رواية جعفر العمده الفصل الثامن عشر بقلم ليل ادم
ندا : مساء الخير
سيف : مساء الورد اتفضلي
ندا : لو سمحت أنا عملت امبارح شغل في عربيتي طلع في عيوب كتير وبتكلم مع الفني بتاع حضرتك زعل اوي وصوته كان عالي ينفع كده
سيف : لا طبعا مينفعش مين ده
ندا : اهو اللي هناك ده
سيف : سعد معلش سيبك منه تعالي
ندا: اتفضل
سيف : ( فتح العربية وبدأ يشوف العيوب ويحل فيها )
ندا: اه كده تسلم ايدك
سيف : ولا يهمك تحت امرك
ندا : أنا ندا
سيف : أنا سيف
ندا : أنا عارفة حضرتك على فكره اصلي دي مش اول مره اعمل شغل هنا أنا أصلي مجنونه بالموضوع ده
سيف : غريبه أول مره اشوف حضرتك
ندا: أصل دي اول مره اعمل شغل ويطلع في حاجه
سيف : طب تعالي ( ودخلوا المكتب)
ندا : مش عايزه أزعجك و اضيع وقتك
سيف : لا طبعا مفيش حاجه تشربي اي
ندا : عصير
سيف : سعد يا سعد
سعد: نعم يا استاذ سيف
سيف: هات اتنين عصير
سعد : تحت امرك يا سيف بيه (وخرج ورجع تاني)
سيف : مالك يابني
سعد: عصير اي بالظبط
سيف: لا عندك حق عصير اي صحيح يا ندا
ندا : اي حاجه
سيف : لمون حلو
ندا : حلو
سيف : روح يا سعد
سعد: ايوه ما برضوه حضرتك مقولتش عصير اي
سيف : لمون يا سعد الله يحرقك
ندا : ( مبتسمه)
سيف : بسم الله ماشاء الله روح يا سعد روح
في جانب آخر
جعفر: في اي يانعيم
نعيم : المعلم فكري عايز يدخل
جعفر: عايز اي يا معلم فكري مش الشغل ما بنا وقف
فكري: لا يا معلم جعفر معلش أسمعني علشان كده احنا في خطر
جعفر: أتكلم على طول يا معلم فكري
فكري : الراجل اللي دخل المنطقة علينا ده مدور الموضوع أستعباط وكل يوم يشتري محل جديد والأسعار في المنطقة بقيت مستحيله
جعفر: شغل يا معلم فكري وده حقه العيب على اللي بيمد ايده ليه
نعيم : يا معلم جعفر المحل اللي يسوي مليون بيدفع في اتنين والناس تعبانه انت عارف
فكري: معلم جعفر سيبك من اي حاجه ما بنا أنا وكل المعلمين في السيده وكلناك تتكلم بلسان الجميع
جعفر: لا آله إلا الله هتكلم اقول اي طيب
فكري : يشتغل فوق راسنا إنما يعمل كده في الأسعار في السوق دا مينفعش
جعفر: حاضر يا معلم فكري هتكلم معاه
فكري : العشم برضوه يا معلم بعد اذنك
جعفر: أتفضل يا معلم
نعيم : جعفر بره عنك الموضوع ده
جعفر: هو انت تبقا كبير بالاسم يا نعيم الكبير يقف يحل في الصغيره والكبيرة
نعيم : اللي تشوفه يا جعفر
جعفر: ابعت مصطفى للمعلم راضي قوله المعلم جعفر عايزك
نعيم : مصطفى انت يا حمار
مصطفى: اي يانعيم
نعيم : روح للمعلم راضي قوله المعلم جعفر عايزك في المحل
مصطفى: حاضر
في جانب آخر
المعلم راضي: روح قوله هو اللي عايزني يبقا يجي لو انا كنت عايزه كنت روحت لحد عنده
جعفر: ( دخل المحل في وسط الكلام بين راضي ومصطفى) وأنا جيت يا معلم راضي علشان عندك حق أنا اللي عايزك
راضي : اقعد يا معلم
جعفر: روح انت يا مصطفى
راضي : مرسي
مرسي: تحت امرك يا معلم راضي
راضي: الشيشه والقهوه للمعلم جعفر
مرسي : تحت امرك يا معلم
جعفر: مش عارف ساعات بشوفك ابن بلد وساعات مش بشوفك
راضي: من داخل دارك جاب الحق عليك
جعفر: شوف يا معلم راضي الوقتي الرجاله كلها بتشتكي من الأسعار اللي بتشتري بيها
راضي: طبيعي يشتكوا بس أنا راجل بحب أريح دماغي يا معلم
جعفر: بمعنا
راضي: أنا شايف المحل يستاهل مليون جنيه غيري علشان هيشتري هيقولك اي مليون و مائه واللي بعد يقولك و كمان مائه أنا بقتصر الكلام وبقول اتنين مليون اللي قلبه جايبه يدخل
جعفر: السوق مش كده يا معلم أنا بالنسبة ليا شايف كده كتير
راضي: وأنا شايف اني مدوستش ل ليك ولا لغيرك على طرف
جعفر: عداك بس أنا بقولك كده غلط اكسب الناس لو عايز تكمل في المنطقة
راضي: دي كلمه الواحد ياخدها يحطها في ودنه ويعمل بيها كفايه أنها من المعلم جعفر
جعفر: مش مرتاح يا راضي شويه ناعم وتزحلق وشويه ناشف عايز تتكسر
راضي: طب قولي أتعامل معاك ازاي علشان تصدق اني جاي اشتغل
