رواية خارج عن السيطره الفصل السابع بقلم عمرو راشد
الساعي قدامه خطوتين ويبقا عندك جوا.. خلص نفسك بسرعة
= انا مش لاقي الورقة
بسرعة.. الساعي واقف قدام باب المكتب
الو.. الو انت سامعني .. الساعي هيفتح الباب بقولك
" وبالفعل الساعي فتح باب المكتب و دخل وقفل وراه.. بعدها ب دقيقتين الفهد خرج من المكتب ومشي لحد ما وصل ل باب الخروج وخرج من البنك.. بصيت جنبي على شهيرة اللي كانت مستغربة من تصرفاتي
هو في حاجة يا أدهم؟
= لا لا مفيش.. بس جالي تليفون مهم جدا و لازم امشي
تمام.. اتفضل
= هشوفك تاني
" خرجت بسرعة من البنك و اتمشيت شوية لحد ما وصلت للفهد واللي كان راكب الموتسيكل.. ركبت وراه وجرينا.. وصلنا البيت
انا عايزة افهم انت بتفكر ازاي ولا دماغك دي فيها ايه
= في ايه اللي حصل؟.. مش انت جبت الورقة اللي انت عايزها
ف طالما جبت الورقة يبقا عادي وكأنه محصلش حاجة
= اه محصلش حاجة
لا حصل.. لما متاخدش بالك ان الساعي رايح المكتب الا وهو واقف قدام الباب يبقا حصل.. تقدر تقولي حضرتك كنت مشغول ف ايه؟
= مش مشغول ولا حاجة بس كنت قابلت واحدة صاحبتي معايا في الجامعة ووقفت اتكلم معاها
وقفت تتكلم مع مين؟
= معاها
" ساعتها كان ساند ايده على ترابيزة خشب كبيرة.. اول ما قولتله ضر*ب الترابيزة ب ايده.. حسيت انها اتقسمت نصين.. قرب مني وقال
وانت ازاي تقف تتكلم معاها.. ازاي أصلا تركز معاها و انا جوا ، ركزت معاها وسيبتني انا يتقبض عليا عادي
= مانا كنت واخد بالي
واخد بالك من ايه معلش.. واخد بالك من شكلك ، لابس كويس يعني.. انت لو كنت مركز وواخد بالك فعلا مكنتش غفلت عن الساعي اللي كان قدامه خطوة واحدة ويكشفنا.. حضرتك بقا سيبت العملية وقعدت تتكلم مع صاحبتك و طبعا قولتلها اسمك
= اكيد
بص يا أدهم.. دي اخر غلطة ليك معايا.. بعد كدا مش هتبقا موجود في المكان دا عشان مش انا اللي اقع في غلطات عبيطة زي دي.. انت عايز تحب براحتك بس برا مش عندي.. هنا مفيش حب ، انت واحد شايل كفنك على ايدك.. بنروح العملية ومش عارفين ممكن نرجع منها ولا لا ، عايز تسمع كلامي يابن الناس براحتك ولو مش عايز برضو براحتك بس متجيش تلومني على اي ردة فعل هعملها
= بتهد*دني يعني
لا انا مش بهدد.. انا هنفذ فعلا
= هو مش الموضوع عدا على خير يبقا خلاص ملوش لازمة اللي أنتي بتعمليه دا
عدا على خير عشان انا اللي في العملية دي مش حد تاني
فلاش باك
" الساعي فتح باب المكتب و دخل وهو شايل صنية عليها قهوة.. بص ليا واستغرب
انتي مين؟
= انا ابقا نعمات المسؤولة عن نظافة البنك
انا اول مرة اشوفك وبعدين هو مش عم فتحي هو المسؤول عن النضافة
= ماهو هما جابوني عشان اساعد عم فتحي
اممم.. وايه النضارة اللي على عنيكي دي
= اصل انا بعيد عنك عندي حساسية من الشمس.. والدكتور قالي لازم ابقا لبساها طول النهار
بس احنا جوا البنك يعني مفيش شمس
= صح بس فيه زحمة و الزحمة هتعمل حرارة في المكان والحرارة غلط على عيني
