رواية مشاعر مبعثره الفصل العشرين 20 بقلم دودي
بقيت متكية فالسبيطار.. كنبكي على الاطلال.. حتى دخلات عليا ماما.. وهازة ولدي.. نضت وانا الحريق قاتلني والدوخة فيا.. كيشوفو فيا بحال شي وحدة طيحات براسهم..
الام: جيتيني مريضة.. اما كون عاودت ربيتك من جديد..
حنيت راسي وانا حشمانة.. عمري كنت متخيلة اني غانوصل لهاد الوضع.. ديال الذل.. معمري كنت مفاهمة مع والدية.. ودابا غانرجع تاني لعندهم.، انا وولدي..
الام: باك هضر مع الطبيب.. وغادي تخرجي دابا..
ملقيت منقول.. كون بقينا حتى الغدا.. نشوف ردة فعل رضوان.. وهو كيعرف انه ضلمني.. يجي يعتادر مني.. ولكن .. ماشي اي حاجة حلمنا بيها كنلقاونا.. عاونت راسي بزز.. وجمعت حوايجي.. غانرجع للفقر ديال دارنا،. اللي تزوجت على قبلو انس حتى قبل منعرفو.. ولا نعرف عليه شي حاجة.. غانرجع للتسلط ديالهم.. والقمع.. حنبت راسي ومشيت معاهم.. وانا مقادراش نعلي راسي.. ومقادراش نهضر.. ولا نطلب اي حاجة.. ولدي كنت كنشوفو مع حماتي مفشش ومدلل.. دابا كنشوفو هنا غير كيبكي.. كنحاول نسكتو بأي حاجة مكيبغيش..
الاب: سكتيه علينا.. صدعلي راسب بغواتو..
الصراحة كنت مفششة فداري.. غلطة غلطتها خرجاتني من الجنة..مكرهتش لوكان يرجع بيا الزمان اللور.. ومنغلطش هاد الغلطة.. كنت غانشد تيقاري.. ومنديها الا فولدي.. ونحمد ربي على ما عطاني.. اش داني لشي حب.. اش داني لشي زمر.. تذليت.. وراسي تمرمغ فالتراب.. نهار طحت حتى واحد مرحمني.. هادشي غا من المقربين.. والبراني اش كان غايدير فيا.. منعستش داك الليلة ابدا.. نعست ولدي بزز.. بالرغم من اني مازال عيانة..وخاصني الراحة الا اني درت مجهود خايب.. حسيت فيه ان القوة ديالي فشلات عليا الغد ليه فقت وانا كنشوف فين حليت عيني..رجعت لنقطة البداية.. بحال شي واحد عندو كنز فيديه.. معرفش قيمتو حتى طار من بين يديه.. كنت فنعيم محسيتش بيه..
فالسبيطار كان رضوان كيستنى النتيجة بفارغ الصبر.. مشا لعند الطبيب للي خدا النتيجة.. وبدا كيقرا فيها..
الطبيب: كما كان متوقع.. الجينات ديال الابوة مطابقة مع الجنين.. يعني الجنين كان فعلا منك نتا اسي رضوان..
تخالطت ليه دموع الفرحة والحسرة والندم.. الفرحة حيت اسماء مخانتوش.. والدري من صلبو.. اما الحسرة حيت عرف انه خسرها ومابقاتش معاه.. والندم حيت شك فيها من الاول،، ومتيقهاش.. هز الورقة ومشا للدار..
رضوان: شوفي مزيان.. هاذي اللي تثبت ان اسماء شريفة... والولد مني.. انا ماشي عاقر اهند.. ماشي عاقر..
خرج وخلاها مصدومة.. ومشا لعند دارهم.. وبقا متردد.. كيفاش غايقدر يدخل.. خاف.. وبعد لحظات تنفس ودخل..
الاب: نتا،؟ اش جاي دير هنا..
رضوان: عمي.. انا جاي طالب وراغب فيد بنتكم اسماء.. على سنة الله ورسوله.. وداخل من الباب..
الاب: مزيان اللي عرفتي الاصول..
رضوان: انا كنعترف بغلطي.. وعارف انه كان خاصني من الاول نجي عندك.. ولكن هادشي اللي وقع.. ومغاديش يتكرر..
الاب: خلينا نفكرو... وغانجاوبوك.. ودير بحسابك.. راه مغاتزوجش بيها فابور.. نتا بوحدك وخوك الله يرحمو بوحدو..
رضوان: عارف.. وانا مستعد نفذ طلباتكم كلها .. غانستنى جوابك بفارغ الصبر..
مشا رضوان اللي كنت كنطل عليه من بعيد.. رجع يعني عرف الحقيقة.. ولكن بعدما فات الفوت.. وحتى عائلتي.. محملتش الطريقة باش كيبيعوني ليه.. سديت الباب وبديت كنبكي من جديد.. رخاصيت مزيان.. رخاصيت حتى ولاو كيتساومو عليا..
بعدما شحف بابا رضوان.. وخلاه يحط صداق كبير.. وشرط عليه شروط متشرطهم حتى للعزبة.. ورضوان غا كيقول اه.. اللي يشوفو يقول واكل ودن الحمار... مازال كنعقل نهار جا خطبني لخوه.. وكيفاش كان داير رجل على رجل.. ونيفه فالسما.. وهو اللي كان كيشرط على الواليد.. وبا كان خايف لا يفلت من يديه.. ووافق على كلشي.. دابا تقلبت الاية.. بعدما جا العدول.. وكتب العقد وسنيت.. وانا طول الوقت عينيا فالارض..
العدول: بنتي واش عندك شي شروط..
اسماء: لا.. معنديش..
الاب: شرطنا هو يتهلا فيها ويخدم على ولدها ويعتابرو ولدو.. ويعدل بينها وبين المرا ديالو الاولة.، اجي شنو درتي فالموافقة ديالها..
العدول: السي رضوان خدا موافقة من القاضي.. حيت عندو مقومات الزواج.. ويقدر يفتح جوج بيوت..
الاب: طبعا يقدر يفتح حتى ربعة..
محملتش طريقة الهضرة ديال بابا.. نضت للببت وبديت نجمع حوايجي.. زواجي من رضوان ما هو الا نجاة.. من هاد الدار..
الام: شوفي.. فلوس الصداق ديالك يبقاو عندنا.. متعرفي شنو يوقع.. لا تمشي تما ويحيدهم ليك..
اسماء: شبعو بيهم.. مبغيتهمش..
الام: ردي عليا الهضرة.. زيد.. درتي الفعلة وزايداها بالهضرة.. انا بلاصتك مندويش.. ونمشي نلوح راسي من شي جبل حسن ليا..
كتزيد تضغط عليا،. كملت الجميع.. وخويت البيت مشيت لقيت رضوان كيستناني.. خدا مني الولد.. ومشا حطو فالطوموبيل فلابوسيت..وانا مشيت ركبت القدام ودرت الحزام.، وجلست.. جا ركب القدام.. وانطلقنا..
