 |
رواية ليلة الحنة الفصل السابع عشر 17 بقلم بسمة البياتي
عرس يعني بدلة بيضة وقلب فرحان
يعني هلاهل وطش جگليت وتهاني
زين على شنو يهنوني؟!
اذا الفرح متبري مني
والبدلة بيضة كفن خانگني
الهلاهل تدخل المسامعي صرخات تقبض گلبي
خسرت نفسي
خسرت فرحي
خسرت انسانة
كانتلي أخت وصديقة هذا اليوم
لأزم يكون عرسها مو عرسي
فرحتها مو موتي شسويت بحالي
وقت التراجع أنتهى والندم بعد ميفيد
ليال... زلولة الزفة راح تجي گومي گعدي بالأستقبال النسوان يسألون عليج
حبيبتي ليش ساكتة حتى مباوعتي النفسج بالمرآيا شوفي شگد حلوة طالعة
... لكن داخلي قبيح
وصال.. داخلج ابيض من الحليب وانقى من المي
.. لا غلطانة قتلت روح بريئة في سبيل اخلص من المشاكل واحمي اهلي الله اعلم حال لمى هسه
خليت ايدي على وجهي وبجيت
وصال.. لزمتها من كتفها هزيتها اصحييييي عاد فات الأوان هذا الكلام بعد مامنة فائدة أمجد صار زوجج وكلها ساعات وتجمعكم غرفة وحدة وتنامون على نفس المخدة
دام رضيتي بي بأرادتج لأزم تكونين گد قراراتج
لمى الـ خلقها مينساها راح تتعوض بالأحسن من امجد وتعيش حياتها بأحس صورة
كاااااافي بجي نعلتي ابو المكياج راح اكفخج
ليال... وصال ششجاج بدال ماتهديها استلمتيها رزايل
... جززززعت من تصرفاتها لا أكل لا شرب ليل ونهار تعوي رضت بي تتحمل وتكمل للنهاية
شذى.. وصال امششي وياي رعبتيها بالزايد
هسه ليال ورغد يجيبوها ويجون
ليال.. الشهگة گطعت گلبها ما أتگدر تحجي جبنالها مي شربت شوية عدلنا مكياجها
اخذناها وطلعنا العيون عليها والمهامس بفلس
أجت الزفة فات امجد حاله مو احسن من حالها لا باوع عليها ولا باوعت عليه
من گعد بصفها شفايفها ترجف خفت لاتتخربط
أبد مجان اكو داعي للزفة لكن خالي أصر
يسويلهم زفة ترفع الرأس والظهر
سووا غدة مابقى احد ما عزمة يحاول بهاي الطريقة يرد اعتبار أهلي
أخذها وطلعنا كلمة مايحجون اثنينهم مثل الأصنام حتى يم المصور جامدين ملامحهم جامدة مابيها أي حياة
الحد ما رجعنا للبيت أيدنا على گلوبنا لا تروح توگع وتترخبط وضعها يخوف
گعدنها شوية تالي وصال گالت گوموها الغرفتها ترتاح
بس انفتح الباب وشافتها شلون مزينيها والفرشة البيضة على السرير انجنت لزمت الباب ووگفت تبجي
... فدوة ما أريد أفوت الله عليكم اخذوني الغرفة وصال لاتفوتوني اهنااا ما أريدها
رغد.. ياعيني والله مراح يأكلج لاتخافين
اذا يشوفج خايفة أكيد راح يعوفج الحد ما ترتاحين وتهدين
... عززززززا بعيني شششسسويت بروحي انييييي غبية والله غبييييييية عقلي ششششايلتة مخلية بمكانه نعال
رغد... لج فوتي لاتجيج وصال ششيخلصج منها
ليال... سمعنا صوت خالة فردوس ورأنا
فردوس.. ششجاكم ششو واگفات بالباب
... أبد ممتوقعين راح تجي
زلال غمضت عينها ماگدرت تندار عليها عيونها تزخ
فردوس... ششو عوبة باوعيلي ليش دايرة وجهج
يا ماما ششنو هالبجي
.. اخذتها الحضنها زلال عبالك ما صدگت صارت تبجي بصوت عالي
