رواية غويشه صينى الفصل الثاني بقلم شهد محمد موسى
_كُنت عارفة إنك هتيجي أكيد حبيب القلب كَل......
_قاطعتها وأنا برفع في وشها إللي جوا الكيس و دموعي بتنزل: ممكن أفهم إي دا!!؟قوليلي حاجة غير إللي في دماغي!!؟
_إتكلمت بتلعثم: روميساء..أنا يعني أنا..مِش إللي في دماغك أبد..أنا..أنا مستحيل أعمل كدا فيكي..صدقيني
_ضِحكت بسخرية ودموعي زادت وإتكلمت بقهر: مصدقاكي يا حبيبتي مِصدقاكي...أكيد دي صدفة وإنتِ بس مِشتريه واحده شبهها عشان عجبتك مِش كدا!!؟
_رَدت بسرعة وهي بتحاول تبتسم:أيوة بالظبط كدا زي ما قولتي هي فعلا كانت عجباني وأنا قولتلك كدا قبل كدا فَـ فـَ عشان كدا يعني جِبت واحده شبهها
_قربت منها ونِزلت بإيدي علي وشها وزعقت بصوتي كُله: ليه؟ ها؟ ليه أنا عملتلك إي عشان تِعملي كدا!!؟ دا جزاتي عشان إعتبرتك أختي وكُنت بقولك علي كُل حاجة!! وأمنتك علي حاجتي وأسراري ودخلتك بيتي وإمي إعتبرتك إختي التانية إللي مخلفتهاش!! دا أنا أنا بتخانق مع أدهم عشانك!! تقومي تِعملي كدا!!؟ تقومي تِسرقينا!!! طَب كُنتِ إسرقينا في صمت ومحدش أبدا كان هيشك فيكي!! لكن تِسرقينا وتحطي واحده شبهها!! طب عشان إي طيب ؟ إيه إللي كُنتِ عايزة تستفاديه!!؟ إنطقي!!
_لَقيتها بَصتلي بِـ كُره ودموعها بتنزل وأتكلمت بغل: عشان إنتِ دايما بتاخدي كُل حاجة حلوة مني!! كُل حاجة بحبها بتاخديها عندك أب وأم بينهم قصة حُب عظيمة حُفظتها مِن كتر ما بتكرريها!!! و بيحبوكي ومخلينيك عايشة مَلكة مِش محتاجة لأي حاجة و لا لأي حد لكن أنا!!! زي إللي عايشة في سجن!! محدش فيهم مهتم لوجودي أصلا بابا كُل شوية يتجوز علي ماما ويحرق قلبها!!! وهي مَشغولة ببابا وجوازته محدش فيهم إداني الحُب إللي بيديهولك أهلك!!! إنتِ متمرمطيش في المَحلات وشُغل المصانع عشان تجيبي فلوس تعرفي تصرفي بيهم علي نفسك!!! إنتِ مولودة في بؤك معلقة دهب!! "كَملت بِغل وحزن وشهقات عالية" حتي لما جه يتقدملك حد إتقدملك مُهندس بيحبك ومرتبة حلو وبيرضالك الرضا ترضي!!! في كُل مره كُنتِ بتيجي تحكيلي عن علاقتك بيه وأد إي هو بيحبك وبيجبلك هدايا وبيخرجك كُنت بتمناه لنفسي فيها!! وبفضل أسأل نفسي هو أنا وحشة للدرجة دي عشان متحبش!! هو أنا وحشة أوي كدا عشان أدهم يحبك إنتِ وميحبنيش!! علي الرغم إني أحلي منك وأذكي منك ومع ذلك بصلك إنتِ!!"كَملت بغل وهي بتمسح دموعها بعنف" اه يا روميساء خدت غويشتك وبدلتها بواحدها شبهها صيني عارفة ليه؟ مِش عشان فلوس لاء أنا أعرف أجيب الفلوس مِن الهوا مِش مضطرة أسرق أنا خدتها عشان أبعد أدهم عنك!! عشان تفتكروا إنه غشكم وتحصل بينك وبينه مشاكل ولما حسيت إنك مش مقتنعة إنه هو إللي عملها قولت أتصرف أنا وأخليه هو إللي يبعد وأجرسه في الشركة!!عشان هو كتير عليكي أصلا ومتستاهليش كُل الحلو إللي بيعملهولك كُل دا المفروض يبقي بتاعي أنا هو يستاهلني أنا!! مِش إنتِ فاهمه يستاهلني أناا!!!
