رواية همسة وجع الفصل السادس 6 بقلم اسماء العذب

 

رواية همسة وجع الفصل السادس بقلم اسماء العذب

6

#همسة _ وجع 

اول حاجه قبل ما نبدأ عاوزه اقول اني في الفصل ده مش عاوزة لايك ولامتابعه ولا تفاعل كويس ولا حاجه كل اللي عوزاه انكم تترحموا علي عمي علي في التعليقات وتدعوا من قلبكم ان ربنا يرحمه ويغفرله ويسكنه فسيح جناته وافته المنيه يوم الاثنين وقلبي بينز/ف عليه بمعني الكلمه من الزعل 

ولكم جزيل الشكر لو حد تفرغ لثواني وقرأ له الفاتحة هو ده كل اللي عوزاه 

صلوا على الحبيب الغالي 

___________________________________________________

هشام أخد وعد ووليد للعربيه وطلع بيهم علي بيته لانه لازم يعرف كل حاجه والنهارده قبل بكره

 علشان كده لازم انه يستخدم كل ذكائه 

بحيث ما يحسسهم انه يعرف امهم قبل كده وفي نفس الوقت يقدر يعرف أخبارها طول الفتره اللي فاتت 

اول ما هشام وصل للعربيه ركب الاتنين في الكرسي اللي ورا واتأكد انه ربطلهم حزام الامان وهو ركب قدام وبقي يسوق بسرعة متوسطه زي العاده وسأل وليد وهو بيبص عليه من المرايه اللي من قدام وقله 

/ بقولك يا ليدو 

_ايوه يا عمو ؟

/هو انت طياره ايه اللي قلتلي عليها وانكم لسه نازلين منها هو انتوا كنتوا مسافرين ؟

/ايوه يا عمو ماما بتقول علي البلد اللي كنا فيها أن هي أنها مش بلدنا وأننا هنرجع بلدنا في يوم ولما رجعنا ماما اتعورت وعملت حاد ثه 

/انت بتقول مامتك كانت بتقول ان البلد دي مش بلدكم ليه هو انتوا كنتوا فين بالظبط ؟

وليد كان لسه هيرد عليه لكن موبايل هشام رن وكان هشام لبس الإيربودز وحط التليفون قصاده وجاله صوت عصام وهو بيتكلم بسرعه

=ايوه يا هشام انا في الطريق استأذنت من الشغل وجاي علي طول عشر دقايق كده وتلاقيني عندك 

رد عليه هشام 

/انا كمان لسه ما وصلتش ربع ساعه كده بالكتير اوي واكون عندك غير هدومك واستناني انا معايا بس جماعه حبايبي بوصلهم وجاي في السريع 

طيب حاضر هستناك...سلام

=سلام 

بعد ما قفل مع عصام لقي نفسه في الشارع اللي فيه بيته لان بيته قريب جدا من المستشفى اللي شغال فيها 

___________________________________________________ 

عند إيمي كانت دخلت واستحمت علشان تفوق لنفسها علشان هشام لما ييجي ما يشوفهاش بالحاله اللي كانت فيها

 وبعد ما استحمت لبست بيجامه بيتي بكم

 وعملت شعرها بالسشوار وسرحته لحد ما بقي مفرود ومتسرح وناعم

 بعدها خرجت راحت المطبخ لقت مامتها لسه موجوده هناك وبتحضر اكل وفي واحده ست تانيه بتساعدها 

واول ما مامتها شافتها قربت عليها وهي بتبص علي شكلها الحلو والمرتب وقالتلها 

_حبيبتي انتي صحيتي ؟ ...كويس انا وأم محمود حضرنا كل الحاجه للعشا وام محمود نضفت البيت وغسلت الهدوم وكاوتهم وكل حاجه بقت تمام 

ردت عليها إيمي وتقريبا صوتها من كتر ما هو واطي مامتها ما سمعتش هي قالت ايه 

=ماشي يا ماما تمام تقدري تمشي اكيد وراكي حاجات تانيه عاوزه تعمليها 

بالرغم من ان امها ما سمعتش هي قالت ايه لكنها هزت راسها وهي بتكلم ام محمود وتقولها 

_يلا يا ام محمود كل حاجه خلصت واحنا الاتنين لازم نمشي دلوقتي

 

ام محمود : امرك يا ست هانم 

بعدها الاتنين جهزوا نفسهم وأم محمود لبست عبايتها وطرحها وأم إيمي كمان كملت لبسها وتممت عليه

 وكانوا ماشيين لكن مامت إيمي مالت عليها وهي بتهمسلها في ودنها وتقولها

 

_انا مشيت دلوقتي عشان اديكي مساحه مع جوزك يا ريت تتفاهموا مع بعض بالهدؤ وتولعي شويه شمع علي السفره

