رواية طفوف الفصل السادس 6 بقلم وسام الفراجي
الرقم الغريب صار عندي فضول اعرفه شنو بالمحادثة وشداز
فتت ع سريع ع محادثة والكاه كاتب ..
جنت احلم هالصور هاي وياي !
صراحة شعر راسي وكف صرت افكر بكم شخص اجه ببالي ممكن تطلع من عنده هالسالفة ..
دزولي خطابة سابقا ورفضتهم اكيد منهم هذا بس ماريد اجادل لان خايفة من المحادثة وسكرين ومن هالخبصة ما اعرف حسيت نفسي جبانة كلش ..
حللت الشغلة كلت هاي من دزيت الصور وجثير ناس اجت خطابة سابقا ورفضتهم من منطقتنا فـ اكيد من شاف الصور ووصلته حب يتحرش او يشمر سوالف او يبتز ..
المشكلة مكدر ابلغ يزن ع اي شي ولو هسة هو بيا حال مدري شيصيرله بالسجن بعدما ضرب يوسف ..
بعدني واني جاي افكر بهالتفكيرات هاي
دزلي انوب رسالة يكول ..
" مو كلتيلي محد يفل كصيبتي غيرك ؟ تالي فلها انسان جانت امنيته تباوعيله نظرة وحدة "
من خلال سوالفه عرفت الي ديسولف يوسف !
بس هو ماعنده ولد ولا متزوج بعد حتى يشوف صوري او يكون بالكروب مالتنا مال صف اول شلون شاف صوري ؟
اووو صحيح ابن اخوه بالصف بس مامعقولة واصلة لعنده
رديتله كبل من عرفته يوسف ..
ـ هسة اني متزوجة انسى طفوف وعيش حياتك استرني الله يستر عليك يا يوسف ..
ـ انسى ؟ هههههه حب الصغر هذا ؟ معقولة انتِ طفوف تكوليلي انسى ؟ ولا عبالك صار 10 سنين نحب بعض ومن احنه منعرف شنو حب شلون صاير احنه سوة !
_ كافي كافي يوسف ماصار نصيب اني ع ذمة زلمة ثاني هسة اترجاك عوفني ابتعد عني مايرحمني ترى اذا عرف مراسلتك
_ ميعرف بالسجن هسة ميطلع لباجر متعمد اتحرش بي واخلي يضربني واسجنه ومخطط الها بس ردت اشوفه وشفته ..
_ رقمي منين جبته
- صح كسرتي رقمج القديم بس الجديد حصلته وخليت ابن اخوي بمدرستكم رغم اكو مدرسة اقرب
ـ لعد ليش ما سجلته بذيج المدرسة
ـ اتحجج بي واجي لمدرستكم لو ألمحج لمح هاهي تكفيني اسبوع
ـ يوسف عييييب ميصير هالكلام لتسويلي مشاكل يزن شكاك ترا ومتأكدة يراقبني من راح اداوم
ـ هههه يزن يزن يزن شكد حظك حلو يا يزن لعد
ـ يووووسف روح
ـ ما اروح وصورج كلهن اخذتهن يمي لان تعشيت بالبيت واسمعهم يكولون بقصة الصور ومنا ومنا اخذت الصور وحفظتهن يمي اعتازهن
ـ شتريد تسوي بيهن يوسف ليش تأذيني يوسف ليش
ـ ليش من تزوجتي ما فكرتي شكد اذيتي ؟
ـ شتسوي بالصور يوسسف جاوبني لتغلس
ـ حفظتهن اريد اطلكج بيهن
ـ اطلك ؟ هههه يذبحوني ويعلكوني بالبنكة بنص الغرفة وما يطلكني ويعوفني
ـ اخلي يطلكج اخلي وانتظرج لو بعد 20 سنة لتفكرين بيوم اتزوج وتخلصين مني و هذا ابوج ابو فليس باعج اله بيع لان عنده فلوس ومهرج ملايين وسيارته خلاها عنده ونطاه محل شريك وبعد كل هالإغراءات قبل يزوجج يزن غصب عنج وعني وعن اهلج كلهم لذلك لو تموتين بيده ابوج ميحجي لان خيره كله من يزن ..
ـ كافي يوسف كافييييي روح
ـ رحت رحت لتتوقعين بيوم ممكن تكدرين تنسيني اني اعرفج تكابرين ومتكدرين تتخطيني لو الف سنة يلا باي ..