خالة عيونها مدمعة هدءتها وفوتتها للغرفة
گعدت وگعدتها بصفها
فردوس...حبيبتي ليش دتأذين روحج
زلال.. تعبانة وكارهة حياتي ما استاهل منج أنتي بالذات هاي الحنية
.. وليش بله زلال لاتعصبيني مامسوية جريمة حتى تخجلين وتنصين راسج
... ششلون ماسويت واني سبب أذية لمى
رجعت غصيت بالبجي
... كلشي قسمة ولمى مو قسمتة وداعتج حتى لو ممأخذتة مراح ننطيها اله فكري بنفسج وحياتج ومعليج بيها
... شلونها
... الحمدلله زينة
ليال.. شلون موقف ياربي الله يساعد خالة وزلال
خالة تشجع زلال وتواسيها
ومتأكدة گلبها نار على بنتها
طلعت علبة صغيرة بيها محبس لبستة الزلال وحضنتها بوستها وراحت
زلال.. راح امووت بردانة
رغد.. عززا ليش هيج ترجفين
... ما أدري غططوني
.. دبدلي بالأول
.ليال..على السريع طلعتلها دشداشة ساعدناها تنزع البدلة وتلبسها
ردت افتح شعرها ماقبلت تريد تتغطى
جبتلها بطانية تمددت حتى رأسها غطتة
رغد... شراح نسوي نگوللهم لو لا
.. لا يمعودة سكتي لاتحجين
هو الجو بارد والبدلة خفيفة تلگيها اخذت برد
من دفت وطمئنينا عليها يلا عفناها ونزلنة
زلال.. أختفت الأصوات انسد الباب وصفيت وحدي بالغرفة
أشگد حلو لو أغمض عيني ومن أفتحها
يرجع بيه الوقت القبل خطوبتي من أركان
الگي نفسي بيتنا وبفرأشي الدافي
أرجع الهذاك الوقت الي بي أكبر همومي
يوم أستلام النتيجة أرجع الهذيج حياتي البسيطة بكل تفاصيلها
لكن هيهات شي يتغير وهيهات الزمان يرجع ليوره
تعبت من البجي حتى دموع مظلت عندي
مطلعة عيوني من جوة البطانية عيني على الباب
ادعي بكل جوارحي مايجي بلكي هو من ذاتة يرفض ينجمع وياي بنفس الغرفة
أمنياتي مثل أماني طفل ممحضر واجبة المدرسي
ويدعي الله أمه تنساه وماتجي تگعدة للدوام
تالي لا امه الراح تنسى ولا هو الراح يگدر يحفظ الدرس قبل لاتجي المعلمة وتوگفة قصاص
كل ربع ساعة تنفتح الباب الگي وحده من البنات مادة رأسها تسأل اذا بيه شي أو محتاجة شي
المصيبة مايدرون كلما يحركون يدة الباب
يهدون حيلي ويأخذون نص عمري
من الخوف والتفكير عيوني شكلت غمضت عيني أخذتني النومة
النوم بهيج ظروف تكون رحمه ونعمة من رب العالمين
اقل النص ساعة رجعت گعدت شلت البطانية من رأسي تحركت نمت على ظهري
رجفت من شفت أمجد بالغرفة فاتح الشباك ووأكف
شلت الغطى مني نزلت رجلي من الجرباية
سمع الصوت أندارلي
عيوني من گد مابجيت وأرمات ويحرگني
گمت من مكاني مشت بتجاها
وصلت العنده بدون كاف نون جثيت على ركبتي يم رجلة ما ادري شجاي اسوي ومايهمني شي
همي الوحيد يسمع مني
أمجد... بابا ششبيج تخبلتي گومي
.. راد يرفعني دفعت ايده
أمجد ابووووسسس رجلك لاتفكر بيه كـ زوجة
ما أگدر بالقرآن ما اگدر والله أخذتك علمود أهلي
اذا تحب الله لاتجي يمي
... الركوع لله مو الي عندج كلام وياي گومي اوگفي وبدون بجي حاجيني
.. من ضييييمي ليشش عبالك بوعيي لو أعرف اتصرف مجان هذا حالي ولا جان انجمعت وياك بنفس الغرفة مو تقليل من قيمتك لا والله أبد
