رواية 30 يوم جواز الفصل الخامس
.................
مرام : بقولك ايه انا زهقانه وعاوزه اخرج . وانت مانعنى انى اخرج او اروح ف اى حته . حتى عيد ميلاد صاحبتى منعتنى منه
احمد : مابمنعكش بس بحافظ على منظرى العام . وشكلى وشكلك .. ازاى تروحى عيد ميلاد وسط الناس دى كلها وانتى ست متجوزه وجوزك مش معاك ؟ انتى مش بنت . انتى مدام دلوقتى
مرام : طب ما تيجى معايا بقولك زهقانه ياسيدى
احمد : اجى معاكى فين معرفش انا الناس دى ولا اعرف اصحابك
مرام : طيب عاوزه اخرج . خرجنى انا زهقت ...
احمد : تحبى تخرجى فين . ؟
مرام : اى مكان .. على ذوقك ياسيدى
احمد : خلاص ادخلى البسي نروح نتعشي ف مكان لطيف كده اعرفه
مرام : ربنا يكرم اصلك يا امير يابن الامرا ... خلاص ادينى ساعه زمن اجهز فيها
احمد : سا ايه ؟ ايه ساعه دى ليه ؟ هتعملى ايه ف الساعه
مرام : ياباشا انا مرام . عارف يعنى ايه يعنى لازم ابقي على سنجه عشره
احمد : طب انجزى والنبى . مش عاوزين نتاخر بره
مرام : لا ماتصربعنيش .... اعملك حجر شيشه كده وفنجان قهوه واستمخ فيهم لغاية ما اخلص
احمد : طيب . انجزى انتى بس وخلصى
............
( ف المطعم )
مرام : بس ايه المطعم ده شكله فاخر اوى .. تعرفه منين ؟
احمد : ( بيبصلها ) جيت فيه كذا مره
مرام : ( بتشرب العصير وبتبصله ) كنت جاى لوحدك ولا مع حد
احمد : ايه ؟ لا كنت جاى مع حد
مرام : حد
مين ده ؟
احمد : حد وخلاص .. انتى ليه بتسالى ؟
مرام : مش مراتك ؟ ولا مش من حقى اعرف ؟
احمد : مراتى ؟ تصدقى بنسي احيانا اننا متجوزين وكده
مرام : تنسي ليه ؟ ماشبهش يعنى ولا ماشبهش
احمد : ( بيبصلها باهتمام ف عنيها ) تشبهى طبعا .. مين ده اللى امه داعياله ويكون سعيد الحظ انه يملكك يامرام وتكونى حلاله ...
مرام : اومال احنا ايه ؟
احمد : يعنى ايه ؟ مانتى عارفه وضع جوازنا وعلاقتنا
مرام : امممممممم ( بتشرب العصير ) معاك حق .. لسا لغاية دلوقتى مش عارفه ليه بابا كتب ف وصيته ان مرام واحمد يتجوزوا لمدة شهر ويقعدوا ف بيت واحد علشان مرام تاخد حقها ونصيبها
احمد : انا كمان مش عارف .. الله يرحمك يا عمى ..
مرام : وانت بقا ؟ اخبار شغلك ايه
احمد : ( بيبتسم ) كله خير ... معكوك عكه بنت لذينه
مرام : معكوك ازاى ؟
احمد : واحد عميل عندنا ف الشركه كان ساحب قرض مننا ... سدد منهم شهرين . وخلع بالفلوس .. مش عارفين نجيبه ...
