رواية همسة وجع الفصل السادس عشر 16 بقلم اسماء العذب

 

رواية همسة وجع الفصل السادس عشر بقلم اسماء العذب

لايك الاول يا شطار 

16

#همسه_وجع

#رمضان_مبارك

جماعه اسفه جدا والله علي التأخير بس انا بجد تعبت من موضوع النت اللي بيحصل مني كل شويه 

عشان كده قررت بعد العيد إن شاء المولي اعمل باقة منفصله علي تلفوني عشان ارتاح والنت ما يفصلش مني ..عشان كده ياريت تتحمليني لو النت فصل تاني لحد العيد ..واسفه تاني والله انا محقوقالكم ياريت تعذروني 

صلوا علي الحبيب المصطفى 

___________________________________________________

هشام وايمي ومحمد ومامته كانوا خلصوا الغدا وهشام علي اعصابه عاوز يعرف عصام عمل ايه وتقريبا مش معاهن من كتر ما هو دماغه مشغوله 

لكنه مضطر انه يتواجد معاهم عشان محمد مامته ما ياخدوا موقف عليه 

وتلفونه كان بيرن لكنه ما يقدرش يجاوب قدامهم علشان كده عمله صامت

واخيرا شاف النجده جواله علي هيئه بنت عندها حاجه وتلاتين سنه لابسه وردي مع نبيتي 

الممرضة :دكتور هشام ..حضرتك مطلوب عشان تشوف الكشوفات بتاعه المريضه همسه 

وبسرعه البرق وقف هشام لكنه في آخر لحظة اتعقل وبص لمحمد وكأنه بياخد منه الأذن واللي جه علي هيئه هزه من راسه وكلامه

محمد:اتفضل يا هشام انت روح شوف شغلك ولما تخلص تعال علي مكتبي هنكون هناك مستنيينك 

هشام: هخلص بسرعه واجي..مش هتأخر عليكم 

بعدها ادور وهو بيتنفس بزهق من اللي بيحصل معاه والتيار اللي دايما معاكس اتجاه خططه

ام إيمي بعد هشام ما مشي اتأففت بغيظ من سلوك هشام معاها ومع بنتها 

هي عارفه ان هشام مش بيعمل إيمي احسن حاجه لكن مضطره انها تصبر علشان ما ينفعش تاخد موقف سلبي ضده لان هشام دكتور مهم في المستشفى وجوز بنتها الصغيره 

وأهم سبب كان بالنسبه ليها هو نظرات الناس ليهم والشماته اللي هتشوفها في عيونهم لو حصل خلاف بين هشام وإيمي 

عشان كده فضلت انها تفضل ساكته 

وإيمي مش عارفه هي حاسه بأيه مشاعر مختلطه 

كيانها متلخبط 

عقلها متشتت 

بتسأل نفسها هو لازم يكون فيه ناس حوالينا عشان هشام يعاملني زي اي اتنين مرتبطين طبيعيين 

اومال قبل الجواز كان معيشها ولا كأنها جولييت وهو روميو العاشق الولهان 

كانت بتفتكر نظراته ليها وكلامه اللي يىسحر والهدايا اللي كان بيغرقها بيها 

هي صحيح ما كنتش محتاجها لكن احساس ان فيه حد مهتم بيها وبيعمل المستحيل عشان ينزل رضاها كان عاجبها 

لكن لما اتجوزها بقي يبعد عنها بسرعه ويتعامل معاها ببرود ولامبالاه وكأنه متجوزها غصب 

لدرجه انهم ممكن ياخد يوم كامل ما يكونش في بينهم اي كلام غير صباح ومساء الخير 

سألت نفسها ..انا فيا ايه غلط علشان ما اعجبهوش؟؟؟

طب حصل مني اي غلط غيره من ناحيتي ؟؟؟

إيمي لما اتخنقت من كتر التفكير وقفت وهي بتقولهم انها رايحه الحمام 

ودخلت جوه المستشفى بعد ما سابت الجنينه

واخوها وامها

___________________________________________________

الكل موجود في اوضه الدكتور المسؤول عن همسه واللي للأسف كان هشام

مستنيين هيقولهم ايه حتي مازن متسند علي عمر لانهم هيروحوه بعد اللي هيتقال علشان يرتاح 

