 |
رواية ليلة الحنة الفصل السادس عشر بقلم بسمة البياتي
.. الديصير خلاني اخطي خطوة بحياتي مجنت اظن راح اسويها اتقبل الموت ولا اتقبلها
من فضت الهوسه فتت للهول ماما بالفراش وبابا گاعد يم رأسها عيونه ذبلانات من القهر
عادل وعماد والبنات موجودات ماعدا علاء بغرفتة
محمد...عيونج راحن من البجي هونيها وهي تهون ربح من سابع سما يدبرها حاشاه مايضيع تعبنا وكسرت ظهرنا يرده العقلة وعيونج يرده بس صبري
حورية...ياصبري الدتحاجيني بي من تالي عمري يرفع صوتة عليه لا مخليلنا قدر ولا قيمة
هذا الجان يطب ويطلع يبوس ادينا ويطلب رضانه هيج يصفى حاله
... لعد ليش اگلج خلي نبيع البيت حتى لو بخساره
اذا يظل اهنا يسمع كلام هذا وذاك يتخبل بالزايد علاء البعد عن المنطقة دواه
... محمد لاتغشم روحك والله لو نروح الأخر الدنيا مراح يجوز ويفك ياخة وابن اخوك نازل زن على رأسة
زلال.. ثنيت رجلي گعدت على ركبتي مقابيل بابا وماما
مسحت عيني بطارف ردني نطقت بكلام متقطع
من الشهگة بابا اني موافقة على امجد
... مكافي عليه سوالف اخوج تريدين تكمليها
رجعي الغرفتج يابة ولاتعيد هالسالفة بعد
.. الزواج قرار وشي يخصني مووافقة وهاهي
عادل.. ترى طوختيها سمعي كلام ابوية وسكتي
محمد... دوم اگول زلال عقلها جبير وفطنة ماينخاف عليها ليش تخليني اغير رأيي بيج
غلطت مره وانطيتج ولهسه جاي ندفع الثمن تريدين ارجع اكرر نفس الغلط حتى بينج وبين نفسج لاتفكرين بالموضوع
...بالقرآن تعبت بعد ماعندي طاقة واگدر اتحمل
خليني أزوج بلكي يبرد راسكم وترتاحون من المشاكل
عماد.. احنا نرتاح وانتي عادي تأخذين واحد متريدي وتجبرين نفسج عليه كل هذا حتى علاء افندي ينهمد يگعد ويسكت
عادل.. بنتي لاتصيرين غبيه واحد مارادج ولى وراح
طبه مرض واليجحي طز بي
بس اذا أخذتي اخو الف علامة استفهام تصير عليج
حورية... محمد أسمع من بنتك ما راح تنحل غير بزواجهم
محمد.. حوررررية هاي عود انتي الجبيرة العاقلة
... ليششش وين ظل عقل برأسي مرعوبة يارجال وروح أبوي مرعوبة زلال من تأخذة على اقل قريبة مني واعرف بيها بخير
اذا علاء سوة مصيبة وراح بيها بوقتها ششسوي
انييي ام حسسسسو بيه اذا صار شي بواحد بيكم لا سامح الله اموت نفس اللحظة
عادل... عاجبج نظلمها الخاطر المحروس
الله يرضى عليج لاتفكرين بس بي وتعالجين الغلط بغلط اكبر منه
عماد... عافها أركان تاخذ اخو بشرفي حتى الأخرس راح يحجي
حورية...لا محد يگدر يحجي هذا زواج على سنة الله ورسوله من تصير بعصمة رجال كلمن يدخل لسانه الحلگة ويسكت يوم يومين وينسون
اما اذا بقت محد راح يرحمها وحتى زواج مثل باقي البنات ماراح تتزوج بله گولولي اذا تقدملها احد راح تگدرون تضمون عليه موضوع خطوبتها القديمة
لا طبعاً واذا سأل شنو سبب فسخها تگدرون تگولوله أبن خالها عافها بحنتها
خلوها تأخذ امجد محد يصونها غيره
امجد مو اركان ويعوف عرضة وينهزم
عماد... مايعوفها بس عمره مراح يحبها لان يحب بنت اختج اصلاً مستغرب شلون قبل يتخلى عنها
ولو ما أعرفه حق المعرفة جان گلت امجد نسخة أخو أركان
... كلشي قسمة ونصيب لمى مو نصيبة
أبوها وأمها بعد ماينطوها اله
عاطف بنفسه أجه وياهم يخطبله زلال وگال لمى رايدها گرايبي وراح انطيها
محمد... حجيتي هواي وسمعناج يحورية
هسه سمعيني مانطي زلال الأبن اخوج وفضت وراحت حتى لو تظل طول عمرها بلا زواج
زلال...رجعت للغرفة تمددت بالفراش رأسي يريد يطك
ليال.. من كل عقلج وافقتي عليه لعد وين راح كلامج هذاك اليوم ما أريده ولو امووت مأخذة
... ولهسه أگولها وأعيدها ما أريده وأفضل الموت عليه لكن ما بالأيد حيله مجبوررة والله مجبورة
ليااااال حاسه بيتنا راح ينهجم بسببي
وبابا وماما راح يصير بيهم شششي يعني معقولة تريدين ابقى اتفرج عليهم وهما يذبلون ويومية مأخذين احد بيهم للمستشفى
... ولمى مفكرتي بيها!!