بس هذا مو مكاني اليوم أذيتك وأذيت أختي وصديقتي
... اني الجيت خطبتج مو انتي الجيتيني
مثل ما اتخذتي قرار القبول بيه قبلج اتخذتة
واذا تعتبرين زواجج مني تضحية علمود اهلج
تأكدي نفس السبب جابني عليج
ادري مامتقبلتني واكبر كذااااب اذا اگلج عادي عندي ومتقبلج أعرف حرام أحجيها لان صرتي على ذمتي صدگيني الهاي اللحظة ما أشوفج غير اختي الصغيرة الربت گدامي
.. مسحت عيوني بقوة والحل شنو شراح نسوي
.. يبقى الحال مثل ماهو بين ما الله يفرجها
خليها للوكت هو يحلها
..اهلي واهلك اذا سألوا شگوللهم
... لاتخافين محد يسأل هما هم متأكدين ماراح يصير شي بينا
... حجيت بغصة ولمى
ملامحة تغير انطاني ظهرة رجع وگف يم الشباك
حجة وهو مندار
ياريت مانحجي بهذا الموضوع
... اوك رجعت تمددت وتغطيت
غمضت حتى من تأكدت مراح يقترب مني
لا أرتاحيت ولا فرحت كسرت لمى تحفر بگلبي احساس الذنب دمار شامل وموت بطيئ
غطيت رأسي وغمضت
جابوا العشى
گال گومي تعشي مجاوبتة سويت روحي نايمة
هو هم ما اعتقد تعشى مگابل الشباك ويدخن
يذب قهرة ولوعتة بالجگاير
اذا هذا حالة لعد حال لمى شلونة
فزيت على وجع قوي بمعدتي تعصرني عصر
يومية نفس الحال من قلة الأكل تملخني ومن أكل لگمة نفسي تظل تلعب
رفعت رأسي النهار طالع انداريت للصفحة الثانية
امجد نايم بطارف الجرباية عكس أتجاهي رجليه من يم رأسي ورأسة بالجهة الثانية بقيت بفرأشي
ماتحركت
متقيدة كلما اصفن وأردد بيني وبين نفسي هذا صار مكاني وهاي غرفتي ولأزم اتقبل العيشة ويا تحت نفس السقف
گلبي ينعصر بلاية شعور اهز رأسي بالرفض
أبد أبد ما أگدر مسستحيل اتحمل أريد بيتنا أريد مكاني أريد عيشتي القديمة هاي مو حياتي ما انتمي الها ولا الهذا المكان
اااخ أركان كل الصار بيه وديصير بسببك الله يهد حياتك مثل ماهديت حياتنا ودمرتنا
الي مرينا بي كشف هواي ناس على حقيقتها سقطت أقنعتهم
وبينت معادنهم ونعرف
الزين من الشين
الطيب من الخبيث
هواي أشخاص انخدعنا بيهم
منهم عمي منير گدامنا شي ومن ينطينا ظهرة شي ثاني
اما بقية عمامي ميختلفون عن عمي منير كلمن يگول ياروحي
ماعدا عمو أبو رائد اشگد جنا نضوج من بعض تصرفاتة لان بوقت العصبية هواي يحجي ويزعل
لكن ثبت گلبة ابيض لا يحقد ولا يغدر
قبل خطوبتي من امجد رايح العمو محمود گايلة ابنك بدال مايزن براس علاء ويفتر ويا يدور اركان
ليش مايخطب زلال ويسد حلوگ الناس وبلكي علاء يصحى على زمانة وينسى سالفة الانتقام
عمي رافض گايلة زلال متفيده مالي خلگ اجيب المصايب النص بيتي
وعماتي اخذن دور المتفرج ماعدهن غير القال والقلت
اما الجيران الي بفرعنا دافعولي كانما وحدة من اهل بيتهم واولهم بيت حجي ريسان
وباقي اهل المنطقة هما سبب دماري شبابهم
نسوا عدهم عرض وخوات وين ميگعدون يگصگصون بلحمي وينهشون بي وهذا الي خبل علاء
صحيت من صفنتي من تحرك امجد ترك الفراش طلع من الغرفة
