رواية شايفه نفسك فين بعد سنه كامله جميع الفصول بقلم مريم سمير
_ شايفه نفسك فين بعد سنه؟
= مش كانت خمس سنين؟
_ بقولك أي يفندم اخلصي معلش!
= انت بتكلمني كده لي يروش؟
_ عشان أنا بعمل الانترفيو دا بدل ابويا غصب عني وكده كده هتترفضي
= صراحتك شنجتني! ، طب مدام هترفضت هنعمل انترفيو لي؟
_ مش احسن ما انتي متلقحة برا؟
= ماشي اقتنعت
_ بس ال cv بتاعك ما شاء الله
= أيوة اللهم بارك ، هي فين الخرزة الزرقا ، ثانيه اطلعها من الشنطة
_ يقرف يفندم انتي بتعملي اي؟
= انت ازاي تقولي كده؟
_ انتي متخرجة ب مقبول؟
= فيه مادة جبت فيها جيد ، ابقي بص قبل ما تحكم علي الناس
_ تصدقي أنا ظالم وانسان مش كويس؟
= منك لله ربنا ينتقم منك
_ اييي؟
= بقول ربنا يكتر منك في أي ؟
_ اه بحسب ، طب وشايفه نفسك فين بعد كده؟
= في الكرسي الي انت قاعد فيه دا
_ ما شاء الله المقبول مقوي قلبك
= نتكلم بجد؟
_ ياريت
= شايفه نفسي بشتغل وبجيب لماما دوا السكر كل شهر في ميعاده ومش عليا أي حاجة للصيدلي ، وكمان عندي شقه واسعة ببلكونة ، واعرف اعمل بسكوت الشعر دقايق في عشر دقايق فعلا مش في تلت ساعات ، والمكرونة البشاميل تظبط معايا وتبقي جوسي ، وكمان نفسي ابني دار ايتام
_ دار ايتام؟
= اه مالك متنح لي؟
_ اصل امي متوفيه
= لاء دي للصغيرين بس مش هينفع اقعدك وسطهم
ضحك ف بصتله = ربنا يرحمها يارب
_ يارب
= استأذن بقي عشان خدت من وقتك كتير ، وياريت باباك ميقعدكش تاني تعمل انترفيو ، وقت الناس مش لعبه بلاش قرف كده
_ انتي يبنتي بتبرطمي بتقولي ليي؟
= مفيش ، هات ال file
بص علي الفايل ورجع بصلي _ تعرفي يا انسه مريم ؟ لو شركة شافت ال cv بتاعك ممكن يسجنوكي
= لي هما عارفين اني جايبه مجموعي ب الغش؟
_ يعني بمقبول وكمان غاشه؟ يبجاحتك والله
= مبحبش حد يتريق علي قدراتي العقلية
_ مش لما تبقي موجودة؟
= قولتلك فيه زفت مادة جبت فيها جيد متطلعوناش عن شعورنا بقي دا أي الهم دا
_ بتقولي حاجة؟
= انت هتجيب ال cv ولا اي في يومك دا يفندم؟
_ واي لازمتها فندم؟ اقعدي
= مش قاعدة
_ وانا بقولك اقعدي
= وانا مش قاعدة وأمور النفوذ والسلطة دي مبتكولش معايا
_ اقعدي بدل ما انده الأمن يضربونا رصاصتين اقعدي
قعدت= انت بتضيع وقتي جامد خلي بالك
_ لا وانتي ما شاء الله وقتك من دهب
= قدرني عشان هتخسرني
_ بصي ، بغض النظر عن مهاراتك الي معدومة ، بس انتي شكلك بنت حلال وطيبه وقلبك ابيض
= طب واي لازمته المدح بعد طحن الخواطر؟
_ انتي هتشتغلي هنا
= بجد؟ أنا راضيه ب أي حاجة والله ، حتي لو هبقي المدير
_ الرحمه يا رب ، مريم أنا كنت هشغلك بتاعت شاي وقهوة
= اه ، انت متهزرش معايا تاني بقي
_ هتبقي سكرتيرة بابا يستي
= هقعد في المكتب الي برا دا؟
_ اه
= اقسم بالله ؟ الي فيه تكييف فوقي؟
_ دا انتي مركزة بقي
= بس انا جايه علي اساس اني اشتغل في الحسابات
_ مريم ٦×٨ ب كام؟
= ١٤
_ والله أنا قولت شاي وقهوة ، طب تمسكي البوفيه طيب ؟
= انتوا عندكم هنا بوفيه؟
_ اه بيفتح لما نعمل اجتماعات أو حفلات للشركة
= انت شايفني اي يعم ؟ ماشي سكرتيرة زي بعضه ، المهم هتدوني كام في الليلة الي مش فايته دي؟
_ ٤ في الشهر كويس ؟
= عاوزة ٢٠
_ ممعكيش فلوس مواصلات؟ عنيا
= انت فاكرها ٢٠ ج؟ بس لاء أنا عاوزة حاجة تليق بيا عاوزة ٢٠ الف
_ لييييي! دا انا ابن صاحب الشركة ومبخدهومش!
