.jpeg)
رواية يلا بينا نعرف نبينا الفصل السادس و التسعون
يلا صلوا على النبى :)
غزوة بدر (ج2)
" إدعاء كاذب من ضمضم بن عمرو على المسلمين "
شفنا إمبارح أبو سفيان ( قبل إسلامه ) وهوه بيحاول يهرب بأموال المسلمين فخرج بسرعة للإستطلاع بنفسه فسأل راجل عجوز في الطريق إذا كان شاف حد تبع رسول الله صلى الله عليه و سلم .. فرد الراجل و قال : " نعم لقد رأيت أناس كثيرون مروا من هنا " ، فسأله أبو سفيان عن المكان اللى أستقروا فيه .. و يروح أبو سفيان على المكان و يلاقى بذر تمر فيفهم أن كان محمد و أصحابه فى المكان عشان ده تمر المدينة ..
فيبعت أبو سفيان واحد أسمه " ضمضم بن عمرو " عشان يبلغ قريش و يبعتوا له مدد ( ناس أكتر ) .. لكن ضمضم عمل فعل خبيث جداً .. ضمضم جرح الناقة بتاعته و خد من دمها و لطخ وشه و لبسه بالدم ، و يدخل مكة و هوه بيصرخ و يقول : " اللطيمة .. اللطيمة .. الغوث الغوث " .. فيقولوا له : " ما لك يا ضمضم " .. فيقولهم : " أجتمعوا عند الحرم " و بعدين يحكى و يقول : " هجم علينا محمد و أصحابه عند بئر بدر و أخذوا الأموال و قتلوا الناس و ضربونا " ..
فيقف أبو جهل و يقول : " والله لا يبيتن رجل منكم إلا فى بدر " .. هتعمل أيه يا أبو جهل بقى ؟ هيجمع أبو جهل جيش بسرعة غير طبيعية .. جيش ما بين 950 ل 1000 جندى .. أنتو متخيلين العدد .. و مش بس كده ب 1000 ناقة و 200 فرس .. يعنى كل الجيش راكب و مرتاح و محدش حيمشى و معاهم أسلحة و جمال حتدبح هياكلوها فى الطريق و معاهم كل المعدات .. أبو جهل جهز الجيش بسرعة غير عادية .. طيب النبى فين دلوقتى ؟ النبى لسه موصلش لأبى سفيان أصلاً و ضمضم كدااااب ..
طيب هوه النبى أصلاً طالع يحارب ؟ لأ .. النبى طالع لقافلة أبى سفيان .. يعنى هيستردوا أموالهم و بس ... أه ممكن يحصل شد بس مش حرب يعنى .. طيب معاك إيه رسول الله ؟ 313 صحابى .. و معاه من 70 ل 100 ناقة يعنى كل 3 أفراد هيركبوا على ناقة واحدة بالتناوب و حيمشوا باقى السكة .. طيب هي المسافة من المدينة لبئر بدر كام كيلو ؟ من 300 أو 350 كيلو .. يعنى لو كل 3 هيبدلوا بينهم و بين بعض على ناقة واحدة .. يبقى الواحد هيركب 100 أو 150 كيلو .. يعنى يركب تلت المسافة ويمشى التلتين .. يعنى حيمشى حوالى 200 كيلو على رجله .. ما هما مش عاملين حسابهم على حرب فعادى إن مجهودهم يروح فى المشى .. أنتو متخيلين المشقة ..
طيب وأنت يا رسول الله هتتناوب مع حد على بعير ؟ أه .. النبى هيناوب مع 2 واحد أسمه " أبو لبابة " و التانى " على بن أبى طالب " رضى الله عنه و هما التلاتة بيبدلوا مع بعض على ناقة واحدة .. و يركب أبو لبابة شوية و على بن أبى طالب شوية فأبو لبابة أتضايق و قال لعلى : " يا على .. يركب النبى و نمشى أنا و أنت ؟ " .. فقال على : " أجل يا أبو لبابة " و قالوا ده للنبى بأن مينفعش تمشى .. فأركب و أحنا حنمشى يا رسول الله ..
فيرفض رسول الله يقول : " لا والله ما أنتما بأقدر على المشى منى و ما أنا بأغنى عن الثواب منكما " .. فيرفض النبى صلى عليه الصلاة و السلام .. طيب أبو سفيان عمل إيه بعد ما بعت ضمضم ؟ .. أبو سفيان سلك طريق تانى .. عرف يلاقى سكة مش ممكن يكون النبى هيعدى منها .. و مشى منها و قام باعت جواب لقريش و يقولهم : " يا معشر قريش لا تخرجوا .. نجت العير ( القافلة ) " .. ( تلاحظوا يا جماعة من الموضوع ده أن أبو سفيان مش بيسعى لحرب ولا بتاع مشاكل يمكن عشان كده ربنا أكرمه بالإسلام .. و أبو سفيان حيسلم بعد كده و حيبقى صحابى ♡ ) ..
المهم بعد ما أبو سفيان ما قالهم أنا عديت خلاص .. متخرجوش .. فيقوم أبو جهل ميوافقش ، و يقول : " لا .. والله لنخرجن إلي محمد الليلة لنصل إلى بدر ولنبيتن ببدر هذه الليلة ونشرب الخمر ونذبح الجمال وناكل و نطعم و ترقص المغنيات حتى تعلم العرب أننا لا نقاتل " .. فيطلع واحد أسمه " عتبة بن ربيعة " و يقولهم : " يا معشر قريش نجت القافلة لا تخرجوا .. ما يريد محمد إلا أن نخلوا بينه وبين سائر العرب " .. ( يبقى عتبة فاهم قضية النبى كويس و هي تبليغ الدعوة للإسلام ) ..
و راح عتبة مكمل كلامه و قايل : " لئن أصابته العرب .. إذن فهذا ما أردتم ولئن أنتصر فعزه عزكم وملكه ملككم " ( يعنى لو العرب قتلته يبقى هتخلصوا منه وتبقوا أنتم بريئين من دمه و لو أنتصر يبقى خير لأن هو فى الآخر قرشى وده حيعزكم ) ، فيرد أبو جهل و يقول : " كلا والله لن نتركه أبدآ " .. و يبدأ أبو جهل يجهز الجيش .. الجيش خارج من مكة والجيش قرب يطلع خلاص .. و فى ناس خافت و مردتش تطلع .. ليه ؟ لأنهم كلهم عارفيين إن النبى هو نبى الله حقآ و أن ربنا هيقف جنبه ... طيب فى واحد محدش يتصور أنه مش راضى يطلع يحارب لأنه قوى و شجاع .. مين هوه ؟ ..
بدل ماتدور وتبحث علي الروايات خليها علي تليفونك وحمل تطبيقنا
