رواية القاسيان الفصل الثالث عشر
سما بإستغراب : هتعمل ايه ؟؟؟
• هقتل يوسف !!!
سما : تبقى اهبل لو عملت كدا
• ليه !!!
سما : البوليس هيبصلنا وماتنساش ان يوسف، الظابط اللى اسمه محمد ده قعد معاه وكان شاكك انى اللى قتلت سهى واكيد واقف مع يوسف علشان كدا نافش ريشه علينا
• وانتى رأيك ايه ، الحل معاه ؟
سما بإبتسامة : حبيبة قلبه سهوة
• نخطفها ونساوموا بيها
سما : بالظبط بدأت تفهمنى اهو
• وهو هيعمل اللى احنا عايزينه علشان يرجعها ؟
سما : هيعمله وزيادة كمان ، ده بيعشقها وهى نقطة ضعفه والمثل بيقول شوف نقطة الضعف فين واضرب
• كلامك تمام اوى
...............
روح يوسف بعد ما جاب الفيلا لسما وطلقها وقالها الكلام اللى راحت قالته للى شغالة معاه .... فضل يوسف يفكر كتير واتكلم مع ابوه شوية وفضل يلف شوية من التفكير وفى الاخر دخل الاوضة بتاعته واتصل بسهوة
يوسف : وحشتينى اوى
سهوة : لحقت اوحشك، مانا كنت معاك الصبح
يوسف : انتى بتوحشينى كل ساعة ...كل دقيقة .....كل ثانية ...
ضحكت سهوة : كفاية انا مش اد الكلام ده
يوسف : امال انا اللى اده ، انا برتجل يا قلبى
سهوة : طيب ارتجل يا حبيبى
يوسف : انتى عارفة
سهوة : امممم
يوسف : كلمة حبيبى طالعة منك عسل اوى
سهوة : .........
يوسف : فينك يا سهوة ، سهوة !!!!!!
فجأة ظهر صوت سهوة بتصوت جامد اوى وبتقول : الحقنى يااا يوووسف ، الحقنييييييي
اتنفض يوسف من مكانه وقال بصوت عالى : سهوة ، انتى فين ، حصل ايه ردى عليا
لكن الصوت اختفى قام يوسف فى لحظة ونزل جرى وسأله رأفت ورباب حصل ايه لكن ماردش على حد وجرى زى المجنون على برا وركب العربية وطار بيها بسرعة جنونية ووصل لبيت سهوة وخرج من العربية وطلع على فوق زى المجنون
لقى الباب مكسور ومفتوح ودخل لقى الشقة مكسرة ولقى نيرة قاعدة على الارض وحاطة دماغها مابين رجليها وبتعيط
يوسف بصدمة : نيرة
نيرة بعياط : سهوة يا يوسف خطفوها ، خطفوووها
يوسف : اهدى يا نيرة بس وقوليلى مين دول اللى خطفوها !!!
نيرة كانت بتعيط وتنهج جامد : ناس ....ناس مغميين وشهم ودخلوا وضربوها على دماغها واغمى عليها وجيت اتصدى ليهم واحد منهم زقنى جامد وخبطت فى الحيطة وخدوها ومشيوا ، انا عااايزة اختى يا يوووسف ، عايزة اختى.....
يوسف دماغه بقت مشتتة ومش عارف يفكر ازاى وهيعمل ايه
يوسف : ماتقلقيش يا نيرة ماتقلقيش، سهوة هترجع ، والله هترجع.... تعالى انتى بس معايا مش هتقعدى هنا تانى
نيرة بدموع : حاضر
نزل يوسف وخد نيرة معاه وركب العربية وفجأة لقى البواب بتاع العمارة راجع وكان الجو هوا جامد وبرد ومطرة شديدة جدا والشوارع غرقانة وصوت الرعد ونور البرق كان شكله مخيف ومسيطر على الشوارع
نزل يوسف من العربية وراح جرى عليه
يوسف بعصبية : كنت فين !!!!
عم حسين : لقيت انسة سهوة ناس شايلينها وخدوها فى عربية ومشيوا، جريت وراهم بس هربوا يا يوسف بيه
يوسف بعصبية : ماشوفتش نمرة العربية كام !!!
