رواية خارج عن السيطره الفصل الثاني بقلم عمرو راشد
الحقوووني حرامي.. حد يلحقني يا ناااس
" بصيت على مصدر الصوت لقيتها واحدة ست بتصرخ في الشارع وبتشاور على شخص بيجري ناحيتي.. قومت بسرعة وحاولت اوقفه ولكن هو كان اخف ف عدا مني بسرعة ولكن انا كملت وراه.. وشه مكنش باين.. كان بيجري بسرعة جدا.. عرفت اني مش هعرف اجيبه.. وقفت عشان اشوف هو هيروح فين و لقيته كمل جري و دخل شمال فقررت اروح من شارع جانبي بحيث اقطع عليه الطريق.. جريت بسرعة عشان اعرف الحقه واول ما وصلت للشارع الرئيسي اللي كان بيجري فيه ملقتش حد.. الشارع هادي تماما ومفيش أي حد فيه لحد ما سمعت صوت شد اجزاء المسد*س من ورايا ومعاها صوت بيقول
جاي ورايا ليه.. عايز ايه؟
= اااا.. انا
انجز
= انا مش عايز حاجة
طالما مش عايز حاجة.. جاي ورايا ليه
= حضرتك يعني سرقت الست اللي كانت هناك و دا ميصحش
وانت بقا الراجل الجدع الشهم اللي هيرجع حقها
= مكنتش جريت وراك كل دا
" استغليت كلامه معايا ولفيت وشي ناحيته وحاولت اخط*ف منه المسد*س ولكن كان هو أسرع مني وخب*طني ب ضهر المسد*س على دماغي.. وقعت على الأرض و بدأت افقد الوعي بس كنت لسة سامعه وهو بيقول
لو لمحتك تاني في اي حتة هقت*لك
" حاسس اني مبقتش واعي بأي حاجة حواليا وفعلا فقدت الوعي.. لما فوقت لقيت نفسي في مستشفى والممرضة واقفة جنبي
حمدالله على سلامتك
" قومت وانا ماسك دماغي وحاسس ب الم
هو مين جابني هنا
= في شخص هو اللي جابك بس مشي من غير ما يملى البيانات أو حتى يقول على اسمه وسابلك الورقة دي
" خدت منها الورقة.. فتحتها وبصيت فيها
مكنتش عايز أاذ*يك بس انت اللي خلتني اعمل كدا.. ياريت بقا منتقابلش تاني عشان المرة الجاية مش هضمن انا ممكن اعمل فيك ايه وعلى فكرة حساب المستشفى اتدفع خلاص.. حمدالله على السلامة
" الفهد....
" طلع اسمه الفهد.. بس حرامي جدع والله.. كان ممكن يسيبني ويمشي بس معملهاش وكمان دفعلي فلوس المستشفى.. بس ثواني ، هو في حرامي أصلا يعمل كدا ، الحرامي اول حاجة يعملها بعد ما حد يعترض طريقه انه بيضر*به ويجري لكن مبيقفش ويشيله ينقله المستشفى.. في حاجة غريبة... سندت راسي على المخدة وبدأت افكر
انت هتتجوز عليا يا خالد.. هونت عليك تتجوز عليا انا.. دا انا ريهام حبيبتك
= غصب عني يا ريهام والله.. مش بإيدي ، انا خلاص اتورطت ومش هينفع ارجع عن اللي بعمله
ف تقوم متجوز مرات اخوك.. انت ازاي فكرت ف كدا أصلا.. رايح تعمل كدا في أدهم اخوك اللي دايما واقف جنبك وبيساعدك.. بقا انت تتسمى اخ انت
= اقفلي الموضوع دا يا ريهام.. مش عايز فيه كلمة زيادة
ماشي انا مش هتكلم وهريحك مني خالص عشان الجو يبقا فاضي وتعرف تاخد راحتك.. انا هروح بيت اهلي
= ريهام هي مش ناقصة جنان.. اقعدي هنا وكفاية اللي حصل
الجنان حصل يا حبيبي خلاص.. حصل لما قبلت تتجوز مرات اخوك.. بس خلي بالك يا خالد غادة مش سهلة ومش هتعرف تضحك عليها واكيد هي عملت كدا عشان مصلحة ليها يعني بمجرد ما هتخلص المصلحة هترميك.. انا ماشية
" قامت من قدامي ودخلت الأوضة تلم هدومها.. مكنتش عارف اعمل ايه.. قومت وراها أحاول معاها تاني
يا ريهام اهدي وتعالي نتفاهم طيب
= رايح تتجوز عليا وتقولي اهدي. بتتجوز مرات اخوك وتقولي اهدي.. اهدا ازاي انا ، حتى لو هديت ووافقت وقعدت معاك.. ازاي هبقا هطمن على نفسي معاك وانت عامل كدا في اخوك.. ما بالك ممكن تعمل فيا انا ايه
انا مستحيل اعمل فيكي اي حاجة يا ريهام.. انا بحبك
= بتحبني تتجوز عليا صح.. عموما يا خالد الكلام دلوقتي مبقاش له فايدة.. انا هروح بيت اهلي ولما تعقل وترجع عن اللي انت بتعمله دا ابقا تعالى ونتفاهم
#بقلم : #عمرو راشد
" لمت هدومها وفتحت باب الشقة ومشيت.. انا كان مالي انا بكل دا.. انا تقريبا عمال اخسر كل اللي حواليا دا اذا مكنتش خسرتهم اصلا.. و اولهم اخويا اللي معرفش ممكن يكون عامل ازاي دلوقتي ولا حالته ايه.. حسيت الباب بيتفتح و لقيت اللي بتدخل منه وبتبص يمين وشمال