اخذت نفس وتحرك براحة وره دقائق رجع
امجد.. صباح الخير
.. صباح النور
نشف وجها ومشط شعرة اندارلي
... گومي نزلي نريگي
.. هاا ماشي بعدين
بدون ميجاوب تركني وراح
بقيت على نفس نومتي
وصال...صباحوو يولي اذا گاعدة ليش منزلتي
.. شسوي انزل
... تتريگين قابل شسوين
هاي شنو شو العشا نفسه ممأكلين
.. جنت نعسانة نمت
.. هاا نمتي
طبن ليال ورغد الحلو محد سألني شصار كلام امجد صح الكل متأكدين مراح يصير شي بينا
واساساً لا شكلي ولا وضعي يدال اني عروس وعايشة ليلة خرافية كلها حب ورومانسية
شو هي مخدة امجد من جوة رجلي وحتى بطانيتة وحده
ليال.. ششلونج اليوم لج غزولة ادورلج شافت بنت عمة نادية نايمة بمكانج راحت تزحف عليها تريد تكشفها
... ياعمري والله اشتاقيتلها ليش مجبتيها وياج
.. جوة يم ريم
وصال.. تنزلين جوة تترگين لونجيبه اهنا
.. ما أريد كلش نفس متريد
رغد.. هذا مو وضع من قلة الأكل وجهج اصبعين ووزنج نازل ادري شلون تتقوين اذا متسندين گلبج بلگمة زينة
... معدتي المي بالگوة تجرعة مو عاد أكل
ليال... الحجي وياج ميفيد نازلة أجيبلج الريوگ
وصال.. زلولة حبيبتي الأيام الصعبة ولت وراحت
هونيها على نفسج وهي تهون لاتبقين تاكلين بروحج وشايله هم هذا وذاك
... شلون ما اشيل هم وادري لمى دتتعذب بسببي وامجد كذلك اني دمرتهم ما اگدر اسامح نفسي داتعذب العذابهم
وصال...لج وداعة جهالي خالة تحلف كل يمين يكسر الظهر اتگول حتى لو زلال مماخذتة ماجان انطيناها اله أبوها قافل لاتلومين نفسج
ترى مو انتي السبب امجد لو صدك متمسك بيها ميعوفها بسهولة ولا يرضى يضحي بحبه الخاطر يصلح الخراب السببه اخو
... شتحجين شفت بعيني حاله البارحة الليل كله مگابل الشباك ويدخن كل حسرة يجرها تطلع من اعماق روحه
وصال.. سمعيني والله يشهد على كل حرف راح احجي خالي من بداية المشكلة طلب من امجد ياخذج وامجد تخبل ماقبل بكل شكل من الأشكال
خالي حاول ويا الحد ما يبسن بلاعيمة وأبد ماكو فائدة بين يوم وليلة
اجه امجد گال اذا عمي محمد ينطيها وهي توافق اخذها
بوقتها صدك انصدمنا شنو الغير رأيه ماندري
وليد حاول يفهم منه
امجد ماانطى لا حق ولا باطل گال هذا احسن حل اخلص زلال من كلام الناس واحمي علاء قبل لايتهور
رغد.. اكيد اكو سبب خلاه يوافق
وصال.. الله اعلم
زلال.. زادت حيرتي شنو الموضوع هو ولمى مابينهم مشاكل فجأة ابتعد عنها وهي ظلت تشكي الـ ليال من هالشي
اتمنى اعرف السبب بس منين حتى ميانة ماكو بيني وبين امجد د اسألة
ليال..هاي شنو بعدج بالفراش ليش مرحتي غسلتي هيان جبت الريوك
... بابا والله ما اشتهي خوما گوة
رغد جرتني من ايدي گومتني اول ما وكفت لزمتني دوخة رجعت گعدت
... هاكم استلموا شوفوا لوين واصل بيها الحال وگفة متگدر توگف
.. كافي هسسه اگوم لاتخبصوني
بطلاع الروح وگفت رحت غسلت ورجعت
اتعارك ويا معدتي حتى أكل اكثر من ثلاث لگمات ماگدرت اتقبل والبنات وگعاتلي دك رزايل
