رواية مشاعر مبعثره (كاملة جميع الفصول) بقلم دودي

رواية مشاعر مبعثره الفصل الأول 

ليوم عرسي.. وانا فرحانة بزاف.. كلشي ناشط وفرحان.. وحتى انا.. 

سميتي اسماء... فعمري 24 سنة.. بعدما تعرفت على انس.. وتفاهمنا.. اتافقنا على الزواج.. هادشي فوقت وجيز.. هو متفاهم بزاف واهم شيء انه اي حاجة كنبغيها كيوافق عليها.. مازال عاقلة على نهار جاب عائلتو يخطبوني.. جا خوه اللي كبر منو ومرتو.. وامه وختو،. صحيح ان خوه كان تعامله خايب.. معرفتش يمكن مرضاش يتزوج خوه من عائلة بسيطة بحالنا.. بقا كيهضر ويشرط.. كون ما شفت فوجه انس .. اكيد كنت غانجري عليه.. داز كلشي على خير فالاخير... وها حنا ليوما كنعرسو..

انس: انا فرحان بزاف

اسماء: حتى انا قوليا واش غانمشيو للاوطيل بعدما يسالي العرس..

انس: احم لا غانمشيو للدار

اسماء: علااشياك اتافقنا

انس: عارف احبيبة ديالي غير هو خويا رضوان

اسماء: خوك رضوان تاني!! واش غايبقا هكا ديما يتدخل فحياتنا

انس: حبيبة هاداك راه خويا الكبير وهو اللي رباني بعد الواليد

اسماء: ما قلت والو ولكن يحتارم شوية خصوصيتنا راك وليت راجل دابا..اففف.. الحمد لله للي مقالكش لا على شهر العسل..

انس: داكشي اللي بغيت نقولك.. احم..

اسماء: لااا.. متقولهاش 

انس: تهدني احبيبة عفاك.. غانمشيو نتساراو ولكن ماشي دابا حتى تدوز سيمانة .. وغادي نمشيو للشمال..

اسماء: شنووو.. ياك قلنا مراكش...

انس: حبيبة حبيبة.. خلي حتى نمشيو للدار.. الناس كيشوفو فينا..

بقيت غضبانة وكنبان فالتصاور مغوبشة.. حتى سالا العرس.. ومشينا للدار.. مشفتش فعائلتو كاع.. دخلت للبيت ديالي.. وقلبت وجهي من انس..

انس: حياتي عفاك.. سمعيني.. واش اول يوم لينا مع بعضياتنا غادي ندوزوه غضبانين..

اسماء: حيد مني.. انا مغانوليش نهضر معاك.. شحال وانا نستنى هاد النهار.. ودايرة فبالي انك غاتفاجئني.. ونتا زايد فيهم كتصدمني..

رديتها فيه.. وبقيت هكاك غضبانة.. الله ياخد فيك الحق ارضوان منغص عليا فرحتي.. بقا انس كيرغب فيا وانا والو.. ناض وخرج.. بقيت كنطل عليه ونشوف فين مشا.. بانلي كيضور فالكولوار.. حتى بانلي اللي ما يتسمى جاي عندو..

رضوان: افين ابا العريس.. مالك.. ياكمااا

انس: لا لا.. ولكن.. اسماء غضبات مني حيت.. كنت متافق معاها نمشيو لمراكش.. وو

رضوان: وتبدل البلان.. اومنبعد.. ونتا بديتي كترغبها.. تبارك الله على الراجل.. هادي شفتها بدات تتحكم فيك من اول نهار وتمشي هضرتها..

انس: لاا ماشي هكاك..غير مابغيتش نخسر ليها خاطرها..

رضوان:سمعني مزيان... سير شد مرتك وقضي الغراض.. ديك 

الساعة نعرفك خويا دبصح.. منبغيش نشوفك قدامي الا ونتا سبع.. سمعتي.. النهار الاول يموت المش.. 

               الفصل الثاني من هنا