازم تتقبلني ومتاخدنيش بذنب ابويا ف حقها عشان انا هبقي مراتك المستقبلية . 
وان ردة فعلي غيرت وجهة نظرك عني واني من اليوم دا اخصك و مش من حق حد يتكلم عني بالوحش ابدا
 يومها حسيت باول دقة ليك " 
ابتسم _ كل دا بالصدفة ؟ 
بصيت للأرض تاني " ف البداية والله صدفة لكن بعد كدا فضول "
_ انا بدأت اقع ف حبك من يومها من خناقة تصوري ؟ 
رفعت رأسي له فابتسم ويا وعدي ع ابتسامته 
_ بحبك يا زينة البنات 
ابتسمت
 " تشرب قهوة ؟ "
حضني 
" اشرب قهوة " 🖤

_____________________

"أطلت النظر إليك فضللت بمحراب عينيك " 
______________________
يتبع.....
  جاري كتابه الفصل الجديد من الروايه حصريه لعالم سيكرهوم اترك تعليق ليصلك البارت فور نزوله او حاول زيارتنا الليله       

بدل ماتدور وتبحث علي الروايات خليها علي تليفونك وحمل تطبيقنا

تحميل تطبيق سكيرهوم
تعليقات



حجم الخط
+
16
-
تباعد السطور
+
2
-