 وحطي شويه مكياج وعاتبيه بس بطريقه حواء الماكره وياريت تقنعيه انكم تسافروا شويه

 علشان العلاقه بينكم تقوي شويه

 فهماني يا حبيبتي انا كل اللي عوزاه مصلحتك فهماني ؟؟

هزت راسها وهي بتفكر في كلام امها وقالت 

=فهماكي يا ماما فهماكي 

_طب الحمد لله فكري في اللي قولتلك عليه وقوليلي النتيجه ...اسيبك انا دلوقتي سلام 

بعد كده حضنتها ومشت وسابت إيمي وهي بتفكر في كلامها هي فعلا لازم تواجه هشام بكل حاجه

 ولازم علاقتهم تبدأ من الصفر يمكن يقدروا يحبو بعض واحوالهم تستقر شويه بدل ما هم عايشين مع بعض

 وكأنهم اغراب وعلشان امها تبطل تتدخل كل شويه في حياتها ..هي صحيح امها وعاوزه مصلحتها

 لكن هي نفسها تحل مشاكلها هي وجوزها لوحدهم لكن ازاي وهم بيتعاملوا زي الاغراب علشان كده لازم تقرب منه ويبقوا زي اي زوجين طبيعيين 

ايوه هو ده اللي لازم يحصل...إيمي قررت في نفسها

 انها لازم تعمل كده...لكن يادوب هي بتقرر مع نفسها وسمعت جرس الباب افتكرت أن امها نسيت حاجه 

لان في الوقت ده ما حدش بييجي عندها وهشام لسه في الشغل لكن لما فتحت لقت هشام هو اللي علي الباب فسألته بإستغراب 

_هشام؟ ؟ انت خرجت من الشغل بدري ليه حصل حاجه 

رد عليها هشام وهو بيحاول يختصر الكلام وبيتكلم بسرعة 

/هفهمك بعدين كل حاجه يا إيمي لكن ورايا مشوار مهم دلوقتي فخلي بالك من الضيوف

 

ردت التانيه وهي بتبص حواليها بإستغراب 

_ضيوف مين انت عزمت حد وجاي في الطريق 

/لا هم وصلوا فعلا

بعد ما قال كده شاور لوليد ووعد علشان يوقفوا معاه قدام الباب لانهم كانوا بعاد عنه

 ومش باينين ووقفوا جنب هشام اللي بقي يدخلهم البيت براحه ونزل علي ركبه وكلمهم 

/بصوا يا حبايبي انا ورايا مشوار مهم لازم اروحه دلوقتي فأنتم هتبقوا هنا مع طنط إيمي مراتي وهي هتاخد بالها منكم لحد انا ما اجي تمام؟ ؟

=بس مش هتتأخر صح ؟؟

سألته وعد فجاوب 

/لا طبعا هجي بسرعه بس انا لازم امشي دلوقتي علشان كل ما مشيت بدري جيت بدري صح ؟

الاتنين هزوا رأسهم وهشام وقف واخد إيمي علي جنب وقالها

/خودي بالك منهم يا إيمي لحد ما اجي ولما ارجع هقولك هم مين ويعملوا ايه هنا سلام 

بعدها مشي من غير ما يديها اي فرصه انها تناقشه أو ترد عليه وكأنها هوا

 وده خلاها تحس انها مش مهمه بأي شكل من الأشكال بالنسباله ووجع كبير بقي ساكن صدرها

 بعد ما الذكريات الوحشه بقت تيجي كلها مره واحده في عقلها لكن كمان عقلها فكرها بالعيال اللي جابهم

 وطلب تاخد بالها منهم واللي هي تقريبا نسيتهم من تأثرها من الموقف اللي حصل ..واول ما بصت عليهم 

كانت البنت واقفه ورا اخوها وماسكه دراعه وهي خايفه من إيمي وهو كمان شكله خايف لكن بيحاول يهديها ويطمنها بنظراته 

كان شكلهم برئ ولطيف جدا 

خصوصا وهم واضح عليهم التعب وهم أطفال صغيره كده 

من غير ما تحس ابتسمتلهم علشان تحاول تطمنهم ونزلت لمستواهم علي ركبها 

وهي بتحاول تخليهم ما يخافوش منها لكن الاتنين رجعوا لورا هم الاتنين لما قربت منهم وهم بيبصوا عليها بخوف وكأنها هتعز بهم 

فراحت قالت بسرعه لما حست بكده 

_متخافوش انا مش هأذيكم... انتم اساميكم إيه؟؟؟

جاوبها وليد

 

