رواية همسة وجع الفصل الثالث 3 بقلم اسماء العذب

 

رواية همسة وجع الفصل الثالث بقلم اسماء العذب

#همسة _ وجع 

3

صلوا علي من بكي شوقً لرؤيتنا.... 

_________________ 

واستمر البحث 

شهر

شهرين

تلات شهور 

اربع وخمس شهور 

لحد ماجه اليوم اللي غير كل حاجه في حياه الكل 

كان اليأس تقربيا أتمكن من الكل وكلهم بقوا معتقدين أن همسه اتوفت أو اتخطفت علشان ياخدوا اعضاا* ئها 

وكل واحد بيقول قصه مختلفه عن اللي حصلها 

هشام اخد قرار مهم بعد طول اختفاء همسه واقتنع انها حتي لو كانت حيه اكيد مش هترجع حتي لو خسرت حملها لكن لأنها ما بقتش انسه اكيد ما ينفعش ترجع لأنها اكيد هيجيها عرسان بعد ما ينفصلوا وساعتها كل حاجه هتنكشف وسمعتها وسمعه أهلها هتبقي في الارض لما يكتشفوا أنها انسه لكن مش بكر كل دي افكار كانت في عقل هشام بعد ما سلم نفسه للشيطان من جديد 

وصل لبيت همسه وخبط استني شويه وفتحت له ام همسه واللي كان واضح علي شكلها الإرهاق والتعب وخسرت وزن كتير بسبب زعلها علي بنتها سلمت عليه وخلته يدخل لقي في البيت أخواتها الاولاد وابوها واتنين صحابها وواحده تقريبا قريبتهم سلم على الكل وقعد جنب مازن اخوها الصغير اللي في تانيه ثانوي 

وبدأ كلام 

بص يا عمي انت عارف ان كل شيء قسمه ونصيب وإن بنتك همسه مختفيه من اكتر من خمس شهور وما فيش عنها أي خبر حتي لو كان صغير وكأنها فص ملح وداب 

بص عليه ابو همسه وكل الموجودين من كلامه اللي واضح انه مش هيعجب حد فيهم 

قصدك ايه يا هشام يا ابني 

سأله ابو همسه بتعب لان حالته الصحيه اتدهورت بعد اختفائها 

قصدي ان الله اعلم همسه هترجع ولا لا لان دي حاجه في علم الغيب والعمر بيعدي واحنا عملنا كل اللي نقدر عليه علشان نوصل لها لكن ما فيش فايده 

انت عاوز توصل لايه يا هشام من كلامك ده 

اللي سأل السؤال ده اخو همسه التاني عمر واللي عنده ١٩ سنه 

راح هشام جاوبه بصراحه ومن غير اي تزيين للكلام ولا مقدمات 

اللي عاوز اوصله ان الجواز قسمه ونصيب وانا جاي النهارده علشان اقولكم إني هطلق همسه واشوف نصيبي مع غيرها ياريت تفهموني و....

قطع كلامه ابو همسه لما زعق فيه مع أن صوته كان واضح عليه التعب وقال له 

نفهم ايه يا دكتور يا محترم انت جاي تتخلي عن بنتي في اكتر الاوقات اللي هي محتجالك فيها هي دي الأصول واللي انت اتربيت عليه 

رد عليه هشام هو بيحاول يوضح ويبرأ نفسه 

يا عمي اتخلي عنها ازاي انا هفضل زي ما انا ادور عليها واعمل اللي اقدر عليه علشان الاقيها لكن انا في آخر فتره قبل همسه ما تختفي وانا مش مرتاح ،واليوم اللي اختفت فيه همسه انا كنت جاي لحضرتك علشان اقولك الكلام ده وزي ما دخلنا بالمعروف نخرج بالمعروف 

اتكلم المره دي عمر اخو همسه بعصبيه وغضب بعد ما وقف قصاد هشام 

معروف وهو اللي يطلب طلب زي ده في وقت زي ده يبقي بتاع معروف يا اخي اختشي علي دمك واتكسف شويه وقدر الحاله اللي احنا فيها ولا اعمل اعتبار للعيش والملح اللي كلناه مع بعض في يوم من الايام

 

