رواية خارج عن السيطره الفصل الخامس بقلم عمرو راشد
وانت ماشي خلي بالك من البوليس.. انت دلوقتي واحد هربان واكيد بيدورو عليك.. ومتنساش برضو تخلي بالك من غادة ، مستحيل هتسيبك بعد اللي أنت عملته فيها دا.. وانت عندك حق انا عملت معاك الواجب و زيادة حبتين يعني لو خرجت من هنا يا أدهم انا مليش دعوة بيك تاني
" لفيت وشي و مشيت.. بمشي خطوة و اقف.. مش عارف ااخد قرار ، انا لو خرجت معنديش حد اروحله.. مفيش حد يساعدني وحتى لو حد ساعدني هيكون مستني مني مقابل.. الفهد هو الوحيد اللي وقف جنبي ومن غير ما يكون عايز مني حاجة.. وقفت مكاني وبصيت عليه
انا معاك وهكمل
= اهلا بيك.. اهلا بيك يا... يا نمر
نمر ايه.. انا مش النمر ولا عمري هكون زيه
= مطلبتش منك تكون زيه على فكرة
واعملي حسابك انا مش همشي في اي سكة شمال
= قولتلك انا بطلت يعني المفروض تبقا واثق فيا
وانا هثق فيكي ازاي وانتي..
= كمل سكت ليه.. حرامية صح ، بس على فكرة انا قولتلك انا بسر*ق ليه بس انت زيك زي الناس اللي برا بتعايرني عشان حكيتلك حاجة
انا مكنتش اقصد يا نادين.. انا اسف
= انا اسمي الفهد.. مش عايزة اسمع نادين دي تاني طالما انت طلعت منهم.. يلا ادخل نام دلوقتي عشان عندنا تدريبات كتير الصبح
" مشيت من قدامي.. مسكت ايدها بسرعة قبل ما تمشي
انا اسف
" شدت ايدها مني بقوة ومشيت وقالت
ادخل نام
" حسيت اني كان لازم فعلا اسكت و ادخل انام.. دخلت اوضة صغيرة وقعدت فيها بس مكنتش عارف انام.. فضلت قاعد لحد ما سمعت اذان الفجر.. قومت خرجت من الأوضة و روحت اوضتها ، خبطت عليها بهدوء لكن مكنش في رد.. دخلت لقيتها نايمة والغريب انها كانت نايمة بنفس لبسها.. مغيرتش هدومها.. قربت منها و ندهت بصوت واطي
نادين
" اتفاجأت بيها لما قامت بسرعة جدا و وجهت المسد*س في وشي
متخافيش.. دا انا
" نزلت المسد*س وقالتلي
عايز ايه
= كنت بصحيكي تصلي معايا الفجر
ومين سمحلك تدخل هنا أصلا
= انا اسف بس كنت عايزك تصلي
بعد كدا متدخلش الا لما تستأذن
= انا اسف مش هعملها تاني.. عن اذنك
" مشيت و كنت لسة هخرج من الأوضة لكن وقفت لما سمعت صوتها
استنا.. هو انت ممكن تعلمني ازاي
= ازاي ايه بالظبط
يعني ازاي اتوضا وازاي اصلي
= طبعا هعلمك
" علمتها الوضوء والصلاه.. كان باين انها اول مرة تصلي فعلا كأني كنت بعلم طفلة صغيرة.. كان فيها حاجات غريبة اوي بس مش وحشة.. هو دا اللي لاحظته فيها أنها رغم الظروف اللي مرت بيها هي لسة قلبها نضيف وممكن تتغير للاحسن.. كنت قاعد لوحدي لقيتها جاية وقعدت جنبي
احساس حلو انك تصلي دا
= ليه سيبتي نفسك كدا
محدش علمني.. محدش فكر يعلمني اصلا
= وانتي كنتي ممكن تفضلي العمر كله مستنية حد يعلمك
لا اكيد كان هييجي حد ويعلمني
= كان جه من زمان
طب ماهو انت جيت فعلا اهو
= بالصدفة.. احنا اتقابلنا بالصدفة
واحد زيك عمره ما كان هيقابلني الا بالصدفة
= واحد زيي!!.. يعني ايه
شخص كويس يعني
= طب ماهو أنتي كمان كويسة.. مفيش واحدة وحشة هتكون عايزة تتعلم الصلاه
ناس كتير بتكون وحشة وبتصلي عادي
= مش غلط ولا حرام انك تفضل فاتح باب بينك وبين ربنا حتى لو انت وحش
