رواية شايفه نفسك فين بعد سنه الفصل الثاني بقلم مريم سمير
_ قالي كل سنه وانتي طيبه
= يمريم كان بيقول لكل سكان العمارة وهو بيوزع التمر!
_ مش عارفه هو مش زيك لي ، مع أنه اخوك التوأم!
= هو عشان توأم نبقي زي بعض في كل حاجة؟
_ لاء ، انتوا اه نسخة طبق الأصل من برا بس من جوا بينكم فروق زي السما والارض
= زي اييي؟
_ اخوك روش وكل بنات المنطقة هتموت عليه ونفسها تكلمه ، وهو ما شاء الله مش مقصر بيكلم بدل الواحدة عشرة بس زوقه مختلف وساعات بيبقي زوق عشوائي
= اه
_ لكن انت دايما ماشي ألف ، مذاكرة وكرير والكلام الكبير دا ومتعرفش بنات غيري ، المهم! هنعمل أي عشان اوقعه؟
= وانتي المفروض تعملي حاجة عشان يحبك؟ الي بيحب حد مش بيحتاج يعمل خطط عشان يوقعه
_ احمد فكك من الفلسفة دي دلوقتي ، انت المفروض تساعدني!
= عوزاني اعمل اي يمريم؟
_ هو تقريبا ميعرفش اني عايشه معاكم في العمارة وأننا جيران ، ف نعرفه بقي ، اعزمني عندكم النهارده
= لاء متجيش
_ والله ؟ انت يومياتي عندنا يالا! انت مخلص علي الفراخ الي عندنا! امي بتجيب رقبه كل فرخة والتانيه من السطح عشان خاطرك
= انتي كده بتذليني مش بتأكليني
_ اعزمني علي قهوة من ايدك
= ماشي يمريم تعالي ، بس علي فكرة هو مش موجود
_ مش مشكلة عاوزة قهوة بردو
= طب تعالي
_ السلام عليكم ، ممكن ادخل؟
= انتي هتعمليلي فيها متربيه؟ مريم انتي الي فارضه نفسك عشان تيجي
_ تصدق انك عيل معندكش دم؟ يطنط كنتي بتعملي اي ونسيتي تربي؟ شوبنج ولا اي يقلبي؟
= هدخل اعمل القهوة متتحركيش من هنا مش كل مرة اجي ألاقيكي بتاخدي جولة في الشقه
_ ولا! انت ازاي كده ؟ ولي اصلا؟
دخل المطبخ ف مسكت كتاب من كتبه ° انتي بتاعت التمر بتاعت الصبح؟
الكتاب وقع من ايدي لما شوفته ، نزلت اجيبه ف بصتله تاني
_ أيوة
° انتي ساكنه قصدنا بتهيقلي؟
هزيت راسي ب أيوة ° اهلا بيكي
احمد جه ووقف جمبه ف كنت ببص علي الاتنين ب استغراب مين فيهم احمد ومين عبدالله؟
° مش تقولنا إن معانا جيران حلوين كده
= اديك عرفت لوحدك
° طب أنا داخل
دخل اوضته ف رجعت بصيت ل احمد _ قال إني حلوة؟
= نسي يحط قطرة العين اكيد
_ تصدق انك متربتش فعلا؟ ، عرفني يسطا خلاص انت بقيت عم وخال العيال
= طب اقعدي اشربي
_ شوفته كان بيبصلي ازاي؟
= دا جاي معاه بشقط عشان تبقي عارفه
_ منا هربيه لما نتخطب
= طب اشربي بدل ما اخليه اخر شربك
_ مش هننزل النهارده ؟
= لاء يمريم مليش مزاج
_ مالك يا احمد؟ مضايق من حاجة؟
= ها؟ لاء ابدا مفيش
_ يعني مش هننزل عند عبده نتانة؟
= مريم احنا لسه عاملين غسيل معدة الاسبوع الي فات
_ طب كبداكشي؟
= الي سندوتش الكبدة عنده ب ٣ ج؟
_ ضد غلاء الأسعار ربنا يستره
= مريم أنا رميت الكبده قبل كده للكلب الي جمب العلبه مرضاش ياكل
_ الدم بيحن
= اييي!
