رواية طفلة من رحم الشيطانه الفصل الثاني بقلم احمد محمود محمد
طفله من رحم الشيطانه " سليله الشيطان "
لـ احمد محمود محمد
part 2
( الـعـــــهد)
وسط زهول كُل اللى موجودين وصراخ الام اللى لما شافت ده قالت اقتـ ـلها يبنى دى زرع شيطانى
لازم تخلص منها يبنى دى لو قعدت اكتر من كده هتموتنا
سالم بخوف وتوتر _ المهم دلوقتي هنعمل ايه فى الجُثه دى
وحيد - هنبلغ الشرطه والمشايخ حاضرين وشاهدين
بعد ما تم نقل جُثمان الشيخ للمستشفى والتحقيقات خلصت وثبتت انه مات نتيجه لحادث غير مقصود قضاء وقدر يعنى
بيرجع سالم ووحيد وامه واخته وابوهم من القسم بعد ما مضوا على المحضر
دخلت الام " الست فتحيه " علشان تريح فى اوضتها بالصدفه شافت ورقه مرميه على الارض شكلها مُلفت للنظر
مسكت الورقه دى عاوزه تعرف ايه اللى موجود جواها وبمجرد ما شافتها لقيت صوره الطفله قمر. صرخت بقوه ووقعت على الارض
بيجرى عليها وحيد واللى بيلاقيها واقعه على الارض بيحاول يفوقها بس مش بتفوق لحد ما بيسمع وحيد صوت بنته بتعيط ودى كانت اول مره تعيط
بتروح اخته شيماء علشان تجيبها من سريرها وبمجرد ما دخلت بيها على امها وهيا شيلاها بتفتح الام عيونها فجأه وبتقوم من النوم وهيا بتشهق بسرعه ومش قادره تتنفس
وبتشاور على الطفله قمر ومحدش فاهم هيا تقصد ايه او عاوزه ايه بس سرعان ما خرجت بيها شيماء لبره ورجعت الام طبيعيه خالص وعرفت تتنفس كويس
فى مشهد مكانش لاقى ليه وحيد اى تفسير خالص مكنش عارف ايه اللى بيحصل
بياخد بنته وبينومها فى سريره وبيقعد جمبها يلاعب فيها لحد ما بيسرح بخياله شويه وبيفتكر ايام زمان
اول ما كان فاتح محل حلويات صغير كده على قده قدام العماره اللى كانت ساكنه فيها" سحر " مراته
وبيتعرف عليها وبيحبها رغم انها اكبر منه بحاولى عشر سنين بس السن مكنش عائق ابدا فى قصه حُبهم اللى استمرت خمس سنين
وبتحكى سحر لوحيد قبل ما يتجوزها عن شغلها وانها دجاله ووارثه الشغلانه دى عن امها وستها وخالتها وانها مجبوره تشتغل فى الشغل ده علشان تعيش
وفى يوم بتكون بتتكلم معاه فقالت ليه: عارف يا وحيد انا اشتغلت الشغلانه دى من وانا عندى 14 سنه كانت امى بتضربنى لما برفض اعمل اللى هيا عاوزاه
كانت بتخلينى امـ ـوت القطط الصغيره والكلاب علشان تستخدمهم فى سحرها بتخلينى اطلع معده الفراخ واستخدمها فى الاعمال والعقد
ياما أذيت ناس ودمرت بيوت ناس وانا واحده من ضحايا امى بص على ايدى دى وبتوريه ايدها
- ايه ده؟!
ده حرق بالنار
- من ايه.؟!
من امى لما رفضت فى يوم أئذى ام زميلتى فى المدرسه عملت فيا كده..
- تفتكرى انا ممكن اعيش معاكى بعد اللى قولتيه ده
انا عشان حبيتك بصارحك بحقيقتى ومستعده معاك اكفر عن كل ذنوبى واتوب وافك كل الاعمال اللى عملتها
- ياريت يا سحر علشان نبتدى حياتنا على نضيف..
يعنى انتا مش هتسيبنى
- مقدرش اسيبك ابدا والله.. بعدها بيفتكر ان سحر قررت تسيب مجال الدجل ده تماما وكانت عامله كتاب فيه كل انواع السحر اللى عملته ودفناه فين بس عشان متنساش لأنها كانت عارفه ان يوم توبتها هيجى
فضلت اربع شهور تفك فى الاعمال اللى عملتها لحد ما وقفها عن انها تكمل.. عهد. !
