رواية شقة الزمالك الفصل الرابع بقلم محمد شعبان
#الجزء_الرابع
#شقة_الزمالك
-طب وحلهم ايه العُمار دول!
-شغلهم قرأن وهم هيتكسفوا على دمهم وهيبطلوا يطلعوالك.
-ماشي ياعم ملواني، نورت المحكمة.. سلام.
سيبته وطلعت الشقة وانا دماغي بتودي وتجيب، عُمار ايه وبتاع ايه، انا اه من منطقة شعبية وبصدق في وجود الجن وكده، بس لأ، مش للدرجة دي، مش لدرجة انهم يخلوني اشوف حلم غريب زي اللي شوفته ده، لا وفي نهايته وبعد ما اصحى من النوم، الاقي نفسي في مكان غير اللي انا نمت فيه.. لأ يابليغ لأ، اللي حصلك ده لا سببه جن ولا عفاريت ولا أي كلام من ده، دي اكيد كوابيس وبسببها مشيت وانت نايم، ايوه.. ده التفسير المنطقي.. او بمعنى أصح، ده اللي انا كنت بقنع نفسي بيه لحد اللي شوفته في الليلة دي.
ليلتها، بعد ما أكلت واتفرجت على التلفزيون وقعدت اتكلم مع خطيبتي شوية في التليفون، نمت، هو انا اه نمت متأخر، بس في النهاية نمت، وبمجرد ما غمضت وسرحت في غيبوبة النوم وحلاوتها، حواسي كلها انتبهت بسبب صوت سمعته.. كان صوت عزف على عود!
فتحت عيني وقومت من عالسرير، الدنيا كانت ضلمة، مشيت بخطوات ثابتة وبطيئة لحد باب الأوضة، صوت العزف كان من برة، بالتحديد من الصالة.. مديت إيدي ناحية أوكرة الباب وفتحته، وبمجرد ما خرجت من الأوضة، لقيت الصالة بتاعتي شكلها مختلف، كانت بنفس هيئتها اللي شوفتها عليها امبارح، اما الموجودين فيها، فماكانوش كتير زي ما شوفت قبل كده، دول كانوا تلاتة، راجل لابس بدلة شكلها قديم، وراجل لابس جلابية، ومعاهم كانت قاعدة واحدة ست.. ركزت معاهم وانا مش فاهم حاجة، مين دول وبيعملوا ايه في صالون بيتي الساعة دي؟!، لا والأهم من ده كله، دخلوا ازاي وامتى وشكل الشقة بقى عامل كده ليه؟!
-طب والمطلوب؟!
قطع اسئلتي مع نفسي، السؤال اللي سئله الراجل اللي لابس بدلة، وبعد سؤاله ده، رد عليه الراجل ابو جلابية وهو بيشاور على الست..
يتبع
قصة شقة الزمالك "التوقيع الأخير"، القصة مستوحاه عن جريمة حدثت بالفعل
