رواية شايفه نفسك فين بعد سنه الفصل الثالث بقلم مريم سمير
_ دبلوم يماما!!!
= وماله الدبلوم يعين ماما ؟
_ ماله اي؟ الناس تقول عليا اي؟ طب صحابي وشكلي قدامهم؟ بقي كل واحدة فيهم واخدة الدكتور والمهندس وغيره وانا واخدة واحد ب دبلوم!
= بلاش النفخة الكدابة دي ، هو دا الموجود ، فضلتي تتشرطي وتعملي بنت بارم ديله ، لحد ما القطر خلاص هيقرب يفوتك ، وانا وابوكي مش عايشينلك العمر كله ، عاوزة اتطمن عليكي يبنتي واشوفك في بيت العدل
_ بس مش كده ، لا مستواه الفكري هيناسبني ولا أنا وهو هنعرف نتفق علي حاجة!
= بقولك أي ، سيبك من جو الافلام والمسلسلات الي لاحسه دماغك دي ، الواد كويس ومحترم وجاهز ، وابوكي اداله كلمه وجاي النهارده بليل ، يعني متفكريش ف حاجة غير انك تجهزي
_ يماما!
= والله يمريم لو اتعاملتي معاه وحش أو طفشتيه زي الي قبله ل اكون معرفاكي ومربياكي من الاول ، أنا الي دلعتك وخليتك تتعوجي وتشوفي كل الناس ولا حاجة ، بس لازم تفوقي انتي الي قدك معاهم عيال وفاتحين بيوت ، سمعاني؟ فوقي
خرجت وانا قعدت علي السرير ، افوق من اي؟ أنا مرتاحة في حياتي كده ، لي رابطين دايما السعاده ب راجل وجواز؟
= وتدخلي وانتي الضحكة من هنا ل هنا سامعة ؟
_ ومكشرش واحترم نفسي واتكلم عدل ، أنا حفظت السيناريو دا من اول عريس جالي!
= وكانوا كلهم لقطة لكن انتي عاوزة الي يحتايل عليكي باين
_ يماما افهميني
= الناس جايه دلوقتي ، ياريت انتي الي تفهمي وتعقلي
ماما خرجت بعد ما الجرس رن ، عرفت انه خلاص شرف ، كان معاه باباه ومامته ، معرفتش ألمح حاجة غير ضهره ، كان عندي فضول اشوفه ف خرجت اول ما ماما ندهت عليا ، ابتسمت وسلمت علي مامته ، ماما بصتلي اني احط راسي في الأرض! لي لازم مبصلهوش دلوقتي ؟
ماما خدتهم البلكونة وبقيت أنا وهو في الصالون لوحدنا ، بصيت قدامي عشان اتأكد إن ماما مش سمعانا ورجعت بصتله .
= ازيك؟ إن شاء الله بخير
_!!
من وسط يجي عشرين عريس أو اكتر بس ملقتش حد بقدر وسامته ، جذمته الي بتبرق ، شعره المترتب جدا ، ضحكته الذوقيه ، لبسه الشيك ، وعيونه الي كان باين عليها الطيبة!
= انتي كويسه؟
_ ها؟ أيوة
= طب الحمد لله يدكتورة
_ طب الحمد لله اوييي بقي
= مش فاهم!
_ انك عارف اني دكتورة ، دكتورة المنطقة كلها!
= اكيد حد يتسجر يقول غير كده؟
_ وبعدين ؟
= مش عارف ، المفروض يبقي فيه بعدين ؟
_ والاستاذ امممم؟
= احمد ، وعارف انك عرفاني ، ممكن تتنازلي عن غرورك خمس دقايق عادي الدنيا مش هتخرب
بصتله ورفعتله حاجبي _ اه اسمع عنك بس اول مرة اشوفك ، دايما بيقولوا الاسطا صاحب الورشه البريمو
= الحمد لله أنا شاطر جدا في مجالي
_ انهي مجال ؟
= الميكانيكا
_ اه ميكانيكا ، ربنا يوفقك
= بصي! ، أنا عارف انك بتلمحي ب كلام علي اي ، واني ازاي فكرت اجي اتقدملك اصلا ، وعقلي راح فين عشان اطلب طلب زي دا ، بس عاوز اقولك أنها بالقلوب مش بالالقاب ، ولما نيجي نتعامل بنتعامل بالتربيه مش ب الدكترة ، تعرفي إن الي عرف من المنطقة اني جايلك قالولي اي؟ دي مناخيرها مرفوعة للسما واني هندم وكلام كده ، بس انا عارف أنا بعمل أي كويس .