بقيت بالغرفة ماما وخالة أجن للغرفة مجرد اطمئنن عليه ونزلن
جابولي الغدة وتعالي هم اجبري نفسج طگت روحي تعاركت ويا ليال ما أريد خوووووما گوووة دخيل الله عوفوني من أجوع اني انزل أكل قابل غريبة لو مستحية شو گضيت حياتي بين بيتنا وبين هذا البيت
ليال جزعت مني گالت عقلج برأسج تعرفين خلاصج على شنو موجعة راسي ومتحملة عنادج
عافتني وراحت
نص ساعة وفات أمجد غمضت عيني لا اريد احاجي ولا يحاجيني
متأكدة حتى هو مختنگ من وجودي بغرفتة
لف راسة ونام بنفس المكان الجان نايم بي باليل
وهاي جانت بداية حياتي التعيسة ويا
كلام مگطوع بينا حالنا حال الجثث لا احساس ولا روح
من ثاني يوم بده يطلع يقضي اكثر وقتة بالشغل
مرضي زاد وصلت مرحلة وگفة ما أگدر أوكف
أكل شبه قطعتة بشكل نهائي
وباليل اذا أنام الجاثوم يقضي عليه كم مرة امجد حس بيه اجة گعدني
من اصحصح أشبع بجي
بيوم السبعة اقاربنا والجيران راح يجون شلون اگوم واستقبلهم بهذا حالي ما ادري
حورية.. بعد مابيها مجال باجر أخذج طبيب أخصائي بلكي يوگع على علتج
كوثر... منين تجيها القوة وهي گاطعة الزاد نحيد نريد نخليها تأكل ماتقبل
زلال...عفية كافي والله رأسي يوجع ماتحمل لوم ورزايل
أجت رغد عدلت وجهي كومة مكياج وبعده وجهي تعبان
طلعت سلمت وگعدت بالأستقبال
ياهو التجي اتگلي هاي شصاير بحالج الظاهر امجد متعبج
والله بطرانات اليدري يدري والمايدري لايدري
شفت الموت الحد ما راحوا يمكن لو مطولة بعد نص ساعة اتخربط بنصهن
وبالواقع هم تخربطت ماما وعماد اخذوني للمستشفى
لان امجد اصلاً مموجود
سوولي تحليل طلع عندي فقر دم حاد احتاج ابر ومقويات وتغذية زينة
رجعت للبيت امجد موجود گال ليش ماخابرتوني اني اخذها
عماد..مو مال نعوفها متخربطة ونظل ننتظرك
زلال.. راد يدفع فلوس العلاج عماد حلف مايأخذ گال من انطي شي الأختي لاتفكر ترجعة حتى لو تزوجت تبقى مسؤوليتنا
زلال.. امجد مگدر يناقشة طلع ورة ساعة رجع جايب معلاگ وعصير طبيعي
اهلي وبيت خالي كلهم فوك رأسي غصب خلوني أكل
ليال... وأخيراً رجع الهدوء البيتنا
وبالمقابل ادمرت حياة زلال
علاء لهسه زعلان ويا اهلي بس وياي يحجي وقايمة بطلاباتة أكلة ملابسة
ورة العشا كلنا ملمومين
محمد.. ليال اليوم عمج ابو رائد رجع طلبج الرائد
عادل... ههههه وهاي راح نگضيها هيج نخلص من خطوبة نحير بالثانية
محمد... العنده بنات اكيد خطابة رايحة وخطابة جاييه يكبرن بناتك ويجيك الدور
ليال... قاطعت كلامهم اي بايا شنو جان جوابك العمي؟
.... الجواب يمج مو يمي گتلة اسألها واردلك خبر
عماد..رائد بهواي مواقف ثبت صدك زلمة وينشد بي الظهر وماتخسر التأخذه
ليال... لا بابا ما اگدر اوافق الزواج شايلتة من رإسي بشكل نهائي اريد اعيش البنتي وبس
مثل مگال عماد رائد ماكو منه واكيد يستاهل الاحسن مني
هو مو على اساس يخطب وداد
محمد... منو گال؟
حورية... اي صح امه حجت گالت رايدينها اله وعلى أساس خطوبتهم قريبة