اتكلمت ام همسه وهي بتقول كلامها لعمر 

عمر عيب يا ابني تكلم جوز اختك بالطريقه دي 

يا ماما انتي مش سامعه بيقول ايه ده عاوز يسيب اختي في اكتر وقت هي محتجاله فيه دي أخلاق دي ولا دي رجوله 

حاسب علي كلامك يا عمر واحترم فرق السن اللي بينا

حذره هشام بالكلام ده فا رد عمر

وانت ما احترمتش الراجل والست اللي امنوك علي بنتهم علشان ترعاها وتسندها وتاخد بالك منها الراجل والست اللي اعتبروك ابنهم وبقيت فرد اساسي من العيله بتاعتهم ما احترمتهمش ليه ها؟؟ انا اقولك لأنك اصلا مش محترم فا ازاي هتقدر تحترم غيرك

 

في اللحظه دي هشام ما قدرش يمسك نفسه ووقف بسرعه وهو بيزعق بأعلي صوته وعروق رقبته بانت ووشه احمر من الغضب 

احترم انت نفسك يا عمر واعرف انت بتكلم مين انا واحد ما كنتش مرتاح مع اختك هتجبرني علي العيشه معاها و....

قبل ما هشام يكمل كلامه ويتكلم عن همسه بطريقه مش كويسه ابوها رفع ايده بتوقف هشام عن الكلام وطلب منه يقعد وطلب كمان من عمر انه يقعد ساكت بعدها وجه كلامه لهشام لما سأله 

قولي يا ابني انت ايه اللي يريحك وانا اعمله 

وضحله هشام هو عاوز ايه لما قال 

انا هطلق همسه يا عمي واخد حاجتي ونخرج بالمعروف لكن هنفضل اهل زي ما احنا لحد ما همسه ترجه بالسلامه إن شاء الله 

اتكلم ابو همسه وهو مغلوب علي أمره لانه مش عاوز ينزل من قيمه بنته لان الراجل اللي قدامه رافضها فهز رأسه بنعم وهو بيكلم ام همسه 

روحي يا صفاء هاتي الدهب والهدايا اللي جابها هشام لهمسه هي ما استعملتش حاجه فيهم ودساهم علشان كانت هتستخدمهم بعد جوازها اللي كان المفروض يكون من تلات شهور لكن ملهاش بخت

 

هزت صفاء ام همسه رأسها بقله حيله وزعل علي اللي بيحصل معاهم وهي عارفه طريقه تفكير جوزها وموافقة عليها لانه مش عاوز يقلل من قيمه بنته قدام اي حد حتي اللي المفروض انه جوزها فا راحت تجيب الحاجه وعدت حوالي عشر دقايق وبعدها سمعوا صوتها وهي بتصرخ وبتقول

 إلحقوني

 الكل دخل اوضه همسه لقي امها عماله تفتش بجنون في الدولاب وبتدور علي حاجه ولما جوزها سألها بصت عليه وهي بتبكي وقالتله 

الدهب بتاع همسه كله اللي احنا جايبينه واللي هشام جايبه والفلوس اللي كنا بنحوشها مع بعض كله مش موجود 

مش موجود ازاي يعني اتاكدي كويس

 

اتاكدت كويس والله احنا كنا بنحطهم علي طول في ضلفه الطرح والشرابات والضلفه عليها قفل ومقفوله من قبل ما همسه تختفي وما حدش بيدخل الاوضه غيري 

يعني ايه  

سأل جوزها راحت هي ردت عليه بتأكيد وهي بتضرب ضهر يدها بيدها التانيه

يعني في حد دخل هنا واحنا مشغولين واخد الدهب والفلوس 

الكل طبعا انصدم بعد الكلام ده لانه معناه إن فيه حرامي هو اللي عمل كده ومين الحرامي اكيد محدش هيعرف لانه مش هيعترف علي نفسه ويقول انا اللي سرقت ،

اتكلم ابو همسه وهو بيحاول ما يعليش صوته علي مراته احتراما ليها قدام الموجودين وقال

انتي بتقولي ايه يا صفاء يعني هيكون مين اللي دخل واخدهم افتكري كويس يمكن انتي غيرتي مكانهم لما همسه اختفت 