أنا كُل دا بسمعها بصدمة وذهول ودموعي بتنزل في صمت للدرجادي أنا كُنت مغفلة ومِش شايفه حقيقتها!!؟ بس أنا ليه حاسة بالذنب والتعاطف معاها دلوقت!!! ليه حاسه إنه أنا السبب في الحالة إللي هي وصلتلها وتفكيرها الحاقد دا!!؟ مِش يمكن لو مكنتش دخلتها في حياة بابا وماما وعرفتها تفاصيل حياتهم مكنتش هتفكر بالشكل دا!! ومكانتش هتقارن أهلها بأهلي!! مِش يمكن لو مكنتش بحكيلها عن أدهم مكنتش إتمنته لنفسها ومكانتش حبيته!!! أنا بأي حق المفروض ألومها دلوقت!! وأنا أساس الغلط أنا إللي المفروض كُنت أسمع كلام أدهم لما كان بالنفس البشرية ضعيفة يا حبيبتي ولو حد محروم من حاجة وهي موجودة عندك وبتفضلي تتكلمي كتير عنها غصب عنه هيتمناها لنفسه وفي إللي نفسه ضعيفة أوي لدرجة إنه هيعتقد إنك واخده الحاجة دي منه وهيحقد عليكي وهيحاول تخليها تروح من إيدك عشان في إعتقاده إنها هتبقي بتاعته هو!!! أدهم مغلطش لما قالي تفاصيل علاقتنا تِفضل بينا ومينفعش صحابك يعرفوها!! ولا أي مخلوق أنا الغلطانة مِش هي!! أنا إللي كُنت بأذيها وبوجعها مِش هي!! أنا أساس كُل دا!!
محستش بنفسي أنا بعمل إي لقتني بقرب منها وبحضنها جامد تحت صدمتها مِن رده فعلي وهمست بندم:أنا أسفة..أسفة ليكي علي كُل إللي أنا وصلتك ليه دا مِن غير ما أقصد
والله ما كُنت أقصد كِدا أبدا أنا كُنت بحكيلك وبتكلم معاكي بعشم لأني بعتبرك أختي!! عُمري ما كُنت أتخيل إني كلامي دا هيوصلك لكدا!!! لو كُنت أعرف إني هأذيكي بالشكل دا كُنت سِكت ومفتحتش بؤي بأي حاجة!! أنا أسفة إني محطتش حياتك وظروفك في الصورة أسفة ليكي...أسفة
عارفة إنه بعضكم ممكن يستغرب رد فعلي و يشوف إنه أنا مغلطش لأنه معظمنا عنده صحاب وبيحكلهم كُل حاجة ومحدش فيهم بيفكر كدا!!وسما هي إللي أصلها مِش كويس وعندها قابلية إنها تحقد وتكره بس لاء لاء وألف لاء حتي لو صحابكم إنتم شايفين إنهم مبيقارنوش نفسهم بيكم تبقوا غلطاانين وغلطانين أوي كمان!! لأنه إحنا بشر يعني نفسنا ضعيفة ضعيفة أوي وغصب عننا هنقارن نفسنا بس عارفين إيه إللي بيفرق بين صحابكم أو بينكم وبين سما!!؟ هو الرضا أهم حاجة إنك تكون راضي بإللي عندك فَـ حتي لو عملت مقارنة غصب عنك بس رضاك هيكون غالب وهتتمني من ربنا إنه يعوضك خير علي إللي مش عندك وهتتمناله هو كُل الخير إنه ربنا يزيده لكن سما كان عندها قنوط فأقرب فرصة جتلها وعملت مقارنة إتمنت الشر لغيرها!!! بس الغلط مش عليها لوحدها الغلط عليا أنا كمان لاني سمحتلها بالمقارنة!!!!
خلاصة الكلام إرضوا باللي في إيديكم وعلاقتكم الخاصة بشريك حياتكم تبقي علاقة سرية صدقوني هتبقي حياة أفضل ومشاكل أقل°°
إتصدمت برد فعلها لما لقيتها بتخرجني من حضنها بعنف وبتزقني جامد لدرجة إنه توازني إختل ودماغي إتخبطتت في حرف السرير وهي كَملت بغل وجنون وهي بتشد في شعرها: إنتِ إزاي كدا!!؟ ليه مصممة تباني إنك إنتِ الكويسة بس!! وأنا الوحشة!! إمتي هتخرجي من دور المثالية دا بقي!!!
