رواية همسة وجع الفصل السابع 7 بقلم اسماء العذب

 

رواية همسة وجع الفصل السابع بقلم اسماء العذب

7

# همسه _ وجع 

صلوا علي الحبيب المصطفى 

___________________________________________________ 

......طب وهنعمل ايه؟

سأل عصام وهشام شخط فيه بصوت عالي 

/انت بتسألني انا هو انا مش جايلك علشان انت تقولي انا هعمل ايه تطلع انت كمان مش عارف ...اتصرف يا عصام انا دلوقتي عامل زي الغرقان ومش عارف اتصرف ولا افكر في اي حاجه 

رد عصام هو بيحاول يهديه 

_طب اهدي.. اهدي اكيد هتتحل 

/تتحل ازاي بس.. تتحل ازاي ده لو حد عرف اني السبب في هروب همسه هروح في داهيه

 ولا لو عرفوا السبب وإيمي ومحمد اخوها لو سمعوا بالحكايه دي يمكن تطلب انها تسيبني ومحمد يطردني من المستشفى 

وكل حاجه كنت ببني فيها تنهد فوق دماغي 

انا واللي خلفوني دبرني يا عصام وقول اي حيله اعملها علشان ماضعش 

_طب مش يمكن هي راجعه ومش حطاك في دماغها 

رد عليه هشام بتريقه وهو بيعوج بقه بطريقه كأنه بيقوله والله وقاله 

/مش حطاني في دماغها دي كانت مسافره بره مصر ورجعت معاها عيلين واحتمال يكونو عيالي ..يعني فكرك لما حد تعرفه ويعرفها

يسألها عنهم هتقوله ايه ولا لما ترجع لأهلها ويسألوها هتقول ايه ...اكيد هتقول اللي حصل اكيد يعني مش هتشيل الشيله لوحدها ...طب ايه رأيك اني حاسس انها راجعه مخصوص وحطاني في دماغها يعني

هتخسر ايه اكتر من اللي خسرته ؟؟

عصام قعد علي اقرب كرسي ليه وهو بيفكر في اللي هشام قاله وهشام كمان راح وقعد علي أقرب كنبه وهو بيدفن وشه بين ايديه

وبينفخ من حاله الرعب اللي لبسته احد ما عصام قال علي غفله وبسرعه وهو بيسأله

 

_هشام هو انت العيال دول لو كانوا عيالك بجد هتعمل ايه ؟؟؟

هشام رفع رأسه بسرعه واتنفض وكأن السؤال عمله كهربا في كل جسمه وقال

/ ..... 

___________________________________________________ 

عند إيمي 

وجات للسؤال اللي محيرها هيناموا فين البيت فيه اربع اوض للنوم اوضتها هي وهشام واوضه للضيافة لكن مش مجهزه

ولا مترتبه ومحتاجه

 نضافه وما فيش وقت والاوضه التالته هي اوضه في حال كانوا خلفوا اكتر من طفل بحيث يكون لكل طفل اوضه 

والاوضه الرابعه هي اوضه ابنها اللي اتوفى معقول تخليهم يناموا هناك؟ ؟؟ 

لكن ما فيش حل تاني إلا انها تبتدي تنضف واحده من باقي الاوض لكن مزاجها دلوقتي مش طالب انها تنضف ولا تعمل اي حاجه فيها شغل

 

لكن عاطفتها غلبتها واختصرت

كل حاجه وقررت انهم يناموا في الاوضه الجاهزه وهي اوضه طفلها المتوفي 

لعل دخول أطفال للاوضه يكون فال خير علي أصحاب البيت ،فا طلبت منهم انهم ييجو وراها واول ما شغلت نور الاوضه الاتنين شهقوا بفرحه من شكل الاوضه اللي كان شملها ساحر بمعني الكلمة ووعد قالت

 