هشام لما لاقي الكل متجمع حواليه بلع ريقه خصوصا ان عنده احساس ان عمر هيهجم عليه من خلال نظراته علشان كده قال

هشام: النتايج بتقول ان فيه اخبار كويسة واخبار مش كويسة..تحبوا ابدأ بأنها فيهم 

ابو عمر: اي حاجه يابني مش هتفرق 

هشام: طيب الخبر الكويس ان هم...قصدي المريضه ماعندهاش اي نزيف داخلي ولا اي إصابات مستعصية ومع الوقت الجروح بتاعتها كلها هتخف

وللأسف...يعني الخبر الوحش انه الحادثه أصابت الجزء المسؤل عن الذاكره في الدماغ وده كان السبب ان يبقي عندها فقدان ذاكره دائم كُلي يعني بالعاميه هتكون زي الكتاب اللي صفحاته بيضاء ما فيهوش اي حاجه

مش هتفتكر اي حاجه قبل الحادثه لا هي مين ولا فين ولا ايه اللي حصلها ولا هتفتكر أهلها ولا صحابها 

كمل كلامه وهو بيبص لمشعل والأولاد وهو بيوجه ليهم الكلام 

ولا هتفتكر جوزها ولا حتي عيالها ولا اي حاجه ولا اي حد 

مشعل ملامح وشه كانت غريبه ...مابين الراحه والقلق 

....الأطفال مكنوش فاهمين حاجه لان الكلام اكبر من استيعابهم ..ابو وأم همسه كانوا مش عارفين يفرحوا لان بنتهم مفيهاش أي إصابات جسديه 

ولا عارفين يزعلوا انها مش هتفتكرهم ابدا ولا تتعرف عليهم لما تفوق 

عمر كان مبسوط من قلبه أن اخته كويسه وفي اللحظه دي نسي كل غضبه منها واللي عملته ويمكن ده السبب اللي ممكن يرجعهم تاني زي الاول 

اه مش زي الاول قوي بس علس الاقل النفوس تتصافي ويقدروا يطمنوا عليها في اي وقت من غير قلق 

مازن كان بيتريق علي نفسه بعد اللي سمعه 

مازن :ماكنتش انا اللي فقدت الذاكره وارتاحت ..اهو علي الاقل اهرب من المواجهه اللي هتحصل لما اروح البيت...صحيح محدش بياخد كل حاجه..وانت يا مازن واخد كتير يعني مجتش علي سرك اللي هيتكشف 

بس ربنا يستر والعقاب يكون هين ...بس الحمد لله همسه بخير...الف حمد وشكر ليك يارب 

ويارب سلم علي اللي هشوفه في البيت 

هشام لما لاقي الكل سرحان ومسهم قطع كل ده وهو بيقول 

هشام: هي دلوقتي المفروض تقعد في المستشفى لحد ما تتماثل للشفاء مغ الالتزام بجلسات علاج طبيعي بعد ما تخرج لمده شهر او شهرين علي حسب الاستجابه 

ده غير انها محتاجه تاخد الادويه علي معادها وتغذيه كويسه 

وبالنسبه لموضوع فقدان الذاكره فا في ادويه المفروض تاخدها مع انها غير مفيده في حاله الفقدان الدائم للذاكره لكن مش هتضر وممكن جسمها يستجيب مع ان ده احتمال يكاد يكون منعدم لكن بصفتي دكتور لازم يكون فيه امل عند المريض 

مشعل :يعني بتقصد انو همسه ما رح تتذكر شي نهائي طول العمر ؟؟

هشام بتشفي ونظرات شمتانه مستتره

:اه هو كده المريضه مش هتفتكر حتي اسمها وكل المعلومات اللي هتاخدها هتعتمد فيها علي المعلومات اللي حضراتكم هتقولوها ليها 