لا مش كدا.. هما بيصلو عشان يبعدو عنهم عشان اي شبهة
= طب وانتي يا نادين
انا ايه؟
= مش ناوية تتغيري
اتغير ازاي؟
= للاحسن
انا كدا احسن
= انتي بس اللي شايفة كدا.. اللي أنتي فيه غلط يا نادين و آخرته مش حلوة
وانت عايزني ابقا ايه.. عايزني اشتغل ايه ، موظفة اروح و ارجع بعد الضهر.. ولا اتجوز ولا انت عايزني اكون عاملة ازاي.. قولي
= عايزك طبيعية يا نادين.. ليه متبقيش طبيعية زي باقي الناس
بعد كل اللي حكيتهولك يا أدهم ولسة عايزني اكون طبيعية
= وفيها ايه.. كل واحد فينا شاف ظروف في حياته بس الشاطر هو اللي ميتغيرش
الكلام دا اكبر دليل يثبتلي انك مشوفتش يوم واحد وحش
= بطلي تحكمي على الناس من برا.. انا مش ملاك نازل من السما ولا واحد غني عندي فلل وعربيات عشان مشوفش يوم وحش.. دا حتى الاغنيا بيعدو بظروف وحشة عادي.. انتي بس اللي فاكرة انك لوحدك في الدنيا اللي عندها مشاكل
وانت كنت شوفت ايه انت.. ايه اللي مريت بيه عشان تتكلم
= انا اتحرمت من الخلفة.. مراتي كانت بتعايرني كل يوم بالموضوع دا.. اخويا و مراتي اتجوزو.. مراتي كانت حامل من اخويا وهي لسة متجوزاني.. كل دا ومشوفتش يوم وحش
مش قدي.. انا كمان شوفت كتير
= احنا مش في مسابقة عشان نزايد على بعض مين شاف اكتر من التاني
" قامت مشيت من قدامي
على فكرة انا بكلمك
= وانا خلصت كلام.. لو لسة عايز تتكلم عندك الحيطان اهي مش مقصرة معاك في حاجة
" كانت لسة هتمشي بس اتكلمت تاني وقالتلي
و اه لو أنت عايز تمشي امشي.. انا مش همسك فيك ، براحتك
= انا قاعد هنا عشانك
لو عندك امل اني اتغير تبقا بتضيع وقتك على الفاضي وصدقني الموضوع هيقلب معاك ب اننا هنكون اعداء في الاخر.. بلاش احسن يا أدهم.. بلاش تعمل عداوة معايا انا بالذات
" كملت ومشيت وقبل ما تدخل أوضتها وقفت في مكانها لما انا كلمتها
طب هو انا مش هبدأ تدريب؟
= ربع ساعة و اجيلك.. أجهز
#بقلم : #عمرو راشد
" بدأنا تدريب بالفعل.. شهر كامل وأنا بتدرب معاها.. كانت بتعلمني كل حاجة او بمعنى اصح كانت بتعلمني ازاي اكون زي النمر.. كانت حتى دايما بتناديني ب النمر في التدريبات.. مكنتش انا اللي في دماغها.. اللي كان في دماغها هو النمر الحقيقي اللي هي عايزة تعمل منه نسخة تانية.. بس كانت كل حاجة ماشية بشكل طبيعي لحد ما كنت قاعد في يوم.. كنت حاسس اني محتاج اغير جو.. قومت لبست و خرجت.. شافتني وانا بفتح البوابة وقالتلي
رايح فين
= مخنوق شوية.. هخرج اشم هوا ، تيجي معايا؟
لا انا عندي حاجات كتير عايزة اخلصها.. متتأخرش
" خرجت واتمشيت شوية.. كان في مكان بحبه و دايما بروحله لما أكون مخنوق أو هربان من حاجة.. النيل ، بروح اقعد قدامه ومتكلمش ، بفضل ساكت لحد ما احس اني كويس و اقوم بس المشكلة اني ولا مرة حسيت اني كويس بس كان بيبقا لازم اقوم.. قعدت وفضلت سرحان قدامه ساعة بالظبط بعدها سمعت صوت من ورايا
أدهم.. الحمدلله اني لقيتك هنا
" بصيت ورايا.. غادة.. اتعصبت وقومت من مكاني
انتي عايزة ايه.. جاية هنا ليه، سيبتلك الدنيا كلها ومشيت برضو جاية ورايا لحد هنا
= اسمعني بس.. احنا في مشكلة كبيرة أوي يا أدهم