طب خلصي بسرعة وبلاش رغي.. المدير زمانه راجع
= انا خلصت خلاص.. عن اذنك
باك
يعني ما شاء الله عرفتي تهربي اهو.. امال عاملة مشكلة ليه بقا
= عشان دي اول مرة تحصل ومش هسمح أنها تحصل تاني
اتفقنا
= انا همشي دلوقتي.. هروح اسلم الورقة دي ل صاحبها
" ركبت الموتسيكل
بقولك ايه.. هما مش ممكن يكشفونا.. البنك اكيد مليان كاميرات
= كل الداتا اللي على الكاميرات زمانها اتمسحت
اتمسحت!!.. طب ازاي
= هو انا بشتغل لوحدي ولا ايه
معرفش الحقيقة.. انا كنت عايز اطمن مش أكتر
= لا اطمن.. انت مع الفهد
#بقلم : #عمرو راشد
" مشي وانا فضلت قاعد لوحدي.. مكنتش لاقي حاجة اعملها.. رايح جاي في المكان لحد ما افتكرت حاجة
فلاش باك
هتلاقيني قاعدة في كافيه اركان.. مبتحركش من هناك
باك
" أظن دلوقتي بقا واضح انا بفكر ف ايه.. قومت خدت دش و غيرت هدومي.. جهزت نفسي كويس وخرجت روحت على الكافيه اللي بتقعد فيه.. دخلت لقيتها قاعدة والويتر بيحط قدامها القهوة.. مشيت لحد ما بقيت واقف قدامها.. شديت كرسي وقعدت
لسة بتشربيها مظبوطة ولا غيرتي؟
= أدهم.. انت بتعمل ايه هنا
انا عديت بالصدفة من قدام المكان قولت ادخل اشرب قهوة
= بالصدفة هااا.. يعني مش عشان انا موجودة هنا مثلا
إطلاقا
" طلبت قهوة و فضلت قاعد اتكلم معاها اكتر من ساعتين.. مكنتش حاسس بالوقت وأنا معاها ، بنتكلم في اي حاجة وكل حاجة.. هزرنا وضحكنا وافتكرنا ايام الجامعة.. بعدها قومنا واتمشينا شوية لحد ما خدت بالي من الوقت.. الساعة كانت 10 ونص.. طلبت منها أنها تروح عشان متتأخرش اكتر من كدا.. وانا كمان مشيت رجعت على البيت.. اتسحبت بهدوء لحد جوا.. مكنش في حد في البيت ، كملت مشي لحد الأوضة لكن وقفت عشان لمحت نور اشتغل ورايا.. بصيت ورايا لقيته قاعد
اتبسطت؟
= اتبسطت ازاي يعني
اتبسطت معاها؟
= مع مين
مبكرهش في حياتي قد الكدب.. انت دلوقتي كنت فين
= كنت برا
برا فين.. مع صاحبتك صح
= وفيها ايه
مفيهاش حاجة.. بس انت حاليا في وضع تاني يعني لازم تكون واخد بالك من كل حاجة حواليك
= ما كفاية بقا يا نادين.. انا مبحبش الجو دا ، انا عايز اعيش براحتي ، مش هفضل مقضي حياتي كلها خايف وعامل حساب كل حاجة ، فيها ايه لو عيشت عادي زي البني آدمين
يبقا مكانك مش معايا.. انا وانت مختلفين يا أدهم مش هننفع مع بعض
= انتي اللي مش عايزة تجربي.. عايزة تفضلي طول حياتك بتجري وتهربي من كل الناس
طالما هكون كسبانة يبقا ايه المانع
= كسبانة ايه.. شوية فلوس يعني ، طب شوفي قصاد الفلوس دي ايه ، قصادها عمرك يا نادين ، عمرك اللي بيضيع على الفاضي
اني ارجع للناس حقوقها دي مش حاجة تستاهل اني اضيع عمري عشانها؟
= ربنا هو اللي بيرجع الحقوق مش أنتي
انا بعامل الناس بمعاملتهم يا أدهم.. يعني واحد حرامي وبيسر*ق الناس يبقا يستاهل اني اروح و اسر*قه.. هو دا العدل
= العدل انك تسلميه للبوليس.. احنا مش في غابة