ابو همسه: قدر الله وما شاء فعل..الحمد لله علي كده ...الحمد لله انها كويسه وصحتها تمام حياتها اهم 

ولو علي ذاكرتها ربنا هو القادر يرجعهالها ولو ما رجعتش يبقي ربنا رحمنا كلنا من اللي كان هيحصل لو كانت افتكرت ..الحمد لله

وفاء: ايوه فعلا الحمد لله أهم حاجه بنتي بخير وربنا نجاها من حادثه كبيره ووقت ما احتاجتنا ربنا كتبلنا اللقا علشان ناخد بالنا منها ومن عيالها ..ربنا يحفظهم لينا 

وعد مدت شفايفها بزعل ودموعها علي مشارف النزول 

وعد: يعني كده ماما مش هتفتكرنا انا ووليد وزيد وهتقعد كل ما تشوفنا تقولنا انتوا مين زي المره اللي فاتت ؟؟؟

بعدها انفتحت في العياط وهي كل اللي علي لسانها 

عاوزه ماما ..عاوزه ماما 

وليد قرب منها بسرعه هو ومشعل ووفاء والكل بيحاول يهديها ويسكتها لحد ما قرب منها ابو همسه وهو بيتكلم بحنان وبيطبطب علب رأسها 

ابو همسه: بس يا حبيبتي ما تعيطيش وصدقيني مامتك حبيبتك هتخف وترجعلك وتبقي معاكي 

وعد بعياط :بس هي مش هتبقي فكراني 

ابو همسه: ولو حتي لو عقلها ما افتكرسش انتوا مين قلبها هيعرفكم ويحس بسلامتكم عندها ..وبعدين انتوا لما هي تخف وتتكلم معاكم انتوا بقي هتحكولها علي كل اللي عشتوه سوا وتقولولها علي كل حاجه هي عاوزه تعرفها عنكم وهي بكده مش هتبقي عيانه وهتبقى فكراكم..حتي اسألوا بباكم ونيته وهم يقولوا 

وليد :صح الكلام ده يا بابا 

وشعب شاله علي كتفه وبيبوسه من خده 

مشعل: اي صح وليدو البطل ..الحين لازم تكونون هاديين ومؤدبين لبين ما تصحى امكم ..زين؟؟

وليد بفرحه طفل بليله العيد:ماشي يا بابا تمام انا هقعد انا ووعد شطار ومؤدبين عشان ماما لما تصحي تحبنا علي طول زي الاول من قبل ما نقولها حاجه ..هي اكيد هتحبنا من هدؤنا وادبنا ولاننا شطار

بعدها بص لوعد وكلمها بنفس الفرحه 

:بس بقي يا وعد بطلي عياط ماما كده هتزعل منك لما تصحي وماما علي طول بتقول أننا لازم نكون شطار في المكان اللي هي مش فيه عشان الناس تحبنا ..مش كده يا بابا

مشعل: كده يا حبيب ابوك 

هشام: طيب ممكن حضراتكم تتفضلوا علي البيت تيجوا بكره لأن طبعا ممنوع المبيت مع المريض ووقت الزياره اللي انتوا فيه قرب يخلص 

وفاء بتصميم وعناد كبير بان في عيونها قالت

وفاء: مستحيل اتحرك من هنا وإلا وبنتي معايا ..انا ما صبرتش السنين دي كلها عشان ابعد عنها تاني

هشام: وهو انا بقول لحضرتك انك مش هتشوفها تاني انا بس بقول انكم تمشوا دلوقتي وتاجوا بكره لأن قوانين المستشفى بتمنع المبيت مع المريض إلا لو حابته حاجه ...والحمد لله بنتك عدت مرحله الخطر فمفيش داعي حد يفضل معاها 