جعفر: (أشار ب صوباعه على عقله ) مش محتاج تعمل حاجه خالص يا راضي أصل هنا مش مقتنع نهارك كله خير
راضي: طب القهوه طيب
جعفر: نشربها وقت تاني
وخرج من المكتب راح على مكتبه
بعد عشر دقائق وقف عربيتين قصاد محل جعفر العمده نزل منها رجاله كتير طالبين جعفر العمده
وبدأت خناقه كبيره في المنطقة بين جعفر و شباب المنطقة مع الناس اللي دخلت المنطقة جري منهم اللي جري حجز جعفر العربيتين ومعاها اتنين منهم ربط جعفر الاتنين رجاله في نص الشارع متعلقين
جعفر: نعيم
نعيم : نعم يا معلم
جعفر.: خد العربيات دي المخزن
نعيم : تحت امرك يا معلم
في لحظه دخلت عربيه الشرطه
محمد بيه: في اي يا معلم جعفر
جعفر: العيال دي دخلت المنطقة وعملت مشكله
محمد بيه: بعد اذنك يا معلم نزل يابني العيال دي
جعفر: اتفضل يا محمد بيه
دخل جعفر مكتبه وكان زعلان جدا أن محمد بيه خد العيال قبل ما تقول مين وراهم
نعيم : مالك يا جعفر
جعفر: عايز اعرف مين اتصل بي محمد بيه
المعلم راضي: أنا يا معلم جعفر
جعفر: خوفت اعرف مين وراهم
المعلم راضي: مش فاهم قصدك أنا اللي باعت العيال دي
جعفر: لو كنت متأكد كنت علقتك جمبهم يا راضي
المعلم راضي: تمام الظاهر عمرنا ما هنجتمع على العموم أنا دخلت اطمأن عليك ولما كلمت محمد بيه كلمته علشان الموضوع كان كبير وقلقت عليك بعد اذنك يا معلم جعفر
نعيم : ليه بس كده يا جعفر
جعفر: اقعد ساكت يا نعيم الراجل ده مش سالك والحوار ده من تحت راسه وبكره تعرف
في جانب آخر
راضي: مرسي
مرسي: نعم يا معلم راضي
راضي: ابعت حد على القسم قول للعيال دي لو حد فتح بوقه معرفوش انما لو سكتوا عيالهم وأهلهم في حمايتي وليهم عندي شغل بعد ما يطلعوا
مرسي: تمام يا معلم بعد اذنك
في جانب آخر
ندا : يالهوي الساعه بقيت ١١
سيف : اي يعني في اي
ندا : لالا مش بحب أتأخر بره البيت اي نعم بابا مسافر ومعيش حد بس عيب برضوه
سيف : خلاص تحبي اجي معاكي أوصلك
ندا : ربنا يخليك العربيه معايا كده كده
سيف : خلاص اول ما توصلي البيت طمنيني عليكي
ندا : اتفقنا بعد اذنك
سيف : أتفضلي
في جانب آخر
مرسي : ( على باب القسم )
جعفر: أهلا المعلم مرسي تعالي
مرسي : اي يا معلم جعفر خير
جعفر: الخير كله عندك بتعمل اي هنا
مرسي : أنا مفيش حاجه عادي
جعفر: طب اركب
مرسي : اركب اي لأ مينفعش
جعفر: ( فتح الباب) هتركب ولا لا
مرسي : اركب اركب خلاص
جعفر: ( ركب عربيته ) شوف أنا هنا بقالي اكتر من ساعه مستنيك هات من الاخر الدوغري باب واحد يا معلم مرسي
مرسي : منا معنديش حاجة أقولها يا معلم جعفر
جعفر: ( بضهر ايده علي قلب مرسي بقوه ) أنا مش جاي لحد هنا علشان تسرح بيا بروح امك اخلص انت جاي تفهم العيال محدش يفتح بوقه صح
مرسي : ها
جعفر: ( بصوت عالي) صح ولا لا
مرسي : صح يا معلم صح
جعفر: تعالى ( وخد مرسي ودخل بي القسم )
محمد بيه: خير يا معلم جعفر
جعفر: العيال اللي عملت حوار في المنطقة
محمد بيه: مالهم يا معلم
جعفر: عايزهم أنا متنازل لو كنت عملت محضر
محمد بيه: لسه
جعفر: استأذن حضرتك اخدهم معايا أهالي العيال عشمانه فيا
محمد بيه: يامعلم جعفر خليهم يخدو جزائهم
جعفر: خدو بما فيه الكفاية علشان خاطري يا محمد بيه
محمد بيه: يمشي كلامك يا معلم جعفر امين خالد
خالد: نعم يا محمد بيه
الامين : هات العيال
بعد مرور عشر دقائق
الامين : العيال يا محمد بيه
جعفر: بعد اذنك يا محمد بيه
محمد بيه: اتفضل يا معلم
جعفر: امشي يابني انت وهو ( وخرج بيهم من القسم قصاد عربيته فتح شنطه العربية)
جعفر: اللي ملوش مكان فيكم هنا الحجز اولا بي
(ركبوا الاتنين في شنطه العربيه )
جعفر: اي يا معلم مرسي مش سامع أنا قولت اي
مرسي : اعمل اي اركب معاهم
جعفر: انت حر مش عايز تركب قولي
مرسي : لا عايز عايز ( وركب معاهم في شنطه العربيه)
جعفر: متقلقش ياليفه انت وهو مسافه السكه ( وخد العربيه وراح على محل المعلم راضي)