_انا وليد ودي وعد اختي الصغيره

إيمي مدت ايدها وهي بتبتسم ليهم وقالت 

=انا بقي ابقي إيمي مرات دكتور هشام اللي جابكم دلوقتي ده ومشي اكيد عارفينه ؟؟

الاتنين هزوا رأسهم ووليد مد ايده وسلم عليها ووعد كمان عملت كده بعدها إيمي وقفت وهي بتقلهم ييجوا وراها

 لحد ما وصلت بيهم للصالون وخلتهم يقعدوا وشغلت التلفزيون علي قناه من قنوات الكرتون لأنها كمان هي بتحب جدا تتفرج عليه بعدها

 بصت عليهم وهم قاعده لازقين في بعض والهدوم اللي لابسينها متو سخه وعليها نقط د/م وواضح جدا علي اشكالهم التعب والإرهاق

 لكن لفت انتباهها كمان صوت طالع من عند وعد كان صوت بطنها لأنها كانت جعانه ووليد كمان

 لكن وليد ما عملش اي صوت لكن هي متأكده انه نفس الحاله علشان كده قعدت جنبهم وهي بتقول 

_انتوا شكلكم تعبانين وعاوزين ترتاحوا إيه رأيكم تاكلوا وبعدها تستحموا وتناموا شويه مش انتوا جعانين ؟؟؟

بصوا لبعض ووعد هزت راسها بكسوف راحت إيمي هزت راسها بحماس وهي بتقول 

_طيب انا هقوم احط الاكل حالا وناكل كلنا مع بعض ايه رأيكم؟ ؟؟

لما لقت الاتنين وافقوا راحت هي بحماس ناحيه المطبخ علشان تجهز الاكل 

والاتنين قعدوا مكانهم لحد ما وليد قال 

_دكتور هشام ده طيب اوي علشان جابنا بيته 

=ايوه وطنط إيمي كمان طيبه زيه دي هتأكلنا و تخلينا نستحمي وننام وبعدها عمو الدكتور هشام هياخدنا لماما 

علشان نبقي معاها وهو يديها علاج علشان تخف وتبقي كويسه وترجع زي الاول 

_احنا لازم نقول لماما لما تصحي علشان تشكرهم وتعمل الواجب زي ما علطول بتقول واحنا لازم نسمع كلامها علشان ما تزعلش مننا

 

=صح انت كلامك صح احنا لازم نعمل كده اول ما ماما تودينا البيت بتاعنا اللي قالت عليه 

بس تفتكر هي هتزعل لأننا سمعنا كلام حد ما نعرفهوش زي دكتور هشام وجينا معاه البيت بتاعه

_لا يا وعد مش هتزعل اكيد لان دكتور هشام هو اللي عملها العمليه علشان تبقي كويسه وتخف وبكده هو ما بقاش غريب لانه ساعدنا واللي يساعدنا ميبقاش غريب 

=ايوه صح بس يارب ماما تخف بسرعه بقي 

_يارب ونرجع زي الاول 

بعد الكلام ده الاتنين شافوا إيمي وهي جايه ناحيتهم وبتبتسم ليهم وهي بتقول

 

_لا بقي يا شباب ناكل كلنا كده مع بعض علشان بعد الأكل تستحموا وتبقوا نضاف وشطار 

=حاضر يا طنط

بعدها الاتنين مشيوا وراها لحد ما وصلوا السفره اللي كانت عليها أصناف كتير من الاكل شكله يفتح النفس وهم من شده جوعهم كانت نفسهم مفتوحه لوحدها 

_يلا اقعدوا بقي وعوزاكم تاكلوا براحتكم لحد ما تشبعوا وكأنكم في بيتكم 

هزوا رأسهم وابتدوا انهم ياكلوا و لأنهم جعانين اوي بقوا ياكلوا بسرعه وإيمي بتبص عليم بحنان وهي بتسرح بخيالها وبتقول 

اكيد لو كان عندي عيال كانوا هيبقوا زيهم كده حلوين وطعمين وانا اأكلهم واحميهم واغسلهم الهدوم بتاعتهم واهتم بكل تفصيله في حياتهم وأما يكبروا شويه ويدخلوا المدرسه اذاكر معاهم علشان يبقوا شطار ومتفوقين دراسيا لكن هم فين عيالي فين ......؟

=طنط هو انتي مش بتاكلي ليه هو حضرتك مش عاوزه تاكلي معانا علشان بتقرفي مننا لأننا عيال ومش نضاف

 

فاقت إيمي من تفكيرها عاي سؤال وعد اللي لسه كانت بتاكل وبتتكلم وهي والاكل في بقها 

_لا طبعا يا حبيبتي ليه بتقولي كده انا بس سرحت شويه مش اكتر وبعدين انتي سمعتي الكلام ده فين علشان تقولي كده وتفتكري إن كده 

=اصل مره واحده من أصحاب ماما قالت كده وماما اتخانقت معاها

 