عهد كان معمول مع الجن. والعهد ده كان مطلوب من سحر تسلم انسيه لجن عاشق.. علشان يشفى ليها امها
من سنه كانت امها تعبانه تعب الموت والامل فى شفائها ضعيف جدا فقررت تستعين بالجن رغم انها عاشت طفوله بائسه بسبب امها الا انها مكانتش قادره تستغنا عنها ولا ترميها وقت شدتها
فحضرت جن علشان يساعدها.. الجن كان عاشق انسيه وكان عاوز يتجوزها وياخدها معاه بس هيا كانت رافضه
فطلب من سحر انها تساعده فى ده وهيشفى ليها امها.. وهوه ده " العهد "
سحر مع الاسف صدقته زى كتير من الناس اللى بتصدق فى التخاريف ونسيوا ان فيه خالق اسمه " الله "
ونسيوا كمان ان لا قدره لمخلوق بالنسبه لقدره الخالق ﷻ بس مكنش قدامها الا الحل ده
وعلشان هيا فى المجال ده من وهيا بنت صغيره كانت مؤمنه ان السحر حل لأى مشكله ولكل مشكله ممكن تقابلها
وفعلا قدرت انها تساعده.. ومش هكون ببالغ لو قولت ان كُل اللى هحكيه ده مستوحاه من قصه حقيقيه
عرفت سحر كُل حاجه عن البنت دى.. وعرفت انها بتجهز للجواز من جارهم اللى بتحبه من صغرها واللى متربى معاها
طلبت من الجن انه يعمل العمل اللى هيفرق بين العريس وعروسته دى وقالت ليه ان العمل اللى هيا هتعمله مش هيكون قوى زى العمل بتاع الجن
وبيوافقها وبيجبلها عمل معمول على جلد ماعز وبيقول ان اللى عامله كبير السحره وبيقولك حُطيه فى اوضه نومها
بتروح سحر البيت على اساس انها تبع الميكاب ارتست اللى هتجهز العروسه للفرح
وبتدخل اوضه العروسه وبتحط العمل فى مكان مستخبى فى اوضه نومها فى المخده بتاعتها
وبعد شويه من بدأ حفل الزفاف لما بتكون فى اوضتها قبل ما تخرج للفرح مع عريسها
بتتكلم معاه لما بيكون بيطمن عليها وبتقوله انها حاسه بدوخه وصداع جامد
وفجأه بتقوم العروسه تصرخ وبتكسر فى كل حاجه حوليها.. وبتقول مش عاوزاه..
مش عاوزاه مش هتجوز ابعدوووه عنى ابعدووه .. بالرغم من انها كانت بتحبه جدا الا ان مفعول العمل كان اقوى بكتير
بتفضل تزعق وتصرخ بصوت عالى وبتتشنج وبتقعد على الارض بعد ما بتقطـ ـع فستان فرحها
وبتفضل تهز فى راسها يمين وشمال وهيا بتردد " انا مش ليه " انا مش ليه "
اللى بيحصل كان صدمه للكل. فى لحظه من اللحظات بتقرب عليها امها بتكون منهاره من العياط
بتقرب منها عشان تاخدها فى حضنها.. للحظه بتبعد البنت ايدين امها عنها وبتقولها " انا مش ليه "
وبتنظر للأم بنظرات مرعبه وفى ثوانى ييقرب منها عريسها وهيا بتكون شبه مُغيبه بيلمس ايديها ويقولها حبيبتي مالك!؟ فيكى ايه
بتبص عليه وبتكون عيونها مليانه دموع وبتقرب ايديها من وشه وفجأه بتصرخ وبتخربشه فى وشه
وبتفضل تصرخ.. وبتكمل تقـ ـطيع فى فستانها
العريس اتكلم وقال: لأ كده مش هينفع..
طفله من رحم الشيطانه " لـ احمد محمود محمد
بيبص لحماه وبيقوله انا لازم اجيبلها دكتور حالا.. وفعلا بيتصل بالدكتور والدكتور بيحضر
بمجرد ما بيشوف حالتها دى بيتعجب! وبيسأل مين اللى عمل فيها كده..
الكل بيقول انها هيا اللى عملت كده فى نفسها بيأمرهم يدخلوها اوضتها عشان يكشف عليها
البنت بتكون هاديه جدا ومش بتتكلم رغم انها مقـ طعه فستانها ومخربشه نفسها الا انها بتكون هاديه وبياخدوها لسريرها.. وبمجرد ما الدكتور بيقرب منها..
بتزوم عليه وبتبصله بغضب وبتقوم تضرب فيه وبتحاول انها تخربشه بس هوه بيلحقها
وبتفضل تصرخ وتزعق بصوت عالى وبتتشنج اكتر واكتر وبتفضل تزوم عليه..
