رواية شايفه نفسك فين بعد خمس سنين الفصل الثاني بقلم غادة عادل
_هو أنا قلقاسة!
=اتخض: إيه!
_أومال ماقولتليش ليه أكاد من فرط الجمال اذووب!
=لسة جاية و خضتيني حرام عليكِ
_ماجبتليش هدية معاك ليه؟
=هما بيجيبوا هدايا!
_أممم ماطلبتش ليه تكون المقابلة في كافيه؟
=ابوكِ مارديش
_ولا جاتلك على الطبطاب عشان توفر! شكلك بخيل
=والله ابوكِ رفض خالص
_كملت: لا بخيل، و بكرة تقولي اصرفي على نفسك أو اشتغل و تاخد فلوسي
=والله ابدا!
_بالمناسبة بتحب الست العاملة؟ و لا تفضل ست البيت؟
=معنديش مشكلة للشغل بس...
_يعني عايز اللي تصرف عليك!
=خاليني اكمل!...افضل ست البيت اكتر عشان دا...
_آه يعني حضرتك من انصار سي السيد! لا يابا فوق أنا ست حرة!
=أنا عملت ايه!
_هل تعرف من هو هامتارو!
=لا أنا...
_طب من يسكن البحر و يحبه الناس؟
=مش عارف أنا هو في ايه!
_بتغير؟!
=مش فاهم عايزة إيه يعني!
_يعني طبع الغيرة فيك و درجته قد إيه؟
=والله الرجل اللي بجد بيغير ب...
_يعني هاتخنقني و تقيض حريتي!
=الله! مش للدرجة، قصدي الغيرة اللي مش خنيقة
_يعني حضرتك اوبن مايند و الجو دا و هاتبقى لامواخذة..
=انتِ بتقولي إيه! ماسمحلكيش!
_ علاقاتك في الشغل إيه!
=عادي يع...
_ليك اصحاب بنات؟
=عادي يعني ب...
_لا ماينفعنيش الكلام دا ليك بيست بنت هايكونلي بيست ولد...
=يا...
_هاتتجوز عليا هاتجوز عليك...
=انتِ مجنونة!
_معا ضد العنصرية الذكورية!
=هو الموضوع كبر إزاي كدا؟!
_كملت: بتخاف من الفيران؟
=ايه علاقته بكلامنا دا!
_بتعرف تقتل صراصير؟
=مش فاهم يعني بس عادي يعني مابخفش...
_بتعرف تطبخ؟
=لا..
_بتنضف مكانك؟
=انا شخص الصراحة فوضوي شوية
_يعني عايزني خدامة!
=ماقولتش كدا أ...
_لا قُلت يا ذكوري يا سليل الصنف الغتت
=والله أبدا!
_بتعاكس، بتعرف تفلرت!
=بصراحة يعني أنا راجل عملي بس اعرف اقول عادي...
_اممم ياسمين صبري و لّا اسكارليت جوهانسن؟!
=ايه العلاقة!
_طب روبي ولا ألكساندرا داداري؟
=مش فاهم بس كلهم حلوين..
_آه يعني حضرتك جاي مع أي أنثى
=ابدا والله انتِ سألتي...
_امممم عبد لشهواتك و تجري ورا اي ست
=الله!والله لا أنا...
_بتحب الصبح والا الليل؟
=الليل عشان...
_يعني بتاع سهرات و جو سفه وفجور!
=ياست لا عشان هدوء و مش بشتغل بالليل...
_بتروح الچيم؟
=آه..
_تعرف فنون القتال؟
=لا بس...
_يعني ممكن اتخطف منك عادي أو تنضرب لما اتخانق مع حد!
=استهدي بالله كدا
_بتعرف تعوم؟
=على خفيف..
_يعني مش هاتعرف تنقزني زي الأبطال و هاموت مبأوأة منك
=لا إله إلا الله!
_بتحب المازيكا؟
=أيوة..
_بتحب مين؟
=فيروز و عمرو و..
_لا كدا سوري يعني مش هاننفع مع بعض..
=اومال الهانم بتحب إيه!
_عنبة و ويجز
=أنا إيه اللي جابني!
_بتعرف تشكل!
=نعم!
_طب تعقّب!
=هارسود عليا! هي اسألة اول مقابلة اتغيرت ليه كدا!
_بتحب افلام الرعب!
=عادي آه
_بتتفرج على القتل!
=دي افلام عادي
_يعني في هاتقتلني و أروح فطيس بسببك يا ذو العقل الباطن الإجرامي !
=إيه دا في إيه!
_بتحب الكعب العالي و لا الكوتشيات؟
=الكعب انثوي اكتر بس..
_يعني بتاع مظاهر..
=والله ابدا انا قصدي...
_مامتك ولا اختك!
=الاتنين عندي اهم حاجة في حياتي
_يعني مش هاتختارني في يوم و هاتسبني و هاطين عيشتي يابن أمك!
=الله!ماسمحلكيش أنا...
_بتخاف من الجن!
=بسمع عنهم بس
_يعني بتخاف!
=مش عارف بس السيرة يعني بيقولوا غلط
_باصت وراه فجأة: خلاص يا شرشبيل
=بص وراه مالقيش حاجة: مين!
_شرشبيل دا جن
= اتنفض:نعم!
_وطي صوتك و بص في الارض عشان بيغير عليا و على تكة و يحدفك من البلكونة
=هارسود هو...
_ايوة جن عاشق... صوتت فجأة : لا أستنى دا روح!
=قام جري و خرج و هو بيزعق: انا استاهل إني اتقدمتلك! استاهل!...
_دخلت امها جري: عملتيها تاني يا سارة؟!
=ببراءة مصطنعة: أنا ماليش دعوة هو اللي مجنون..
#غادة_عادل
