رواية مشاعر مبعثره الفصل الثالث عشر 13 بقلم دودي

رواية مشاعر مبعثره الفصل الثالث عشر 13 بقلم دودي 

طلعت لبيتي .. وبقيت كنفكر.. شفت العضة نفخاتلي الشنيفة.. بدلت حوايجي وخربقت فشعري وخرجت باش نهز ولدي.. 

حماتي: واش كنتي ناعسة؟؟ 

اسماء: اه داني النعاس.. 

هند: شنو داكشي ففمك.. 

اسماء: فقت من النعاس هكا .. يمكن عضاتني شي شنيولة.. 

هند: اااه.. وديريلها التلج.. 

درتليها التلج ومشيت هزيت ولدي.. بقيت كنوكلو وكنلعب معاه.. كبر دابا وانا ديما مشغولة.. لحظات كتيرة مكنتش قريبة منو فيها.. تعلم فيهم بزاف دالحوايج.. 

طلع رضوان.. ومشا البيت يبدل حوايجو.. وهند تبعاتو تمشي تعاونو.، 

هند: حبيبي.. نسولك.. 

رضوان: سولي.. 

هند: كايجي عندكم شي واحد طويل وعريض وعندو اللحية..؟ 

رضوان: علاش كتسولي؟؟ 

هند: خليها بيناتنا.. ولكن اسماء قالتلي راه عاجبها شي واحد كيجي عندكم.. وفيه هاد الموصفات.. 

رضوان: ( بضحكة خفيفة) اييه.. ههه عرفتو واه.. 

هند: واش كيجي عندكم بزاف.. واش غاتسكت على هاد الفضيحة.. 

رضوان: طبعا لا .. كنستنى غا الفرصة.. 

هند: خاص تخرج بهدوء.. الى بغات تخرج الطريق تتنازل على الولد.. وهي الله يعاونها.. 

رضوان:عندك الحق.. 

هند: عرفتي انا شاكة فيها كتلاقاه.. 

رضوان: باش عرفتيها.. 

هند: جات ليوما وفمها معضوض.. تخيل.. قالتلينا شنيولة عضاتها.. 

ديك الساعة طلقها رضوان بضحكة عالية.. وهند كتضحك معاه 

هند: كدبة باينة ياك هههه 

رضوان: كتضحك.. هههه اوووف .. خلينا نمشيو ناكلو.. نوضي.. 

خرجو ياكلو.. بدات هند تحط ورضوان جالس.. عيطاتلي حماتي وجيت ناكل... حيت فيا الجوع.. جلست .. شفت فرضوان كان مبتسم وحادر عينيه.. جلست وحاولت نتصرف عادي.. 

هند: اووف فمك زاد تنفخ.. عندك غا تكون هاد الشنيولة اللي عضاتك فيها ميكروب.. خاصك تشوفي الطبيب.. 

حماتي: متكبروش الموضوع.. غا شنيولة عادية.. 

رضوان حبس الضحكة بالجهد... وانا محملتش الموضوع.. 

اسماء: بصحتكم انا شبعت.. 

نضت وخليتهم.. حماتي معجبهاش الحال سمعتها كتدابز معاهم...وانا نمشي ننعس..

الغد ليه فقت وقاديت حالتي وحالة ولدي.. وكالعادة فطرت ونزلت بعدما خليت ولدي مع حماتي.. ومشيت لقيت رضوان كيضحك.. باينة غايكون كيضحك عليا.. مشيت عندو وضربتو فدراعو.. 

اسماء: ممكن نفهم علاش كتضحك.. 

رضوان: واش تا الضحك ممنوع.. 

اسماء: محشمتيش تضحكو عليا نتا وهند.. 

رضوان: ومحشمتيش نتيا تقولي عليا شنيولة 

شداتني الضحكة ههه عليها كان كيضحك... 

اسماء: خليني بعد مني هههه  

مشيت بديت الخدمة وكنسرق مرة مرة نظرات لعند رضوان.. وحتى هو...دخلت فحالة غشاوة.. مكنشوفش فيها الواقع كاع.. حسيت راسي باغاه.. هادا هو .. كلما بانتلي شي وحدة.. كنمشي نوقف حداه.. هاديك ديال انه ديالي بوحدي.. ومديال حد.. حاسة راسي اني كنتبرهش بعض المرات.. ولكن كنستحلى هاداك التبرهيش.. مللي كيجي وجهي فوجه هند كنحشم منها.. وكنتفكر انه هادشي اللي كندير فيه راه غلط وانا ومنرضاهش لراسي.. معرفتش واش تعقدت من انس ولا شنو.. ولكن راه مكنتش هكا.. واحد النهار سمعت هند كتبكي ورضوان كيهدن فيها.. صافي فشلت حسابلي اكتاشفات علاقتنا.. مشيت كنشوف.. وانا خايفة.. 

رضوان: تهدني غاتكون بخير.. انا غانوصلك لعندها.. تما تنفست وعرفت انه يمكن ماماها مريضة.. حيت ديما كتعاود عليها.. وفعلا مشاو .. ووصلها رضوان لعند امها.، بقيت انا فالبازار.. حتى العشية لقيت رضوان جا.. 

اسماء: كيبقات ام هند.. 

رضوان: عيانة مسكينة.. 

اسماء: الله يشافيها.. 

رضوان: امين

بقينا خدامين.. وكل واحد دايها فراسو.. حتى جا داك بنادم اللي سببلي المشكل داك المرة.. هو فالحقيقة كان خاصني نشكرو.. بسبابو خلاني نقرب من رضوان كتر.. غير شافو رضوان وهو يتفعفع.. عاد بدا السيد كيهضر معايا وانا كنجاوبو حتى لقيتو مورايا.. 

رضوان: محمااد.. اجي اولدي شوف مع السيد.. 

شدني من دراعي وجرني البيرو.. 

رضوان: هاد الدودة اللي فيك مغاترصاش.. 

كان حسابلي كيضحك.. ساعة كان كيهضر بجدية.. 

رضوان: واش غانبقا حاضيك ديما.. جمعي راسك ونتي اللي جا تفتحي ليه دراعك.. 

اسماء: عرف راسك اش كتقول.. انا نفسي حارة.. ومانيش بنت الزنقة.. 

حيدت يدي منو وخليتو.. طلعت لبيتي.. وسديت عليا.. كلما جيت نحليها نكحلها.. علاش هو داير هكاك.. علاش عندو هضرة بحال السم.. ومكيراعيش لمشاعري كاع.. واش هادا هو اللي يبغيوه الناس.. اش داني ليه.. وهو ماراعاش ليا كاع.. مديتهاش فيه كاع.. ومخرجتش لا للغدا لا للعشا... حتى جات حماتي كترغب فيا ناكل 

حماتي: نوضي تاكلي احبيبة عفاك.. غا قوليلي مالك.. 

اسماء: رضوان عزيز عليه يتعصب عليا قدام الناس.. واخا مكندير ليه والو.. واش حتى لهاد الدرجة كيكرهني.. 

حماتي: لا احبيبة متقوليش هكا..نوضي معايا.. وانا غانجبد ليه ودنيه.. 

نضت ودرت الخاطر ليها.. وبقيت كناكل وماشفتش فيه كاع.. حتى هو مهضرش.. حتى كملنا العشا وكل واحد مشا لبيتو ينعس.. حتى من خالتي ..

             الفصل الرابع عشر من هنا 

لمتابعة باقي الرواية زوروا قناتنا على التليجرام من هنا