ردت عليه صفاء وهي بتبكي 

والله من ساعه ما همسه اختفت وهم مش في دماغي اصلا ولا جيت ناحيتهم وانت تقولي غيرت مكانهم انا متأكده انا بقولك ايه الحاجات اللي كانت هنا في حد اخدها وكان عارف انهم هنا في الضلفه دي بالتحديد واخدهم 

قرب منها عمر وهو بيحاول يهديها وطبطب علي كتفها وقالها 

اهدي يا ماما اهدي كده وافتكري مين دخل اوضه همسه من ساعه اللي حصل غيرك 

هزت راسها وهي بتحاول تفتكر فقالت 

اول لما اختك اختفت في أول أسبوع قعدنا ندور في الاوضة والدولاب وكل حاجه انا واصحابها وابوك وناس قرايبنا حتي الجيران كله كان بيدور لكن اللي انا متأكده منه أن الضلفه متفتحتش خالص طول ما احنا بندور والمفتاح كان معايا دسيته في اوضتي ومن بعد الأسبوع ده وما حدش دخل الاوضة غيري انا متأكده  

من بعد الكلام ده واللي اتضح من خلاله أن الكل مشكوك فيه وفي دايره الاتهام القرايب وأصحاب همسه والجيران حتي عمر ومازن اخوات همسه بقو متهمين  

الجو بقي متوتر خصوصا انه مش معروف الوقت اللي انسرق فيه الدهب والفلوس ممكن يكون من يومين ممكن من شهر او اتنين تلاته حاليا الكل موضع شك 

هشام لما حس ان الموضوع اتعقد قال 

المفروض انا اعمل ايه دلوقتي يا جماعه 

هو ايه اللي تعمل ايه استني لحد الدهب ما يطلع وخده مش عاوزين من وشك حاجه وبقيه الكراكيب اللي جبتها اكيد قاعده ما حدش لمسها 

طبعا اللي قال كده هو عمر بعد ما هب في جوز اخته لما ما قدرش يستحمل كلامه وكمان هشام ما قدرش يستحمل كلام عمر علشان كده كلمه وهو تقريبا علي اخره وقله

 

لاحظ أن صبري ابتدا ينفد منك ومن كلامك يا عمر مش معني اني ساكت اني قابل اللي انت بتقوله عليا انا بس ساكت احتراما لأهلك اللي واقفين وللعيش والملح اللي بينا 

رد عليه عمر بتريقه 

بس خلي حد غيرك يتكلم الكلام ده عشان يبقي في اقناع 

خلاص انتو الاتنين بقي اسكتوا ....هشام يا ابني زي ما انت شايف الدهب مش موجود حتي الدهب اللي احنا كمان كنا مشتريينه لهمسه اتاخد مع دهب غير الفلوس فا ياريت يا ابني تعذرني وتاخد بقيت الهدايا والدهب لو ما قدرناش نلاقيه هندفعلك حقه مرضي يا ابني 

 

هز راسه بتمام من غير ما يقول ايه كلمه بعدها بص لعمر اللي ناقص ينقض عليه من غيظه منه بعدها بص لابو همسه اللي لو حاجه واضحه علي وشه فا هي الزعل ،الزعل والتعب والحسره وقهره القلب فا طلب من ابو همسه وباقي الناس انهم يستنوا بره على بال ما ام همسه تجيب باقي الحاجه وفعلا كله استني في الصالون وخم بيفكروا مين اللي سرق ده كله وامتي اساسا لحق انه يسرق واصحاب همسه اللي قلبهم وقع لما كل واحده فيهم فكرت انها مشكوك فيها وهي بريئة 

.........استوووووووووب 

اسفه جدا جدا جدا جدااااااااااااااااااا علي التأخير بس النت فصل مني والنهارده اللي الشحن وإن شاء الله اعوضكم بفصلين حلوين 

بس تفاعل بالله عليكم وإوعو تفوتو الفصل الجاي لانه هيبقي دمار ...يلا

 

أستودعكم الله 

اسماء العذب( كروان)

الفصل الرابع من هنا 

بدل ماتدور وتبحث علي الروايات خليها علي تليفونك وحمل تطبيقنا

تعديل المقال