رواية طفلة من رحم الشيطانه الفصل الثامن بقلم احمد محمود محمد
8
طفله من رحم الشيطان
لـ احمد محمود محمد ( عوده وانتقام)
وبدأ المكان يتهز بيها جامد كأن فيه زلزال جامد وبدأت تظهر مجموعه من الستات. والرجاله لابسين اسود ووشوشهم لونها اسود وملهمش عيون ولا اذان ولا حتى شعر ولا انف
وبدأوا يرددوا " انتى ملكى انا وبس " وبيقف المجموعه دى من الناس حوليها على شكل دايره كبيره وكل واحد وواحده منهم بتلف راسها 360 درجه بشكل مُرعب وغريب
بتكون مرعوبه جدا وبتبص وراها بتلاقى باب واحد بس والمكان بقا عباره عن صحراء والاصوت من كل حته حتى من السماء اللى شبه النار دى
وبتجرى ع الباب وبتفتحه وبتلاقى نفسها فى بدروم بيتهم وهدومها متقطعه وباين عليها الارهاق الشديد كأنها كانت بتتعذب وفيه خرابيش على وشها وايديها وجسمها فى اماكن متفرقه
ده غير ان فيه أثار لكرباج على ضهرها والأثار دى باينه اوى
وبتجرى على بيتهم وبمجرد ما بتفتح الباب الكل بيستغرب من شكلها ومين اللى عمل فيها كده وبتاخدها امها فى حضنها وبتسألها كنتى فين طول السنين اللى فاتت دى
بترد البنت بعد ما بتستعيد وعيها " سنين ايه يا ماما انا كنت فى البدروم!
ولما بتبص فى النتيجه بتلاقى نفسها فى سنه 2022 وهيا مش مستوعبه اللى حصل
غابت تلات سنين كامله عن اهلها لدرجه ان الكل افتكر انها ماتت والاقاويل كترت وفيه اللى اتهمها انها هربت مع واحد
بس الام كانت واثقه فى بنتها كُل الثقه
وبتخلص كلامها حبيبه اللى بتكون بتحكى لشيخ اسمه عبد الرحمن كل اللى حاصل معاها ده
وبتكتشف من كلام الشيخ عبد الرحمن ان صاحبتها واللى كان اسمها " دينا " كانت هيا السبب فى كل اللى حصل لحبيبه
وان دينا دى مش بنى ادمه.. وان الصوت اللى كانت بتسمعه ومش عارفه هوه صوت مين بس شاكه فيه كان صوت دينا
وعلشان هيا كانت مُرهقه فى الفتره دى معرفتش انها تميز صوت صحبتها
وعاشت حبيبه خمس شهور من بعد ما رجعت فى عذاب عظيم مكنتش حرفيا بتقدر تنام ولو نامت بتصحا على كوابيس
وبتشوف صاحبه عُمرها دينا وهيا واقفه فى مكان كبير وبتدى اوامر لناس انهم ينفذوا حُكـ ـم الاعـ ـدام فى ناس تانيه
وبنستنتج ان دينا من عالمهم وانها اميره تبع " حنزقيل "
وبتكون فيه اصوات بتنده عليها فى كل حته حتى ف الحمام ولما بتشغل قران عشان تنام بتحس بصداع شديد وبتحس ان عيونها بتخرج من دماغها
وبتحس ان صوتها محشور ومش عاوز يخرج ده غير انها بتحس انها متقيده مبتقدرش تحرك ايديها ورجليها
وطول الليل اصوات عاليه محدش بيسمعها غيرها منعاها من النوم خالص
والشيوخ اللى زاروها كتير بس محدش قدر يعالجها وفيه منهم تلاته ماتوا بأبشـ ـع الطُرق
لحد ما فى يوم لقيوها ميـ ـته فى اوضه نومها وكان على وشها علامات الفزع والكل استنتج انها شافت حاجه رعبتها
بيوصل الخبر لعادل.. الشاب اللى كانت بتحبه حبيبه وبيروح العزاء بتاعها بتكون قمر بقا عندها تلات سنين
وبمجرد ما بيدخل العزا بتكون قمر بتلعب وبصتله بصه واحده بس واتحولت عيونها للون الاسود