_ اي؟ خلاص ربنا ينتقم منه حاكم دماغنا ، خلاص كريب
= عارفه؟ لو المعدة بتتكلم هتشتمنا ب افظع الشتايم والله ، يلا نخرج هنتمشي
_ ن ايييي؟ ننننن؟ هناكل بقولك ، الخروجة من غير أكل بالنسبالي يبقي اسمه اسعباط مش خروجة
= ماشي يمريم هناكل
_ بينا علي مصمد عبده بينا
كان دايما اقرب واحن شخص أنا شوفته ، ليه عندي رصيد مبيخلصش من كتر المواقف الي كان جمبي فيها ، عمره محسسني ابدا اني رغاية ، نكدية ، متحكمة ، صعبة ، كان دايما بيحسسني اني مش ناقصني حاجة ، حتي لو ناقصني كتير كنت كاملة عنده ، كان الوحيد الي بيحسسني اني جميلة بحب اشوف نفسي في عنيه ، بزعل لما بنت تيجي تقولي أنها معجبه بيه ، ف اروح أنكد عليه لسبب هو ملوش دعوة بيه! بس دايما كان بيقولي أنه مش عاوز غيري ، ف علي طول متطمنة إنه عمره ما هيستبدلي ، ابدا .
= وانتي كويسه دلوقتي ؟
_ بقيت احسن لما فضفضتلك
= المشكلة الي في الشغل هتتحل ، انتي شاطرة وقد أي حاجة
_ تفتكر؟
= افتكر ، انتي بس متزعليش نفسك والمشكلة بسيطة والله وهتعدي
_ دي تالت مرة احكيلك المشكلة ديي ، لو مكنتش موجود مكنتش عارفه هعمل ايي يا احمد ، كان زماني بكلم نفسي
= وانا موجود معاكي دايما يحبيبي بس متزعليش نفسك
_ أي حبيبي ديي؟ احترم نفسك
= أنا ماشي
_ يسطا؟ يا احمد؟
= عاوز اي من اهلي ؟
_ قولي يحبيبي تاني كده؟
غمز = اي؟ طب منا ممكن اقول حاجات تانيه
_ روحني يا احمد ، روحني بدل ما الم عليك الكورنيش
_ يعني هو سألك عليا بعد ما روحنا؟
= اه
_ قالك اييي ؟
= سألني انتي مرتبطة ولا لاء
_ اوعا يبقي وقع ، لما الاهتمام
= اه ، وبعدين؟
_ مش عارفه المفروض أنا الي اتقدم ولا اي؟
= انتي جاي معاكي سكة أنه يتقدم؟
_ ولي لاء؟ ، دا شافني مرة يمعلم وسأل مبالك لو عرفني بقي
= انتوا عاوزين مني اي؟ عاوزين أي يولاد..
_ اي اي! طولة لسان مش عاوزة ، وبعدين مالك ؟
= مالي ؟
_ متعصب ومتضايق لي؟
= انا؟ لا خالص ولا اي حاجة
_ ماشي ، مفاتيحه أي بقي؟
= امشي من وشي بدل ما اطلع هم الزمان عليكي امشي
_ يمعلم عيب انت بتكلم مرات اخوك دلوقتي!
= هحدفني والله انتي حرة ، همشي أنا دا انتي قعدتك خل
دخل من البلكونة ف ضحكت ، ماله دا ؟
_ يعني هو جاي دلوقتي؟
= اه قال إنه هيعدي عليا
_ تلاكيك بجد ، طب ولي التقل؟
= جاي يشرب قهوة يمريم قهوة احنا في كافيه عادي
_ اسكت انت مش عارف حاجة ، ها اختار اسماء عيالنا ولا اي الدنيا؟
= ارقع بالصوت في وسط الكافيه ؟
° ازيكم
= اهلا ، اقعد يعبدالله
قعد ف بصلي ° ازيك؟
_ الحمد لله كويسه
° تحبي تشربي اي؟
_ لا تمم انا شربت ، اشرب انت
° طب تحبي نتغدي في أي مطعم؟
= احب تنضفلي الاريل أو تظبطلي الإشارة مش لاقطة عندي قناة الجزيرة
_ يبني حرام عليك يبني بقي!
