رواية مشاعر مبعثره الفصل الثامن 8 بقلم دودي
وصلنا للسبيطار ودخلنا .. كالعادة بقينا كنستناو .. وسط الناس شي عندو قريب شي عندو حبيب فالانعاش.. وانا واقفة مع رضوان.. كنستناو بجوج.. خرج هاداك المسؤول على الانعاش كيسولو كل واحد على قريبه.. شاف فينا..
المسؤول: واش نتوما من عائلة انس الزاكي؟؟
اسماء: اه حنا.،
المسؤول: البركة فراسكم.. هادي ربع ساعة باش توفى..
الدنيا توقفات ديك الساعة بقيت شحال كنحاول نستوعب شنو قال.. اما رضوان بدا يضرب بقبضة يدو فالسور.. وهو كيبكي... بدات الضبابة كتنزل على عيني.. حتى غيبت.. فقت لقيت راسي فغرفة.. ورضوان جالس وحاط يديه على راسو.. نضت وبقيت كنشوف فيه وعينيا فاضو بالدموع.. وليت ارملة..وعلى غير المتوقع ناض رضوان عنقني.. وبدا كيبكي معايا.. الدموع ديالنا بجوج كانو حارقين.. افتقدنا انس بجوج.. وبجوج بينا ندمنا عليه.. وحزنا عليه.. شد فيا.. ومشينا نشوفوه .. كان بيض بزاااف.. بقيت كنبكي.. حتى مبقيتش قادة.. وخرجت من تما.. شدينا الطريق للدار..كنا غاديين بكبرياء.. ورجعنا بالدموع.. شحال كيتغير الحال في ثانية واحدة.. وصلنا للدار.. وهمنا واحد كيفاش غادي نخبرو حماتي بموت ولدها.. لقيناها كتصلي.. شافت فينا بجوج.. لقات دموعنا على خدنا..
حنات راسها كأنها فهمات شنو وقع.. وبداو دموعها كينزلو في صمت..
الام: الحمد لله.. قدر الله وماشاء فعل.. انا لله وانا اليه راجعون،.
الوضع كان حزين بزاف..درنا مراسيم الدفن وشديت حق الله على راجلي... جاو الناس عزاوني انا مازال ما مستوعبة اني وليت ارملة.. وان ولدي ولى يتيم.. وحتى انه مازال معرف باباه.. ولا شبع منو.. الصدمة كانت قوية بزاف..
دازت ايام... وانا عايشة وسط عائلة انس.. وعايشة على ذكراه.. دازت اربع شهور وعشر ايام.. جاني اتصال من عائلتي.. كيطلبو مني نمشي لدار با.. انا وولدي.. بقا فيا اني نخلي البلاصة اللي عشت فيها مدة ماشي بسيطة.. ونرجع لدارنا.. مشيت لعند عجوزتي.. وقلت ليها شنو كاين.. وباللي خاص نرجع لدار بابا انا ولدي..
الام: واش غاتحرميني من ولدي.. مشا ليا ولدي.. واللي مصبرني عليه هو ولدو.. انا غانتعدب الى مشا ...
اسماء: ولكن اخالتي راه العدة ديالي كملات.. ومجاتش نعيش هنا.. عائلتي رافضين هادشي..
الام: واش ناوية تتزوجي ؟؟
اسماء: اش هاد الهضرة اخالتي..انا اخر حاجة نفكر فيها هي اني نتزوج.. انا غانعيش على قبل ولدي.. ونربيه..
الام: نتي صغيرة..وماشي من حقي نمنعك على زواج.. تقدري تتزوجي رضوان؟؟ يربي ولدك مغايكونش حسن من الغريب.. على الاقل هو راه من دمه..
تعصبت مللي قالت ديك الهضرة..
اسماء: هادشي هو اللي عمرو يكون.. مستحيل..
رضوان: علاش كتغوتي .. اش كاين..
اسماء: انا راجعة لدار با..
رضوان:شكون شدك .. ها الباب..
صدمني.. كان يحسابلي هو اللي مصيفط امه.. مشيت لبيتي وبديت كنحاول نجمع حوايجي وحوايج ولدي.. بقيت مشغولة مع داكشي واحد المدة حتى سمعت الدقان فالباب.. مشيت حليت.. لقيت رضوان..
رضوان: ممكن نهضرو شوية؟؟
اسماء: واخا..
مشينا وجلسنا فالصالون..
رضوان: مللي مات با الله يرحمو.. خلى لينا الارض اللي فالعروبية.. والدار اللي تما.. وخلى مبلغ فالبنك.. وخلى البازار والدار... هادشي كله.. مقسنا فيه والو.. كلشي بقا مجموع.. بينا وبين خويا انس الله يرحمو وختي.. والوالدة.. يعني اللي محتاج شي حاجة كان كيديها.. ومفرقناش.. ولكن.. دابا نصي انس مبقاش ديالو.. ولى ديالك نتي وولدكم.. وايلا بغيتي نصيب راجلك.. غاتاخديه حسب الشرع.. نتي ولى عندك فالديور بجوج وفالارض وفالبازار.. وحتى فنصيب انس من الارباح..
اسماء: ونصيب ولدي؟؟
رضوان: فالقانون مغانقدرو نعطيوه والو حتى يكمل 18 عام..
اسماء:واخا.. انا مكيهمنيش الورث.. ولدي محتاج باه .. وباه مشا..
رضوان: ولدك مغايخصو خير.. انا غادي نصرف عليه ومغايخصو خير من هنا حتى يكبر..
اسماء: شكرا ليك.. ااه ماماك قالتلي واحد الهضرة..
رضوان: على هضرة ماما.. نتي ام.. وعارفة انه الولد طرف من الام.. وامي فقدات ولدها .. وانا مبغيتش نخسرها..ولا نعصبها.. انسانيا كنترجاك.. انك متحرميش ماما من ولد ولدها.. هي كتشم فيه ريحة المرحوم..
اسماء: وعائلتي شنو غانقول ليهم..
رضوان: انا غانهضر معاهم..