وفاء: برضوا مش هتحرك لازم افض مع بنتي اخاف اغفل عنها الاقيها ضاعت مني تاني 

وبعدين لازم أول ما تفتح عيونها تشوفني وتلاقي حد يطمنها ويهديها ..من الاخر انا مش هتعتع من هنا إلا وبنتي معايا 

هشام سكت لانه عارف ان ام همسه عنيده جدا ورثت عنادها لابنها عمر 

عشان كده قال 

هشام: ماشي سيبي عليا الموضوع ده لكن حضرتك بس اللي مسموح له يبقي 

الباقي ياريت يمشي وييجي بكره الصبح 

وفاء: يلا يا سعيد خد مازن وعمر والأولاد واستاذ شعلان 

مشعل بمقاطع

: مشعل ام همسه اسمي مشعل 

وفاء: اه اسفه قصدي واستاذ مشعل وروح البيت ارتاح انت وهم وتعالوا بكره ولو احتجتم حاجه كلموني علي التلفون وانا هقولكم علس مكانها

وفي اكل من أكل الاسبوع سخنوه في الميكرويف وكلوا انتوا اكيد جعانين 

سعيد: طيب وانتي كمان ما كلتيش من امبارح 

وفاء: ما تقلقش عليا معايا فلوس هبقي اجيب اي حاجه من الكافتيريا اللي هنا 

بعد ما الكل اتفقخرجوا بره المكتب وكانوا فريقهم لباب المستشفى لكم وقفهم مشعل لما قال

مشعل: لحظه استاذ سعيد ..انا ما اقدر روح معكم عالبيت..انا باخد الاولاد وروح اقعد بأي أوتيل قضي الليله وباتشر بكون هني ..انا مارضيت قول هيك داخل الغرفه منشان ما تزعل الست ام همسه ..بس صدق انا ما برتاح في حدا ..لهيك بقضي الليله في الاوتيل 

سعيد: بص حضرتك علشان ما نكون علي خلاف من اولها ..لو حضرتك عاوز تروح أوتيل انت حر لكن الاولاد هيفضلوا معانا وبكره نتقابل 

مشعل: بس يا عم م...

مازن قاطعه وهو مسنود علي عمر

مازن: يا استاذ افهم حالتنا احنا محرومين من اختي بقالنا سنين ولما نلاقيها تكون زي ما انت شفت خلينا حتي ناخد أولادها معانا ونفرح بيهم ويعوضونا غيابها شويه وبكره هنكون كلنا في المستشفى..ولو حضرتك عاوز تاجي معانا البيت اهلا وسهلا بيك ..لكن غير كده يا ريت تقدر موقفنا 

مشعل اتنهد وهز رأسه بقله حيله لانهم معاهم حق 

بعدها نزل علي رجليه واتكلم مع وعد ووليد وطمنهم وطلب منهم يبقوا هاديين 

....

إيمي كانت ماشيه من بعيد ولمحت وعد ووليد مع راجل بيتكلم معاهم وتلات رجاله تانيين حواليهم 

راحت عندهم بسرعه وهي بتنادي عليهم بصوت عالي لفت انتباه الكل ولما وصلت وقفت قدامهم بعدها نزلت لمستواهم زي مشعل وهي بتبص ليهم بفرحه وأبتسامة واسعة 

إيمي: ازيكم يا حبايبي عامله ايه ؟؟

وعد ابتسمت هي واخوها والاتنين جاوبوها انهم بخير 

ادخل مشعل بأستغراب زيه زي الكل انه مين دي وتعرفهم منين 

مشعل: اسف للسؤال لكن مين منوا حضرتش..ومن وين تعرفين العيال 

إيمي استغربت شويه من لهجه الراجل اللي بيكلمها لكن افتكرت كلام وليد لما كانوا بياكلو وقال انهم طول عمرهم مش عايشين في مصر

إيمي: انا إيمي اخت صاحب المستشفى وشريكه فيها وفي نفس الوقت ابقي مرات دكتور هشام المسؤول عن علاج مامت الاولاد 