*واااااو دي شبه اوضه الاميرات بتوع ديزني هو احنا هنام هنا يا طنط؟ ؟؟

بصت علي إيمي وهي بتسألها وإيمي هزت راسها بحنان وهي بتقول 

=ايوه ياروحي انتوا هتناموا هنا 

بعدها دخلت معاهم لحد السرير ووليد بيلتفت حوالين نفسه لحد ما سأل إيمي علي غفله 

_طنط إيمي هو ليه الاوضه دي فيها حاجات أطفال صغيره خالص من اللي هم لسه مش بيمشوا دول هو دي اوضه نونو؟؟؟

إيمي هزت راسها من سكات وهي بتحاول ما تبينش زعلها 

_هو النونو ده ابن حضرتك انتي ودكتور هشام؟ ؟؟ 

ومن تاني إيمي هزت راسها برضوا من سكات لحد ما وعد سألتها

*طب هو فين يا طنط احنا ما شفنهوش لما جينا انا بحب النونوات اوي ووليد كمان بيحبهم خالص

إيمي قعدت علي السرير وشالتهم علشان يقعدوا جنبها وبقت بتمسح علي عيونها علشان دموعها ما تنزلش 

وهي بتقول بوجع ظاهر في صوتها

=هو مش هنا راح عند ربنا وبقي نجمه في السما  

بعدها حاولت تغيير الموضوع وسألتهم 

=هو انتوا مش تعبانين يلا علي النوم يا كتاكيت 

*طب ممكن حضرتك تحكيلنا حدوته كل ليله زي ما ماما بتعمل ؟؟؟

متعرفش ليه ابتسمت من سؤال وعد وجهزت راسها بتأكيد وهي بتقول 

=اكيد ينفع مين قال ما ينفعش..قولولي انتوا عاوزين حدوته ايه ونا احكيها

الاتنين في صوت واحد 

حدوته الشاطر حسن

إيمي ابتسمت وبدأت كلام وهي بتقول 

طب من عيوني ...كان يا مكان في قديم الزمان وما يحلي الكلام إلا بذكر النبي عليه الصلاه والسلام.........  

........ 

___________________________________________________ 

عمر كان قاعد في البلكونه بيشرب شاي وهو سرحان وبيضحك وبيفكر فيها وهو بيسأل نفسه وبيقول

_إمتي بقي هتاخد بالها مني أو حتي تلمحني لمح عملت كل حاجه علشان ألفت نظرها لكن هي مش واخده بالها خالص ....بس بصراحه تستاهل كل اللي

 بعمله وهعمله علشانها وأكيد هتكون ليا ..ايوه صح هتكون ليا لازم تكون اكيد مش هتلاقي حد يحبها ويعشقها زيي 

فجأة ظهرت قدامه 

وكأنها طلعت من راسه علشان تتشكل قدامه كانت واقفه في البلكونه اللي في العماره اللي قصاده لابسه بيجامه بيتي بنص كم وعامله شعرها كعكه نازله منها خصل علي وشها مخلية شكلها قمر وهي بتبص في التلفون بتاعها 

عمر تقريبا عيونه كانت هتطلع قلوب من فرحته بشوفتها ..بعدها التفت يمين وشمال

 ولما ما لقاش حد حواليه في باقي البلكونات حاول انه يلفت نظرها نه يرفع ايديه الاتنين

ويلوح بيهم ويحرك جسمه يمين وشمال وكأنه بيعمل رياضه لكن التانيه مش واخده بالها منه خالص

 وكأنه هوا لحد ما جات في باله فكره 

وبقي يدور يمين وشمال لحد ما شاف طوبه صغيره في قريه الزرع والمره الثانيه يتأكد أن ما فيش حد شايفه وبسرعه كبيره حدف الطوبه ناحيتها 

من غير ما يحدد مكان نزوله ..واللي للاسف خبط في تلفونها وقعه علي ارض البلكونه عمر اول ما شاف كده الرعب وطلع تلفونه وعمل نفسه بيتكلم

