رواية مشاعر مبعثره الفصل الثالث 3 بقلم دودي

رواية مشاعر مبعثره الفصل الثالث 3 بقلم دودي 

دازت ايام.. وانا وانس عايشين فالوسط.. عييت نقوليه نمشيو نسكنو بوحدنا.. ولكن هو كل مرة كيقولي لا.. رضوان ميبغيش.. كلشي مشترك.. البازار اللي خلى ليهم باهم الله يرحمو.. واللي كاين فالجراج ديال الدار نيت.. سبق ودخلت ليه هو كبير بزاف.. وعندهم فيه بزاف دالخدامة.. على حسب ما قالي انس.. ان رضوان هو اللي طورو.. وانه فضلو كبير فالارباح ديالو.. هادا اول سبب فأن انس مقدرش يبعد ويسكني بوحدي.. ومن جهة اخرى ان الام ديالهم.. ماباغاش ولادها يتفارقو.. ويبقاو ديما مجموعين..الفقصة.. عييت معاه.. حتى قالي عقلي نمشي نهضر مع رضوان الراس فالراس.. نزلت للبازار.. ودخلت شفتو كان جالس فالبيرو.. وحاط رجل فوق رجل.. وكيراقب الخدامة ديالو.. شافني واستغرب،. وفنفس الوقت تغوبش..

رضوان: شنو باغيا.. 

اسماء: جيت نهضر معاك.،

رضوان: الهضرة الفوق ماشي هنا..

اسماء: لا.. انا بغيت نهضر معاك هنا.. مابغيت تاواحد يسمعني الفوق..

رضوان: كنسمعك.. وددغيا راه عندي الناس..

اسماء: بغيتك تبعد من حياتنا انا وانس.. ياك حنا مكندخلوش فحياتك نتا ومرتك.. خلينا نعيشو حياتنا كما بغيناها انا وراجلي.. علاش كتدخل فكل صغيرة وكبيرة..

رضوان: هه سيري طلعي لبيتك.. وسدي عليك بابك.. وديري مكايديرو العيالات.. وخليك من سوق الرجالة..

اسماء: هادا ماشي اسلوب..، انا بغيتك تبعد منا.. ومطلبتش شي حاجة كبيرة.. اشنو فيها الى سكنا بوحدنا.. اشنو فيها الى خرجت انا وراجلي.. اشنو فيها الى .. (قاطعني)

رضوان: سمعيني مزيان.. الى طلقت من انس ونتي معاه.. غادي تغرقو وتغرقونا معاكم.. سيري طلعي للدار ومتعاوديش تجبدي هاد الموضوع تاني..

اسماء: واش حاسب راسك واصي علينا ولا مركز الكون.. راه مغانموتوش بلا بيك غا تهنا..

مازال كنهضر حتى ناض.. وبدا يخدم ويعيط للعمال.. متجاهلني تماما.. استفزني ونضت طلعت للدار.. وبديت نرد اللومة على انس.. نتا معندك شخصية.. واش انا مزوجة بيك ولا بخوك .. واش نتا هو الراجل.. تعصبت... هاد السيد نغص عليا حياتي.. تقول بيني وبينو شي حساب.. كالعادة بقا انس كيرغبني.. وانا طالعة.. كنرجع ونقول هو شنو ذنبو.. خوه اللي كيدير لي مونتيف هو مالو.. كتهون عليا هند.. كنشكي ليها وكنخوي قلبي.. وهي كتنصحني.. دازت ايام وانا مخنوقة.. ولات تجيني التقية .. وكلشي لاحظ عليا المرض..

عجوزتي: واش نتي لاباس ابنتي.. واش مريضة..

اسماء: كنحس ان معدتي كتحرقلي.. وديما كنتقيا.، زعما يكون عندي تسمم؟؟؟

عجوزتي: لا منظنش.. اجي معايا..

مشيت موراها خدات شوية دالقهوة فيدها وقرباتو لنيفي.. ديك الساعة متحملتش ريحتو وسديت على نيفي دغيا.. وجابلي التقية.. شفت فيها ضحكات،. وطلقات واحد التزغريتة طوييلة.. كلشي تجمع عندها بعدها.. وانا مفهمت والو.. كلشي بقا كيشوف فيا..

عجوزتي: قريب غايجينا حفيد..اسماء راها حاملة..

انا تصدمت.. باش عرفاتها.. انس جا يعنقني وفرحان.. شفت فهند كان باين الحزن فعينيها.. اما رضوان.. مدار حتى ردة فعل.. وتجاهلني كالعادة.. 

           الفصل الرابع من هنا