وانت مروحتش ليه للبوليس لما مراتك وأخوك عملو فيك كدا
= كنت هروح اقولهم ايه
وانا كمان هروح اقولهم ايه
= اللي أنتي فيه غيري يا نادين
لا زيه بالظبط لو انت ركزت.. يعني شوف هما عملو فيك ايه ووصلت انهم كانو هيقت*لوك ولما جيت انا اقت*لهم انت رفضت.. رغم أنهم لو جاتلهم الفرصة تاني هيقت*لوك برضو
= عشان انا لو وافقت هبقا مفرقش عنهم حاجة
ف الحل انك تمو*ت بسبب انك مش عايز تاخد حقك من ناس ظلموك.. انت غبي أوي يا أدهم.. اوي
" مشيت وسابتني و دخلت اوضتها.. انا كمان دخلت اوضتي ونمت.. صحيت تاني يوم و خرجت من اوضتي ، دورت عليها بس ملقتهاش ، فضلت قاعد مستني أكتر من 3 ساعات لحد ما رجعت
كنتي فين
" مشيت و مردتش عليا و دخلت اوضتها.. دخلت وراها
بقولك كنتي فين
= ملكش فيه
يعني ايه مليش فيه.. هو مش المفروض اننا صحاب ولازم كل واحد يبقا عارف التاني بيعمل ايه
= وانا قررت انك متعرفش عني حاجة
و القرار دا خدتيه من امتا
= من دلوقتي او من ساعة ما فشلت في اول عملية.. تخيل انا افشل بسببك انت.. بسبب انك مش مركز.. والراجل جاب حد تاني هو اللي يخلص العملية بدالنا
مش فاهم.. هو مش أنتي لقيتي الورقة وكانت معاكي
= مش هي.. في حد راح و خد الورقة قبلنا
مين دا
= مش موضوعنا.. المهم اني فشلت ولاول مرة افشل في حاجة.. انا كنت غلطانة انت مينفعش تكون النمر ، النمر كان حاجة وانت حاجة تانية خالص.. انت صفر يا أدهم وانا حاولت اساعدك كتير بس انت مش قابل وعايز تكمل في دور الطيب البرئ دا ماشي مفيش مانع بس اعمل حسابك.. انت قدامك للصبح يإما تفوق لنفسك وتثبتلي انك قد اللي انت فيه أو هتمشي من هنا
" خرجت من اوضتها من غير ما انطق.. مكنتش عايز اقعد في البيت وعشان كدا خرجت برا واتمشيت بعيد شوية.. وانا ماشي جاتلي مكالمة من شهيرة
صباح الخير
= صباح النور
انت فين؟
= في الشارع
رايح الشغل؟
لا
= خدت اجازة من البنك ولا ايه
بنك ايه
= ايه يا ادهم.. هو مش انت قولتلي انك شغال في بنك
اه البنك.. ايوا خدت اجازة النهاردة عشان تعبان شوية
= الف سلامة عليك.. مالك
مرهق من الشغل
= طب ايه رأيك نتقابل في الكافيه.. نقعد نشرب حاجة وتحكيلي شوية
لا معلش يا شهيرة مش هقدر.. خليها يوم تاني
" قفلت معاها وكملت مشي.. حسيت انها زعلتها خصوصا ان مش دي حلاوة البدايات خالص بس مكنتش قادر فعلا اتكلم مع حد.. الساعة بقت 9 بليل ، قررت ارجع البيت لإني كنت تعبت جدا وعايز ارتاح بس لما رجعت لقيته قاعد مستنيني
يعني خرجت وسايب تليفونك هنا
= بقولك ايه يا نادين.. اي مشكلة عندك تتأجل للصبح ، انا تعبان دلوقتي
ماهو للاسف دي مشكلة تخصك انت مش انا
= مشكلة ايه دي
" مدت ايدها بالتليفون ليا.. كانت صورة واحدة
دي شهيرة
= لا دي غزال
غزال مين
= بإختصار كدا يا أدهم.. شهيرة عبدالرحمن زميلتك في الجامعة تبقا هي غزال.. وهي اللي سر*قت الورقة قبلنا!!!
#عمرو_راشد
#خارج_عن_السيطرة 7
#يتبع
