 |
رواية يلا بينا نعرف نبينا الفصل الخامس والعشرون بقلم اسماءف25 يلا صلو على النبي وفاة أم النبي ﷺ " سيدنا محمد يتيم الأب والأم وعمره ٦ سنوات" وقفنا المرة اللي فاتت مع النبي ﷺ عند قبر أبوه عبد الله اللي مات قبل ما يشوفه .. النبى عمره ما قال ولا فهم يعني إيه أب ، ووسط كل ده يحصل شئ صعب أوي .. أم النبي ﷺ تعبت .. وبدأت تحس أنها مش قادرة تتنفس والألم بيزيد .. وتبدأ تقع على الأرض .. أم النبى بتموت قدام عينيه ، آمنه بتحتضر ، وأم أيمن واقفة مش عارفة تعمل أيه .. وبعد دقايق وقف الألم ، آمنه مش بتتحرك ، أم النبى ماتت ،ورغم أنه موقف صعب أوي إلا إن لسه في موقف هيحصل أصعب من كده .. أم أيمن مينفعش تسيب آمنة على الأرض ولا تقدر تشيلها لحد مكة .. أم أيمن لازم تدفن آمنة .. أكيد قلبه أتعصر ووالدته بيتحط عليها التراب قدام عينيه .. طب تفتكروا النبى ساعد أم أيمن فى دفن أمه ؟ يمكن ساعدها ، يمكن يكون أنهار من البكاء .. الله أعلم .. أتولدت يا رسول الله ومشفتش أبوك .. وأمك تموت وتدفن قدام عينيك وعمرك ست سنين .. هيفضل المنظر قدام عينيك ؟! هتفضل فاكره طول عمرك؟! أي طفل لو مر بظروف زي دي ممكن يطلع طفل معقد .. حقود .. عايز ينتقم من الدنيا إلا النبي صلى الله عليه وسلم أزداد حنان فوق حنانه وطيبة وعطف ، وهنشوف ده طول ما أحنا بنحكي سيرته ﷺ .. حنعرف مواقف كتيرة مليانة رحمة وإنسانية .. سيدنا محمد دلوقتى مع أم أيمن يتيم الأب والأم .. مين هيهتم بيه بعد كده ؟ مين هيبقى ولي أمره ؟ |
بدل ماتدور وتبحث علي الروايات خليها علي تليفونك وحمل تطبيقنا
