رواية شايفه نفسك فين بعد سنه الفصل السادس بقلم مريم سمير
_ أنا عاوز اقول حاجة مهمة النهارده
الكليه كلها اتجمعت علي صوته في الميكروفون .
_ عاوز اتعرف النهارده اعتراف صغير لأحلي واحدة في الجامعة
الكل سقف وبدأوا يضحكوا ، كان ماسك الميكرفون في منتهي البراءة ، اشطر واحد هنا ودايما بقرب منه الصراحة لما فترة الامتحانات تيجي ، زي ما كله بيعمل! ، لكن عمره ما ارتبط نظرا ل وزنه! ، مكنش ولا حلم ل اي بنت موجوده هنا .
_ أنا بحبك يمريم
الكلمة وقعت عليا زي جردل ميا ساقعة في عز الشتا ، الكل بدأ يبصلي ويضحك ويتريق وإن ازاي واحدة زيي يكون ليها علاقه بيه اصلا!
_ مريم اطيب واحدة اتعرفت عليها و..
= خلاص يا احمد!
كله بصلي وشاورتله ينزل ، جه قدامي وهو بيبصلي ويضحك ، مشيت وشاورتله يجي ورايا ، لحد ما بقينا في مكان بعيد عن كل الي كانوا واقفين
= انت ازاي تعمل كده؟
_ عملت ايي؟ ، كنتي قولتيلي قبل كده انك عاوزة الي يحبك يعترفلك قدام الناس كلها ، أي مش مبسوطة ؟
= ابدا ، احنا زمايل وبس ومتفكرش هيبقي بينا اي حاجة تانيه
_ أيوة يمريم بس انتي كنتي بتعامليني كويس و..
= هو اي حد هيعاملك كويس هتحبه؟
_..
مشي من قدامي ، مكنش بيجي الكليه بعدها ، كنت حاسه ب الذنب وعاوزة اعتذرله ، افتكرت أنه قالي إن لما يبقي مخنوق بيروح يقعد علي النيل ، روحت ولقيته فعلا هناك ، قعدت جمبه من غير كلام وبصيت قدامي ، مش عارفه ابدأ منين!
_ انتي طلعتي زيهم ، أنا كنت فاكر انك مش زيهم
=..
_ كنتي بتعامليني كويس عشان الامتحانات ؟ عشان اشرحلك أو اساعدك في كذه حاجة ؟
تعرفي؟ أنا كنت بستني الوقت الي تيجي وتكلميني فيه ، عشان احس إن حد عاوز يكلمني ، من ابتدائي وإعدادي ، مكنش ليا صحاب ، مكنتش بخرج من البيت ، حتي لما جيت هنا ملقتش أي حد عاوز يبقي صاحبي ، كنت دايما لوحدي ، لحد ما عرفتك ، لما كنتي تيجي نتكلم ونهزر ، كله كان مستغرب انتي ازاي قاعدة معايا بس انا كنت مبسوط ، مبسوط حتي وانا عارف إن فيه حاجة مش طبيعية
ضحك _ بس أنا شكلي فقري ومكتوب عليا افضل لوحدي
= احنا طلعنا وحشين اوي يا احمد ، منستاهلش حتي اننا نكون عارفين واحد زيك
_ انتي بتعيطي؟
طلع من شنطتة منديل وادهولي _ انتي كويسه؟
= ايوة
_ أنا هقوم دلوقتي عشان اتأخرت
= هتقوم عشان اتأخرت ولا مش عاوز تقعد معايا؟
_ وانتي عوزاني اقعد معاكي؟
= أيوة
ضحك _ أنا صعبت عليكي صح؟
= لا والله ابدا ، أنا بس الي اول مرة اشوفك من غير الضبابة الي بتبقي علي عيني ، تعرف يا احمد؟ أنا كمان لوحدي
رجع قعد تاني _ انتي ؟ ازاي؟ دا انتي كل الي في الكليه نفسهم يتعرفوا عليكي!