فورا بتمسك سكينه كانت على درج فى اوضتها وبتقربها على شريان ايدها وبتهددهم ان محدش يقربلها
الكل بيتخض عشان ممكن تعمل فى نفسها حاجه وبيبدأ عريسها يقرب منها
اهدى يا " منى " ارجوكى.. انا " عمرو " انا اللى بحبك
اهدى ارجوكى متعمليش فيا وفى نفسك كده
هاتى السكينه.. هاتيها يا حبيبتى عشان متعوريش نفسك.. وهعملك اللى انتى عاوزاه..
والله العظيم هعملك اللى عاوزاه هوعدك محدش هيلمسك.. هاتى السكينه يا حبيبتى عشان خاطري
بتبدأ " منى " تهدا وتطمن لكلام " عمرو" وبتبدأ تمد السكينه ليه علشان ياخدها وايديها بتترعش
بس فجأه بعد ما بيكون مسكها بتشدها منه وبتعوره فى ايده وبتفضل تصرخ وتزعق اكتر واكتر.. وبعدها بيمسكها عمرو من ايديها بمساعده والدها
وبيسيطروا عليها وبيديها الدكتور حقنه مُهدئه عشان تنام
وفورا بيقول انها فى حاله عصبيه حاده لازم تتنقل المستشفى دلوقتي وانا هتابع معاها
بيعدى اسبوع ومنى فى المستشفى وبقت كويسه خالص وهاديه ونسيت كل اللى عملته فى ليله فرحها
كل اللى فكراه انها كانت تعبانه ومصدعه وبس كده. وبعدها مقدرتش تفتكر اى حاجه تانى
بيبدأ عمرو يخلص اجراءات الخروج من المستشفى وبياخدها وبيروح على بيتها.. وفى الليل بتكون الام معديه من قدام اوضه منى
بتسمعها بتتكلم مع واحد وبتطلب منه يستنا شويه وهتروح معاه.. طبعا الام مكنتش فاهمه حاجه خالص وفتحت الباب فجأه
طفله من رحم الشيطانه " لـ احمد محمود محمد
فا اغمى على منى.. بنتى بنتى الحقنى يا حج البنت وقعت الحقنى
بيفوقوها وبتفوق وتبقا كويسه جدا وبتطلب انها تنام تانى وانها مش عاوزه حد يزعجها..
الام بتقلق على البنت وبتسيبها هيا وابوها وبتخرج.. وبعد شويه بتقرب الام من باب اوضه منى
بتحاول تعرف منى نامت ولا لسه. بس فى الحقيقه معرفتش.. بعدها سمعت صوت موسيقى هاديه جايه من الاوضه
فقالت انها اكيد مشغله الموسيقى دى ونايمه عليها مع انها اول مره تعمل كده ديما بتشغل قرأن. بس مكنتش مُهتمه
تانى يوم الصبح بتصحاا منى. وبتخرج من اوضتها بيكون الاب قاعد بس باين عليه علامات الحُزن
- صباح الخير يابابا..
منى! صباح الورد يا روح قلب بابا.. الف حمدلله على سلامتك يا حبيبتى.. طمنينى عامله ايه دلوقتي . حاسه بحاجه
_ فيه ايه يابابا مالك كده.. هوه حصل حاجه ولا ايه؟
حصل حاجه يعنى ايه!؟ هوه انتى مش فاكره اى حاجه
_ اى حاجه عن ايه بس يابابا انا اخر حاجه فكراها كنت دايخه ومصدعه وروحت المستشفى بس
بس؟ يعنى مش فاكره اى حاجه تانيه..
_ لأ مش فاكره حاجه خالص
طاب انتى حاسه بحاجه دلوقتي؟
_ حاجه ايه
اى حاجه دوخه صداع كده يعنى
_ بالعكس يابابا دانا النهارده حاسه بنشاط الدنيا كله.. وحاسه كده انى فرحانه جدا
طيب يابنتى الف سلامه عليكى..
- الله يسلمك... هيا ماما فين؟
فى المطبخ
_ طيب انا دخلالها
_ صباااح الخير ياماما
منى حبيبتى صباحك ورد عامله ايه دلوقتي يا حبيبتى
_ الحمد لله يا ماما هوه فيه ايه
الحمدلله يا حبيبتى دول كانوا شويه دوخه وراحوا لحالهم
- بتعملى ايه بقا
بحضر الفطار زى ماانتى شايفه طبعا هتفطرى معانا
_ اكيد ياماما
علفكره عريسك ده ابن حلال اوى وطيب مسبناش لحظه وديما يتصل يسأل عليكى..
_ عريسى! ؟
اه عريسك ايه مش عارفاه
- ماما بصراحه كده انا مش هقدر اكمل معاه
يتبع
رعب_احمد_محمود
#سليله_الشيطان
لسه حكايتنا مكمله والاحداث كتيره هتحصل واتمنا دعمكم عشان نكمل الروايه
متابعتكم تشرفنى