عم حسين : للأسف يابنى مكانش عليها نمر
حس يوسف ان كل الابواب بتتقفل فى وشه ورجع تانى للعربية وحس ان نيرة بردانة جدا وبتترعش
قلع يوسف الچاكت بتاعه واداه لنيرة
يوسف : خدى البسى ده يانيرة عقبال ما نوصل
نيرة : حاضر
انطلق يوسف بالعربية ووصل الفيلا
اول ما دخل الفيلا كله جرى عليه
رأفت : فيه ايه يابنى
رباب : حصل ايه !!!
يوسف بحزن : سهوة اتخطفت
رأفت : ايييه ، مين وازاى
يوسف : هيكون مين يعنى يا بابا، مانت عارف لما رفضت قالوا يلووا دراعى
جودى : تعالى يا نيرة ماتقلقيش تعالى ، هتقعدى معايا فى اوضتى
رأفت : ماتقلقيش يا حبيبتى اختك هترجعلك
اتحركت نيرة وطلعت مع جودى وكانت عنيها مليانة دموع
اسماء : يعنى هم خطفوها علشان رفضت اللى اتفقتوا عليه
يوسف بحزن : ايوة ، مش عارف افكر ازاى ولا اعمل ايه ، مش هسامح نفسى ابدا لو سهوة جرالها حاجة بسببى ...مش هسامح نفسى
رباب : اهدى بس يابنى هترجع ان شاء الله ، غير بس هدومك علشان غرقانة مطرة علشان متاخدش برد
رأفت : اطلع غير هدومك ونام والصبح نبقى نشوف هنعمل ايه
طلع يوسف على السلم وهو بيقول بحزن : ومين هيجيله نووم
طلع يوسف ودخل اوضته وهو بيفكر وخايف جدا على سهوة
معقولة اول ما يقرر وقلبه يحب، تحصل حاجة تمنع الحب ده ؟؟؟
معقولة اللى حبها الحب ده كله تضيع منه كدا !!!
معقولة هو يكون سبب فى اللى بيحصلها ده
، يااارب
انا مش هساااامح نفسى لو جرالها حاجة بسببى
لو اعرف بس هى فين والله لأروح اجيبها واقتل اللى يقف قصادى
فضل يوسف طول الليل يفكر ومش قادر يستوعب حاجة لغاية اما قرر قرار واحد ومالوش رجعة
اول ما النهار طلع لبس يوسف ونزل وركب عربيته وراح على الشركة
وصل الشركة واتصل بعمر اللى استغرب ان يوسف بيرن عليه بدرى اوى كدا ويوسف قاله يجى على الشركة، وصل عمر وهو مش فاهم فيه ايه
عمر : حصل ايه يا يوسف خضتنى ومصحينى وجايبنى على ملا وشى
يوسف : خطفوا سهوة يا عمر
عمر : اية ...مين دول
يوسف : هو فيه غيرهم يا عمر
عمر : امتى الكلام ده
يوسف : امبارح بالليل ومانمتش طول الليل من التفكير
عمر بقلق : ربنا يستر ، بس اكيد هيكلموك
يوسف : وانا مش هستنى لما يكلمونى، انا قررت خلاص
عمر : قررت ايه يابنى
يوسف : هقولك بس فاكر الواد ايمن صاحبنا اللى كان بيسهر معانا ؟
عمر : ايوة مش ده اللى بيصرف السلاح وعيلته شغالين فيه
يوسف : ايوة بالظبط كدا
عمر : وده ماله
يوسف : عايزك تكلمه وتتفق معاه على حتتين سلاح ، مسدس ورشاش حديث اللى هو صغير ده
عمر : نهارك اسود انت هتعمل ايه
يوسف بضيق : عمر انت عايز تساعدنى ولا اروح اتفق معاه انا
عمر : خلاص خلاص كمل
يوسف : اتفق معاه وشوف هيتكلفوا كام وانا هدفع بس النهاردة قبل بكرا يا عمر
عمر : طيب ما تبلغ الظابط
يوسف : والظابط هيعمل ايه ، يلا بس اتصل بيه ولو ماردش روحله ، يلا انت لسة واقف
عمر : حاضر