مش عايز اسمع حاجة.. وأنا مليش دعوة بيكو تاني ، فاهمة ولا مش فاهمة؟
يا أدهم اخوك تعبان
" بعد ما كنت ماشي.. وقفت و اتجمدت في مكاني
تعبان ازاي.. انطقي
= اخوك عنده المرض الوحش ومش معانا فلوس نعالجه. انا كل يوم بجيلك هنا لان اخوك قالي ان دا المكان اللي بتحب تقعد فيه.. ابوس ايدك الحقنا يا أدهم.. اخوك بيمو*ت
" قررت انهي الصراع اللي جوايا بعد دقيقة بالظبط و رديت عليها
انا جاي معاكي
" مشيت معاها.. طلبت منها تروح توقف تاكسي وعقبال ما راحت كنت انا اتصلت ب نادين
ايوا يا نادين
= في ايه يا ادهم
انا رايح مع غادة اشوف اخويا.. بتقول تعبان وعنده المرض الوحش
= وهي جاية تقولك انت ليه ولا عرفت توصلك ازاي أصلا.. لا يا أدهم الموضوع دا فيه حاجة غلط.. انا مش مطمنة.. بلاش تروح أو تستنا لحد ما اجيلك
خلاص بقا يا نادين.. انا هبعتلك لوكيشن ، يلا سلام
بعدها لقيت غادة بتنادي عليا عشان اركب التاكسي.. ركبت معاها مشينا.. خدت بالي ان دا مش طريق البيت
هو احنا رايحين فين يا غادة
= اصلنا نقلنا ل بيت جديد و أجرنا الشقة اللي كنا فيها عشان نلاقي نصرف ونجيب علاج ل اخوك
" مكنتش مطمن لكلامها.. التاكسي وقف في منطقة شعبية وكانت غريبة عليا.. اول مرة اشوفها ، مشيت معاها لحد ما وصلت للبيت.. دخلت قدامي وانا دخلت وراها بس قبل ما ادخل كنت بعت اللوكيشن للفهد.. حطيت الموبايل في جيبي وكملت وراها لحد ما وصلنا للشقة.. فتحت الباب و دخلت.. دخلت وراها بحذر
اتفضل يا أدهم ادخل.. انت مش غريب
" وقعت على الأرض في ساعتها لان كان في شخص مجهول واقف جنب الحيطة وهو اللي ضر*بني على دماغي.. محستش ب حاجة بعدها.. لما فوقت لقيت نفسي مربوط في كرسي و غادة واقفة قدامي وخالد جنبها وفي 4 رجالة معاهم
صباح الخير يا أدهم.. ياريت تكون نمت كويس
= انتي قد اللي انتي عملتيه دا
اه قده ولو مش قده مكنتش عملته
= هتندمي يا غادة.. اقسم بالله هتندمي
ومين اللي هيندمني.. تكونش انت يا أدهم
" بدأت تضحك بصوت عالي وبعدها كملت
مش هتلحق يا أدهم لأنك مش هتخرج من هنا أصلا وابقا خلي الواد اللي كان معاك ينفعك.. انت فاكر بعد اللي أنت عملته فيا دا هسيبك
= انتي كنتي هتمو*تي وانا اللي منعته عنك
عشان غبي.. كان المفروض تسيبه يقت*لني
= هيحصل.. صدقيني هيحصل
وقبل ما يحصل بقا.. انت مش هتكون موجود
" بدأت تقرب مني والسكي*نة في ايدها.. لحد ما بقت قريبة مني جدا بس فجأه سمعنا صوت برا ، الرجالة اللي معاهم وقفو عند الباب.. ثواني و لقينا حد داخل من باب الشقة لابس قناع.. الفهد ، بس فجأه الرجالة ضر*بوه لحد ما وقع على الارض و اغمى عليه.. سحبوه قدامي و شالو القناع اللي على وشه.. لقيت غادة بتضحك
هو دا اللي كان هيلحقك؟
= لا.. مش دا
" ملامح وشها اتغيرت
مش دا ازاي.. امال مين
" فجأه باب الشقة اتفتح و اترمت قنب*لة دخان.. محدش كان شايف حاجة.. وفجأه الفهد ظهر من وسط الدخان.. بدأ يضر*ب الرجالة وطبعا مكنش في اي مقاومة لانهم مش شايفين حاجة لحد ما وصل ل غادة و ضر*بها بالبوكس.. وقعت قدامي في الارض.. مسكها من ايدها و حط السك*ينة على رقبتها
الغدر تمنه المو*ت يا رخيصة!!
#عمرو_راشد
#خارج_عن_السيطرة 5
#يتبع
