رواية رؤي الفصل الثالث بقلم شادي
قصة رؤى الحلقة الثالثة اتمنى منكم التفاعل
بدئت رؤي تحكي لمالك حكايتها من البدايه
:انا رؤي بنت وحيده معنديش اخوات كنا عايشين في قريه في الفلاحين ماتت امي بعد ولادتي بابا اضطر يتزوج عشان يجيب واحده تربيني بعد ماتوفت امي وانا رضيعه زوجة ابي رغم انها كانت مش بتخلف بس مشفتش منها اي حنيه وكانت بتعاملني كواجب بتعملو عشان ترضي ابويا بابا الله يرحمه كان طيب وحنون عليا بس شاءت الأقدار اني اتحرم منو هو كمان لما اتممت العشر سنين
لما راح في زياره لعمي في القاهره وتوفي في حادث القطار المشهور لو سمعت عنو زمان اصبح مليش في الدنيا غير زوجة ابي اللي هي كمان سابتني وسلمتني لعمي اللي عايش في القاهره وقالتلو دي بنت اخوك وانت اللي مسئول عنها بعد ما ابوها توفي مبقاش في حاجه تربطني بيها واخذني عمي كان عندو بنتين كبار هما اللي كانو حنونين عليا واصرو علي عمي يخليني اكمل تعليمي وساعدوني بس بعد ما اتجوزو وانا اخدت دبلوم تجاره زوجة عمي قالت كفايه تعليم كده اقعدي ساعديني في البيت انا محتاجه اللي يساعدني رغم اني جبت مجموع عالي وكنت اقدر ادخل كلية تجاره، لكن زوجة عمي اصرت .
عمي كان بيشتغل في قصر كبير لناس اغنيه هو كان اللي بيشرف علي الحديقه اللي فيها وبيزرعها وفي يوم من الايام عمي قالنا انا وزوجتو ان في حفله عيد ميلاد لأبن صاحب القصر ومحتاجين ناس كتير في المطبخ يساعدو وان لازم نروح معه عشان نساعد احنا كمان وانا فرحت اني هشوف القصر والحفله واشوف ناس جديده.
روحنا وكان في شغل كتير في المطبخ فعلا وكان مابين الوقت والتاني ابص من شباك المطبخ علي الحفله والشباب والبنات ولبسهم كان غريب والرقص حاجه كده زي اللي بنشوفو في التلفزيون وبعد شويه قولت لزوجة عمي اني تعبت و عايزه ارتاح شويه وهي قالتلي خلاص ارتاحي روحت غيرت ملابسي وظبطت شعري ونزلت اتفرج من بعيد وانا واقفه لقيت شاب بيبصلي من بعيد نظرات غريبه ومقرب عليا جه سألني مين القمر اتلغبط ورديت عليه
تقصدني انا ؟
ضحك ضحكه عاليه قالي لا بسأل القمر
لغبطني اكتر روحت جريت لقيتو بيجري ورايا وبيقولي تعالي بس انتي حراميه ولا ايه وقفت وقولتله لا انا مش حراميه انا جايه مع عمي صابر هو جنايني هنا قالي طب خلاص متخفيش مالك خايفه كده ليه؟
لا مش خايفه انت اللي شكلك غريب
ضحك اكتر ههههههه انا شكلي غريب لا بس دي حفله تنكريه وانا افتكرتك واحده من الشله لابسه لبس تنكري
قلت :فين اللبس التنكري ده ده لبسي عادي
قال :لا اقصد يعني لبسك بسيط عن الشله بتاعتي
قلتلو:اه تقصد يعني لبس فقير!
قال:لا مش القصد يعني بس تعرفي انتي احلي من اي واحده شفتها
خجلني جدا و قولت له طب بعد اذنك
رد وقال خلاص خلاص وشك احمر خالص معقول لسه في بنات بتكسف كده طب مش تسأليني انا مين مش نتعرف!
ونتعرف ليه انتو ناس واحنا ناس انا بنت بسيطه.
قال وده يخلينا منتعرفش؟ عادي بلاش الكلام القديم ده كان زمان ومش بحبو
يا ستي انا وليد الجارحي اللي عيد ميلادو انهارده ويسعدني ويشرفني اني اتعرف عليكي
ومد ايدو يسلم عليا
مديت ايدي وضحكت وقولتو وانا رؤي وكل سنه وانت طيب
رد وقال اكيد معاكي تلفون ممكن تديني رقمك ونبقا اصحاب اصلي ارتحتلك اوي ونفسي اتعرف عليكي اكتر وانتي شايفه جو الحفله هنا مش هعرف اسيب اصحابي كل ده ولا اقولك طلعي فونك يلا اكتبي رقمي ورني عليا
كنت كالمغيبه لم اشعر بما افعله تبادلنا ارقامنا وذهب.