_لا طبعا يا حبيبتي انا مش كده خالص واهو هاكل معاكم اهو 

وفعلا بدأت انها تاكل معاهم بنفس مفتوحه علي غير العادة وهي بتحاول أنها تهزر معاهم من وقت للتاني بعد ما لاحظت انهم زعلانين 

وما حاولتش انها تعرف عنهم اي حاجه لا هم مين ولا جايين منين لأنها عايزه تسمع كل حاجه من هشام بنفسه لحد ما خلصوا اكل وإيمي اخدتها الحمام علشان تحميهم

 لكن وليد رفض انها هي اللي تحميه بحجه انه راجل وما ينفعش انها تشوفه من غير هدوم

 وإيمي وافقت على كلامه وهي بتضحك من كلامه اللي اكبر من سنه وبعد ما هو خلص ادته هوت شورت من عندها وتيشرت من عند هشام تقريبا واصل لحد مفصل ركبته

 وبعدها حمت وعد ولعبت معاها بالمياه ولما خلصت لبستها واحده من بيجاماتها اللي صغرت عليها بسبب حملها

 لكن برضو البيجامه كانت كبيره علي وعد اوي لكن اهي اي حاجه تأدي الغرض زي ما بيقولو 

واخدت الهدوم المش نضيفه وحطتها في الغساله علشان تتغسل لحد بكره 

وجات للسؤال اللي محيرها هيناموا فين البيت فيه اربع اوض للنوم اوضتها هي وهشام

 واوضه للضيافة لكن مش مجهزه ولا مترتبه ومحتاجه نضيفه وما فيش وقت

 والاوضه التالته هي اوضه في حال كانوا خلفوا اكتر من طفل بحيث يكون لكل طفل اوضه

 والاوضه الرابعه هي اوضه ابنها اللي اتوفى معقول تخليهم يناموا هناك؟ ؟؟ 

لكن ما فيش حل تاني إلا انها تبتدي تنضف واحده من باقي الاوض لكن مزاجها دلوقتي مش طالب انها تنضف ولا تعمل اي حاجه فيها شغل يا تري تعمل ايه؟؟؟؟

___________________________________________________ 

هشام اول ما وصل الشقه عصام هو اللي فتحله لانه ساكن لوحده واول ما دخلوا عصام 

اتكلم بلهفه وخوف وهو بيقول 

قولي يا هشام همسه رجعت ازاي فهمني الكلام اللي انت قلته علي التليفون دي صحيح ولا ايه الموضوع 

جاوب عليه هشام وهو تقريبا حاسس بالضياع 

النهارده كان فيه حادث وو......

وحكاله علي كل حاجه بخصوص حادث همسه وحالتها 

وأنه اهلها ما يعرفوش حاجه عنها وكمل كلامه لما قال 

_المصيبه اني علي باب العمليات لقيت عيلين تؤم وهمسه امهم 

=ينهار مش فايت طب والعيال دول عيال مين عيالك ؟؟

_مش عارف..مش عارف انا جايلك علشان نفكر مع بعض ونعرف انا لازم اعمل ايه 

=طب العيلين فيت دلوقتي وهمسه احتمال تفوق إمتي 

انا اخدت العيال عندي البيت علشان اعرف منهم اي حاجه وكمان علشان بصراحه صعبوا عليا اوي ...وهمسه احتمال تفوق علي بكره كده انت بتفكر في ايه 

_اكيد بفكر في اللي لازم تعمله انا لما قلتلك زمان أن واحده تسلم نفسها لخطيبها قبل الجواز حتي لو كان مكتوب كتابهم ما يتأمنلهاش وانا كنت بقول رأي بس

لكن انت اخدت كلامي أمر ورحت نفذته وقلتلها انك هتسيبها وانت قلت انها كانت حامل وده اللي أزم الموضوع لان احنا الاتنين افتكرنا أن آخر الموضوع هيكون انكم تنفصلوا مكنش علي البال ده كله ان هي تطلع حامل وتهرب والدربكه اللي حصلت دي كلها 

=وانا كمان افتكرت أن ده هو اللي هيحصل 

طب هنعمل ايه ؟.......

...... 

استوووووووووووب 

اسفه جدا بس حالتي النفسيه مش كويسه خالص علشان اكتب كتبت علي قد ما قدرت علشان متزعلوش لاني بقالي يومين ما نزلتش حاجه لكن يعلم ربنا انه غصب عني 

ياريت تترحموا علي عمي علي وتدعولوا في الأيام المفترجه دي وربنا يتقبل مننا جميعا 

يلا.........

أستودعكم الله 

اسماء العذب( كروان)

الفصل السابع من هنا 

بدل ماتدور وتبحث علي الروايات خليها علي تليفونك وحمل تطبيقنا

تعديل المقال