مع حد وبص الناحيه التانيه علشان ما تشكش فيه والتانيه اتخضت 

جامد لما التلفون وقع من ايدها ووقت علي طول والدته من الأرض وبعدها حطت ايدها علي قلبها وهي بتدور بعنيها علي اللي عمل كده

لكن ما كنش فيه حد حواليها غير جارهم اللي بيتكلم في التلفون واللي شكت فيه 

وقعدت باصه عليه

ومركزه معاه وهو بدوره اتوتر من نظراتها لانه كان متابعها لكن من طرف عينه

لحد ما اخيرا سابت البلكونه ودخلت وهو قدر ياخد نفسه بعد ما دخلت 

وهو بيشتم نفسه علي غبائه وتسرعه لكن بص عليها بحالميه وهو بيقول 

_وعد اول ما نرتبط هجيبلك تلفون تاني بدل الي وقع ده لكن انتي كوني ليا ارجوكي 

___________________________________________________

مازن كان قاعد في اوضته بيذاكر لأنه أهمل دراسته الفتره دي فكان بيحاول يعوض اللي فاته وهو قاعد بيفتكر ومنسجم موبايله رن وقاطعه ولنا شاف صاحب الرقم رد بسرعه وقال 

_معاك يا لول 

=ايه يسطا؟ ؟ من ساعه المره اللي فاتت وانت تقلان علينا ومش علي بالك 

مازن ضحك وهو بيقوله 

_عيب يا زميلي دنته الشق يا جدع المهم قولي ايه رأيك 

=آخر جمدان ..عالمي الكل كان عينه عليك ولا البنات مقولكش يا جدع هيموتو من جمدانك ربنا يحفظك من العين يا ابني والله 

مازن بغرور وهو بيحط ايده على صدره وكأنه بيحيي الجمهور قدامه وهو بيقول 

_شكرا شكرا عارف كل ده متنساش ده انا ميزو يسطا 

المهم قولي ايه الجديد 

=احم احم..في طلعه بكره على الساعه ١١ او ١٢ كده خليك جاهز 

_بس مش بدري بكره ده يادوب كان آخر مره امبارح 

=ماهو عشان كده الكل كان مبسوط اوي من آخر مره وعاوزين تاني فاهمني انت اكيد 

مازن بعد الكلام ده ابتسم بمكر وهو بيقول 

_لاا مادام ده طلب الجمهور مقدرش أرفض الواحد مننا ملهوش إلا جمهوره ولا ايه 

=ولا اه ...اشوفك بكره يلا اجهز ...سلام يا برنس 

_سلام يا لول 

بعدها ساب المكتب اللي بيذاكر عليه وقفل الباب بالمفتاح و وخرج لبس من الدولاب وحطه في الشنطه بتاعته الجامعه بعدها شال المرتبه وطلع الصندوق الحديد

وجاب المفتاح المعلق في سلسال في رقبته وفتحه وجاب الورقه وكتب رقم معين جنب الرقم الأصلي للفلوس اللي معاه وهو بيحط علي الرقم ده دايره وبيقول

في نفسه إنه لازم ياخد ضعف المبلغ بكره علشان يقدر يخلص بسرعه وينتبه لدراستك وهدفه الأصلي بعدها رجع كل حاجه زي ما كانت

ورجع هو كمان يعمل اللي كان بيعمله قبل ما التلفون يرن وحاول يذاكر لكن غصب عنه عقله مشوش في طلعه بكره 

استوووووووووووب 

اسفه جدا جدا جدا علي التأخير بس عندي ظروف من دخله رمضان والحاله النفسيه وشويه الكركبه اللي حصلالي الايام دي لكن إن شاء الله احاول التزم في المواعيد وناخد بالروايه شهر رمضان فا يريت تعذريني وتكوني تفاعل كويس علي البارت من باب جبر الخواطر يمكن النفسيه ترتاح شويه 

يلا 

أستودعكم الله 

اسماء العذب( كروان)

الفصل الثامن من هنا 

بدل ماتدور وتبحث علي الروايات خليها علي تليفونك وحمل تطبيقنا

تعديل المقال