وفضلت افكر فيه بعد ما رجعنا البيت ايه اللي عملتو ده عمري ما اتكلمت مع ولد ازاي اتكلم معه وكمان اديه رقم تلفوني وعمي لو عرف هيموتني طول عمرو قافل علينا ومش بيخلينا نعرف حد ولما اتعرف علي حد يبقا ابن صاحب القصر اللي بيشتغل فيه لا انا همسح رقمو ولو اتصل مش هرد عليه
وبعد صلاة الفجر لقيت الفون بيرن لقيتو هو معقول في حد يتصل دلوقتي قفلت الصوت قبل ما حد يسمعه فضل يتصل كتير لغاية ما سكت وبعد شويه الفون نور برقم تاني رديت
:يعني كده يا رؤي مش عايزه تردي عليا
رديت :اصل انا .....مش هينفع لو عمي عرف هيموتني
ومين اللي هيقول لعمك متخفيش طول مانتي معايا انا، الصراحه من ساعة ما شفتك وانا مش علي بعضي ومش مبطل تفكير فيكي حرام عليكي اللي عملتيه فيا
قولت له :انا والله ماعملت حاجه
ضحك وقال والله انتي عسل
وفضلنا نتكلم كل يوم وفضل يقولي كلام جميل يقربنا اكتر من بعض وبقينا نتقابل ونخرج ويغرقني بحبو واهتمامه بيا واتعلقنا ببعض اكتر واكتر
لغاية ماجه يوم زوجة عمي ندهت عليا وقالتلي عيزاكي
نعم يا مرات عمي
بصي يا رؤي انتي جالك عريس تعرفي الحاج صاحب محل الأثاث اللي في شارعنا راجل محترم ومقتدر وهيعيشك اميره
رديت:بس ده راجل كبير ومتهيئالي متجوز
هي :وفيها ايه لما يكون كبير ولا متجوز الراجل مش يعيبو غير جيبو وده يابت علي قلبو فلوس كتير وهينغنغك وبعدين عمك وافق خلاص والجمعه اللي جايه هيجي ومعاه شبكتك
قولتلها:لا يا مرات عمي انا مش موافقه
بقولك ايه انتي حالك متغير وعلطول خروج وحجج انتي حد كل عقلك ولا ايه من امتا عندنا بنات ليهم رئي عمك عارف مصلحتك واللي يقولو اللي هيمشي ومتنسيش احنا اللي ربناكي وصرفنا عليكي وقومنا معاكي بالواجب وخلاص كفايه علينا كده جه وقت نرتاح ونسلمك لراجل يشيل مسئوليتك بقا كفايه علينا كده يلا حضري نفسك بقا ليوم الجمعه وعمك سابلك فلوس تشتري فستان جديد ..
وتركتني في صدمتي وذهبت
اعمل ايه ازاي عايزين يرموني كده الراجل كبير ومتجوز ويقولو قامو معايا بالواجب لو بابا وماما موجودين كانو عملو معايا كده ياربي اروح فين ووليد يعني خلاص مش هشوفو تاني انا لازم اتصل بيه ولو يحبني هيجي يخطبني
اتصلت به:الو وليد عامل ايه
وليد:ايوه يا حبيبتي يا قمري عامله انتي ايه
انا عيزاك ضروري في موضوع مهم
في ايه يارؤي متقلقنيش حد زعلك
هقولك بس قابلني في نفس المكان اللي بنتقابل فيه هستناك بعد ساعه
قابلت وليد وحكتلو علي اللي حصل وغضب اوي وقال: ازاي يجوزكي يعني كده وراجل كبير ومتجوز ايه عمك ده معندوش قلب انا مش ممكن اسيبك حد ياخدك مني
قولتلو :يعني هتتجوزني يا وليد هتعرف تقنع والدك وولدتك تجوز واحده تبقي بنت اخو اللي شغال عندهم
وليد :ازاي بس اطلب اتجوز وانا في الجامعه وعمك كمان مش هيوافق يجوزك ليا هيخاف من بابا
رؤي: يعني هتسبني اتجوز الراجل ده هتتخلي عني
وليد:لا طبعا انتي بتقولي ايه مفيش غير حل واحد
ايه هو؟
انك تهربي ونتجوز من غير ما حد يعرف لغاية بس ما اخلص جامعتي واقولهم اني اتجوزتك واحطهم قدام الامر الواقع ولو رفضو هكون قادر اعتمد علي نفسي واشتغل ونعيش سوا وملناش دعوه بيهم
قولتلو:انت بتقول ايه اهرب ده احنا فلاحين وده عندنا فيها ق*تل البنت اللي تعمل كده بي*قت*لوها مش ممكن اعمل كده ابدا!
قالي:ايه الكلام ده محدش يقدر يعملك حاجه وانا عايش وبعدين انا هتجوزك في الحلال لغاية ما ارتب اوضاعي وتبقي مراتي قدام الناس وافقي مفيش غير الحل ده ولا عايزه تجوزي الراجل ده غصب عنك
