رواية عهر الرجال الفصل السادس 6 بقلم وسام الفراجي
شعندج هنا هذا بيت الزبال خاف يكولون عنج كاعدة ببيت ابن ابو البلدية ..
تفضلي اطلعي برا البيت وحافظي ع سمعتج مثلما كلتيها سابقا الي ..
صدمة الكل ..
الوجوه كلها تباوعلي ..
كلشي جنت متوقعة الا يحجي كدام الكل سالفتي هاي ..
كتله ..
ـ هاي اليه السالفة تطردني من بيتك ؟
ـ تفضلي بلا زحمة اطلعي برا بكرامتج شنو من عين صلفة وجاية لهذا البيت بعد كل الخراب الي سويتي
ـ اني ما سويت شي انتَ متتحمل الحقيقة وادري بيك كل تعبك وتغييرك وسمارك وهالاتك من وراي من رحت منك
ـ غلطانة اني الله رحمني ماخذت وحدة مثلج نحسة وماتحب الخير للكل شوفيني عرض جتافج يلا
عذراء ـ لحظة لحظة اني مو فاهمة شي .
حوراء ـ ع كيفك يوليد احترم البنت الوياها
وليد ـ اطلعي انتِ روحي لغرفتج اي كلمة زايدة ماريد ..
عذراء ـ بس اهدأ وليد انتَ وياها شنو
ام وليد ـ انتم عليش تطمطمون عالسالفة وليد و شمس يحبون بعض جانوا ومن تعرفت ع ولد طاك عنده سيارات وفلوس وبيوت كالت لوليد اني مكدر اكمل وياك باجر شنو يكولون عليه ماخذة واحد زبّال!
جان يصيح وليد ..
كافي كافي تعيدون بهاي السالفة وضرب بيده ع راسه!
جان تكله امه ..
ليش مستحي من هالسالفة وهي مو مستحية
عذراء ـ هسة شمس عافت وليد علمود ولد طاك!
وليد ـ علمود اخوج انتِ غراها بالبيوت العنده والسيارة
كلت الهم كافي كافي نطيتكم مجال تحجون هواي هاي حياتي و اني حرة بيها اختار الي يعيشني اني بنية عندي متطلبات و من حقي اختار انسان عنده فلوس حتى اعيش بكرامتي
شو حجت حوراء و اول مرة تكون ضدي جانت دائما وياي حتى من تفاصلنا اني ووليد ..
ـ وعشتي بكرامتج ؟ معززة ؟ لو يعزب بيج للزلم تفو ع هيج كرامة اطلعي انتِ انسانة قذرة ومتستاهلين واحد يوكف وياج ..
جان تباوع للكل حوراء وتكول ..
هاي الي اخذها يريد تصير بنت ليل وكل يوم يم صديق من اصدقائه وهاي اخته هم شغلتها هيج كلهم زناوي ..
عذراء صارت هالكدوتها بس ما نطقت ولا حرف ..
سحبت ايد عذراء وكلت الها امشي نروح ..
طلعت وياي ادفع بيها تدفع احسها متريد تطلع وتريد تحجي شي بس ماحجت ..
كلت لعذراء اني ماشايلة ولا فلس اجري النا تكسي للبيت ياريت لوما جاية هنا بس شسوي كلت هي اقرب شي علينا بيتهم ع نهاية المحافظة الفلانية واحنه بإطراف المحافظة الفلانية الثانية ..
لزمت جنطتها وشمرتها عليه وماحجت شي ..
اخذتها وطلعت فلوس واجرت لبيت عيالي ..
الطريق كله عذراء صافنة وماحجت ..
حجت مرة وحدة من وصفتله بيتهم ..
اول وصولنا للبيت ..
هدوء ماكو سيارات ولا هوسة ولا شي ..
طبينا للبيت ..
لكينا فارغ ..
شنو القصة ..
فتحت موبايلي طلع صامت و17 مكالمة فائتة حاركة حرك اتصالات للموبايل ..
خابرته جان يرزلني رزالة يغلط يفشر يسولف تعالي وين جنتي مو ساعة اتصل عليج كتله يابه والله صامت جان ..
جان يكلي بنت الباعوج بكم فلس وين انتِ؟
كتله
ـ باعوني بكم فلس ؟
ـ كتلج وينج ؟
ـ لاااا اهلي باعوني بكم فلس ؟
ـ بنت الـ*** اكلج وينج
ـ ما اسمحلك تغلط ع ابوية فهمت لو لا
ـ لج بابا جاي اكلج وين انتِ فضيها ؟
ـ ما اكلك شتريد تسوي سوي ..
سحبت عذراء التلفون مني جان تفتح سبيكر وتكله
ـ احنه بالبيت شتريد
ـ اطلعوا ذولي اهل شمس توة يلا عرفوا عدهم بنت هنا وجاي يهددون وبأي ساعة يجون للبيت
ـ وين انتو ؟
ـ ببيت ياس صديقي ..
اني من كلي ببيت ياس عليت صوتي وكتله ..