... دفنت وجهي بالمخدة وبجيت بصوت
اااااخ شششلون ما فكرت كافي لياااااال سسسكتي
.. اشش على كيفج هم زين بابا رفض الظاهر لا انتي ولا ماما بوعيكم
.. الصبح بعدني بفراشي ما أريد أگوم ولا أطلع من الغرفة
ليال بالكلية أجت شذى اخذت غزل يمها وره شويه
اندفعت الباب فات علاء ورگعة وراه
خير ياطير ششجابة عليه من صباحيات الله يمكن حلمان بيه
علاء... سمعت موافقة على أمجد جاي تتحديني موووووو
....لا اتحداك ولاتتحداني كل الديصير بسببك
اذا حياة ماما وبابا متهمك مستعدة أشتري راحتهم بعمري
.. ليشش تجبريني أأذيج ومحمد اذا فكرتي مجرد تفكير تأخذي أذبحج واشششرب من دمج
... كل هذا وممأذيني راح ادمرني وتقضي عليه وتگول ممأذيني گلبت بيتنا جحيم وتگول ممأذيني اهلي صحتهم انعدمت وممأذيني
مخليني احاسب نفسي على ذنب مالي يد بي وممأذيني بسسسسسببك أدعي على روحي باليوم الف مرة الي تنهزم وتصخم وجه اهلها هم مايصير بيها الصارررررر بيه
هذا ابد مو علاء جرني من شششعري سحلني من الفراش لزم كتفي عصرة من القوة عظامي رادت اطك بيده
خلص عليه بالضرب ماما بابا شذى رغد فاتوا للغرفة يريدون يخلصوني منه ميگدرون
فاقد الأحساس والشعور حتى رغد وشذى بدون وعي ضربهن لان صارن گدامي
بابا من حلات روحه ظل يصيح بعلوا صوتة
اطلع من بيتي برئ منك اليوم الدين
بعدنييييي مامتت وذليتها لو امووووت شششسسوي بيها
لج حورية هذا الدافعيلة موو هو هذا حزام ظهرهن
اطلللللع برا
تعب گعد بالگاع يلهث صوتة بالزور يطلع
ما اعرف احير بنفسي لو بي
خوو ماما بس تصرخ حتى حجي محجت
بساعة غضب وقهر
بابا گال
روحوا صيحوا خالد خلي العصر يجيب شيخ يعقدلها على امجد
عايشش وما گدرت احميها خلي يأخذها يخلصها من ضيم أخوها.
حورية...محمد گلبك راح يوگف على كيفك.
...انعل ابو گلبي لابو تربيتي لو ميت ولا عايش كل هذا
... الجهال رايحين البيت خالي صايحيهم
اجه خالي وخالة كوثر مايعرفون ششكو
ماما گالتلة اخذ محمد هدي لايصير بي شي...
خالي اخذهم البيتة
رغد.. عززززا بعينة شلون كفخني على راسي مو أيد توثية
گومي زلال لاتظلين گاعدة بالگاع
. رادن يگوموني سحبت أيدي
اشگد ضربني ما احس بالوجع مجرد حرارة تطلع من جسمي
صرخت وحده بيكم تنورني وتحجيلي ششششنو ذنبي بششنو غلطانة ترى راح اتخبل
علاء شششبي فهموني علاء شششبي تصرفاتة مو طبيعية.