_همست بضعف وأنا الرؤية بتاعتي شِبه بتنعدم: إلحق..يني!!
نطقتها وغبت عن الوعي وأخر حاجة شوفتها إنه سما جريت عليا وكانت بتنادي بإسمي بخوف...
______________________________________
_أنا فين!!"نطقت بيها وأنا بحاول أستعيد تركيزي والرؤية كانت بتوضح شوية بشوية"
_ حسيت فجأة بإيد بتمسك إيدي ووصلني صوته الدافي الحنون: إنتِ في المستشفي يا حبيبي متخافيش كُلنا جمبك..
_أنا عارفة الصوت كويس أوي دا صوت أدهم بس أدهم مستحيل يمسك إيدي وأنا مِش حلاله حاولت أركز أكتر في ملامح الوش وهَمست بضعف وأنا ببتسم : هو إنتَ أدهومي بجد ولا أنا بَحلم؟
_حَسيته بيبتسم و لقيته رفع إيدي شوية وباسها وهمس بحب: إنتِ عايزاه إي؟
_إتنهدت وهمست بضعف وأنا ببتسم: عايزاه حقيقة! أنا في أحلامي بس إللي بشوفك وإنتَ ماسك إيدي و بتحضني وبتبوسني ومِش بس كدا لاء كمان بترقص معايا سلو "ضِحكت بضعف وكَملت" وشرقي كمان وببقي محزّماك بالطرحة إللي فيها حاجات بتعمل خشخش دي وبيبقي شكلنا حاجة في قمة إستغفر الله العظيم يعني فأنا واثقة إني بحلم لأنك في الحقيقة مِش هتقدر تِعمل أي حاجة من دول دلوقت!!
لَقيته ضِحك جامد وقرب وشه مني وسند جبهته علي جبهتي بِخفه وهمس بحب ونبرة مرحة وهو بيداعب أنفي بأنفه: قوميلي إنتِ بس بالسلامة كدا وأنا "كَمل بخبث ورغبة وهو بيبص بعمق في عينيا"هبوس وأحضن وأمسك إيدك ورجلك وأي حاجة عايزاني أمسكها معنديش أدني مانع "ضِحك بخفة وكَمل " وزي بعضه هبقي أتحزم بالطرحة إللي بتعمل خشخش دي وهرقصلك علي "طب كُنتِ فين يا لاء لاء لما أنا قولت أه وكُنت فين يا عقلي لما لما مِشيت وراه" أنسب حاجة ممكن أرقصلك عليها لانه ساعتها أنا فعلا هكون إتخليت عن عقلي خالص
_ضِحكت بِضعف علي كلامه وكَملت مِن وسط ضحكي: ياااه بجد شكلك هيبقي مسخرة أوي "هِديت من ضحكي وكَملت بهدوء وأنا ببص في عينيه" هو دا بجد أنا مِش بحلم !!؟
_هَمس بحب: تؤ مبتحلميش دا حقيقة
_رديت بإستغراب: طَب لو حقيقة أنت إزاي قريب مني كدا!!؟
_ضِحك وبِعد عني وقال بمرح: هتعرفي إزاي دلوقت بس خليني أنده أبوكي وأمك من بره عشان خللوا
قرب من الباب فتحه ولقيت بابا وماما داخلين جري وبيقربوا مني !! إيدا يعني دا بجد؟ يا كسفتك يا حازم دا الواد كدا خد عني إني باد جيرل!! بأفكاري المنحلة دي!!
_حمدلله علي سلامتك يا حبيبة بابا
_ألف مليون سلامة عليكي يا قلب ماما
_إبتسمت بضعف ليهم و رديت: الله يسلمكم من كُل شر يا حبايب قلبي "كَملت بنبرة حزينة" هي فين سما؟
_ بابا مَشّي إيده علي دماغي بِلطف و رد بإبتسامة حزينة: في الأوضة إللي جمبك "بَصتله بتساؤل فَـ كمل" بعد ما جابتك هنا و رنت علينا أُغمي عليها ومامتها بتقول إنه الدكتور قال أنه عندها إنهيار عصبي ومِش عايزه تكلم حد ولا تشوف حد هو إيه إللي حصل يا بنتي لِكل دا!؟ وإزاي وقعتي وإتخبطتي في دماغك!؟
_عينيا إتملت بالدموع وهمست بضعف: بابا خلينا نأجل الأسئلة دي دلوقت أنا عايزة أشوفها!!