ـ اي ليش لا بالعراق ماكو بس ياس مرتاح مو ؟
ـ تعالي ويا عذراء هي تندل بيتهم
ـ اني ما اجي لهالبيت
ـ تجين ورجلج فوك ركبتج
ـ هذا البيت ما طبه لو ادري اتكطع
ـ تعالي وبدون لغوة الي ببالج ماكو مو وكت هالسوالف احنه بمصيبة
ـ سامر وين ؟
ـ طلع البارحة لذلك عفنا البيت خاف كلشي يصير
ـ منو طلعه ؟
ـ عمامه مدري منو
ـ ايمت
ـ ششششمس تعالي لهنا وعود اسألي براحتج
ـ هئ ما اجي اني راح اظل هنا حدما يجون اهلي وولد عمامي وياخذوني
ـ يكتلوج يابنت الناس
ـ عادي المهم ياخذوني منك انتَ تريدني اجي لبيت ياس واني اعرف بيت ياس شنو واعرف مرته شنو
ـ هاي اخر كلمة اكولها الج اذا ما اجيتي ويا عذراء وظليتي بالبيت ورحتي لـ اهلج ترا ادزلهم شي يكتلوج بي هناك ويدفنوج رفس
ـ الحمد لله ماعندي شي تهددني بي ماسويت علاقة الا بالحلال شتريد تهدد هدد اني بنية اعرف شمسوية الحمد لله
دا احجي و سده بوجهي غثني وقهرني دائما يهددني بشي وهمي ويخليني بالظيم جان تكلي عذراء امشي وياي كتلها لا والله ماروح ..
عذراء ـ يمعودة امشي هذا ما يتشاقة ترى!
شمس ـ وضحيلي اكثر شنو ما يتشاقة
عذراء ـ والله ياعيني اني ما ادري عن شنو يقصد بس وعد ما يتشاقة بهيج امور ..
دوخوني رجعت بذاكرتي لورة شنو الشي الي يخليه يهددني بي ..
المقطع مال المكالمة الفيديو
اهااا عرفته ..
هو هذا الي يهددني بي ممسوية شي غلط كلش جبير حتى يهددني بهيج كلام وتهديد قوي
قررت ابقى!
كالتلي عذراء تبقين لو تروحين وياي؟
كلت الها ..
باقية
وراح ارجع لأهلي خلي يطلكني ..
ضحكت عذراء وكالت احلام نومة العصر هاي ..
الظاهر متعرفين وعد ..
كلتلها ..
مو بحاله ..
سمعنا صوت سيارات وصياح زلم ويضربون بالباب مال 4 بيوت ..
شايلين سلاح!
ضربوا ع الواجهة مالت البيوت ..
صحنا اثنينه ومكدر اطلع نفسي الهم خايفة تجيني طلقة ..
و صياح
.. وينكم يانسوان
.. اطلعوا
.. والله لزرفكم تزريف
.. وين اختي
صرت اصيح وصوتي ما ينسمع من علو صوت الزلم ..
اخير شي طلعتلهم واسمع صوت سامر يصيح هذيج شمس اوكفوا ..
اجه عليه ..
لزم ايدي باوعلي من فوك لجوة اني كمت ابجي
ـ بيج شي
ـ لا ابد
ـ وينهم ذولي ..
ـ انهزموا يعرفون من طلعت من السجن راح تجي ..
ـ امي تنتظرج ع نار اصعدي بالسيارة ..
طبوا 2 من ولد عمامي للبيت واحنه جاي نحجي سمعنا صوت عذراء ..
كالي منو جوة كتله عذراء بنتهم ..
ركض سامر .. ركضت وياه يصير بولد عمنا ..
هدها وعوفوها متكلي شجاي تسوي ..
يكله ابن عمنا هاي بنتهم
ويردله سامر
بنتهم مو ابنهم عوفها وارجع لحد يلمسها ..
صار كدامها وانطاها ظهره وراحوا جان يكللها وهو منطي ظهره ..
روحي لأهلج محد يمسج بس حطي شي ع راسج قبل ما تطلعين ..
يحجي وياها بدون ما يباوعلها...
جان تكله اروح وياكم
ردلها ..
ـ شلون تروحين ويانه ؟
ـ اريد اروح ويا شمس
ـ لا مايصير ارجعي لأهلج
ـ بس اني اريد اروح
ـ لتسويلنا سالفة ويكولون خطفناها ومدري شنو يا خيتي روحي لأهلج يرحم ابوج ..
لزم ايدي واخذني وياه ..
صعدت وياه بالسيارة وكلي هاج مي اشربي واريد استفسر عن كم سؤال ببالي ..
كتله سولف ..
ـ مو ع اساس تعرفونه هالشخص واخو صديقتج شلون متعرفيهم هيج
ـ تريد صراحة ؟ خاص بـ #وسام_الفراجي
ـ اي طبعا ..
ـ اعرفه عالنت
ـ تهي بهي عالنت تكول .. طبعا صار يفر بيده
ـ اي عالنت وكذبت حت توافقين
ـ زين الي خبلني من سألنا عليه جيران كالوا زين
ـ سألنا مو هنا ببيتهم ذاك وجيرانهم ميعرفون شغلهم لان شغلهم بالبيوت هاي بعيد
ـ غلطتي شي وياهم ؟
ـ اعوذ بالله شريفة والله محد مسني
ـ شممس متاكدة
ـ والله شريفة ..