مشى عمر وقام يوسف وخرج واتصل بواحد على التليفون واتفق معاه يجيله على كافيه هو عارفه وراح ولقاه مستنيه
خليل : ايوة يا يوسف بيه
يوسف : انا عايز اعرف الارض اللى انت جبتهالى دى، فيها ايه بالظبط يا خليل
خليل : فيها ايه بس يا يوسف بيه ، حضرتك طلبت ارض كبيرة فى حتة كويسة وانا جبتلك وحضرتك هتبنى مدينة كاملة عليها، مالها بقا
يوسف : فيه ناس كل شوية عايزين ياخدوها عافية منى وخطفوا حد عزيز عليا بسببها ، ما هو مش معقولة الارض يعنى ، اكيد فيها حاجة
خليل برق وفهم : تعالى معايا يا يوسف بيه
ركب خليل مع يوسف فى العربية واتحركوا وراح يوسف على مكان خليل قاله عليه
يوسف : ايه المكان ده ومين اللى انت مودينى عنده ده
خليل : هتفهم يا يوسف بيه انزل بس وادخل معايا
دخل يوسف مع خليل بيت قديم وكان متعلق فى كل حتة جماجم وعضم وقرون ومكان مش غريب على يوسف
يوسف : انت جايبنى عند دجال ؟
خليل : ده اللى هيعرفلنا الارض فيها ايه
يوسف : ازاى يعنى
خليل : هتشوف
دخل خليل وفعلا كان دجال ونفس اللى بنشوفه فى الافلام بالظبط
الدجال : اتفضل يا خليل ، اتفضل يا يوسف
يوسف اتخض وبص لخليل نظرة فيها سؤال: وهو ازاى عرف اسمه ؟؟
الدجال : طبعا بتسأل نفسك عرفت اسمك ازاى صح ؟
يوسف : انت شايف ايه
الدجال : طبعا جايين علشان اعرفلكم الارض بتاعتك يا يوسف فيها ايه، صح؟؟
يوسف بضيق : قول للعفريت اللى بيكلمك انى عندى لسان اتكلم واقول انا جاى ليه، خليه يشوف وراه ايه ويسيبنا نتكلم
الدجال : هههههه حاضر
يوسف : بعد ايه ، انا جاى فعلا علشان موضوع الارض زى ما قالك الاستاذ عفريت
الدجال : والارض دى فين ؟
يوسف : هتيجى معانا وتعرف ولا ايه نظامك
الدجال : شكل حبيبتك المخطوفة مأثر عليك
يوسف : اممممم عرفنا والله ان العفريت قالك كل حاجة عنى هتيجى ولا امشى
الدجال : ههههه جاى
قام الدجال وخليل وركبوا مع محمد العربية وراحوا مكان الارض
ووصلوا ونزلوا من العربية وبصوا وكانت الارض كبيرة جدا جدا
الدجال : الارض كبيرة جدا جدا، ماكنتش اتخيل انها كدا
يوسف : ليه العفريت نسى يقولك انها كبيرة وهيتبنى عليها مدينة كاملة ؟؟
الدجال : لا ماقاليش
خليل : عايزك تعرفلنا بقا يا سيدنا ايةده اللى مدفون فى الارض دى
الدجال : وحلاوتى
يوسف : يا سيدى خلص وهديك اللى عايزه
الدجال فتح شنطة كان جايبها معاه وقعد فى الارض وفضل يقول كلام غريب ويكتب فى ورقة كلام ملخبط زى الطلاسم كدا وقفل الورقة وشال شوية رمل ودفن الورقة ورش مية عليها وفضل يكرر فى الكلام ونبش الرملة وطلع الورقة تانى وفتحها وابتسم
وقام وبص ليوسف
يوسف : فيها ايه
الدجال : حلاوتى الاول
يوسف : عايز كام
الدجال : 2000 جنيه
يوسف كان معاه المبلغ فى جيبه واداهوله
يوسف : هااا
الدجال : الارض دى فيها كنز
يوسف : كنز ايه ؟
الدجال : مقبرة مليانة كنوووز من العصر الفرعونى
يوسف : اثار !!