= مش انا قولتلك إن بابا وماما متوفيين؟ ، من ساعتها وانا حاسه اني لوحدي
_ ربنا يرحمهم هما في مكان احسن دلوقتي ، واكيد هتتقابلوا تاني إن شاء الله
ابتسمت = يارب
_ تجربي حمص الشام؟ عم ابراهيم بيعمله حلو اوي ، تشربي بالشطة؟
= اشرب
كان طيب ولذيذ ، كلامه كله كان عن الماضي وعن باباه ومامته وقد أي هما طيبين ، كانت عنيه بتلمع ، كانت عنيه حلوة .
_ متأكدة انك عاوزة تقعدي فعلا هنا؟
قعدت قدامه = اه عاوزة نفطر سوا ، مش بقينا صحاب؟
_ صحاب؟ أنا وانتي؟
= أيوة ، أي هيضايقك؟
_ لاء ابدا
كنت بفطر معاه وبعدها نحضر محاضرات ، اتفقنا نروح نادي ندرب فيه ، كان الموضوع بالنسباله صعب جدا في الاول
= هبطت؟
_ ها؟ لاء يلا نكمل
= احمد ، استني ، نرتاح شويه
_ لاء لاء خلينا نكمل
= أنا الي هبطت تعالي بس
قعدنا علي استراحة وهو بينهج وباصص قدامه
= أنا مبسوطة اوييي بيك
ضحك _ مبسوطة أيي ؟ احنا مجريناش الا دقيقتين
= بس انت بتحاول ، وكمان مبسوطة انك سمعت كلامي ورضيت تيجي هنا
_..
= انا عارفه انك قدها ، وعشان صحتك
_ ايدا خايفه عليا يقادرة؟
= يلا نكمل
وبقينا صحاب ، علي الرغم إن ليا صحاب كتير بس مكنش حد بيعمل معايا الي هو بيعمله ، كان دايما جمبي بيسمعني .
_ هو انا ممكن اطلب منك طلب؟
= اكيد طبعا ، قول
_ أنا عاوزك النهاردة علي الغدا في البيت
= بيت مين؟
_ بيتنا امي عاوزة تشوفك
= اه واجي وتطلع مامتك عند خالتك و..
_ اي يمتخلفة! أي جو الافلام السبعيناتي دا! شكلك يوحي انك عاقلة يعني ، كان شكلك حلو وانتي ساكتة
ضحكت = بكرة؟
_ أيوة بكرة ، أي جايه؟
= جايه
روحت وجبت ورد وانا راحة ، خبطت علي الباب وهو الي فتحلي
_ شكرا انك جيتي ، الشقه نورت ، اتفضلي
جت مامته وسلمت عليا
' احمد قال عليكي حلوة ، بس ملوش حق معرفش يوصف انك حلوة اوي كده
بصيت ل احمد ورجعت بصتلها _ خلاص يماما شكرا تسلمي!
' أنا عكيت الدنيا ؟
_ عكيتي؟ ابقي تفي في وشي لو قولتلك حاجة تاني
ضحكت = تسلميلي يطنط مفيش احلي منك والله
قعدت جمب مامته وهو قعد قدامنا
' روح يا احمد كمل الطبخ ، مش قولتلي انك عاوز تطبخ انت الاكل الي بتحبه مريم؟
_ يعني الطم علي وشي يجدعان
ضحكت أنا وهي وهو دخل المطبخ ورجعت بصيت لمامته لقيتها بتبصلي
' متعرفيش أنا مبسوطة قد أي النهارده
= اشمعنا؟
' اصل اول مرة الاقي احمد جاي يقولي إنه عازم حد عندنا ، واول مرة اشوفه بيتكلم علي حد معايا ، احمد طيب اويي وبيساعدني دايما في شغل البيت والشقه الي فوق دي شقته بيشتغل من بعد الثانوي شغلانتين في الاجازة عشان يعتمد علي نفسه ويشطبها بفلوسه ، عمره محسسني اني محتاجة حاجة ، دا سندي وضهري في الدنيا
= ربنا يخليهولك يحبيبتي يارب ، هو يستاهل كل خير
' يارب يحبيبتي ، أنا عارفه إن باباكي ومامتك رحمهم الله ، انتي ممكن تعتبريني مامتك ، أنا طيبة علي فكرة حتي اسألي احمد
ضحكت وحضنتها ، كان بيت دافي وتحبه ، اتغدينا أنا وهو ومامته وباباه ، هو الي كان عامل المكرونة البشاميل عشان عارف اني بحبها .