كنت مستغربه كلامه! اول مرة حد يكلمني كده ، حسيت نفسي و ل أول مرة مزوداها!
_ وانت لي مسمعتش كلامهم؟
= عشان عارف إن ورا كل دا واحدة طيبة ، وطيبتها بتظهر دايما في أوقات محدش هيتصرف كده غيرها ، فاكرة لما ضربتي واحد بالقلم الي كان بيضايق واحدة في الشارع الاسبوع الي فات؟ ولما فضلتي تدوري علي ام البنت الصغيرة الي كانت ضايعة ، فضلتي تطمنيها انكم هتلاقوا ماما وترجع معاها للبيت ، أنا عارف انك الوش الي مصدراه دا مش وشك ، عشان كده جيت
_ انت كنت ملاحظ كل دا ؟
= كنت دايما شايفك يمريم ، لكن انتي اول مرة تشوفيني دلوقتي! ، انتي مش شايفه اي حد
ضحك = بتشوفي نفسك ماشيه ازاي؟ ولا الي وكيلة وزارة خلي بالك
ضحكت _ اول مرة اخد بالي ، محدش قالي الصراحة دي قبل كده!
= واسف لو ضايقتك بس انا عاوز اكون واضح معاكي
_ لا مش مضايقه ، يعني جيت هنا عشان شوفتني طيبة؟
= لا عشان بحبك
تنحنا احنا الاتنين من الكلمة الي طلعت منه بمنتهي التلقائية = طب أنا سايب الورشه لوحدها
_ أي هتتخطف يعني ولا اي مش فاهمة؟
= هروح اجيب عيش فينو ل ابويا
_ اهدي!
= طب و الكاريزما الي انا راسمها الي راحت في داهية ؟ ادعي عليا ب أي وانا فيا كل العبر دلوقتي ؟
ضحكت _ ولا اي حاجة ، مفيش حاجة حصلت
اهالينا دخلوا من البلكونة ، مكنوش عارفين يستنوا شويه! كنت عاوزة الكلام يطول ، عاوزة اسمعه! ، كان لطيف ولبق في الكلام اويي ، شخصيه اول مرة اتعامل معاها بس بيرفيكت في اللذاذة .
° ها يمريم قولتي اي؟
_ موافقه يبابا ، لا استني هي بتتقال الشورى شورتك ولا اي؟ هو عادي اقول موافقه ولا اي مش عارفه ؟
ميل عليا وهو بيضحك = خلاص اسكتي باباكي هيفتكر أننا كنا مترافقين!
كان علي وش بابا وماما الاستغراب ومش مصدقين ، وانا والله مش مصدقه نفسي ، بس اهو اخلص من زن ماما شويه!
= يعني انتي عاوزة تقنعيني انك مش عاوزة خطوبة كبيرة؟
_ أيوة
= وانك عاوزة تلبسي الدبلة في المحل!
_ أيوة أي المشكلة؟
= انتي مصدقه نفسك ؟
_ أيوة تفكيري اتغير
= من يوم وليلة ؟
_ عادي بتحصل
= ماشي الي يريحك هنجيبها بكرة إن شاء الله
الصراحة مكنتش عاوزة أي حد يعرف ، الموضوع كله يبقي سري بين العالمين بس! ، كانت رغبتي وهو نفذها
= طب ودي ؟
_ أي حاجة عادي
= هو كله عادي؟ دي دبلتك يمريم اختارها انتي واختاري الي يريحك
_ أنا اخر حاجة بفكر فيها الدهب
= أصيلة والله
_ فيه محل سوليتير في اخر الشارع ، يلا بينا
= باسم يسمره! اهدي كده وارسي ، سوليتير أي يحبيبتي في أي؟
_ بقولك يلا بينا!