الدجال : بالظبط كدا ، اثار ودهب يوزنوا الارض دى كلها
يوسف : ده كله ؟؟
الدجال : ايوة والحلو فى الموضوع ان مالهاش حراسة من الجن يعنى لو حد حفر هيطلع الكنز ده كله بسهولة
يوسف : اممممممم علشان كدا بقا
الدجال : انا كدا مهمتى خلصت، يلا رجعنى بقا انا وخليل
يوسف : طيب اركبوا
ركبوا ورجعهم يوسف ورجع للأرض ووقف تانى وبص وجواه مليون حاجة وبيفكر مليون تفكير
لو خد الاثار والدهب ده كله هيبقى حرام عليه لان دى حاجة البلد ولو سلمها للشرطة هتتنهب والاثار هتتهرب برا البلد ويبيعوها واللى هيقبضوا الفلوس اللى مسيطرين على البلد والدهب هياخدوه الناس الكبيرة فى البلد وكدا محدش هيستفاد منها فى البلد، يعنى كدا كدا هتضيع واللى هياخدوهم اللى ماسكين البلد وناهبين خيرها
لكن الاهم انى عرفت هعمل ايه بالظبط ، الحاجة دى بتاعة الفراعنة يعنى اجدادنا وده ورث اجدادنا يبقى الورث ده يتوزع بالعدل
ايوة ده الصح بدل ما حد ينهب ده كله لمصلحته، يتوزعوا على المحتاجين والفقراء وعلى كل واحد فى البلد دى مش لاقى لبس ولا بيت يعيش فيه ولا لاقى اكل ياكله وبيموتوا فى البرد ده
هو ده الصح بجد
هو ده الصح
بس الاهم دلوقتى اخلص سهوة من اديهم واعمل اللى خططته وربنا يسترها
طلع يوسف الموبايل وكلم عمر
يوسف : ايوة يا عمر عملت ايه ؟
عمر : كله تمام والسلاح اللى انت طلبته جاهز كمان نص ساعة
يوسف : فين
عمر : ايمن بيقولك فى المكان اللى كنا بنسهر فيه علشان محدش يشك
يوسف : طيب تمام
قفل يوسف وركب العربية ورايح النايت كلب
رن موبايل يوسف وهو سايق
يوسف : ايوة
• بص بقا يا حلو، عايز سهوة تيجى المكان ده ----- كمان ساعتين بالظبط ومعاك عقد واوراق الارض كلها علشان تتباع بأسمى
يوسف : تمام بس اللى هيمس شعرة من سهوة اقسم بالله لأقتله
• ماتقلقش سهوة فى الحفظ والصون ، المهم ماتتأخرش وطبعا البوليس ميعرفش حاجة علشان حبيبة القلب ماتتقتلش
يوسف : تمام
قفل يوسف مع الشخص ده ودخل النايت كلب وسلم على عمر وسلم على ايمن
يوسف : فين
ايمن : طلعهم واداهمله ومعاهم شنطة رصاص
حط يوسف الرشاش الصغير والمسدس فى البنطلون وعدل التيشيرت
عمر : رايح فين
يوسف : رايحلهم
عمر : لوحدك انت عبيط يابنى
يوسف : لا مش عبيط
عمر : طيب انا جاى معاك
يوسف : لا طبعا مش هتيجى ، خليك هنا وانا هتصرف
عمر : لا يا يوسف مش هسيبك وجاى معاك
يوسف : لو عايزنا نكمل صحوبيتنا من الطفولة يبقى تعمل اللى بقولك عليه
عمر بحزن : طيب بس خلى بالك من نفسك
يوسف : حاضر يلا سلام
عمر : سلام
خرج يوسف وركب العربية العربية وراح على المكان ده وكان فى المقطم
خرج يوسف من العربية ووقف قدامها مستنى الناس دى تيجى
نور نور عربيتين جايين من بعيد ووقفوا قدام يوسف على بعد امتار وخرج منها شخص وحوله بودى جاردات كتير وشايلين اسلحة
• فين اللى قولتلك عليه ؟
يوسف : فين سهوة ، اشوف سهوة وتبقى فى حضنى الاول
• ههههه حق
شاور الشخص ده بأيده علشان يجيبوا سهوة من العربية وراح شخص يجيبها وطلعها من العربية
سهوة جريت على يوسف واترمت فى حضنه وهى بتعيط وحضنها يوسف جامد اوى وكانت وحشاه جامد
• معلش هقطع الفيلم الرومانسى ده ، فين الورق ؟
يوسف ساب سهوة وبصله وقاله : ورق ايه ؟
• وحياة امك ؟؟؟
رفع الشخص ده سلاحه وفى نفس اللحظة رفع يوسف سلاحه وده اللى خلى كل البودى جاردات توجه السلاح ناحية يوسف
وكان المشهد هو ان الشخص ده وجمبه كل البودى جاردات موجهين السلاح ناحية يوسف ويوسف، سهوة حضناه من ضهره جامد ومش عايزة تسيبه ويوسف موجه السلاح ناحيتهم !!!!!!!!
*****************************************************