.. والله يا مرة ما ادري بهالسالفة اذا صدك رايد بنت اخوي وحاجي بيها مامرجية منهم يجون يطلبون ليال
.. والله بعد ما ادري
ليال.. انطيت جوابي النهائي الباب وگمت
سمعتة خابر على عمو أبو رائد
شذى.. ليش گمتي غير تسمعين شصار
عمي خابر ابو رائد وعاتبة گالة اذا رايد وداد
شلون تجي تطلب ليال ليش تفشلني ويا محمود
عمو ابو رائد ظل مصدوم يحلف لا رايح خاطبها ولا حاجين بيها ويا اهلها
گال ام رائد قبل مدة اقترحت نخطبها اله
رائد نفس الدقيقة رفض وابوك الله يرحمه انسدت السالفة وراحت
... ششعليه بيهم المهم اني ما اريد الزواج
.. بكيفج عمري الله وكيلج الكل صارت بيهم خوفة بعد محد ينصح ويشجع على أي خطابة يجون
.. ابتسمت هاي احسن فقرة
ثاني يوم العصر أجتي عمة أم رائد تهف هي ومرت عمي محمود
لا شكلهن ولا وضعهن مبينات طبيعيات
گعدت ويا ماما وخالة كوثر بالبداية سوالف عادية عن زلال والعرس ووضعها
كل هذا وعينها مفارگتني
ادري اني على شنو متحملة هالنظرات
عفتهم وگمت
نص ساعة وأجتني للغرفة بحجة تشوف غزل وعافت مرت عمي محمود تلهي ماما وخالة بالسوالف
اخذت غزل بوستها
أم رائد.. ياعيني شگد تكسر خاطري هالطفلة
.. خير عمة ليش تكسر خاطرج؟!
.. راح تربى وتكبر بدون أبوها
يايمه البنية تظل العمر كله تحتاجة
الخاطرها ليش ماترجعيلة انسوا الزعل وربوا هالمسكينة سوى
... زفرت بضجر لاتخافين عليها راح تربى احسن تربية وتعيش احسن عيشة البيني وبين ابوها انتهى الله مكاتبلنا نكمل سوى خوما نعترض على مشيئتة
... يمه داحجي علمودج غير محروك گلبي على بنتج
.... على شنو يحترك ارتاحي
... هاا بكيفج ليال عندي سالفة وياج
.. اي حسيت احجي عمة ولاتبقين شي بداخلج
.. احلفج بالله من رادج رائد كم مره جينا طلبناج وكم مره بنفسي توسلت بيج گتلج بس گولي أي شتريدين يحرالج
صح هالحجي لو لا
.. بدون متحلفيني اكيد صح لا اني ولا غيري ننكر هالشي
... رفضتي بدال المره عشرة وتالي ماتالي فضلتي الغريب عليه
... شنو مناسبة هالكلام
.. يمه ليال بوكتها لو صايرة نصيبة نشيلج من الگاع ونخليج على رؤوسنا
وذاك الزمان راح
.. اي وبعدين
... هسه اني الرافضة زواجه منج مو نقص بيج ولا استصغار بس يابنتي
رائد عزابي اريدله بنت بيت يكون اول بختها وأول بختة
شنو ذنبة يأخذج ويربي بنت الغربة
... ترى كل هذا كلامج ماله لأزمة اعتقد عرفتي جوابي بعد شنو داعي هذا حجيج
... ادري رفضتي بس شسوي للعنودي دينه ومعبوده انتي لو ياخذج لو ما يزوج
يگول انتظرها العمر كله بله يعجبج هالحجي
... لا طبعاً خلي يشوف حياتة وياريت تبلغي كلامي گوليلة ليال مارضت بيك قبل ولا رضت هسه لاتتوقع بمرور الوقت تغير رايها وتوافق
.. لا سسودة بوجهي شبلغ غير اذا درى جاية محاجيتج يگلب الأمه على رؤوسنا
... والله حرت لعد ششتريدين أسوي داگلج رفضت اتگولين ينتظرج أگلج بلغي كلامي اتگولين ما يدري الحل شنو؟!