واحد ما رادني وعافني تسسستوجب يوصلها للقتل ويعوف حياتة ويركض وراه
لا معتدي عليه ولا داك بيه الناقصة وعايفني بصخام وجهي ايدي بالگوة جان يلزمها بعد شششئكو
ششذى... حجي الشباب هو الديخبله كلما يسمع جايبين طاريج يزيد حقده على اركان وهو من يوم يومه دمه حامي
گومي من الگاع غسلي وجهج خشمج دم
.. أريد اذب روحي من السطح واخلص واموووووت ولكم بابا وماما راح يموتون بسببي
من كل عقلي گمت من الگاع أريد اصعد فوك البنات لزمني بهاي اللحظه فكرة الموت سيطرت عليه
بالگوة فوتوني للغرفة وقفلن الباب
وره ساعة هدءت گمت طلعت ملابس أريد أبدل
رفعت ايدي وياريتني مرافعتها لزمني وجع من كتفي خلاني اتبرغث بالگاع حتى النفس بصعوبة أخذة
اشگد حاولت اكتم ماگدرت بجيت بصوت عالي
رغد ششافتني متعرف شسوي
... ما أگدر اسويلج شي اخاف صاير كسر لو خلع راح اتصل بـ عماد يجي
.... ماما وبابا رجعوا للبيت اشگد حاولت اتمالك نفسي گدامهم ماگدرت الوجع فوك طاقتي
گابلوني وگعدوا ماما تبجي على حالي وبابا
يسب علاء ويتوعدله
أجه عماد گومني يأخذني للمستشفى
رغد اجت ويانة الطريق كله يستفسر وهي تحجيلة
عيونه صارت بگصتة
وصلنا للمستشفى اخذولي اشاعة طلع عندي خلع لأزم الطبيب يرجعة المكانه
رغم انطوني مسكنات وهوسه بس من حركة ودفعة روحي ساحت ردت افقد الوعي
الحد ما كمل اني شبه منتهيه
ربطوها الي ورجعنا
ليال... فتت للبيت ابد مامستغربة الأوضاع احنا يومية على نفس الرنه
لكن من گالولي ضاربها وخالع كتفها تخبلت
هذا شجاه لوين وصلت بي
رجعوها للبيت منتهيه من البجي اول ماسكن الألم نامت
سألت ماما علاء وين؟
.. أبوج طرده
... اي ومتعرفين وين راح
.. شمدريني خلي لايرجع اليوم اخوانج متحلفين بي
.. حقهم بربج يرضيج السواه بيها شوفي حالها كلما تتحرك تفز من الوجع
.. الضرب بنص گلبي مو بس بيها
ما اريده يرجع الحد ماتهدء النفوس مانقصين ضيم جديد ومالخ وتصير عداوة بينه وبين اخوتة
.... صدك بابا وافق ينطي زلال الأمجد
... ما ادري صدك لو بحالة عصبية بس گال الخالج
اخذوها
... عزززا دام گال الخالي اعتبري السالفة صارت صدك ابد ماحابه هالقرار لمى شنو ذنبها
.. واختج شنو ذنبها تحملت قهر اكبر من عمرها.
لاتخافين على لمى صغيرة وحلوة والف من يتمناها ماراح تصيرلها مشاكل ولا احد يجيب طاريها
خافي على اختج الدمرت بدون ذنب
... ماما صدگي هالزواجة فاشلة حالها حال زواجي من ليث وخطوبتها من اركان
امجد يحب لمى لاتصدگين راح يگدر ينساها
وزلال طول عمرها تضوج منه وتخاف شلون راح ينجمعون سوة گوليلي ششلون
... صليت استخارة ودعيت ان شاء الله اذا بيها صالح الها تم واذا مابيها الله يبعده عنها
... ان شاء الله
حرت اشيل هم منو زلال المكسورة وضايعة لو لمى المسكينة شلون تتحمل بنت خالتها بمثابة اختها وصديقتها تأخذ حبيبها
ماما طلعت أجت رغد اخذت غزل من ايدي تلعبها
رغد.. ابلامج غرگانة شجاج
... منو البينا مامهموم كل واحد منا بگلبه حسررة شكبرها
سمعنا شهكات زلال جوة البطانية كشفت رأسها
رغد.. اذا متوجعة عماد جابلج العلاج بي مسكن اخذي منه
.
