 |
رواية عمار الجحيم الفصل الثاني 2 بقلم محمود الامين#عمارالجحيم (أخطاء مميتة) #الجزءالثاني لقيت واحد بيرد عليا غير عوض وبيقولي _ انا كرم أخو عوض.. عوض أتوفي يا أستاذ امبارح _ أتوفي!.. أتوفي أزاي ده كان معايا أمبارح وكان كويس _ عوض ممتش موتة طبيعية.. أحنا لقينا جثته في المقابر وكانت راسه مفصولة عن جسمه ... انا شعر جسمي وقف لما سمعت الكلام ده.. يعني اي عوض مات مقتول طيب هو ممكن يكون مات بسببنا.. او بسبب البيت ما اهو اللي بيحصل في البيت ده مش طبيعي أكيد عوض كان عارف حاجة ومات بسببها ملهاش حل تاني قفلت الخط وانا مش عارف افكر حاسس بصداع رهيب دماغي هتنفجر مروة سألتني وقلتلي في اي.. مالك؟ رديت عليها وقولتلها _ مفيش.. عوض مات لقيوه مقتول في المقابر _ ينهار اسود.. وده ليه علاقة بينا؟ _ مش عارف يا مروة حاسس اني في كابوس _ لازم نعرف سبب الوفاة جايز يكون اتقتل عشان حاجه تاني ملهاش علاقة بينا _ هشوف الدنيا ربنا يسهل.. سبيني عاوز ارتاح شويه انا منمتش بسبب اللي حصل _ خلاص نام وان شاء الله ربنا هيعدلها .. نمت.. نمت نوم عميق أول مرة أنام كده من يوم ما نقلت في البيت ده.. صحيت علي صوت حاجه بتتكسر في المطبخ.. وسمعت صوت سلمي بتعيط قومت من علي السرير بسرعة عشان اشوف في اي بالظبط الصوت كان جاي من المطبخ.. دخلت لقيت بنتي واقفة في ركن وبتترعش وفي كوباية واقعة علي الارض.. قربت منها وانا بطبطب عليها وقولتلها مالك بتعيطي ليه؟ ردت عليا ببراءة وقلتلي _ الكوباية كانت في نص الترابيزة ومشيت لوحدها ووقعت علي الارض _ طيب اهدي شويه يا بابا.. يمكن الهوا وقعها تعالي معايا ... أخدت بنتي معايا بره المطبخ.. وبسأل نفسي طيب وبعدين هعمل اي وهتصرف أزاي؟ في الوقت ده أفتكرت الشيخ وليد.. معرفش ليه جيه في بالي وفي الوقت ده بالذات... قررت اني اروحله وأحكيله جايز يكون عنده الحل.. قولت لمروة تاخد بالها من العيال لحد ما ارجع.. رفضت تقعد لوحدها وقلتلي وديني عند أهلي لحد ما تخلص مشوارك وفعلا أخدتها هي والعيال يزوروا اهلها.. وأتحركت انا ناحية الحارة اللي عشت فيها سنين مرتاح البال ولا كان فيه مشاكل ولا هم ولا عفاريت لما وصلت الحارة لقيت ترحيب كبير من الجيران والكل بيقولي أرجع الحارة تاني.. فكرت وقولت ليه مرجعش بس مفكرتش كتير ولقيت نفسي رايح على الجامع عشان اقابل الشيخ وليد دخلت الجامع ولقيته كعادته قاعد بيقرأ قرآن.. سلمت عليه وقلي .. _ خطوة عزيزة يا اشرف يبني.. والله أصيل أنا قولت أنك روحت هناك وهتنسانا _ مقدرش أنساكم يا شيخ وليد أنتوا اهلي وناسي _ تعيش يبني طول عمرك أبن أصول... بس انت مش عاجبني باين عليك التعب والارهاق.. مالك؟ _ والله يا عم الشيخ أنا جايلك وتعبان.. تعبان اوى _ خير يبني أحكيلي وكل حاجة ليها حل .. وحكيت للشيخ وليد كل حاجه من يوم ما دخلنا البيت لحد دلوقتي.. الشيخ وليد كان بيسمع باهتمام وبعدها اخد نفس وقال _ بص يبني انت أكيد مسمعتش عن عمار المكان صح عمار المكان موجودين معانا في كل بيوتنا فيهم الطيب وفيهم الخبيث واللي انت بتحكي عنهم دول عايشين في البيت من فترة كبيرة وانتوا جيتوا عليهم فهما بيحولوا يطفشوكوا بس.. لكن دي فترة وهتعدي وهما هيبطلوا _ يعني انت عايز تقنعني يا عم الشيخ ان الجن بيهزروا معايا.. ده اسمه كلام ده هو في كده؟! _ والله يبني انا قولتلك اللي اعرفه.. ولو عاوزني اجي معاك اقرالك شويه في البيت مفيش مشكله _انا مش عاوزك تقرالي في البيت انا عايز حل _ انت معندكش مشكلة اصلا يبني.. قولتلك انها فترة تعايش مع الوضع وكل حاجه هتنتهي ... خرجت من عند الشيخ وليد وانا مش مستفيد اي حاجه زي ما روحت زي ما جيت.. كنت مخنوق ومدايق ومش عايز ارجع البيت ده... لقيت رجليا وخداني علي المقابر عاوز ازور قبر أبويا وأمي الله يرحمهم وقفت قدام القبر وقريت الفاتحة ولقيت نفسي بعيط بشكل تلقائي وبقولهم انا تعبان ومحتاجلكم سبتوني لوحدي ليه في الوقت ده سمعت صوت بيرد عليا وبيقولي _ مالك بس يا استاذ اشرف حزين كده ليه؟.. الاعمار بيدي الله .. كان اللي بيتكلم ده السيد او تقدر تقول عليه شيطان الانس.. لقيت نفسي من غير وعي بحكيله علي كل حاجه لكنه رد عليا وقال _ بس كده هو ده اللي مديقك.. محلولة سهلة وبسيطة بعون الله _ ازاي؟... مش فاهم _ طلسم الطرد هو الحل هينضف بيتك من كل جن خبيث ويحميك من الشياطين _ بس الشيخ وليد قلي ان ده مش جن خبيث.. وانهم طيبين _ هههههه... جاهل فاكر نفسه عالم وشيخ وهو ولا يعرف حاجه.. انا هجيب الكتاب من البيت وهحصلك اديني العنوان ... اخد العنوان وبعد ساعة كان عندي.. مسك الكتاب وكان معاه تراب شكله غريب شوية بدأ يرش منه في البيت وهو بيقول كلام مش مفهوم وكان بيوطي صوته.. وفجأة سمعات صوت صرخات طالعة من الجحيم اصوات ناس بتتعذب وبتصرخ وبتقول كفايه.. كفايه حسيت ان البيت هيوقع علينا.. السيد اتكلم وقلي اسكت هما خلاص خرجوا ومش هيرجعوا تاني حسيت اني ارتحت وقولت الحمدلله هعيش في هدوء وأمان.. بس كنت غلطان بعد ما السيد مشي روحت جبت مراتي وعيالي ورجعنا البيت اقدر اقولك ان الوضع اتحسن والامور هديت لمدة أسبوع لكن بعد الاسبوع وفي يوم عادي جداً كنت نايم وصحيت علي صوت غريب اجش كان بيقولي امشوا من هنا... امشوا من هنا فتحت عينيا ودققت النظر عشان اشوف أكتر منظر مرعب شوفته في حياتي.. راجل طويل جداً عنده قرون في راسه مدببة عينيه جمرتين من نار جهنم.. وصرخ صرخة طالعة من الجحيم.. سمعت مراتي بتصرخ قومت من السرير ناطط علي بره.. لقيت مراتي قاعدة على الأرض وبتتنفض لما سألتها قلتلي _ شوفت شعرها منكوش وشها كله دم وكانت عاوزة تقتلني يا اشرف.. عاوزة تقتلني في اللحظة دي سمعت صوت بنتي بتتكلم مع حد في اوضتها.. اتحركت علي اوضتها بحذر فتحت الباب وكانت الصدمة... يتبع الجزء الثالث ... اسف على تأخير الجزء ده وانتظروا بكرة جزء ناري من قصة عمار الجحيم ... #محمودالأمين الفصل الثالث من هنا |
تعليقات
