قصة رعب كاملة
كنت شغال في العالمين والسكن بتاعي انا وتلاته تانيين فى الصحرا، والسكن كان قدامه مقابر.
المقابر هناك كانت زي الحفر في الارض المتوفي بيدفن هناك ويحط قالب من الطوب وخلاص، دي طريقة الدفن هناك.
المهم الحته دي فيها قوالب طوب كتير انا واصحابي مكناش فاكرين او مش فاهمين ان دي مقابر في الاول، كنا فاكرينها علامات للطريق وكنا بنعدي منها كتير.
فى يوم كنت سهران وبنسمع ماتش وروحنا السكن كانت الساعه 1 الصبح كان في راجل واقف في المكان او المقابر اللي مكناش نعرف انها مقابر، تمثال بيتحرك و لا بينطق بعدها اتحرك حركه غريبه شوية، وكان في كومه من الطوب اختفي وراها.
احنا قلنا ملناش دعوه ده مجنون ولا ايه، روحنا السكن لاننا تعبانين و عايزين ننام، الحقيقة كان كل واحد فينا خايف ومش عايز يفتح الموضوع مع التاني، واحنا قاعدين ومشغلين المروحه النور كله فصل، لكن المروحه فضلت شغاله سمعت صوت حنفيات المياه كلها بتشتغل، صوت حجات بتتكسر كتير احنا الاتنين زي الخرس خايفين نتكلم.
لحد ما سمعنا حد اتحرك فى الاوضة عارف رجلين لما تكون ماشي فى الاوضة حافي او انت في الاوضة وفي حد ماشي حافي جنبك، صاحبي اتكلم وقالي هو انت اتحرك عايز اقوله لا وخايف اقول اه وتحصل كارثه، رد عليا انت اللي ماشي ولا مين، صرخه خلتني قومت نطيت من مكاني وطلعت برا لما طلعت برا لقيت صاحبي واقف.
قلتله انت خرجت امتي قلي قبلك من شوية، بقوله من امتي يعني قالي اول لما النور قطع خرجت، بعدها لقيت صاحبي طالع من الأوضة بصيت ورايا ملقتش اللي كان واقف، فضلنا طول الليل قاعدين برا.
تاني يوم بعد ما خلصت شغلي حاولت اتناسا الموضوع، حلمت اني ماشي في طريق غريب، والارض مشققة من الجفاف، وسمعت حد بينادي عليا، ولقيت راجل قصير القامة وفى دماغة علامه تلت خطوط متوازية، وايديه طويله واصله لحد الارض، ملامحه مش واضحه، وعمال ينادي عليا بأسمي وانا بحاول اجري لكن جسمي متخشب.
عارف الكابوس اللي بيجيلك اكن كلاب بتطاردك او جن ومش عارف تتحرك جسمك كله مشلول، هو ده اللي كنت فيه فضل يقرب يقرب يقرب لما قرب مني ملامحه وضحت، صوته غريب فتح بوقه وسمعت الصوت ده، فوقت بعدها من الكابوس.
تالت يوم كنا معدين من الطريق بليل بدأ طوب يتحدف علينا، وسمعت حد بيهمس فى ودني متمشيش من هنا تاني، بصيت حواليا عشان اعرف مصدر الصوت مفيش، طلعنا نجري.
شوفت راجل عجوز شاف منظرنا قال في ايه حكيناله قال يا اولاد الطريق اللي بتمشو فيه ده ترب ميتين، انتو كده بتأذوهم و بتمشو عليهم، انت تعرف لما تركن عربيتك علي قبر او تمشي عليه او تسند حتي علي القبر، انت كده بتأذي الميت.
لما حكينا لزمايلنا و كانو تلاته قالو نفس الرد.
احنا مكناش نعرف انها مقابر لان مفيش حد يقولنا، وبعدين راجل عجوز مين اللي انتو شفتوه.
بدل ماتدور وتبحث علي الروايات خليها علي تليفونك وحمل تطبيقنا
