رواية ساظل ملكة قلبك الفصل السابع بقلم سحر سمير لطفي نصار
بسرعه قطع الحته المقطوعه من الدرل و ربط بيها رجلها
قلع جالبيته و لبسها لها و شالها علي أيده
و هما ماشين فجاه طلع عليهم قطاع طرق
و بصعوبه عرفوا يهربوا منهم
حازم وهو بيجري : و تقول لي ارض الحب يا شيخ ينعل ابو دي سافريه
احمد وهو بيجري ب سحر : مش دا كله تفكيرك و اختيارك اقولك ايه بس ما كنت ماشيتها عادي اجي البيت و اتقدم لازم الحوار دا كله
احمد معقب وهو بيبص ل سحر : بس كله يهون علشانها أن شاء الله هتبقي كويسه
رجعوا البيت تاني
جميله : سحر مالها
حازم : متقلقوش يا جماعه
احمد : عاوز مايه بارده بسرعه هعملها كمادات
سوسن وهي بتجري علي الثلاجه : حاضر حاضر
احمد طول الليل قاعد جنب سحر ببحط لها كمادات باردة علشان تنزل درجه الحراره وهي من علو درجه الحراره قاعده تخطرف بالكلام
جميله و حازم و سوسن و محمد كلهم قاعدين جنبهم
في الصباح
فوقت من النوم و انا حاسه بحد ماسك ايدي
لاحظت أن الكل حواليا استغربت هو ايه اللي حصل
بصيت لاحظت احمد نايم قدامي علي الكرسي و ماسك ايدي فعلا بقيت متاكده أنه فعلا بيحبني و اكيد هو اللي رجعني هنا امبارح واضح من ملامحه الإرهاق ودا لانه اكيد منامش طول الليل
تب دلوقتي انا اعمل ايه لازم يعرف الحقيقه اللي خبتها في قلبي طول السنين اللي فاتت
علشان معيشوش في وهم اني بحبه وهو يصدق بجد اني بحبه
لا انا مبحبش حد و قلبي اتقفل من زمان
حسيت اني مخنوقه بجد لسه الموضوع لحد دلوقتي و لما بفتكره بترجع لي الخنقه من تاني
انا لازم اقول ل احمد علي الحقيقه يمكن هو لما يسمعها يرتاح و يبطل يفكر فيا بدل ما يتعب نفسه
شديت ايدي منه لقته قام بفزع و نظراته كلها خوف عليا : سحر انتي كويسه
رديت عليه بصوت واطي لاني مش عاوزه حد يصحي : انا كويسه متقلقش معلش تعالي عاوزه اتكلم معاك
حسيت أنه فرح اول ما قلت كدا و قام بسرعه و انا قومت كنت حاسه بوجع رهيب في بطني بس ما زلت بتجاهل و هفضل اتجاهل لاني مش ضعيفه و عمري ما كنت و لا هكون ضعيفه قدام حد حتي لو اقرب الناس ليا
قومت و طلعت معاه و قعدنا علي مصطبه قدام البيت
كان مهتم و نظراته عليا عاوز يعرف انا هقول ايه
قولت له : بص يا ابن الناس انا هحكي لك علي سري علشان بس متكسرش قلبك و تحبني و تستناني و انت تستاهل اللي تحبك بجد
من ايام ما كنت في ثانوي من و انا عندي ١٨ سنه كنت انسانه فضوليه اووي اي موقع يجي قدامي ادخله و اجربه لغايه ما وقع قدامي موقع......... الموقع دا كان موقع جواز المهم انا كنت لسه صغيره و معنديش خبره و فضولي جابني اني ادخل الموقع دا كنت بتفرج عليه و كان بيتبعت لي رسايل من ناس عاوزه تتعرف و وترتبط و انا علشان بنت مراهقه عمرها ما حبت و لا عاشت قصه حب في حياتها ففكرت ان دا فرصه ليها أنها تتعرف و تحب و في دماغها أن كل دا عادي ياما ناس عملت كدا
و عادي اتجوزوا
اهلي كانوا دايما مشغولين عني و انا من ناحيتي كنت بتهرب منهم علشان اكتشف الموقع دا لحد ما شوفته
و اتعلقت بيه
انسان حبيته من كل قلبي بجد كان اسمه حسام من اسكندريه كان عنده ٢٣ سنه اتعرفت عليه و اتعلقت بيه لدرجه كبيره من أول محادثه بينا كان قلبي بيوجعني لفكره أنه هيجي يوم و يبعد عني كنت خايفه جدا لدرجه اني كنت طول الليل افكر فيه و منامش حبيته اووي و اتعلقت بيه اووي