= نسرقه ، دا اخرنا في الليلة دي والله ، اختاري يمريم الدبلة وزقي اليوم معايا
نقالي دبلة كانت غالية اوي ، في الاول كنت رافضه وكنت عاوزة حاجة خفيفه بس هو أصر ف جبناها ، وفي يوم وليلة! مريم الي كانت اخر رغباتها راجل بقي فيه راجل في حياتي وفيه دبلة في أيدي! وانا مين واي الي جابني هنا والدبلة دي بتعمل أي وانا اتخطبت ازاي يعني ؟
= فينك ، اتحداكي تقولي فينك
_ ايدا في أي! مين معايا؟
= والله ؟ مش عارفه نبرة صوتي؟ وكمان بتردي علي رقم غريب؟ أنا طلعت مغفل؟
_ احمد! انت ازاي مقدمتش فنون مسرحيه؟
= اشمعنا ؟
_ دور الضحيه تحفه عليك ، عاوز اي ؟
= عاوز اي؟ فيه واحدة تقول لخطيبها حبيبها ابو عيالها عاوز اي؟
_ مين ؟
= قصدي خطيبها بس يعني
_ اه
= انتي في المستشفى ولا اي؟
_ اه عندي سهر
= وهترجعي امتي؟
_ اتنين بليل
= والفلوس بتتقسم عليكم في الفرقه بالتساوي ولا اي؟
ضحكت _ انت عاوز ايي يبني؟
= خلي بالك من نفسك
_ ماشي
= مش هعطلك اكتر من كده ، روحي شوفي شغلك ، من السلامة
_ سلام
منكرش أنه لذيذ ، بيضحكني! أنا الي كنت بكشر لو لمحت ذكر قدامي .
كان يوم متعب مليان عيانين ، بعد آخر مريض مشي قلعت النضارة وبصيت علي السقف بتعب
= إلحقيني يدكتورة كشف مستعجل
_ اه اتفضل و..
بصيت لقيته هو! لبست النضارة عشان اتأكد اني فايقه لقيته هو بردو! طب أي ؟ حالة اغماء تحضر دلوقتي
_ احمد! انت اي الي جابك هنا؟
= جاي اخد حقي كمواطن
_ جاي اخر النبطشية بتاعتي عشان تكشف؟
= وعشان اوصلك
_ مكنش ليه لزوم كنت هرجع لوحدي
= خلاص اكشفي عليا وامشي
_ بتشتكي من اي؟
= قلبي
بصيت من فوق لتحت = معاكي حق دخلة قديمة اوي ، خلاص اعمليلي check up
_ انت في مستشفى حكومي مش السعودي الالماني ، نفوق بقي ولا اي ؟
ضحك = يلا عشان اروحك
الباب خبط ودخل اتنين من صحابي ° ها يمريم خلصتي ؟
_ أ أيوة
° لسه عندك الحالة دي بس؟
= لا أنا مش حالة أنا..
_ جاري
بصلي بصدمة ومردتش ، طلع برا واستناني لحد ما نزلت
_ دي عربيتك؟
فتحلي الباب وركب وساق ، كان طول الطريق ساكت! متعصب ملامحه كلها جمود علي عكس وشه المعتاد .
_ أنا قولتلها كده عشان..
= فين دبلتك؟
_ في الشنطة
= اي يخليها في الشنطة؟
_ عشان ، عشان اعرف اكشف كويس
= اقولك أنا الحقيقه من غير كدب؟ عشان محدش يعرف انك اتخطبني لصاحب الورشه الي مش لايق ل مقام حضرتك ، عشان مش عاوزة حد يعرف إن لينا علاقه ببعض
_ اهدي يا احمد ملهاش لازمة العصبيه
= ملهاش لازمة؟
وقف العربيه وبصلي = أنا الظاهر كنت غلطان! أنا بس كنت فاكر إني أنا الي عارفك مش زي ما الناس كلها شيفاكي ، أنا مخترتش ادخل تجارة مع اني كنت شاطر اوي بس ظروفنا وقتها مكنتش تقدر علي مصاريف ثانوي وكليه ، أنا الي اختارت اساعد ابويا مش اجي عليه ، دي كانت ظروفي وانا راضي بيها وعمري ما كنت قليل ، زي منتي بردو ظروفك كانت تسمحلك تدخلي ثانوي وربنا يكرمك بكليه الطب كان في نفس الوقت ربنا بيكرمني ب زباين وبدل الورشه الصغيرة ورشه كبيرة وعربيه راكبها ، انا غلطان! اول مرة قلبي يدلني على حاجة غلط!