_أدهم حط إيده علي إيدي وقال بحنان: مِش هينفع تشوفيها دلوقت إنتِ بقالك يومين في شبه غيبوبة ولسة فايقة فمينفعش تقومي دلوقت إستردي صحتك الأول وبَعدين هنروح نشوفها
_ هزيت دماغي بِلاء و دموعي نزلت وهمست بضعف وحزن: لاء أنا عايزة أشوفها دلوقت!!
_رَد أدهم بحنان: هتشوفيها والله بس مِش دلوقت و عشان خاطري بَطلي جدال عشان هيتعبك أكتر وإسمعي الكلام عشان تِخفي بسرعة
حَقيقي مكنش عندي طاقة فعلا إني أفضل أجادل معاه فَـ لَفيت وشي بعيد عنه وحاولت أغمض عيني لأني حاسه نفسي دايخة بس فَتحت عينيا بسرعة و بصيت لبابا بإستغراب وإتكلمت: هو إنتَ إزاي سايبة ماسك إيدي كدا!!
_ضِحك وقال بنفاذ صبر: مهو المجنون دا جوزك خلاص
_رَديت بإستغراب وتساؤل: جوزي إزاي يعني وإحنا مكتبناش الكتاب!!!
_رَد بـِ غُلب ونفاذ صبر: لاء ما هو إتكتب خلاص!!
_رَدِت ببلاهه: يعني إي إتكتب !!؟ وإتكتب إمتي أصلا وأنا كُنت فين!!؟
_كَمل أدهم بمرح: إتكتب هنا امبارح يا حبيبتي و إنتِ نايمة!!
_رَديت بسخرية : ومهانش عليكم تصحوني أحضر كَتب كتابي!! لاء إخص عليكم بصحيح مكانش العشم!!
_ضِحك وكمل بمرح: مَعلش يا عسل الوقت كان يدوبك
_حاولت أتمالك أعصابي ورَديت: أدهم أحسنلك متفتحش بؤك دا تاني دلوقت خالص عشان حاسه إنه هقوم أرتكب فيك جناية!!"بَصيت لبابا بضيق وكَملت" و إنتَ يا بابا وافقت إزاي تِكتب كتابي في المستشفي!! لاء والأحلي و أنا أصلا شبه مِش موجودة!!
_رَفع إيده ورَد بإستسلام: حُكم القوي بقي أعمل إي!؟ رَفضت وزعقت وعملت كُل ما تتخيليه بس إنتِ عارفاه زناان زن ولما بيقرر شئ فخلاص لازم يحصل "كَمل بحنان وهو بيبتسم وبيبصلنا" لولا عارف ومتأكد هو بيحبك أد إي إتأكدت مِن دا لما شوفت لهفته وخوفه عليكي وأد اي هو محتاج يبقي قريب منك عشان يطمن نفسه كُنت لا يمكن أعمل حاجة مجنـ ونة زي دي وأسمع كلام واحد مجنـ ون زيه
_كُنت بسمع بابا وانا مبسوطة...مبسوطة إي لاء أنا كُنت هطير مِن كُتر الإنبساط أدهم مجنون فعلا بس جنانه دا زي العسل بالرغم من سعادتي المفرطة إلا إني رَديت بغيظ: دا مِش مبرر علي فكرة!!
_أدهم بغيظ: بقولك إي أسكتي أحسن !