عملنا بعدها قهوة ووقفنا في البلكونة ، كانت من احلي الايام الي قضيتها في عمري ، كانت حلوة في قربه وقلبه .
= لازم امشي دلوقتي عشان اتأخرت
_ اه حاضر تعالي هوصلك
سلمت علي مامته وخدت رقمها ونزلنا
_ اتبسطتي؟
= لاء
وقف في وسط الشارع وهو متنح _ بجد؟ طب لي؟ حد ضايقك؟
ضحكت = اتبسطت اوييي والله
_ يشيخة وقفتي قلبي
= مهم عندك اوي تعرف اتبسطت ولا لاء؟
_ ها؟ ، أي رأيك في البشاميل صحيح ؟
= تحفه يا احمد بجد ، طبخك حلو اوي
_ الف هنا ، هبقي اعملك تاني
= شكرا يا احمد
_ علي اي؟
= علي كل حاجة ، انك حسستني النهاردة اني مش لوحدي ، حبيت مامتك اويي ، عرفت دلوقتي انتي طيب لمين
وصلت البيت ووقفت قدام البوابة
_ هنذاكر من بكرة
= لسه عاوز تساعدني؟
_ اكيد مش احنا صحاب؟
= يبختي اني عندي صاحب زيك يا احمد والله
_ ها؟
= هطلع أنا بقي ، تصبح على خير
منا لو اتربيت مكنتش قولت كده ، طب وفيها أي مهي دي الحقيقه اعمل اي يعني ؟
_ اي اكبر هضبة في مصر ؟
= عمرو دياب ها الي بعده؟
_ ألطم علي وشي قدام الناس يعني ولا اعمل اي في نهارك دا ؟
= احمد احمد! أي اهدي
_ دا اسئلة عامه امال هتعملي أي في العملي؟
= اسألني في المنهج صدقني هتلاقي قدامك خليفه مجدي يعقوب
_ اه ، طيب
After 5m
_ يعني احدفني من علي سطح الجامعة وارتاح منك؟
= لي بجد اي الي حصل
_ مريم مش احنا متفقين هنذاكر النهارده ؟
= أيوة حصل
_ أي معلوماتك بقي عن المنهج ؟
= أنه منهج
_ طب ولما اسقف دلوقتي وافضحك؟
ضحكت = طب اهدي ، والله انت عارف اني ذكية
_ ذكية اييي؟ أنا عيالي ذنبهم اييي يطلعوا بالغباء دا ؟
= عيالك ؟
_ تيجي نبدأ من الاول خالص؟
كنا بنذاكر سوا ، بيساعدني في الجزيئات الي مش فهماها ، جت فترة الامتحانات وكان جمبي فيها ، كان اصعب ترم عشان اخر ترم بس هو كان بيسهلي كل حاجة ، بيحفظني الأسئلة الكبيرة ب مفاتيح عشان افتكرها في الامتحان ، كان عاوزني دايما ناجحة .
خلصنا! اصعب فترة عدت ، بس في نفس الوقت كنت زعلانة اوي اني مش هشوفه تاني ، كده خلاص؟ خلصنا رحلة الكليه وياعالم هشوفه تاني أمتي بعد ما كنت بشوفه كل يوم!
_ مالك؟
=..
_ انتي مش كنتي واكلة دماغ امي انك عاوزة اخر يوم يجي؟ مالك بقي مش مبسوطة لي؟
= مضايقه عشان هتوحشني
بصلي وظهرت ملامح الانبساط علي وشه
= انت مبسوط لييي بقولك مضايقه!
_ هنتقابل تاني ، اكيد هنشوف بعض علي طول
= بجد ؟
_ انتي عاوزة؟
= اكيد عاوزة
_ أي رأيك نخرج؟ نتغدي ونروح عند عم ابراهيم
= يلا بينا ، يلا بينا بجد
روحنا اتغدينا وروحنا شربنا حمص شام عند عم ابراهيم ، فضلنا نتكلم ونفتكر ايام الامتحانات ونضحك ، بعدها كنا بنتكلم كل يوم واتس وفون ، وكأنه مبعدش!