اول كلامه كان زعيق وبعد كده كان صوته يدوبك مسموع ، كان موجوع بسببي!
_ أنا اسفه يا احمد ، اسفه والله ، انت معاكي حق ، أنا دايما غبيه وتفكيري سطحي و..
= هتكلمني بابا هنفض الموضوع؟
_ نفضها!!
رجع ساق ومردش عليا ، وصلت ونزلت وساق مبصش عليا حتي ، طلعت الشقه وبصيت قدام المرايا ، اول مرة اشوف نفسي وحشه اوي كده! ، اول مرة احس اني مستاهلش أي حاجة ، ولا استاهل شخص زيه .
حاولت بعدها أكلمه فون بس كان بيتحجج أنه عنده شغل كتير ف قررت اروحله الورشه
_ صباح الخير
طلع من تحت العربيه وبصلي = هات كرسي للدكتورة يبني
قعدت علي الكرسي ورجع يشتغل ، من غير ولا كلمه وكأني مش موجودة!
_ شكلك تعبان ، ارتاح شويه
= الشغل لازم يخلص النهارده ، مش تعبان ولا حاجة
_ أنا اسفه ، حقك عليا والله
= لي؟ كنت عملتي حاجة غلط؟
_ اغلب الحاجات بعملها غلط ، انت خلتني اشوف الدنيا بشكل تاني بعد ما كان غروري عاميني ، محدش كان صريح معايا زيك ، كل الي قعدوا معايا في قعدات التعارف كانت كلها مجاملات ، محدش كلمني كده غيرك ، أنا مكنتش عارفه اني وحشه كده
جه ووقف قدامي بسرعة = انتي بتعيطي ؟
_ أنا اسفه اني جرحتك انت متستاهلش مني كده
= خلاص مفيش حاجة ، بطلي عياط
_ أنا مش عوزاك تفض الموضوع
= ها؟
_ عوزاك تفضل ، وكمان تشيل عينك من عليا شوية عشان اتوترت
ضحك وناولني منديل = شاي ولا قهوة ؟
_ قهوة
طلب اتنين قهوة وفضلنا قاعدين سوا ، اتكلمنا كتير اوي ، عقليته ناضجه جدا وبيقبل اختلاف الرأي وبيصلح وجهة النظر الغلط وبل بيقنعني بيها! ، قارئ كتب كتير وبيثقف نفسه دايما ، كان عاقل جدا ويتحسد علي طريقته وأسلوبه وعقله .
_ كنت بسمع انك لازم تتعزم عندنا علي الغدا بكرة ؟
= اي الجملة ؟ متقولي انك عاوزة تعزميني علي الغدا عشان مشبعتيش مني وانك حبتيني ، لي التقل بجد ؟
_ أنا ماشيه عشان اتأخرت
= علي مهلك لا تقعي بس!
ضحكنا احنا الاتنين وروحت علي البيت ، كان يوم يصنف من احلي الايام الي مرت عليا ،وياريت لو الدنيا دايما حلوة زي قربه .
° يعني انتي عاوزة تعملي انتي الغدا النهارده ؟
_ أيوة يماما أي المشكلة ؟
حطت أيدها علي جبهتي ° انتي سخنه يمريم؟
_ عاوزة اريحك يست الكل
° لا يختي عاوزة تطبخيله من عمايل ايدك الي عمرك ما عملتيها
_ زي بعضه يحبيبتي مش لازم ندقق
بصتلي بصه أنا عرفاها كويس! اتقفشت ، طلعت وسابتني وسط حلل ومطبخ وحاجات كتير ، أنا الي مندفعة مكنش ينفع اقول هطبخ اوي بردو .
_ اتأخرت لي؟
= وحشتك ولا اي
_ الاكل برد يا احمد الاكل برد
بص علي السفرة = بسم الله ما شاء الله ، شكل الاكل
_ حبيبي تسلم
= يسد النفس يمريم ، ها فين الاكل بجد ؟
_ أنا الي طابخة
= أيوة مهو اكيد مش طنط ، لي مسبتهاش هي الي تعمل ؟ ولا لازم اول مرة اتعزم اعمل غسيل معدة وانا مروح ؟
° بتقول حاجة يبني؟
= اي الحلاوة دي يمريم تسلم ايدك يحبيبتي
قعد علي السفرة وبدأ ياكل ، الاكل مكنش مظبوط اوي عشان كانت أول مرة ادخل فيها مطبخ ، بس كان يتاكل والله!