وبمجرد ما بيخلص العزا بيكون نازل من البيت على السلم ومروح وفجأه بدون اى مقدمات بيقع من على السلم وبيموت فى الحال
عذاب عظيم بتتعرض ليه عيله وحيد ومكانش حد لسه مفسر اللى بيحصل ده والوحيد اللى ممكن يفهم كل حاجه هوه الشيخ عباده
بتكون شيماء حزينه جدا على بنتها. وكانت قاعده بتقرأ قرأن ودخل عليها وحيد
- انا عارف ان اللى حصل لحبيبه ده مش قليل وعارف انها كانت غاليه عندك اوى بس ده قضاء ربنا هنعترض؟
بنتك قتلت بنتى يا وحيد
- انتى بتقولى ايه انتى اتجننتى دى طفله
انا مش مجنونه انتا اللى مجنون ومش مصدق اى حاجه وبنتك من يوم ما شرفت واحنا فى عذاب ملوش اول ولا باين ان هيبقا ليه اخر
- طيب اهدى انا مقدر اللى انتى فيه
بنتك دى لازم تخلص منها.. امى كان عندها حق لما قالت انها زرع شيطانى.. من اول مااتولدت والكل شاكك فيها وانا عشان غبيه وعلى نياتى كُنت فرحانه لفرحتك بيها
- البنت طفله معقول تعمل كل ده دى صُدف وده ترتيب القدر وامر ربنا
واللى حصل لأمك بسببها واللى حصل لعباده واتحرق بعد ما اتكلم عنها والممرضه وغيرهم ده تفسره بأيه؟
- انتى عاوزانى اقتـ ـ ـل بنتى يا شيماء؟
علشان مصلحتنا لازم تعمل كده
- بيغضب وحيد وبسيب اخته وبيمشى. وبيقرر انه خلاص هياخدها ويسافر اى مكان بعيد لحد ما تكبر شويه..
وبيلم شنطته وهدوم بنته وبيسافر بيها.. وبيقطـ ـع كُل اتصالاته مع اهله وحتى ابوه. ويعدى اربع سنين ومحدش يعرف عن وحيد اى حاجه وبيرجع وحيد لأهله تانى ومعاه بنته
وبتكون قمر كبرت وبقا عندها سبع سنين.. وبيرجع وحيد لبيتهم علشان يلاقى اخته وابوه واخوه
واللى بيسلموا عليه وبيفتكروا ان السنين اللى فاتت دى انه حصله حاجه خصوصا انه كان قاطع كل المكالمات بينهم وبين بعض
وبينسوا كُل اللى حصل.. وبيسأل وحيد عن احوال البلد والكل بيأكدله انها بخير
وبيجيب سيره الشيخ عباده.. فبترد اخته انه من اول مااختفى من سبع سنين محدش شافه ومرجعش هنا تانى
وحيد كان فاكر ان بعد سفره ببنته ان خلاص هيعيشوا حياه كويسه وسعيده.. وبالمره يثبت للكل ان اللى حصل مجرد صُدف وترتيب القضاء والقدر وان قمر ملهاش ذنب
بس مش ده اللى حصل واللى حصل غير كُل شيئ
بتبدأ قمر تتعرف بأهلها.. عمتها وعمها وجدها.. وبيكون الجد فرحان بيها اوى دى لأنها بنت ابنه اللى بيحبه..
حُب الجد لبنت ابنه خلق جوه " محمود " ابن سالم حاله من الكُره الشديد ده لأنه شايف انه اولى بحنيه جده من واحده كان ديما بيوصفها ابوه بأنها منبوذه
علشان كده كان ديما بيحاول يأذيها ويضايقها بالكلام او بالفعل.. وبنشوف قمر وهيا قاعده فى اوضتها
وباين عليها علامات الغضب وبتبدأ قطرات دم تنزل من عيونها وده معناه انها غضبانه من محمود جدا
لحد ما بتهدا وبتبدأ تتكلم مع حد هيا الوحيده اللى شايفاه وبيبدأ الحد ده يظهر بالتدريج بس ملامحه مش باينه بسبب انه لابس حاجه مغطى بيها وشه
وبيكلمها وبيقولها متخافيش كل اللى عاوزاه هيتنفز
- انا لازم اخلص منه
هيحصل متنسيش ان ده قدرك وان دى مُهمتك عشان تنتـ ـقمى لينا وتفتحى البوابه
مبقاش فاضل كتير والملك عاوز يخرج..