مشينا وطبينا وشافتني امي كعدت بالكاع وتبجي اجيت ركضت عليها بستها من راسها وكلت الها سامحيني امانة واني غلطت وهي تبجي وتكهد من البجي ..
وتحضن بية وتكلي احد سوالج شي وشلون عشتي هناك كل هالوقت شلون تحملتي ..
كلت الها مو وكت هالسوالف هسة ..
طبيت ع ابوية ركضت بست ايده وراسه وهو بارد وياي وزعلان بحيث ما يطيقني ..
جان مهتم اجي بدون محد يمسني بس ..
اما هو زعلان كل حيله ..
حاطة التلفون صامت ..
ملتمين زلم برا وولد عمامي خاف احد يهجم عليهم ..
ساعتين تقريبا ونص ..
اجت دوريات شرطة اخذوا تقريبا 10 من ولد عمامي وسامر انهزم من حايط بيت جيرانة الثاني لغير فرع وفلت ..
هوسة وصياح ياربي دخيلك كل هذا الي صار من وراي ومن ورة قراراتي ..
فتحت التلفون 9 مكالمات فائتة ..
7 وعد
2 عذراء ..
شبيهم ذولي اريد اقفل الخط واكسره بس تهدا الامور واخلص منه ..
وصلتني رسالة عالخط من وعد مكتوب بيها
"تلمسين السما اقربلج من الطلاك وهاي هجمتكم عالبيت ما تمر سلامات ومنا للـ 12 بالليل اذا ما اجيتي هيج اضطر ادز لأبوج الشي الي لازم يشوفه"
ارتبكت ..
عرگت ..
صعدت حرارتي ..
توترت ..
جديات حسيت بخنكة ..
والله ما مسوية شي بشنو يهدد ..
حيلي راح والله يارب دخيلك استرني شنو عنده من سالفة يارب والله ما اتحمل صدمات ..
كاعدة وكلما يدك تلفون ابوي استغفر وادعي يارب مو هو يارب غير واحد ..
روحي تشيط .. خاص ب #وسام_الفراجي
بسرعة اجت ببالي وتذكرت من امه رادت سراب ومارضت بية بالبداية ..
اجت حوراء كالتلي بوقتها امي تريد سراب لوليد وتخبلت وصرت اريد اي شي يخرب هالنصيب ..
سويت حساب وهمي وسويت محادثات وهمية وعلى اساس سراب تحجي ويا ولد وحوراء دزتله الصور ..
طبعا كلها تلفيق بس شسوي جنت اغار وماريدها تاخذ وليد وتصير احسن مني رغم اني احلى منها بهواي وهي زركة جانت ومو مرتبة ..
سويت نفسي ما ادري ..
ودزيتله كل السكرينات ..
ومن فتح الموضوع وياي كالي امي جاي تلح عليه تريد سراب الي ..
كتله بالله دزلي صورتها اشوفها ..
كلي ماعندي عود حوراء تشوفك وثاني يوم كلت اله غدي شنهاي كل عقلك تاخذ وحدة هيج شكلها ما تفكر بأطفالك شلون يطلعون مو حلوين ..
وهاي من شكلها ملعبة وعدها اصدقاء مو مال زواج ..
ظليت اون براسه حتى صار يكرهها لحد اليوم ما يطيقها وهو اصلا ما حجه بسالفة السكرينات ابد يعني دزيناه من حساب مجهول ..
وما كال الي ابد .. يعني جان محتفظ بالسر ماراد يفضحها بس الي يهمني هو وصلته الفكرة ..
كل هاي الي سويتها اجت ببالي بوكت هددني هذا ..
واشجع بنفسي اكثر شي ممكن يسوي يدز مقطع الاتصال الفيديو وهذا الشي صح غلط بس اهون من الاشياء الي اتخيلها براسي
وارجع واكول مستحيل عنده شي عليه ميكدرلي لازم اوكفه عند حده
الساعة
00: 10 .. توتر ..
10:30 .. قلق يزيد
11:00 .. مترددة اكول اخابره واكله اسفة
11:30 .. اشجع بنفسي واكول ما يكدر يسوي شي
11:45 .. اوف التفكير مميت
11:55.. كلبي يدك والله العظيم احسه براسي
11:59 .. شمرت التلفون مالتي وادعي يارب يارب انقذني
12:00 .. وصلت رسالة واتساب ..
" اني لا اصلي ولا اصوم ولا ساجد سجدة وحدة صارلي 20 سنة ولا اخاف ع عرضي ولا اهتم لأحد كلشي بحياتي عبارة عن فلوس حلال حرام ما اسأل وهذا فيديو كصيت الك 10 ثواني لليلة العرس بالبيت الي اخذتها بي و دزيتلك 10 خاف تستحي تكمل الفيديو يعني راعيت مشاعرك ..