= تسلم ايدك أنا متأكد انك المرة الجايه هتنافسي الشيف الشربيني
_ اديله ادي يا ام خالد ، لو اتعرض عليا برنامج توب شيف والله ميلزمني
= دي اخر جبر الخواطر
عملتلنا كوبايتين شاي بالنعناع ، كان الجو حلو اوي ، نسمة هوا وكاست الجيران الي فاتحين ام كلثوم ، وفضلنا نتكلم وفضل يهزر مع ماما وبابا .
ومن يومها واحنا مقررين أننا هنبقي صحاب ، وبقينا اعز صحاب ، منكرش أنه كان اجدع واطيب وألذ صاحب ممكن يبقي عندي ، ولو فيه ف أنا مش عاوزة غير احمد .
_ متتلم بقي وتلبس!
= يمريم الشحم هيجي علي الهدوم ،الهدوم دي برندات
_ اه كده معقوله شويه ف تقف في الورشه بالفنلة أيوة
= شوفتي العضلات ؟ والله دافع دم قلبي في الجيم
_ احمد البنات قاعدة تبص عليك من البلكونة
بص فوق ورجع بصلي وضحك = مريم انتي بتغيري؟
_ انا؟ لاء طبعا ، أنا بقول عشان ميجلكش برد
= احنا في الصيف
_ ميجلكش ضربه شمس ، واه بتيجي للواحد الي مخفف هدومه أنا درساها ملكش دعوة!
اغير لي! دا مجرد صاحبي ، ايدا وخطيبي .
= مريم
اتنفضت من مكاني لما شوفته جايلي المستشفى وهدومه كلها دم ومعاه واحد سانده ، مكنتش عارفه اتصرف ازاي ، مع إن حالات بتكرر كل يوم ب عدد كبير ، بس هو مكنش زي أي حالة ، كنت حاسه روحي بتتسحب مني ، لحد ما جت دكتورة زميلتي وساعدتني وطهرنا الجروح الي عنده وحط جبيرة في رجله
_ انت كويس؟
= اه
_ دي من الوجع ولا بتقولي اه كويس ؟
= كويس يمريم متقلقيش
_ حصل أي ؟ في أي ؟
= كان فيه عربيه زبون بصلحها وجربتها بس وانا سايقها الفرامل سابت
_ وانت أي الي خلاك تجربها؟
= عشان اتاكد أنها خلاص اتصلحت!
_ انت عارف انت الجروح عندك قد اي؟ ورجلك كانت مكسورة ازاي؟
= لا بس الدعم النفسي عندك في السما ، انتي تسيبي ام الشغلانة دي
_ انت لو كان حصلك حاجة أنا كنت هعمل اي؟
= هتعملي أي!
_ أيوة هعمل اي؟ يومي كان هيبقي عامل ازاي ولا مين هيتطمن عليا ويكلمني كل شويه ومين هينصحني ويمديلي دايما أيده عشان تشدني وراه للصح؟ ، كنت هعرف اتأقلم علي حياتي ازاي يا احمد ؟ أنا مصدقت اني وثقت في حد وحبيته تيجي تقولي بتجربها؟ ما تولع العربيه
= طب أهدي اهدي
_..
= قولتي وثقتي في حد وحبتيه؟
_ أنا قولت كده؟
= أيوة لسه دلوقتي
_ يا نهار ابيض علي الاختيار العصب ، طب مش لاعبه لا مش هعلب
= تعالي هنا ، انتي يوم ما تنطقي تنطقي وانا في حالتي دي!
_ الف سلامه عليك يا احمد ، إن شاء الله هتبقي كويس
= أنا كويس طول منتي جمبي يمريم والله
مسك ايدي = أنا لما قولتلك انا غلطان زمان كنت بكدب ، أنا بحبك وهختارك بدل المرة ألف
_ وانا بحبك اوي والله
° احمم احممم! ماسك ايد بنتي يا احمد؟
_ ماما!
= حماتي!! ، احنا نكتب وقتي ونداري العار
مريم سمير 🤍.