اكتشفت اني مش بس بحبه دا انا معرفتش يعني اي حب غير لما حبيته ، ومتأكدة إن عمري هقابل حد زيه ، واني مبسوطة اني قلبي اختاره هو ، وكأنه احسن اختيار ليا وسط كل العك والهزايم الي اتعرضتلها .
_ لازم ضروري تيجي ، لو مجتيش اعتبري نفسك شهيدة
= ايدا في أي
_ مستنيكي ، الساعة أربعة
= أيوة بس..
_ بتبسبسي لي؟ عاوزة أي يعني انتي بردو؟
= لاء خلاص والله جاية
قفلنا ، كان عزمني علي قهوة ، فضلت ادور علي الدولاب علي حاجة مميزة ، كان دريس جبته السنة الي فاتت وملبستوش خالص ، لبسته وحطيت ميكب ولبست هيلز ، مالي يعني هو انا رايحة ديت يعني ولا اي مش فاهمة؟
خلصت وصحبتي كلمتني وروحتله .
دخلت الكافيه لقيته قاعد ولابس بدلة ، مش عارفه لي المرادي بالذات شوفته حبيبي ، الوسيم ، اللذيذ .
_ عاملة اي؟
= الحمد لله ، شكلك حلو بالبدلة
_ انتي الي زي القمر والله
شد الكرسي وقعدني وبصتله وابتسمت ب سماجة
= اه ، عاوزة تقولي اي يمريم ؟ هببتي اي؟
_ هو الصراحة ، صحبتي جايه دلوقتي
= نعم يختي ؟
_ هي وحبيبها
= انتي بتقولي أي ؟ بتقولي ايييي سمعيني تاني ؟
_ نيرمين ومعتز جايين وعاوزين نقنعهم بالجواز
= هو حد قالك اني خاطبة يمريم؟ انتي بتعملي فيا كده لي؟
_ خدمة إنسانية ل اجل الحب
= يستي في ستين داهية الحب ، هطربق الكافيه علي دماغك لو قولتي كلمة كمان
ضحكت وسكت ، بعدها نيرمين ومعتز جم
قعدت مع نيرمين وهو مع معتز في طربيزة تانيه
_ يبنتي مهو كل الناس عارفه انكم بتحبوا بعض الا انتوا!
" أنا خايفه يمريم
_ متخافيش
" لا تصدقي خلاص الخوف راح؟ اقتنعت بجد
_ مدام لقيتي حد بيحبك يبقي امسكي فيه ب ايدك واسنانك ينرمين متبقيش عبيطة!
" أنا مش عارفه حصل أمتي وازاي! بس لقتني عاوزة أكلمه علي طول ، بكون مبسوطة وهو باعت أي مسدج ، بجري علي الفون واتمني أنه هو الي يكون باعتلي ، وعاوزة اشوفه دايما! انتي متخيلة اني شيفاه احلي راجل في الدنيا ؟ ب مناخيره دي ؟
ضحكت _ والله ووقعتي ، فرحانة فيكي ، طول عمرك بتكرهي الرجالة البسي بقي البسي
= انت يبني مش قولت انك بتحبها؟
° يعم أيوة بتزفت بحبها والله واوي
= امال مالك يمعتز مأجل الحوار كله لي؟
° مسؤولية يعم ، مسؤولية كبيرة وخايف مبقاش قدها
= أنا معاك انها مسؤوليه ، بس طول ما احنا خايفين مش هناخد خطوة لقدام وهتطير من ايدك واحدة بتحبك ، كده كده هتلبس في الحيط والجواز ف خد واحدة بتحبها احسن ما تاخد واحدة امك تختارها وهتبقي ليلتك طين
° انت كده بتقنعني؟
= اصل يصاحبي الموضوع كله علبه جاتوه واتنين مليون
° تصدق صح؟ امال أنا مكبر الموضوع لي ؟
= شوفت؟
° انت عبيط يا احمد ؟ مهو دا الي خايف منه ، اني معرفش اعملها حاجة
= ارمي حمولك علي الله يمعتز ، وصدقني ربنا لما يشوفك بتحاول وبتعافر عشانها في الحلال هيرزقك ، ربك مبنساش حد ، متضيعهاش من ايدك ، عمرك مهتلاقي حد يحبك زي نيرمين وانت عارف
° نيرمين؟ عاوزك
قعدنا احنا الأربعة علي طربيزة ، بصيت أنا وأحمد لبعض واحنا بنأكد لبعض أننا تقريبا نجحنا!