مرام : طيب وانت مالك بيه ؟
احمد : ماهو القرض ده انا ضامنه لانه جاى من طرف واحد صاحبى
مرام : ايوه ؟ وبعدين .. والقرض ده بأد ايه ؟
احمد : باقى 350 ألف ... والشركه مديالى مهله شهرين . يا اشوف الراجل ده ف انهى داهيه ياما اجيبلهم الفلوس ياما هيشتكونى
مرام : طيب ماتشوف صاحبك ده اللى هو جاب الراجل ده
احمد : روحتله واتخانقت معاه .. وقالى انه مايعرفش حاجه عنه وانه كمان الراجل ده طلع ناصب عليه ف مبلغ بردو
مرام : طب وليه ماقولتليش حاجه زى دى قبل كده
احمد : محبتش اشغلك بقي . وبعدين كلها 20 يوم وكل واحد يروح لحاله
مرام : امممممممم ... لا بجد اتضايقت .. ع العموم ان شاء الله تطلع منها على خير
احمد : يارب .... تاكلى ايه بقي
مرام : اطلبلى انت بقي على ذوقك
........
مرام : الاكل تحفه
احمد : فعلا ..
مرام : مش هتقولى بردو كنت بتيجى مع مين . ؟
احمد : هيفرق معاكى يعنى
مرام : اهو من باب المعرفه . قول بقا ماتبقاش رخم
احمد : كنت باجى مع واحده
مرام : ( بغضب ) واحده مين
احمد : مع عشق ... كنا بنيجى هنا على طول
مرام : هى ايه حكايه عشق دى . شوفتها فين دى ولا حبيتها امتى . ؟
احمد : لا دى بحبها من ايام الكليه .. عرفتها ف الجامعه هناك
مرام : بس بتقولى انها دكتوره ؟
احمد : اه عرفتها بالصدفه ف كليتها واتقابلنا مره ف التانيه وبقينا اصحاب لغاية ما حبينا بعض
مرام : انت مستفز على فكره
احمد : ليه ؟
مرام : من غير ليه . قوم روحنى يلا ..
..........
( ف العربيه )
احمد : ( بيقف على جنب ) فيه ايه .. بتعيطى ليه ؟
مرام : مابعيطش ..
احمد : بجد فيه ايه ؟ مالك ؟
مرام : مافيش .. افتكرت بابا بس فاكر الصوره دى ؟ ( بتوريله صور ليهم وهما صغيرين على تليفونها )
احمد : ايه ده ؟ جبتى منين الصوره دى ؟ ههههههههههه شكلنا كان مسخره اوى .. كنا ف المصيف تقريبا
مرام : اه كنا ف راس البر .. كانت قريبه من بلدنا .. قبل ما نروح نعيش ف القاهره ..
احمد : اه .. كنا نطلع رحلتين ف الصيف . كنا نحلم بيهم طول السنه
مرام : بس انت كنت رخم على فكره ... تسيب البنات كلها وتيجى علشان عاوز تغرقنى انا
احمد : هههههههههه كنت برتاح نفسيا كده لما بنكشك واضايقك
مرام : ليه يعنى . ؟ مانت عندك اختين ليا وغير بنات عمى محمود وكنا بنبقي كتير ليه بتختارنى انا . ؟
احمد : مش عارف .. بس قولتلك انى كنت برتاح لما بنكشك وارخم عليك .. كنتى كيوته كده
مرام : فاكر لما كنت تخلينى اقعد على كتفك وهوب تقوم رامينى ف الميه
احمد : هههههههههه ايام مسخره ...
مرام : كانت ايام جميله . ابويا وعمى بردو كانو لامين العيله قبل ما كل واحد يروح لحاله
احمد : فعلا .. بس بجد .. ايه اللى مزعلك
مرام : مزعلتش ياعم انت هتزعلنى بالعافيه ...
احمد : زعلانه على حكايه الدكتوره عشق دى يعنى ؟
مرام : وانا هزعل ليه ؟ اشبعوا ببعض ..