ليال...زلال سمعتي كلامي ويا ماما مو؟
زلال.. هزيت رأسي وبجيت
رغد..ششنو شسمعت؟
ليال.. بابا منطي الموافقة الخالي
.. هاا اي ادري عمي قبل شوية بلغ عادل وعماد
... يعني السالفة صدك مو حالة عصبية وتروح
... عمي مقهور يگول گدامي ضربها وماگدرت اخلصها من أيده بعدني عايش وانذلت
.. حبيبتي اذا متريدي احجي لاتبقين ساكتة
ولج هذا زواج مو لعب عششرة عمر لا يوم ولا يومين
لاتصيرين غبية مثلي
راجعي نفسج وفكري راح تگدرين تتقبلي وتكونيلة زوجة وبينكم حق وحقوق
راح تگدرين تنسين حبه الـ لمى
كل هاي الأمور خليهن بالج قبل لاتخطين خطوة جبيرة مثل هاي
اني وانتي والدنيا كلها تدري أمجد راح يأخذج
بسبب سواية أخو لا رايدج ولا هم يحزنون
راح تتعبين
... ليال شفتي ماما البارحة شلون تتوسل بابا حتى يوافق خايفة على علاء
واني خايفة عليها وعلى بابا وحتى على علاء أخاف شما سوة بيه ما أگدر ازعل منه
رغد... وانتي وين من كل هذا فكرتي بيهم ونسيتي نفسج سعادتج وراحتج ليش مفكرتي بيهن ياعيني ليش دتقدمين الكل على راحة بالج
... الله عليج يا سعادة الدتحجين عنها ليش هم ظلتلي سعادة راحة بالي
حالياً كل الأريده اشوفهم بخير
اما حياتي الخاصة ما اعتقدت ظلتلي حياة
بس تبقى لمى غصة بلاعيمي بحياتي متوقعت اني راح اكون سبب أذيتها
ليال...الله لايحط احد بمكانها من يمي اختنگت
خالي وخالة كوثر وبيبي العصر اجو يطمئنون عليها زلال سوت روحها نايمة
عاد خالي حجة ويا بابا گالة خابر عمامها باجر نسوي الگعدة ويعقدون
بابا ماقبل گالة خلي تصير زينة بالأول
علاء ماندري وينه وماما تلوب عليه
لليل يلا عرفنا بايت بمكان شغلهم
يومين وهو مراجع للبيت وليد رايحله محاول يجيبه مقابل
زلال لا ايد ولا رجل تمرضت البارحة باليل گعدت تصرخ اتگول فد شي گطع نفسي وقيد جسمي اريد اتحرك ما اگدر اصرخ صوتي ميطلع
من قريت أية الكرسي يلا صحيت
بابا گاللها هذا جاثوم يستغل ضعف النايم ويجي عليه
قلة الأيمان الحزن ترك الصلاة تجيبه ومرات الحالة النفسية
لمى وخالة صارلهم فترة مجايين من تتصل اتگول ماما متقبل تجيبني اطلعلي شغل من جوة الگاع
اليوم العصر اتصلت عليه گلبي انقبض بس لا عرفت لان باجر على اساس خالي يجيب مشية يريد يجيب هواي ناس حتى يرفع راس اهلي
وبنفس اليوم يعقدون
جاوبتها سمعت صوتها تشهك
لمى.. ااااااااختج ووووووين
.. مريضة ونايمة
.. عررررج مايطبها وووووينها الحقيرة
ليششش سوت بيه هيج لج ليششش مو تدري بيه احبه شلون گلبها انطاها توافق تأخذه
.... لا تلوميها وحدها اول شششخص لأزم تلومي هو امجد
.... ناس انگس من ناسسس أثنينهم غشششوني بحياتي مراح اسامحهم عساهم لاتهنو ومثل محرگوا گلبي الله يحرگ گلبهم
... الله عليج لاتدعين عليها ترى مو ناقصة البيها مكفيها
.. حاقدة عليها الدرجة لو اشوفها تموت گدامي ما انقهر حسبي الله ونعم الوكيل كلشي صار بيها تسسسستاهله لان طلعت حيه اكيد اركان انهزم من سسسمها حياتها ادمرت
ادمر حياتي وياها ليششش قحط ششباب حطت عينها على اخووو
... خالة اخذت التلفون منها گالت