باوعت لآخر جملة كالها بتمعن بعدين كبل حذفت المحادثة ..
مكدرت اسيطر ع روحي وبجيت بجيت حدما برد كلبي وكمت غسلت ووكفت ع المراية باوعت لنفسي واحاجيها شصار بحياتج ياطفوف ..
شلون جنتي مدللة والدنيا كلها تريد نظرة منج والمنطقة كلها تقدمتلج ورفضتي وهم كلم احسن من يزن ..
شلون يزن الي جنت اشوف عفريت وماشوفه يجي يوم يغري ابوية فلوس محلات وشغل وسيارته صارت بيده يروح ويجي بيها وبعدما يثبت نفسه كدام ابوية يطلب ايدي من ابوية وابوية يدري رافضته هواي قبل
بس مكدر يرفضه هالمرة لان اذا رفض راح يضيع شغله وفلوسه ويرجع مثل قبل ..
شلون ابوية قبل ينطيني اله بدون ما ادري
شلون انصدمت من عرفت
شلون انزفيت عبالك فصلية
شلون ذلني واستحقرني لان ذليته وحجيت عليه بكل مرة تقدم بيها عليه ..
كل هذا صار بية شلون تحملته ؟
ابوية شمرني بيد واحد جانت اعلى احلامه اردله السلام
رجعت لغرفتي متحطمة وفتحت كل جروحي بيدي بعدما جنت ضامتهن محد يدري شنو بكلبي وشنو الي خله يزن يعاملني بهيج استحقار يريد يرد الدين مالته ويرد شكو شي سويته بي اني ويوسف من جنه سوة ..
تمددت افكر ماحسيت بروحي الا غافية و طاستها بنومة مرتبة بحيث مو حاسه ع روحي كعدت منثولة معرف صبح لو ليل ..
فتحت التلفون ع السريع لكيت يوسف راجع دازلي شلون بلوة هاي من اشوفه داز الفضول يقرأ الف شكاتب وكلبي يدك بسرعة
فتحت رسالته كاتب اني باقي ع العهد واحبج وماتمنيت احد غير يشم شامة رقبتج غيري احجيلي هم يحبها يزن مثلما احبها اني ؟
بلحظة ضعف بية بدون ماحسيت الا اني حجيت وشخبطت كلشي بكلبي من مشاعر كاتمتهن
كتله ..
هواي تخوفي فكرة إنك راح تخطب وحدة #غريبة غيري وتكدر تحجي وياها بدون تخوف وكدام اهلك وابوك وامك بإعتبار حلال
ترعبني كلش وحدة غريبة تزوجك وتتعلق بيها وتصيحلها حلالي وتجي للمطبخ وهي تطبخ تبوسها كدام امك وتستحي وتبوسك قبل متطلع للشغل وتخابرك وتكلك ياعمري انتظرك ومشتاقتلك وتكوي ملابسك وقميصك الابيض الي يجنن عليه ويجي بالليل تحجيلها عن تفاصيل يومك مثلما تحجيلي قبل وشنو الي ضوجك وشنو الي فرحك وشنو صادفك وتكلك الله يساعدك حبيبي ...
اخاف كلش من فكرة تكلها انتِ عوضتيني عن كل انتظار عن كل تعب عن كل دمعة اخاف تظفرلها شعرها وكصيبتي تظل بدون اصابعك ...
اخاف ماتذكرني وما تذكر شكد ضحيتلك وشكد عانيت بس انجبرت اخذ غيرك ..
ترعبني فكرة تحط راسك بحضنها وهي تلزم شعرك اخاف لا تسمعها الشعر الي انكتب عليه اخاف لا تقرالها من ذوقك الابيات الي احبهن ..
باوعت لنفسي شخبصت اني شجاي احجي
ويوسف ساكت ويقرا بس ..
ع سريع
تم حذف الرسالة ..
تم حذف الرسالة ..
تم حذف الرسالة ..
حذفتهن كلهن كلت بلكي ما قراهن بلكي ما كمل الي حجيتي هاي شجايني وسولفت شهالتخبيص هذا شنو من ضعف الي عندي اتجاه يوسف ..
جان يكتبلي ..
جايج للبيت هسة دام يزن ماكو يبات بالسجن !
بدل ماتدور وتبحث علي الروايات خليها علي تليفونك وحمل تطبيقنا
