رواية مشاعر مبعثره الفصل الخامس عشر 15 بقلم دودي
وليت كنتفادا اني نحتك معاه.. والخدمة مبقيتش كنهبط عندو ليها..حتى عاق بيا.. معرفتش كيفاش كيفكر فيا بالضبط.. ولكن انا راه قلبي عامر من جيهتو.. دازت
يوماين.. وهند رجعات.. امها ولات لاباس.. كنشوفها كتجلس حداه وكتحط يدها عليه.. كنبغي نموت.. كنغير.. هي مرتو وعندها الحق فيه .. اما انا شكون.. غا علاقة عابرة ليا معاه..وليت ماباغاش نجلس معاهم كاع.. حاولت نعيش حياتي عادي..نزلت البازار.. باش نقابل رزقي ورزق ولدي..وحاولت نكون حدودية حتى مع الناس.. بقيت كنقابل ونشوف كل حاجة فبلاصتها.. البازار كبير بزاف.. مللي كتسارا فيه بحال تلى كتسارا فالماركت.. كملت ضورني ومشيت نغسل وجهي.. غسلتو مع عليت وجهي لقيت رضوان مورايا.. تخلعت وحطيت يدي على قلبي..
اسماء: خلعتيني..
رضوان: واش غاتبقاي قالبة وجهك عليا هاكا بزاف..
اسماء: ءنو خاصك ؟ ياك مرتك رجعات.. ومشي عندها غاتكون توحشتيها..
رضوان: متقسايش عليا عفاك.. اسماء.. انا باغيك فحياتي.. وكنشتاق ليك.. مللي كتعصبي مني كنحس راسي تخنقت،، عفاك متخليش مجرد هضرة فلحظة تبعدنا على بعضياتنا..
اسماء: ولكن هاديك ماشي مجرد هضرة.. نتا قلتيها من اعماقك..
رضوان: انس مات .. الله يرحمو.. وانا ماشي. كنخونو دابا..
اسماء: وباش غانعرفك باغيني بالصح ماشي باغي غير تستغلني..
رضوان: نتزوجو.. نقدرو نتزوجو .، مكاين ما يمنعنا..
اسماء: وهند؟؟
رضوان: انا ماشي اول واحد يتزوج جوج.. كاين اللي مزوج ربعة.. غانعدل بيناتكم..
اسماء: خايفة عليها.. لا.. خلينا نأجلو هاد الفكرة..
رضوان: يعني موافقة؟؟
اسماء: واش عندك شك فأني باغا نكون معاك..
رضوان( قرب مني وحط يدو على وجهي وشد عنقي لنفس الوقت..) ااه ياهاد البنت.. لوكان تعرفي شحال كنشتاق ليك،..
حنا العيالات تريكة دالمدلولات.. جا قالي جوج كلمات زوينات فشلت وتيقتو..، عنقني وانا ديك الساعة رجعاتلي الروح.. وقدرت نتنفس براحة..
رضوان: مالقيت منقولك.. الى قلتلك طلعي للدار حيت كنغير عليك هنا من عيون الداخلين غانشتاق ليك انا وغانبغي نشوفك.. الى قلتلك جلسي راه غانقتل شي بوجعران هنا الى لقيتو كيشوف فيك.. اش غاندير..
اسماء: ههههه غانمشي وكل دقيقة نجي نشوفك..
رضوان: ايوا سيري .. ههه وفكري فداكشي اللي قلتلك..
اسماء: غانفكر.. انا راني فكرت قبل منك.. هههه
مشيت كنجري فالدروج بحال شي درية صغيرة وكنقز.. وفرحااانة.. اخيرا اعترفلي.. وبغاني للزواج.. اخيرا ..
وجدو راسكم للدراما.. راها جاية فالاجزاء الجايين... تصبحو على خير ههه