° منا عازمك انت كمان ، ها تحبوا نروح أي مطعم؟
= لاء مريم ملهاش في مطاعم ليها في مصامد وياه بقي لو اكل يودي الانعاش نقطة ضعفها ، ماشيه ب مبدأ نو ريسك نو fun
° نعم؟ ، ازاي؟ أنا بعزم البنات في مطاعم علي طول يعني عشان البرستيج بتاعهم
= برستيح اه ، تسمعي عن البرستيج ؟ أي يمريم عاوزة تروحي مطعم؟
_ عاوزة اقوم اكسر الطربيزة دي علي دماغك عشان امك زي ما قولتلك كانت بتعمل شوبنج ف مش فاضيه
° علي فكرة أمه هي امي
_ لاء يعبدالله متاخدش الموضوع علي نفسك في أي
= اديله ادي يا ام خالد وبترفعي صوتك يمريم؟ كملي يشمامة كملي
_ انت لي يبني؟ لي بجد؟
° طب أنا عندي ميعاد معلش هقوم دلوقتي
_ ميعاد؟ انت عندك جدول؟ كل بنت كام ساعه بقي علي كده؟
° هو..
_ امشي يعبدالله الله يسهله ويهديك
بصلي ب استغراب ومشي ف رجعت بصيت ل احمد الي كان بيبص في السقف
_ أي يقلبي الدهان مش داخل مزاجك؟
= لاء مش جاي معايا سكة مش داخل دماغي
_ دا دماغك دي الي همسكها افتحها وهيحتار فيها الأطبة
= اي يحبيبتي؟ مش كان عاجبك؟
_ دا بيتعامل مع البنات ب الجداول وبيبدل فيهم زي ما هو عاوز!
= مش كان نوعك المفضل؟
_ لاء ، انا كده هيترفعلي ضغطي ، قوم نمشي أنا كده كده الناس مأكدالي إني متعاشرش واني مبيعجبنيش العجب
لما شوفت عبدالله واتكلمت معاه طلع غير الي في دماغي ، طلع خفيف اوي أي بنت ممكن تيجي تاخده وتمشي ، طلع التقيل هو الي كان قدامي علي طول ، طلع التقيل والوسيم واللذيذ وانا مكنتش شايفه كده! ، كنت شايفه إن الواحدة لما تاخد الواحد الي كله عاوزه دا انتصار واستثناء ، لكن عرفت ان الانتصار الحقيقي انك تاخدي راجل استثنيكي انتي .
بدأت نظرتي تتغير ليه ، كنت شيفاه صاحب وجار واقرب شخص ليا ، لحد ما فهمت اني بحبه حتي قبل كده كنت بحبه بس مكنتش عارفه اترجم احساسي دا ، يوه يادي القرف أنا بحب!
= وانا مالي يبنتي؟
_ وانت تقف مع منه لي اصلا؟
= ما هي الي جيت وقفت يمريم لا اله الا الله هو الشارع دا ملك الي جابني؟
_ كنت تسيبها وتمشي
= أنا كنت متأخر عن الشغل
_ مش مبرر ، انت حر أنا مليش دعوة
= مدام أنا حر معلقالي المشنقة لي؟
_ انا؟ لا عادي لا يعنيني
= كيف يا مولاتشي لا يعنيكي؟ لقد سمعت أن منة بنت ابو الجزار تريدني لنفسها
_ وحيات خالتك يعني؟ دا وقت هزار؟
= لاء والله هي قالتلي انها معجبة بيا وبشخصيتي و..
_ من من من من؟؟؟؟؟
= أنا داخل ، داخل والله
واد قليل الادب دا حاجة تنقط!
= هاجي والله
_ وانا مش عوزاك معايا
= بس انا عاوز اجي اشوف الفستان الي هتشتريه
_ وانا بقولك مش عوزاك تيجي ، روح مع منه
= جرب نار الغيرة وقولي ما تقولي ؟
_ هاجي اقولك حاضر
= خلاص بهزر ، يلا عشان متتأخرش
كان بيدخل معايا كل محل وندور كتير ومنلقيش حاجة عجباني ، لحد ما وصلنا ل رابع محل وكان فيه فستان اسود ، عجبني اوي ف دخلت اجربه ، وقفت قدام المرايا كان مظبوط عليا اويي! خرجت من البروفة وانا بشاوله ف جه وقف قدامي
= ها هي فين بقي؟
_ هي مين؟
= معلش يا آنسه اندهيلي مريم من جوا
_ اه هنستهبل بقي ، اي مش حلو ؟
بصلي = شكلك تحفه والفستان هينطق عليكي بجد
_ ها؟
= ناخده؟
_ ناخده
طب اعمل اي طيب؟ طب متقول ونخلص ونفضها أو نتجوز واتيفر من عواقب الأفعال بس انطق!
