رواية حب بعد الطلاق الفصل الثانى بقلم زهرة الهضاب
#حب_بعد_الطلاق
#الجزء_الثاني
قلتلكم لميت قشي ورجعت معاه السيد باقي في طبايعو محبش يتبدل السهرات الغياب ووووو وليت حاسة بلي هذه هي حياتي ولازم نعيشها بالذل و المهانة يعني خيار واحد واحد مكانش زوج فاتت ليام والاشهر وحدة الليلة شدني سطر في كرشي راح نموت داوني لسبيطار وهذيك الليلة طيحت الجنين كانت صدمة كبيرة كنت ديما نقول نجيب وليدي يونسني في الدنيا هذي علي الاقل نفرح بيه وننسي هم باباه الله غالب لله م اعطي و لله م اخذ حالتي النفسية بدات تتعب يوم بعد يوم و انا وحدي مكانش لي وانسني و مكانش لي يقولي حتي كلمة تجبر بخاطري فاتت ليام عليا وبدات ترجع حياتي عادي كان كي العادة لا دايرلي قيمة ولا حساب وكنت مانروحش لدارنا 3 شهر ولا اكتر ولا عندي تليفون نفرغ قلبي لا والو كنت نشد في قلبي ونفوت وكنت طايعة عجوزتي وباباه وكانو يحبوني وكانت دائما بيناتنا مشاكل وكنت كل مانروح لدارنا نحكيلهم يقولولي طلقي وانا
مانحبش ونفوت ونصبر ونخبي في قلبي كانت حياتي ذل وخلاص حشاكم عايشة....
وبعد فترة عادوت رفدت بالحمل وبعد 5 شهر من الحمل قالي نديك نسكنو وحدنا في بلاصة بعيدة على دارهم وانا قلت في قلبي واخيرا رح نرتاح ونستقر وماكنتش عارفة واش رح يصرى وكانو والديه ضد القرار على خاطر عارفين طبايعو وانا قعدت ساكتة حاجة ماقلتها كي رحنا كانت حياتي عادي كان يصرف نهار كاين ونهار مكانش كيما قاع الناس ونا مزال صابرة ونقول الحمدلله و كان يطول عليا كي العادة يسهر ويشرب وانا ساكتة من خوفي منو ومرات نبات وحدي وانا بالحمل حتى قرب وقت الولادة تاعي واختو الي يقول عليها في بلاصت امو شراتلي صوالح البيبي الي كانت طفلة وجات نور للدنيا وكانت احلى بنوته انا توقعت يتبدل ويكون راجل درك خلاص كبرت عليه المسؤولية بصح كنت غالطة وهذا البنادم مستحيل يتبدل راح نحكيلكم في الجزء القادم بقية القصة انتظروني و اعطوني رايكم في التعليقات #يتبــــــــــــع