واللي حصل إن مامتهم لما كانت عامله الحادثه جديد مكنش فيه حد يهتم بيهم عشان كده هشام جابهم البيت عندنا عشان يرتاحوا ويناموا ومن هناك اتعرفنا ببعض 

وليد بابتسامه لمشعل:ايوه دي طيبه خالث اوي وحكتلنا حدوته 

وعد بابتسامه اكبر:ايوه وحمتنا وخلتنا ننام علي سرير النونو بتاعها لما كنا تعبانين وعملتلنا اكل حلو واكلتنا

عمر بأستنكار شديد

:لحظه بس مين اللي جابهم قولي تاني كده

إيمي بأستغراب:دكتور هشام جوزي 

عمر:لا انا اكيد بحلم يلا يا مازن نمشي عشان دماغي هتنفجر يلا 

بعدها اخد مازن وبقي يسعده لحد البوابه 

إيمي بعد ما مشي

إيمي: هو فيه ايه حضرتك ...وانت مين وين دول 

مشعل: انا مشعل القصيبي ابو وعد ووليد واللي كانوا هون من شوي خيالانن والعم جدهم ...اتشرفت بعرفتش

مدام إيمي 

إيمي: الشرف ليا انا استاذ مشعل 

بعدها نزلت وحضنت الأولاد وباستهم وودعتهم 

وبقت ايص علي طيفهم لحد ما اختفوا 

وبعدها كملت طريقها للحمام 

وهي بتفكر خيلان وعد ووليد يعرفوا هشام من وين وليه قالوا كده لما قالت انه هو اللي جابهم البيت  

___________________________________________________

هشام كان في المكتب بتاعه بعد الكل ما خرج وجاله رساله من عصام مكتوب فيها

" اللي اتفقنا عليه تم ..استني المعلومه الأكيده بكره "

ابتسم بخبث شديد وهو بيقرأ محتوي الرساله 

___________________________________________________

اول ما وصلوا البيت 

سعيد طلب من عمر انه يودي وعد ووليد اوضته ويرجع تاني وهو بيبص علي مازن نظرات حاده واللي كان قاعد قدامه متوتر ومنكمش علي نفسه من نظرات ابوه ولانه عارف اللي مستنيه 

اول ما رجع عمر قعد جنب مازن والاتنين بصوا لابوهم

سعيد :قولي بقي يا مازن باشا ايه اللي عمل فيك كده 

مازن بتوتر:ما انا قلت لحضرتك ف..

سعيد بحده:اللي قلته في المستشفى جزء من اللي حصل انا عاوزك تقولي الحكايه بالتفصيل ..فاهم بالتفصيل..من إمتي بتشتغل الشغل ده ووصلتله ازاي ومين اللي دلك علس والأهم من ده كله بتعمل كده ليه 

مازن:...........

___________________________________________________

في الاوضه اللي فيها همسه 

فتحت عيونها ببطء 

واخر حاجه حصلت معاها جات علي بالها 

اتعدلت مز سريرها وهي بتبص حواليها 

همسه: ؟؟؟؟

.......

باااااااااااااااااااااس

ايه رأيكم في الفصل 

ياريت تفاعل يا إخوان اللايك اللي هتحطوه مش هتخسرا و لا التعليق إدعموني بقي 

اول حاجه بكرر أسفي 

تاني حاجه احنا في العشره الأواخر من شهر رمضان المبارك اغتنموا الفرصه واعملوا صالحات وحسناء علي قد ما تقدروا خصوصا إن النهارده ليله ٢٣ رمضان واحتمال تكون ليله القدر عشان كده إدعوا ..إدعوا واذكروا ربنا واعبدوه بقلب خاشع وإن شاءالله يتقبل من ومنكم صالح الأعمال 

كل سنه وانتم طيبين ولا تنسوني في دعائكم 

يلا 

أستودعكم الله 

اسماء العذب(كروان)

الفصل السابع عشر من هنا 

بدل ماتدور وتبحث علي الروايات خليها علي تليفونك وحمل تطبيقنا

تعديل المقال