_رَديت بغيظ وصوتي عِلي: مِش هسكت يا أدهم!! إنتَ حرمتني مِن كَتبوا كِتابك يا نقاوة عيني!!! "خلصت الجملة وتأوهت بألم لأن حسيت بصداع جامد في نفوخي"
_أدهم رجع مِسك إيدي تاني ونطق بحنان: متتكلميش تاني عشان خاطري وأنا أوعدك يا ستي أول لما تخرجي بالسلامة هنجيب المأذون تاني ونكتب تاني وهشغلك كَتبوا كتابك يا نقاوة عيني وكُل إللي إنتِ عايزاه..."بص لبابا وكَمل " أنا هروح أنادي الدكتور
__________________________________________
_أنا وحشة صَح!؟"الجملة إللي هَمست بيها سما للدكتور إللي كان واقف قريب منها وبيطمن علي حالتها"
_إبتسم و رد بهدوء : هو عموما مفيش حَد وحش يا سما !! فأكيد إنتِ مِش وحشة
_سما دموعها نزلت و إتكلمت بصوت مهزوز: طَب أنا ليه شايفة نفسي وِحشة وبكرهني !؟ وليه بأذي الناس وبكرههم؟
شد الكرسي وقربه من سريرها وقعد عليه ورَد بهدوء: عشان إنتِ متعرفيش نفسك كويس ومِش عارفة هي عايزة إي بمعني تاني يا سما إنتِ نفسك تايهه عنك وإنتِ مِش مهتمه تِعرفي هي فين كُل إللي همك إنك توصلي لأهداف وهمية في دماغك وفاكرة إنك لما تحققيها كدا إنتِ تمام ومرتاحة بس الحقيقة إنك هتفضلي مِش مرتاحة!! هتفضلي حاسه إنك مقصرة هتفضلي شايفة إنه لاء مِش كفاية أوصل لدا ولازم أوصل لحاجة تاني ولو محققتيهاش هتكرهي نفسك أكتر وهتلاقي غصب عنك بتأذي غيرك لو لقيته محققها !! فمعني كدا إنه أذاكي للي حواليكي وكرهك ليهم نابع مِن إنك مِش لاقيه نفسك وبتكرهيها و بتعتبريها عدو ليكي وبيطبق عليكي في الحالة دي مَثل كدا بيقول:" الإنسان عدو ما يجهل " وبما إنك أصلا مِش عارفة نفسك ومِش متصالحة معاها فهيطبق عليكي باقي المثل إنه" من يُعادي نفسه، يُعادي من حوله، ومن يُعادي من حوله يكره نفسه بلا شك" حِبي نفسك يا سما ودوري عليها وإسأليها هي عايزة إي؟ مِش عقلك وإعتقاداتك عاوزين إي!! إبدأي رحلة إستكشافية لنفسك وعيشي فيها وصدقيني هتبطلي تكرهي نفسك وإللي حواليكي!! "كَمل بإبتسامة" هسألك سؤال وتجاوبيني عليه بصراحة"سما هزت دماغها بِـ حاضر وهو كَمل"
جربتي تِحبي حياتك وواقعك زي ماهو كدا!؟ وتِحبي الناس إللي حواليكي زي أصحابك مثلا زي ما هما كدا بعيوبهم و مميزاتهم مِش زي ما إنتِ حباهم يكونوا!؟
_سما ردت بنبرة حزينة ولكنها ساخرة في نفس الوقت ودموعها بتنزل: أبداً أنا بكره حياتي!! و بكره الواقع إللي عايشاه وبحاول أهرب مِنه بِكل الطرق المُمكنة مره بالنوم و مره بالشغل ومره بالتليفون أنا ممكن أقعد اليوم كُله مبعملش حاجة غير إني ماسكة التليفون وبعمل سكرول بلا هدف علي الفيس بوك!! ومره بهرب بقراءة كتاب أو رواية أو مقال أو إي حاجة أو للأدق بضحك علي نفسي إني بقرأ!! لأني ممكن أكون بقرأ اه بس تِحس إنه مفيش إستيعاب!! الكلام بيعدي زي الهوا كدا
يعني من الآخر مجرد تضيع وقت !!
"خدت نفس وكملت بنفس النبرة" أما بقي بالنسبة للناس فبردوا لاء غالبا أنا مبحبش حد !!فأنا دايما عايزة أكون أحسن من الكُل! مِش عايزة أكون أقل منهم بأي شكل مِن الأشكال وعشان كدا بلاقي نفسي غصب عني بقرب من الناس إللي بحس إنهم عندهم حاجة مِش عندي !! وبلاقي نفسي بأذيهم مِن غير ما أقصد!! "بكائها زاد وكَملت" أنا مش قصدي أذيهم والله بس عايزة الحاجة دي تكون ليا!! عايزة أكون أحسن منهم!!
