السيرة النبوية الجزء السادس
الله أكبر ،، إنت جالك الناموس الأكبر ،،
= ناموس أكبر إيه!!؟
اللي كان بينزل على سيدنا موسى ،،
= أيوة يعني اللي هو إيه الناموس الأكبر !؟
هو سيدنا جبريل عليه السلام 😊
سيدنا محمد ﷺ لما راح لورقة بن نوفل هو والسيدة خديجة ،، قعد النبي ﷺ يحكي لورقة اللي حصل معاه في غار حراء ،،
وحكاله إزاي إن الراجل حضنه جدا لدرجة إنه كان حاسس إن روحه هتطلع !
وكل دة النبي ﷺ مش عارف مين دة !
ورقة بن نوفل قعد يسمع النبي ﷺ وفجأة قاله :
إنت جالك الناموس الأكبر اللي كان بينزل علي سيدنا موسى وهو سيدنا جبريل " عليه السلام " ،،
ودة ملاك ربنا بيبعته للأنبياء عشان يعلمهم ،،
وربنا بعته لكل الأنبياء اللي قبلك ،،
وبعته ليك عشان انت دلوقتي النبي اللي ربنا اختاره ،،
وبعدين قاله :
خد بالك ،، مفيش أي حد جه باللي إنت جيت به ده إلا و أهل بلده اخرجوه وعادوه..
فهما هيحاربوك ويأذوك ويخلوك تمشي وتسيب مكة ..!
سيدنا محمد ﷺ قاله : هيخرجوني من مكة ؟؟!
ازااااي !؟
دة هما اللي أطلقوا عليا لقب الصادق الامين !
فورقة بن نوفل قاله:
مفيش نبي ربنا بعته الا ولازم يحاربه الكفار ويطردوه !!
ورقة بن نوفل كان حزين جدا وهو بيقوله الكلام دة ،،
فسكت لحظات وبص لسيدنا محمد ﷺ وقاله:
ياريتني كنت صغير في السن وشاب قوي ،، أو اكون حتي لسه عايش وأنا كنت هنصرك بقوة لما قومك يخرجوك من بلدك ،،
وراح قايم ورقة ابن نوفل ووطي علي رأس سيدنا محمد ﷺ وباس رأسه لما عرف ان هو دة آخر نبي ،،
خرج سيدنا محمد ﷺ والسيدة خديجة من عند ورقة بن نوفل واطمن بس في نفس الوقت كان محتار لأنه ميعرفش أي حاجه عن النبوة ،،
ولا يعرف أي حاجة عن الأنبياء اللي كانوا قبله !
فهو مش عارف هيعمل إيه ولا إيه المطلوب منه أساسا!
فالنبي ﷺ اتمني إنه يقابل سيدنا جبريل عليه السلام تاني ،، عشان يفهم منه كل حاجة ،،
ماهو سيدنا جبريل عليه السلام الوحيد اللي يقدر يفهمه يعني إيه نبوة ،، ويعلمه كل حاجة ،،
فراح سيدنا محمد ﷺ الغار تاني ،،
وقعد هناك يعبد ربنا .. ويدعي ربنا ويستني سيدنا جبريل عليه السلام يرجع تاني !
فضل مستني يوم ورا التاني بس برضو سيدنا جبريل عليه السلام مجاش!
وده كان السبب من فترة انقطاع الوحي،،
أرجح أقوال العلماء في المدة إللي انتظرها سيدنا محمد ﷺ قبل ما ينزل عليه جبريل عليه السلام مرة ثانية،
كانت ما بين ثلاثة أيام لأربعين يوم فقط مش أكثر من كدة !
طب هل النبي ﷺ كان بيحاول يرمي نفسه من على جبل عشان ينتحر بسبب حزنه الشديد لانقطاع الوحي!؟
لأ طبعا ،، الكلام ده غير صحيح !
هو حزن إن سيدنا جبريل عليه السلام مجاش تاني ،، وكان بيقعد يستناه في الغار يجيله ،، لكن في نفس الوقت قاعد يعبد ربنا ،،
سيدنا محمد ﷺ فضل يروح الغار ويعبد ربنا،، ويدعي ربنا ان سيدنا جبريل يجيله تاني..
وفي يوم من الايام بعد ما خلص النبي ﷺ عبادته ، ونزل من الجبل عشان يرجع بيته ..
أول ما وصل لآخر الجبل تحت سمع صوت بينادي عليه 🙉
بص حواليه ملقاش حد ..!
فبص في السماء ،،
فشاف سيدنا جبريل عليه السلام ،،
بس برضو خاف اوي واتخض واترعب اول ما شافه !!
طب خاف ليه تاني !!؟
= لأنه المرة دي مشافهوش علي هيئة إنسان !
دة شاف مخلوق ضخم من نور ،،
له ستمائة جناح ،، قاعد على كرسي والكرسي متعلق في الهواء بين السماء والأرض🙈
"وَلَقَدْ رَآهُ بِالْأُفُقِ الْمُبِينِ"
ومن شدة الخوف والرعب قام يجري ورجع لبيته وهو بيقول للسيدة خديجة :
زمّلُوني ... زمّلُوني
غطوني.،، غطوني ،،
السيدة خديجة أول ما شافته خايف جرت بسرعة جابت غطي تقيل ودفته بيه ..
وفجأة سمع صوت بيقوله :
يَا أَيُّهَا الْمُدَّثِّرُ ،، قُمْ فَأَنْذِرْ ،،
يعني يا محمد انت بتتغطي عشان خايف متخافش ،،
لكن قوم وعلم الناس يعبدوا ربنا عشان يدخلوا الجنة ،، وخوفهم وحذرهم من عذاب ربنا لو لم يؤمنوا به ،،
وَرَبَّكَ فَكَبِّرْ ،،
كبر الله يا محمد ، و قولهم انهم يعبدوا الله وحده ،، وقولهم ان اللي هيعبد الأصنام ملهوش غير العذاب وهيدخل النار ،،
وَثِيَابَكَ فَطَهِّرْ ،،
وثيابك فطهرها من النجاسات إللي المشركين مكنوش بيتطهروا منها،،،
واجعل قلبك وعملك طاهرين ،،
وَالرُّجْزَ فَاهْجُرْ ،،
ابعد عن كل حاجة ممكن تكون سبب في العذاب !
وَلَا تَمْنُنْ تَسْتَكْثِرُ ،،
متعملش طاعة لله وتطلب قصادها مقابل،،
ولا تقعد تَمُن على ربك باللي هتتحمله من أعباء الدعوة ،،
وَلِرَبِّكَ فَاصْبِرْ ،،
اصبر على الأذى في سبيل الله والدعوة وخلي صبرك على الأذى إللي هتشوفه ده لله!
سيدنا محمد ﷺ بقي نبي ،، يعني حياته كلها اتغيرت ،،
في لحظة بقي مطلوب منه يبلّغ أهل الأرض كلهم إن هو رسول من عند خالق الكون ،، وإنهم لازم يتبعوه،،
والمفروض يعمل المهمة دي لوحده ،، بطوله ،، مش معاه حد نهائي ..
إزاي بقي هيدعو الناس ويوصل رسالته!؟
💢 💢 💢 💢 💢 💢 💢 💢 💢 💢 💢