هي اتقمصت ومشيت ولا ايه ؟
= جاية ليه يا غادة
" قربت مني
جوزي وجاية اطمن عليك.. فيها حاجة دي
= لا مش جوزك.. انا مش جوزك يا غادة وياريت بقا تشيلي الفكرة دي من دماغك
انت ليه عايز تزعلني منك يا خالد؟
= تزعلي ولا تفرحي دا شئ ميخصنيش ولو سمحتي ابعدي عني وكفاية اللي حصل
شكلك بقيت تنسا كتير الايام دي.. ونسيت انا ممكن اعمل ايه
= هتعملي ايه يعني.. هتقولي ل مراتي انك شوفتيني مع واحدة في الشارع ، روحي قوليلها عادي هي في الحالتين با*يظة
لا ماهو أنا مش هقولها على كدا وبس.. انا هقولها كمان على اللي انت عملته معايا
= ايه اللي أنا عملته معاكي؟
هو انت مش نمت معايا وبقيت حامل منك
= نمت مع مين!!.. أنتي اتجننتي ولا ايه.. انا منمتش مع حد ، احنا اتفقنا هتحملي من غير ما يحصل بينا حاجة
واللي في بطني يا خالد
= انا ملمستكيش يا غادة
شوف مين هيصدقك بقا.. اسمع كلامي يا خالد وبلاش تنشف دماغك.. انت مبقاش ليك غيري خلاص يإما تكون معايا وساعتها هتكسب او تبقا لوحدك بس هتكون خسران كل حاجة.. تختار ايه
" بصيت في الارض
اعتبر السكوت دا علامة الرضا
= هنتجوز ازاي؟
عادي زي اتنين بيتجوزو
= هنتجوز ازاي و عدتك لسة مخلصتش
يا حبيبي هي العدة معمولة ليه أصلا.. عشان لو في حمل يبان وميحصلش خلط أنساب وبما ان اخوك مكنش بيخلف واللي في بطني دا ابنك اساسا يبقا نستنا العدة ليه
= انتي بتألفي دين جديد على مزاجك ولا ايه.. مين اللي قالك الكلام الفارغ دا
انا اللي قولته وبقولك ايه بقا.. انت هتمشي وتنفذ كل اللي انا بقوله دا لو عايزنا نبقا حبايب.. مش عايزة منك كلام كتير.. اوكي يا حبيبي
" خرجت من المستشفى تاني يوم.. المشكلة اني خارج ومش عارف انا هروح فين.. مش معايا فلوس وجعان جدا.. مكنش قدامي أي حل غير اني ارجع البيت بليل بعد ما كلهم ينامو وفعلا بمجرد ما الساعة دقت 1 بليل رجعت البيت وفتحت باب الشقة ودخلت.. بس مكنش في حد في الشقة.. مهتمتش.. دخلت خدت دش وخرجت لميت هدومي بسرعة وخدت فلوسي ومشيت.. نزلت على السلم لقيت اللي فتح باب شقته وخرج
أدهم
" كملت ونزلت ولا كأني شوفته
استنا يا أدهم بالله عليك
" وقفت وبصيت ورايا وقولت ب جمود
عايز ايه
= انت كنت فين
ميخصكش تعرف
= طب انت كويس
جدا
= طب بص امسك الفلوس دي ولو احتاجت أي حاجة كلمني
" مد ايده بالفلوس ليا.. بصتله ب استحقا*ر
رجع فلوسك في جيبك.. انا مش محتاج منك حاجة ولو انت اخر واحد على الأرض انا مش هاخد منك اي حاجة
= يا أدهم احنا اخوات
" سيبت الشنطة و قربت منه ومسكته من رقبته
لسة فاكر اننا اخوات.. مراتي حامل منك وتقولي اخوات.. انا لو بإيدي كنت دف*نتك دلوقتي بس انا مش هدخل السجن في شوية زبا*لة سواء كنت انت او هي
" سيبته و مسكت شنطتي ومشيت.. كنت محتاج اهدي اعصابي شوية وبالمرة هاكل لاني بقالي يومين مكلتش اي حاجة.. روحت على مطعم انا بحبه وبرتاح فيه.. المطعم كان في فندق كبير مشهور .. طلبت الاكل.. بعد شوية الاكل جه و اكلت وفضلت قاعد اشرب قهوتي ولكن لفت نظري حاجة غريبة.. كان في شخص قاعد شكله غريب لابس چاكيت اسود و حاطط على راسه الزونط بتاع الجاكيت.. وكمان لابس نضارة.. اللبس دا انا فاكره كويس.. وسط مانا كنت قاعد وبفتكر لقيت الشخص دا قام و مشي تقريبا رايح الحمام لكن بعدها ب دقايق النور قطع في المطعم ، دقيقتين بالظبط والنور رجع ومعاه شخص بيصرخ وبيقول
امسكوه.. حراااامي
" خرجت بسرعة من المطعم وانا بجري وراه.. بس عقبال ما خرجت برا كان اختفا.. فضلت ماشي و بلف في الشوارع عليه.. مكنش له اي اثر.. وقفت في مكاني ولسة هتحرك عشان ارجع المطعم لقيت الصوت ورايا بيقول
هو أنا مش قولتلك.. لو شوفتك تاني هقت*لك
" لسة كنت هلف وشي عشان اتكلم معاه لكن لقيته شد أجزاء المس*دس
حركة زيادة كمان وهتلاقي الرصا*صة في نص دماغك
= طب سيبني امشي واوعدك مش هقربلك تاني
سيبتك قبل كدا بس تقريبا دي كانت غلطة ولازم تتصلح.. جهز نفسك بقا عشان هتركب وتطلع على فوق!!
#عمرو_راشد
#خارج_عن_السيطرة 2
#يتبع