لحد ما جميله اختي اكتشفت دا
و هددتني أنها هتقول ل أهلي
مسكت تلفوني من ورايا و بعتت له رساله اني متقدم لي عريس و مش هعرف أكلمه الفتره الجايه لأن التليفون مش هيكون معايا و إن انا اسفه اني علقته بيا و أن ربنا يرزقه بالزوجه الصالحه و نهت بتحيه السلام و عملت له حظر
انا طول الليل كنت يعيط من قلبي انا حبيته و اتعلقت بيه بجد انا كنت بموت من وجع قلبي و اكيد هو مفكر دلوقتي اني خليت بيه و اتخليت عنه بس الحقيقه اللي ميعرفهاش اني كنت بموت من غيره
استغليت أنها كانت خارجه و دخلت مسكت تليفوني و حاولت افك الحظر علشان أكلمه بس هي كانت عارفه و مسحت الرقم
فضلت كتير ادور علي الرقم و احاول افتكر و آلف ارقام علشان اوصل له لكن عمري ما عرفت أوصله
كنت بموت حرفيا و مقهوره اووي يعني يا ربي يوم ما احب و افتح قلبي يكسر قلبي بالشكل دا
دخلت علي الموقع و دورت عليه كتير بس مفيش نتيجه
كنت بدعي ربنا أنه يبعت لي و لو بالغلط بس علشان افهمه اني مليش ذنب انا حبيته و الله اقسم بالله العظيم اتعلقت بيه و كان نفسي بس يعرف اني اقسم بالله عمري ما خليت بحد و عمري ما كنت عاوزه اكسر قلبه دا بالعكس أنا اللي انكسرت و انا اللي عايشه من وقتها هموت من وجع قلبي
اللي حب و انكسر
كنت بقلب بالصدفه في يوم و عرفت الحقيقه ان حرام شرعا أن البنت تكلم شاب من علي النت حتي لو كان الهدف أو النيه نيه جواز
سالت كتير شيوخ و كلهم أكدوا لي الحقيقه دي
دا غير أن الموضوع اصلا خيانه للاهل ان اهلك ادوكي ثقه و مسكوكي تليفون علشان في النهايه تخونيهم
من وقتها و انا كرهت كل حاجه
قفلت التليفون ل فتره بس غصب عني رجعت فتحته لأن كنت منتظره التنسيق و الكليه اللي هدخلها
من وقتها عمري ما بصيت ل حد كنت بمشي في طريقي و لو فيه مليون شاب قدامي عمري ما ابص لهم عمري
انا كرهت كل حاجه و مبقتش عاوزه اي حاجه من حياتي
كان نفسي بس يعرف اني كنت مجبره علي اللي حصل و اني كنت فعلا بحبه اقسم بالله محبتش حد قده في حياتي كلها
و لكن يظل الحقيقه اني غلطت و كنت طايشه و غلطت في حق ربنا اني اتكلمت معاه اصلا من غير ما يربطنا اي رابط شرعي و من ورا أهلي كمان
عرفت دلوقتي انا مش عاوزاك تتعلق بيا ليه او تحبني لاني مستحيل اتجوز في حياتي و مستحيل ادخل حد في حياتي بعده
خلصت كلامي و انا مش حاسه بدموعي اللي بتنزل بقيت بعد اللحظات و الايام و الليالي و اندم علي اللحظه اللي فتحت فيها الموقع دا و عرفته و كلمته
لحد دلوقتي فاكره كل اللي حصل و نفس الوجع اللي حساه و نفس الاحساس
...................
أتعلمون ما هو وجع القلب
فقط اسالوا قلبا تعلق ب شخص و اجبر علي تركه 💔💔
..................
بقيت بحاول اسيطر علي دموعي و من جوايا ندمانه اني فتحت الموضوع ده تاني
لانه فعلا جدد فيا الوجع و القهر
قاطعني احمد اللي لقيته بيمسح دموعه هو كمان تقريبا عيط علي عياطي و قال : ......
و قفت و من الصدمه مش مصدقه هو قال ايه ......
يتبع
روايه : سأظل ملكه قلبك
( اسطوره الحب )
الفصل السابع 🤍🤍
للكاتبه : سحر سمير لطفي نصار