= والله هي قدرات
_ مريم أنا متخرج بتقدير عام امتياز والتالت علي دفعتي
= قولتلي ٤ ؟ ماشي زي بعضه
واشتغلت! مكنتش مصدقه اني اقبل في شغل! بس ربنا دايما جميل وبيلطف بينا .
_ ودا كومبيوتر بتسجلي عليه كل المواعيد
= جتلي في ملعبي بقي ، أنا اصلا بروجرامر
_ اسمها بروجرامر ؟ ، انتي كنتي شغالة في حته قبل كده؟
= اه في شركة بس بطحت دماغ المدير
_ أنا ازاي اجازف ب ابويا ؟ طب وبطحتيه لي؟
= قليل الادب ، فاكرني هسيبه واعدي لكن أنا عديت علي عمره
_ ياساتر يا رب! بس ماشي ممكن نقول انك بميت راجل مع أنه مش مبرر
= هو عشان خد ٧ غرز يبقي أنا قادرة؟
_ ال ٧ × ٣ بكام يمريم؟
= ١٠
_ زي الفل
كان بيعلمني الشغل وكان بيمشي معايا واحدة واحدة ، كان شاطر جدا ولذيذ وطيب ، كان حلم ل كل البنات الي شغالين هنا والي بيتكلموا عليه دايما في وقت الاستراحة
_ وانتي بتزعقي وبتلمي علينا الشركة كلها لي؟
= جالي صداع يا احمد
_ من اي؟
= لك لك علي الفاضي والمليان ، عاجبهم فيك اي مش عارفه! وكل يوم نفس الكلام ، أنا اتحملت كتير بجد
_ لاء كتر خيرك ، عاجبهم فيا أي مش كده؟
= مفيش ميزة توحد ربنا وحاجة في منتهي الملل
_ طب ولي التقل
= روح علي مكتبك ورايا شغل
_ شغل أي بقي! احنا واخدين كلنا جزي بسببك
= ال٤ تلاف لو مخدهومش بالسحتوت هفجر الشركة دي
_ أنا الي جبته لنفسي
قربنا من بعض اوي ، كنا بنشوف بعض كل يوم ، وكان يسيب كل الطربيزات ويجي يفطر معايا ، كان بيسمعني ويحاول يحل معايا اي مشكلة بتحصل ، كنت بحب اصحي الصبح عشان اشوفه بعد ما كنت بتكدر كل يوم لو صحيت الضهر!
= دوق
_ يمريم انتي لي بتكرهيني؟
= والله ؟ دا مكرونة بشاميل ، انت عارف كيلو اللحمة بكام ؟
_ انتي قولتي قبل كده انك بتعمليها وحش
= أنا مبحبش اشكر في نفسي ، دوق واحكم
_ بس..
= بقولك دوق متصدعناش حاكم دماغنا
كل معلقه ويبصلي _ انتي الي عملاها؟
= اه والله
_ تحفه بجد ، تسلم ايدك
فضل ياكل وانا بصاله ، طلع إن الاكل بيطلع حلو لو معمول ب حب ، لو وقفتي في المطبخ بالساعتين والتلاتة مش هتبقي مضايقه لو انتي بتعملي الاكل دا لشخص معين ، شخص عاوزة تسمعي منه كلمه اكلك حلو ، ساعتها وقفة المطبخ وكل التعب بيروح .
= عاوز اي يا احمد ؟ أبوك لو طلع وشافنا قاعدين مش بتشتغل هاتك يجزي ويخصم ، المرتب معتش فيه ٥٠٠ ج علي بعضهم
_ عاوز اقولك حاجة مهمة اوي
= طب قول أنا مش فاضيه
_ مريم ، هو انا بالنسبالك اي؟
= وحيات خالتك؟ مسيبني الشغل عشان تسألني أسئلة مراهقه؟ شويه شويه تقولي لونك المفضل اي؟
_ قال صحيح لونك المفضل اي؟
= فحلوقي
غمض عينه وخد نفس عميق _ لا أنا اكيد اتسرعت
= اتسرعت في اي؟
_ بصي هو أنا..
= انت لسه هتسبل؟ بقولك عندي شغل
_ مريم أنا بحبك
= يخربيت الفضا الي انا فيه ، بص قول من الاول خالص ، قول وسمعني
_ وعاوز اتجوزك
= ما شاء الله دا الطموح تحفه
_ لاء منا هتجوزك أنا مش بعرض عليكي
= والله ؟ فاكرني هوافق بطريقتك دي؟ طب انسي بقي
_ مريم!!
= بتقول هتيجي تقابل ماما امتي؟
ضحك _ بقي انتي توقعيني؟ أنا كنت فاكر نفسي تقيل وبتاع
= مخدتش في ايدي غلوة
_ طب وانتي اي؟
= جعانة والله
_ طب اظبطي بدل ما افضحنا
= وانا كمان بحبك يا احمد ووطي صوتك
_ أيوة كده متجوش الا بالعين الحمرا
= لسه تلت ساعات والشغل يخلص روح مكتبك
_ مريم ال ٣×٩ بكام؟
= ب ١٢
_ زي الفل
مريم سمير 🤍.