.. هاي جيتي حتى تعرفين بعدم رضاي والعلمج اني محاجية مرت عمج محمود بخصوص وداد والبنية عدها علم وتريده
ولوما طلاگج جان هي زوجتة
... والله حلوة شو دتحسسيني اني واگفة بوجهم ومانعة ارتباطهم لعد عمو البارحة مو گال ماطالبين وداد ولا اكو هيج شي
... اي صح الزلم مايدرون الكلام بيني وبين مرت عمج ووداد
.. المهم من ناحيتي اطمئني جربت الزواج مرة وفشلت ماكو عاقل يعيد نفس الفشل
.... امانة لاتزعلين مني احبج وأريد خاطرج بس من توصل الأبني كلشي يتغير
.. حقج معذورة
سلمت عليه وراحت تهي بهي بعد هذا كلامها لو جان اكو امل واحد بالمئة أوافق عليه حتى الواحد طار اخذت ليث وامه تكرهني شنو تخبلت اعيد نفس الغلطة
اجت ماما سألتني ام رائد شعدها وياج ليش عافتنا وأجت الغرفتج
گتلها ماكو شي رادت تشوف غزل وظلت تسولف على بناتها واطفالهن
شلت تلفوني حاولت اتصل على لمى بعدها حاظرتني
هسه اني شلي دخل تزعل عليه حقدت
يومية اتصل على خالة اسأل عليها
اتگلي الحمدلله زينة
داحجي ويا خالي طلبت منها تقنع لمى تحاجيني
راحت ورة شوية أتصلت
من گلت الووو
سمعت صوت شهگات مكتومة متت
ماراح اسألج شلونج لان اعرف الجواب
لمى. شرايدة مني ليش متعوفوني بحالي
.. ماتريدين تحاجين زلال ولاتسمعين شي عنها حقج لكن اني شعليه ليش تحمليني ذنب ممسويتة
.. كلكم نفس الطينة اشتركتوا بطعني وموووتي عذابي وقهري كله منكم على ششنو أسامح على شنو اعذر تريدين تعرفين ششلون عايشة وشصاير بيه دامووووت متملخة صورتهم اهنااا بعقلي كلما اتخايلها بحضنه احترك بتيزززززززاب
.. تحجي وتبجي گمت ابجي وياها
لمى وداعة غزل زواجهم مو مثل مامتصورة ولج والله على الورق وبس لاجاية يمه ولا رايح يمها
زلال من مرض المرض اذا تشوفيها تخافين منها صايرة جلد وعظم
... عسسساها بابو زايد ليل ونهار ادعي عليها وبكل صلاة اتحسب أختتتتتج بحياتها مراح تتهنى
.. سسسبيها اغلطي تعالي ضربيها بنعالج بس فدوة لاتدعين بداعة اعزازج لاتدعين
.. الجان عزيز هي اخذتة عوووووفيني بحالي وبعد لاتتصلين اكرهج واكرها واكره نفسسسي
... سدتة بوجهي متت بجي
زلال.. نايمة وجسمي نار من الحرارة حلگي يابس وعطشانة
بده النوم يكبس عليه جسمي خدر حركتي تقيدت
احرك رأسي يمين يسار اريد احرك جسمي ما أگدر بده صدري ينقبض وروحي تنسحب مني اصرخ ماكو صوت
امجد أشوف نايم هيانة بس ليش ميسمعني اذكر الله
اقرأ أيات وماكو تعبت گمت اردد الشهادة يمكن هاهي راح اموت
شوية شوية رجعت الحركة الاطرافي صرخت من اعماق روحي لكن هالمره صرختي طلعت رجت زواية الغرفة امجد فز مرعوب اجه يمي لزمت تشيرتة ورجعت اصرخ بعلوا صووتي...