_الدكتور خد نفس طويل وكَمل بهدوء: مِش قولتلك مِش لاقيه نفسك ومتعرفيش هي عايزة إي!! إجابتك أكدتلي إستنتاجي دلوقت إنتِ فعلا جاهلة نفسك أوي ومِش عارفة إيه الطريق إللي هي عايزة تمشي فيه وعشان كدا بتحاولي تدفينيها تحت عنوان إنك عايزة تكوني الأفضل والأحسن و بس!! "بصلها بجدية وكَمل بهدوء" إسمحيلي أقولك إنك مريضة نفسياً و هَلكتي نفسك وإستنذفتيها بشكل بشع لغاية لما نفسك إختفت وبقيتي بتكرهيهها !! لو كُنتِ جربتي ولو لِمرة تِحبي نفسك وتعرفي هي عايزة إي و تحاولي تحبي واقعك وترضي بيه وتحاولي تنسجمي مع كُل لحظة في الحاضر وتتأقلمي معاه بِحلوة و مُره وترضي بيه مِن غير ما تفكري إنه فيه أفضل منه وغيرك أحسن منك مكنتيش وصلتي لِكدا أبدا!! لازم تبدأي تدوري علي نفسك وتحاولي تستكشفيها وتتصالحي معاها وتعرفي هي عايزة إي ولما تلاقيها صدقيني الحياة هتختلف و نظرتك تفكيرك هيختلفوا كليا
"إبتسم وكمل" أنا الدكتور خالد دكتور أمراض نفسية أو دكتور المجانين زي ما بتسموه يعني "سما إبتسمت علي كِلمته وهو كَمل "هكون مبسوط لو سمحتيلي إني أساعدك تدوري علي نفسك وأنا مِش منتظر منك إجابة دلوقت فكري براحتك وأنا عيادتي موجودة في المستشفي هنا وتحت أمرك في أي وقت
قام بهدوء وأتكلم بأبتسامة: و علي فكرة حتي لو مخترتنيش إني أساعدك فلازم تدوري علي حد يساعدك لأنك بجد نفسك تعبانة ومحتاجة علاج والنفس دي زيها زي أي عضو في الجسم ولا تقل أهمية عنه بل ممكن تكون أكثر أهمية مِنه كمان لأنه لو نفسك تعبانه فتأكدي إنه تلقائيا هتلاقي نفسك بتعاني مِن كُل الأمراض الجسدية
" إبتسم و مشي كام خطوة ناحية الباب بس لف وشه ليها و كَمل بإبتسامة " أنا حقيقي مبسوط وفخور بيكِي جدا إنك إتكلمتي شوية وأقدر أقولك إنه تقدري تخرجي مِن المستشفي في الوقت إللي أنتِ عايزاه
خلص كلامه وخد بعضه وخرج وهي فضلت بصه في آثره و بتعيد كلامه في دماغها لأنه لمسها وحست إنه بيوصف حالتها فهي فعلا مش لاقيه نفسها!!
"النفس هي الوطن الذي نحمله معنا ولا يُغادرنا إلا عندما نُغادره. النفس كائن آخر يسكننا، هي ليست نحن، ولكننا قد نكون هي فعلينا دائما الإعتناء بها ومصادقتها و محاولة فهمها ومحادثتها والتفرغ لها فإذا فرغت لنفسك فسوف تتمكن من إصلاحها، ومن أصلح نفسه، فكأنما أصلح الناس جميعاً وكما قال الشاعر الجليل إيليا أبو ماضي في إحدي قصائدة"كُن جَميلاً ....تري الوجود جميلاً" "
_____________________________________________
_أدهم هو إي اللون الأحمر إللي علي قميصك دا!!؟"همست بيها بإستغراب لما جه قعد جمبي "
_...........
نستوب بقي عشان حاسه إني تِعبت😂♥️
تفاعلكم اللطيف بقي🥹♥️ ورأيكم وتوقعاتكم يا تري إي اللون الأحمر دا؟😂
وقولولي لو إنتم مكان روميساء رد فعلكم هيكون إي؟ ووروني كام روميساء موجودة معانا وهتتصرف نفس تصرفها😂♥️ وقوليلي هل في حد منكم قابل شخصيات زي سما في حياته🌚
*الثاني 🙊
يتبع
إسكريبت_غويشة_صيني🦋
#شهد_محمد _موسي
