رواية حب بعد الطلاق كامله جميع الفصول بقلم زهرة الهضاب
#حب_بعد_الطلاق
#الجزء_الأول
انا بنت عندي 26 سنة قبل 8 سنين كان عمري 18 سنة جا عندنا لدار واحد يعرف خويا و جاب معاه يماه وباباه شافوني بعد جابوه هو عندي شافني وشفتو وقبلنا بعضانا كانت الفترة قصيرة بزاف بعد الشوفة بشهرين تزوجنا يعني درنا خطبة رسمية خفيفة مدرنا فيها والو بعدها تزوجنا مكانش عندي الوقت نتعرف عليه ونحكي معاه زربنا في كلش مام انا مكنتش مصدقة كيفاه تزوجت بالسرعة هذي
و المشكل لكبير قبل هذا كامل ماسقسينا عليه لا والو قلنا يعرفو خويا باين يكون انسان لباس عليه و متربي للعلم خويا انا يصلي متقي الله خطيه المشاكل و السهرات لا علينا المهم
تزوجنا بعد مدة قصيرة زواج بدات تبان الحقيقة نحب نقلكم يا خياتي فارق العمر بيني وبينو كان كبير شوية كيما قلتلكم انا كنت 18 سنة و هو كان 30 سنة يعني بيني وبينو 12 سنة...
وبعد الزواج بديت نكتشف بلي الراجل يشرب ويسهر مايرجعش حتى نص الليل وانا كنت كاريا دار وحدي قدام دارهم لي هم دار شيخي كنت ناكل ونشرب معاهم و الراجل كان يديني عندهم كل يوم ويدي معاه مفتاح الدار ويخليني نستناه حتي نص الليل نبقى انا كيما الكلبة مع خياته و مرات نعيا و تديني عيني وانا عند رجليهم و مرات ما يجيش خلاص ويخليني راقدة تحت الرجلين لا فراش لا غطاء السيد لا يصرف عليا لا يلبس فيا كيما النساء وزيد مهملني وراميني وليت نحس روحي بلا راجل كنت في عالم لقيت روحي في عالم....
انا كنت صغيرة ومنعرفش كنت نخاف منو منقدرش نقلو والو نسمعلو ونطبق وكنت قافزة دارهم كامل يحبوني على خاطر لي يحوس عليها نديرها وانا ساكتة وبعد 4 شهر لولين رفدت بالحمل وكنت فرحانة بزاف قلت بلاك زهري يتعدل بعدها م عرفت بالحمل تاعي بشهر صرا بيني وبينو مشكل بسبت اختو وكيما يقول هو اختي في بلاصت ماما ولي تقولو عليها ديريها وبلعي كان يسمع كلامها وكانت هي الشيطان و سبت المشكل.... اانا كان عندي الحق مقلت والو مهوش فالمعقول كيما النساء كامل قتلو حابة نروح لعند الطبيبة كيما النساء تفوت عليا ونشوف وشعندي طفلة ولا طفل السيد مكرة فيا راح مد لختو الدراهم وخلاني انا نتفرح ومقنوطة راح نموت بقلبي كيما تعرفو انا كانت حاكمتني الغيرة و القنطة كيفاه انا رح نفوت وهو يعطي لختو الدراهم وانا بلاصتي وين ملا عندو تسمي انا بلا قيمة الي هذه الدرجة وناضت المشكلة في دايد الليل وهو كان سكران ضربني حتى دخت فطنت غير لقيت اختو تنوض فيا رفدتني هي و امو داوني لدارهم وانا بلا لبسا كي لعباد وحفيانة نمشي كي المهبولة علي 3:00 في نص الليل وقعدت ايامات في دارهم لا نحكي معاه ولا يحكي معايا بعد 4 ايام قاتلي امو نديك لطبيبة تفوت عليك ونديك لداركم فرحت بزاف وقلتلها ايه ديني رحنا عند الطبيبة فوتت عليا لقات عندي طفل وقالت ليا الحمدلله لباس عليكم انت والجنين بعدها داتني لدارنا كنت فرحانة بزاف... قعدت ايامات في دارنا من بعد جا للدار باه يرجعني وانا قعدت ساكتة من خوفي منو م قلت والو قعد يهدر فيا قدام دارنا ويصغر فيا قدامهم و انا ساكتة بعد لمت قشي ورجعت معاه #يتبع