= بقالي نص ساعه مستني تحت علي فكرة
_ لسالي لمسات بسيطة ، هلبس الهيلز وجايه
= هيلز؟
_ مش وقت اندهاش اقفل
خلصت ولبست الهيلز والشنطة وكانت اجمل مرة اشوف نفسي فيها ، كان فرح قريبتي بس كنت عاوزة اجرب البس فستان وكان رقيق اوي .
_ اتأخرنا؟
=..
_ امي مشت من ساعه ، تفتكر قلقت عليا؟
=..
_ الفرح بدأ اكيد والرقصه السلو فاتتني
=..
_ احمد؟
= شكلك حلو اوي النهارده
_ شكرا وانت كمان شكلك حلو
فتحلي العربيه وركبت _ شغل ابطال سيما بقي وحركات
= استني عشان الشغل يكمل
مد أيده في الكرسي الي ورا وطلع بوكيه ورد
= دا ليا؟
_ أيوة ، عجبك؟ جبته احمر عارف انك بتحبي لون الورد دا
ساق ووصلنا الفرح ، كنت كل شويه ابصله ، كان قاعد لوحده في طربيزة عشان مكنش عارف حد في الفرح كان جاي عشاني .
= تحب نقوم نمشي؟
_ والفرح؟ لسه مخلصش
= هو فرحي عشان اخلصه للاخر؟ قولت لماما اني هسبقها علي البيت
_ خلاص تعالي نتمشي
خرجنا وبصتله ب ضيق _ الهيلز مضايقك مش كده؟
= اوييي
_ ماله الكوتش ماله؟ طب اقولك ، اقلعيه
= وامشي حافيه؟
_ مش بدل ما رجلك توجعك؟ أنا راكن العربيه قريب من هنا
قلعته وضحكت = اخيرا! ويجي حد يقولك حيات البنات سهله!!
_ مريم أنا كنت عاوزة اقولك حاجة
= قول
_ انتي لسه عاجبك عبدالله؟
= كنت فاكرة أنه عاجبني ، لحد ما عرفت أنه لاء دا الي هكون متطمنة وهو معايا ، ربنا يهديه أنا مش عارفه انتوا اخوات ازاي بجد
_ يعني خلاص ؟
= صدقني خلاص ، أنا كنت فاكرة أنه كارف وشخصيه وبتاع بس طلع ممكن يعجب أي حد إلا أنا
_ طب أنا عاوز اقولك علي حاجة
= متقول يا احمد مالك في اي؟
_ أنا..
= اه
_ بصي هو انا يعني
= وربنا مصدقه انك ، انك أي بقي؟
_ أنا بحبك يمريم وعاوز اتجوزك
= اي؟
_ انتي راحة فين؟
= نسيت حاجة مهمة في البيت ، هجري عشان ألحقها ، نسيت الماتور شغال وامي لو عترت فيا هتدشملني
_ تعالي تعالي ، انتي لو مبطلتيش فرط الحركة الي بيجيلك فجأة دا هزعلك
=..
_ أنا كنت خايف تكوني حبيتي عبدالله ، ف يضيع كل حاجة أنا كنت عاوزها معاكي ، عارف اني لخمة شويه واني بردو مش بعرف اتكلم ساعات ، بس وانتي هنا بعرف اعمل كل حاجة
=..
_ اوعي تكوني مش بتحبيني ؟ دي تبقي داهيه ، هدفنك هنا بقولك
= أنا كمان بحبك اوييي يا احمد
غمز _ نستني الحاج والحجة يجوا البيت واقولهم
= أنا كل الناس مأكدالي اني مبيعجبنيش العجب
_ وبعدين؟
_ بس انت عجبتني
مريم سمير 🤍.