احمد : طيب انا هوصلك البيت وهرجع علشان ورايا ميعاد كده
مرام : لا لا معلش .. هتطلع معايا ... اتفضل
احمد : ساعه بس وجاى
مرام : والله مانت رايح ف حته .. رايح فين اصلا
احمد : رايح اشوف واحد صاحبى
مرام : اسمه ايه
احمد : الله ! واحد صاحبى وخلاص
مرام : اسمه الدكتور عشق صح ؟ ياعم انا مجنونه بنت مجانين ولا يهمنى ورث ولا يهمنى ارض ولا يهمنى فلوس من اصله ماتخلنيش امارس عليك حقوقى كزوجه وانكد ع اللى خلفوك ... اقولك حاجه .. انت ال 20 يوم دول مش هتخرج م البيت لغاية ما كل واحد يروح لحاله
احمد : وده بتاع ايه ان شاء الله .. انشالله منا قايلك ان عندى مشكله ف الشغل وبحاول اتهبب اشوفلها حل
مرام : ولا يهمنى .. هتديهم فلوسهم ع الجزمه القديمه بس بعد ما اقبض فلوسى
احمد : وحياة امك ؟ وانا كنت بفضفضلك عشان تقوليلى هديك فلوس .. ماتتلمى يابت
مرام : هو كده وان كان عاجبك ... ويلا اتفضل يا بيه على فوق .. ورينى تليفونك ده .. وريهونى ....( بتقلب ف تليفونه مابتلاقيش واحده اسمها عشق ) اومال فين السنيوره بتاعتك .. مسميها ايه ع التليفون ؟
احمد : عم عبدو السباك
مرام : ( بتضحك ) هعرفها بردو .. اتفضل يلا قدامى
.............
( اخر السهره )
مرام : بتعمل ايه ؟
احمد : هعمل ايه يعنى ؟ بفرض الكنبه علشان انام
مرام : لا ادخل نام جوه .. الجو تلج
احمد : لا بلاش .. المره اللى فاتت بتاعة الفار دى اتشعبطتى فيا طول الليل وكنتى هتخنقينى
مرام : كنت خايفه يا عم وبعدين انا بقولك ادخل نام جوه علشان شاكه ان الفار ابن الكلب ده رجع تانى
احمد : بتهزرى ؟
مرام : وحياة الدكتورة عشق بتاعتك
احمد : ههههههههههه طيب اتفضلى .. جهزى السرير بقي على ما ادخل الحمام واجى
...........
( وهما نايمين وكل واحد مدى ضهره للتانى ... مرام بتتلفت وبتبدا تكلمه )
مرام : نمت ؟
احمد : لسا ..
مرام : بتفكر ف ايه ؟
احمد : حكايه كده ؟
مرام : حكايه ايه ؟
احمد : حكايه واحد صاحبى .. بيحب
مرام : الله !!! احكيلى انا بحب الحواديت بتاعة الحب دى احكيلى . ماله صاحبك ده
احمد : ( بيلتفت وبيبصلها ) بيحب واحده بنوته زى القمر .. والفرصه جاتله لغاية عنده انه يتجوزها بس كانت فرصه ناقصه .. لانه حس انها مابتحبوش
مرام : ما جايز ماتكونش عارفه انها بتحبه اصلا .. جايز محبتش غيره بس مش عارفه .. ولا عمرها فكرت انها بتحبه
احمد : بقوله كده .. بس خايف يقرب منها تبعده هى عنها ... او ممكن خايف انها تفكر انه طمعان فيها
مرام : اسمع منى . خلى صاحبك يقولها انه بيحبها ... مايكابرش
احمد : تعرفى ان دى اول مره ابصلك فيها من قريب
مرام : وانا كمان اول مره ابصلك من قريب اوى كده
احمد : ( بيمشى ضهر ايده على خدها )
مرام : بتعمل ايه ؟
احمد : برجعلك خصلايتين الشعر دول لورا ... ايه القمر ده ياسطا
مرام : وانت لسا عارف ؟ انا طول عمرى قمر اصلا
احمد : لا قمر قمر يعنى بجد ... ( بينسى نفسه وبيقرب علشان يبوسها من خدها )
مرام : ( بتديله بالبوكس ف عينه ) بتعمل ايه ؟ ( بتديله ضهرها ) ابقي خلى الدكتوره بتاعتك دى تعالجلك عينك قبل ما تتحول ..
............