هنعمل ايه؟
متخافيش انا هعمل كل حاجه.... وبيكون ده خادم من خُدام " حنزقيل " مارد قوى واسمه " ميطرون " من اقوى مرده الجن الهوائى
بيعدى وحيد من قدام اوضه بنته وبيسمع كل اللى حصل وبيعرف ان البنت بقت خطر فعلا
وانها ورثت العهد من والدتها ومن هنا بدأ وحيد يفكر ازاى هيخلص منها.. وبدأ يفتكر اللى حصل من سبع سنين
لما كانت سحر موجوده عند المقابر وبتفك الاعمال اللى كانت بتعملها.. ومن ضمنهم العمل بتاع العروسه منى وعريسها عمرو
وده اللى خلى حنزقيل يغضب عليها وراح وراها للمقابر وكان وحيد موجود معاها..
بيتكلم حنزقيل بصوت مرعب وخشن وقال: انتى خلفتى العهد اللى بينا وانا مأخدتش مرادى
- اكتشفت انى غرقانه فى بحر من السيئات وعرفت ان ربنا موجود وهيقبل توبتى
هاهاهاهاهاها ربنا اللى بتتكلمى عليه ده مقدرش يشفيلك امك.. انا اللى عملت ليكى كُل حاجه انا اللى اديتك كل اللى انتى عاوزاه
- وعود واهيه ملهاش لازمه امى اه بقت كويسه بس تحسن ظاهرى وماتت بعد شويه وانتا بتغوى الناس بالحاجه اللى نفسهم فيها بس بتكون وهم
انتى مش هتقدرى عليا انتى لازم تنفذى العهد اللى بينا.
- مش هيحصل
بيتكلم وحيد وبيقوله " ان عبادى ليس لك عليهم سلطان الا من اتبعك من الغاويين
اخرس وبيكتم صوت وحيد.. بس بتقوم سحر بسرعه وبتفضل تردد الايه
ومع ضعف حنزقيل بيقوم معاها وحيد وبيقولها انه هيرجع اقوى من الاول هيرجع وهينتقم وبيرمى على سحر تعويذه
وبيخلصوا قرايه الايه وبنعرف انهم حبسوه.. وهنا بتبدأ سحر تتعب بسبب اللى عمله حنزقيل قبل ما يحبسوه
وبتقع على الارض وبتفهم وحيد انه لازم يخلى باله من البنت ويحافظ عليها وانهم لو سيطروا عليها محدش هيقدر يوقف الشر اللى هيعملوه
وحيد مبيكونش فاهم حاجه.. وبتموت سحر.. بيتصل بسرعه بالدكتور توفيق رئيس قسم الباطنه فى المستشفى
وبيفهمه كل حاجه وانها ماتت وبعد الكشف مبيكونش حد فاهم هيا ماتت ليه
بس الغريبه ان الجنين بيكون لسه عايش.. ودى حاجه غريبه جدا جدا
بس احتمال انه يعيش ضعيف لأنه لسه فى الشهر الخامس.. وبيأمرهم وحيد يطلعوا الجنين وبتحصل المعجزه وبتتولد قمر اللى بتكون مكتمله وصحتها كويسه
ومن هنا وحيد بيفهم ان سحر كانت عارفه ان اللى فى بطنها طفله..
وبيفهم الدكتور انه يقول ان سحر ماتت اثناء الولاده علشان الست فتحيه " والده وحيد " كانت بتكره سحر
فلو عرفت انها ماتت فى المقابر هتكرهها اكتر وهترفض البنت
وكده بنفهم ان حنزقيل اتحبس وانه هيرجع ويخرج مره تانيه
وبيخلص وحيد تفكير لما بيلاقى قمر واقفه قدامه
وبصتله وقالت.. متحاولش تفكر فى حاجه مش من مصلحتك يا بابا.. هوه اكيد هيخرج وبتضحك وبتمشى
وهنا نعرف ان قمر عرفت ابوها بيفكر فى ايه.. وبيتأكد وحيد ان البنت تم السيطره عليها تماما..
مبيكونش عارف هيعمل ايه ولا هيتصرف ازاى وايه اللى ممكن يحصل معاه الفتره الجايه..
يتبع
#رعب_احمد_محمود
#سليله_الشيطان