فردوس.؛.. معليج بحجيها الله يسعدهم
يلا مع السلامه
سدتة وراحت
ياربي شلون قهر هذا الله يبرد گلبها ااخ منج زلال بشنو ورطتي نفسج
هاي مفرفحة وذيج مفرفحة ما أعرف الدنيا شلون تمشي
لمى تتمناه وهو يتمناها
زلال لا تريدة ولا هو يريدها
وبالنهاية راح تصير اله
شذى...بنتج طگت بجي شسوين اهنا بالبرد
... بلكي يبرد گلبي
.. خيرج صدك ويامن جنتي تحجين!؟
.. لمى
.. عرفت مو؟
.. اي وتعالي شوفي حالها متخبلة حتى دعاء دعت عليهم
.. محد يگدر يلومها بس الله وحده يعرف شنو حساسها
وحال اختج اتعس منها حتى لأكل گاطعتة
... امشي انفوت لاتحجيلها على لمى
.. لا شعليه
...علاء من سمع باجر مشيتها خابر عماد گالة دام انتطيتوها غصب عني خلي أهلك ينسون عدهم ولد اسمه علاء،
عمي ابو رائد گال عوفة لاتحاجي ورة المشية احنا نتعنالى نجيبة ونجي
ثاني يوم خالي وفى بوعده مابقى احد ما جابة بحيث الشارع انسد بالسيارات
والجيران ياهو اليسمع عقد امجد وزلال ينصدمون لكن محد بيهم يگدر يحجي
زلال يا زلال نشف ريگنا يلا گامت بدلت
جديات تعصبت منها لا من ترفض وتفضنا ولا من تتقبل الأمر الواقع وتسكت
سألتني لمى عرفت لو لا گتلها ما ادري
مخابرتني
زلال...بعد لحظات راح أجرم بحق نفسي وبحق صديقة عمري انانية خاينة حقيرة كل هاي الصفات ينطبقن عليه
الخاطر صحة اهلي وراحتهم اشتريت تعاستي
لأجل هدوء بيتنا حرگت نفسي بنار وحرگت لمى وياي
اصير زوجة امجد الكلمة وحدة تسببلي غثيان
صاحوني للعقد
ردت اموت أريد انهزم بس ماعرف شلون
مگعدين السيد بالغرفة فتت ويا ماما بدون ما ارفع راسي منزلة الحجاب على گصتي حتى لايشوفون دموعي
ماشفت احد ولا اعرف منو موجود
الشيخ سألني على الموافقة ما اگدر أجاوب بجيت بصوت مسموع
سألني اذا مجبورة او اكو احد ضاغط عليه
والله العظيم اتمنى ارفض واطلع ركض من الغرفة
لكن فات الاوان ما أگدر أسويها
جاوبتة لا ماكو واني موافقة
عقدلنا صرت مرتة الكلمة تخوفني
امجد لحد هسه مشايفتة ولا اريد أشوفة
خلصت الهوسة ورجعت تقوقعت على نفسي المرض ملازمني ميفكني
الليل جاثوم وكوابيس حارميني لذة النوم
خالة كوثر رادت تجهزني رفضت اكتفيت بجهازي القديم ما اگدر اطلع واشتري
حتى ذهب رفضت أروح اخذه گتلها جيبي حلقة وهاهي
من رجعت جايبة حلقة وگلادة وتراجي
گالت ادري قليلات بس صبري على أمجد ان شاء الله يعوضج
المسكين حتى سيارتة بايعها ومخلي العنده والمعنده
ومكمل فلوس البضاعة الباگهن اركان
من بدوا يحجون بالعرس والحنة تخبلت
لحد يجيبلي طاري الحنة ما اريد حنننننة
گمت اصرخ حتى يسكتوني گالوا هذا هو منسوي بس سكتي
عرس هم ما أريد
عاد خالة گالت مو الهدرجة ابني أريد افرح بي
على الأقل نسوي بالبيت شي بسيط
ما اعرف على شنو فرحانين ويريدون يفرحون
اشو لا اني ولا هو متقبلين هذا الزواج
قبل العرس عقدنا محكمة والمصيبة صرت مرتة شرعاً وقانوناً
علاء عمامي وخالي راضوا ورجعوا للبيت صح رجع بس ميحجي ويا احد ولا يباوع بوجه طير البشر
والكل عايفي براحتة
أجه يوم العرس هذا اليوم الي شايلتلة هم بكبر هالدنيا......