° نيرمين ، كنت عاوز اقولك حاجة
" حاجة اييي؟
° بصي هو ، هو يعني
= لا اخلص وحيات خالتك مش فاضيين لسه دوري!
_ دورك في اي؟
= استني انتي دلوقتي
° أنا ، كنت عاوز اقول اني..
احمد مسك كتفه وهز راسه أنه يقول
° أنا بحبك ، وهعمل أي حاجة عشان تبقي معايا ، الكل كان بيقولنا أننا لايقين علي بعض بس انا كنت شايف أننا صحاب وبس ، لحد ما لقتني مش عارف اكمل يومي من غيرك ، وبعمل أي حجج عشان اكلمك اسمع صوتك ، مرة ناسي كشكول المحاضرات وبسألك عليه ومرة عاوزة تعلميني ازاي اعمل صنيه فراخ بالبطاطس و..
= انت اتعمقت اوي في التفاصيل يمعتز ، ارجوك أنجز حالك
° مرة واحدة لقتني واقع لشوشتي والمشكلة أنه مش بمزاجي!
= اديله ادي يا ابو معتز ، اديله يالا
° عجبتك بجد؟
= الله ينور والله
_ ها ينرمين قولتي أي يحبيبتي؟
" انتي شايفه اي يمريم ؟
_ شايفه أنه مش بطال ، ماشي حاله شغال
° انتي كده بتقنعيها؟ انتوا الاتنين في الإقناع زفت يجماعه بكلمكم بالامانة والله
" خلاص سيبني افكر
° حقك ، قد اي؟
" سنتين تلاتة كده عما ربنا يسهل
° بقولك موافقه ولا هزعلك؟
= يسطا مبنقولش كده يسطا
° استني انت
_ معتز استني فعلا مش طريقه!
° استني انتي
" أنا موافقه
بصيت أنا وأحمد لبعض ورجعنا بصينالها _ يشيخة!
حضنتها وأحمد حضن معتز ، كانوا مبسوطين اوي! ، مشيوا عشان يتفقوا هيعملوا أي وتقوله يقول اي لباباها ، ياه مشاكل صعبه وموترة جدا ربنا يكتبها عليا!
رجعنا قعدنا علي الطربيزة الي كنا قاعدين عليها
= ها؟ فيه حد تاني جاي؟
ضحكت _ لاء خلاص كده
= شكلهم كان حلو
_ عشان بيحبوا بعض بجد
= مش ناوية شكلنا يبقي حلو؟
_ يعني اي؟
= هتشربي قهوة ولا حاجة تانيه ؟
_ انت عاوز تقول حاجة ؟
= بس خايف ، خايف يحصل زي ما حصل في الاول
_ الاول؟ انت شايفني زي الاول؟
= الصراحة ؟ لاء اتغيرتي اويي
ابتسمت _ بسببك
= اه
_ اه اييي؟ انتوا بتقلبوا هطل فجأة لي؟
= مش بنعرف نجمع كلام في المواقف الي زي دي ، ف أنا في المواقف دي بحب اسمع سامو زين جدا
_ احمد؟
= يادي النيلة ، نعم
_ قول عاوز تقول ايي
= أنا بحبك يمريم ، حتي بعد كل الي حصل في الاول معرفتش ابطل احبك ، كنت متأكد إن جواكي غير الي ظاهر لكله وعرفت أوصله ، انتي ، أي رأيك يعني ؟
_ انت فاكرني غبيه يا احمد ؟
= أي اكبر هضبه في مصر يمريم؟
_ عمرو دياب
= اه ، كملي ، لاء طبعا انتي لقطة
_ ماشي أنا موافقه
= موافقه بجد ؟
_ أيوة والله
= لي؟
_ عشان ناويه يبقي شكلنا حلو ، منا كمان بحبك!
= ها؟
_ في المواقف الي زي دي بحب اسمع سامو زين جدا
مريم سمير 🤍
