رواية مصير مجهول الفصل الخامس عشر
فلاااش باااك
************
على ومحمود رجاله خدتهم وراحو مكان بعيد جدا ومغمين عيونهم .. وصلو لمكان مهجور والرجاله قعدتهم فى اوضه فاضيه تشبه السجن وقفلو عليهم بعد ما فكوهم ..
على بيبص على المكان مش قادر يشوف اى شئ لان الشبابيك عاليه جدا
محمود بقلق : وبعدين ياعلى مع المجنون دا هى دى اخرتها
على بثقه : ما تقلقش يا محمود هو مجبر يطلعنا من هنا .. شمس مش ها يقدرو عليها ابدا من غيرى
محمود : انت ياغبى ما سمعتش قالتلك ايه قبل ما تمشى
على : دا من زعلها انى ما سافرتش معاها .. سيبها على الله .. إلا فيها لله مابتغرقش
محمود : ونعمه بالله .. فضلو على وضعهم دا اكتر من اربع شهور .. مجرد بيدخلهم الاكل والشرب والحمام جمبهم .. سجن بمعنى الكلمه ولولا إن الاتنين مع بعض كان الوضع بقى صعب .. لحد ما فى يوووم اتفتح الباب ودخل عليهم سالم وعلى فضل قاااعد ما قامش من مكانه هو ومحمود
على بسخريه : ايه جاااى تنفذ الاعدام
سالم : غريبه بقالك هنا اربع شهور انت وهو لا حد هدد بالحاجه ولا حد سئل عنكم .. طلعت فشنك ياعلى
على بيلف ايده : مش قوووى يعنى .. عمتا انا مأمنتش نفسى ولا يلزمنى والا عندك اعمله ومش ها اترجاك تسيب محمود هو قدره انه صاحبى ووقع فى طريقى يعنى العمر واحد.والرب واحد وبيبص لمحمود والا ايه يا صاحبى
محمود : معاك يا صاحبى
سالم رفع راسه وضحك : حلو جو الصحاب دا .. ما علينا وانا كمان لا جاى اقتلكم ولا اى حاجه .. بكل ادب وذوق وليك الحق ترفض او لاء .. رفضت الباب دا ها يتفتح واقولكم بالسلامه .. وافقتوو .. يبقى ها تفضلو تحت ايدى لمده غير معلومه .. وها اقول تانى ليكو حق الاختيار ومحدش ها يقدر يتعرض لكم .. عشان كفايه عندى انك كنت حمايه لشمس
محمود : دا اسمه كلام .. والمعامله دى ايه يا راجل
سالم بالا مبلاه : عااادى .. او تقدر تسميه تأمين مش اكتر عشان اشوف اخركم
على : وايه هو العرض دا
سالم : اول عرض الباب مفتوح قدامك واخرج وانسى شمس وحياتنا للابد وليك مبلغ تقدر تعيش منه
على هز راسه : تمام .. والتانى بقى
سالم : التانى اننا بنعانى مع شمس برا ومش قادرين عليها .. وطول ما هى بتعانى من مرض نفسى مش ها ينفع نعالج جسمها عشان ما تضرش نفسها بأى شئ .. انت بقى عارف ومتاكد ان معاك مفتاح شمس وعشان كدا ها اعرض عليك فرصة عمرك تشتغل عندى انت وهو وتبقى محامين لشريكاتى ولعملا عندى ... دا رقم واحد ... وها يبقى فى عقد بالكلام دا .. رقم اتنين ها تسافر لشمس كل فتره عشان تتأكد انك ما اتخلتش عنها وفى نفس الوقت انا مش ها ابان فى الصوره خالص لانها بتكرهنى جدا ومعندهاش ثقه فياا .. انما ها تعرف ان مجدى هو الا بيساعدك تروح لها عشان تكمل علاجها وتكمل تعليمها وتتفسح وتخرج للحياااه و تفضل بعيده عن هنا ما تقربش من البلد لحد ما انا اقولك هى تنزل امتى وازاى .. وطبعا انت ها توصل ان دا رغبتك انت .. اى شئ شمس تفكر فيه يبقى عندى اى شئ تتكلمو فيه يتقالى
على : من الاخر جاسوس لسيتك
سالم : انت فاهم كدا تبقى غبى .. انا بحميها بأمن تحركها وحياتها .. وبردو الاتفاق دا ها يتكب له عقد لحد ما اقولك اخرج من حياتها مهمتك خلصت تخرج .. وها تاخد مبلغ مش بطال مليون جنيه
على هز راسه : فعلا مش بطال المبلغ
سالم : دا غير انك ها تبقى محامى عندى انت ومحمود ولو طلعتو شاطرين .. يبقى ها تعدى
على : الصراحه عرض مغرى .. بس ممكن اسأل سؤال
سالم : اسئل
على : يعنى ممكن افضل وقت اد ايه جمب شمس
سالم : على حسب فترة علاجها وهى ناويه على ايه
على : تمام .. وقام .. اتفقنا انا موافق على الاتفاق دا
محمود : على انت بتقول ايه
على : ايه يا محمود احنا مش ها نعمل حاجه غلط دا شغل والا ايه يا سالم بيه
سالم : ابتديت تفهمنى
محمود بيشد على : انت اتجننت .. البنت مش سهله وكمان لو اتصدمت فيك ها يجلها انتاكسه وتعيش فى مصحه نفسيه طول عمرها
على : وايه الا ها يعرفها .. انا ها ابقى جمبها .. تعالى يا اخى واقفل بوئك دا
سالم شاور للرجاله .. وخرجو كلهم بعد ما على ومحمود خدو شاور ولبسو هدوم جديده وراحو الفيلا .. وهناك كان مجدى قاااعد مستنى سالم واول ما شاف على ومحمود ابتسم وفهم انهم وافقو
مجدى : ايه نقول مبرروك
محمود باصص الناحيه التانيه وعايز ينسحب بس خايف على علي ..فا قرر يكمل معاه لحد ما يعرف بيفكر فى ايه
سالم : هات يا خالد العقود الا باعتها المحامى
خالد : اتفضل يا سالم باشا
سالم : تعالا عشان انت ومجدى ها تكونو شهود على العقد .. وفعلا مضو العقدين .. وبدأت حياه جديده لعلى ومحمود تماما
..
سالم : دا مفتاح لشقه ليكم انتم الاتنين . ها يتسدد تمانها بالقسط من مرتباتكم فى الشركه .. وامضى هنا
وعلى مضى وبص لخالد .. عايزهم فى ظرف شهر شكلهم يتغير تماما .. من لبس ومظهر وكله .. واهم حاجه القوه البدنيه عايز عضلات وفورمه وحركات
على : هو مش بالعضلات لانى بأمر الله انا ومحمود محدش يقدر علينا
خالد : ها نشوف وخدهم ووصلهم الشقه الجديده الا محمود تنح وسنح اول ما دخلها .. ومسك فى على الا قاعد مسهم .
محمود : انت عارف انت عملت ايه
على بتاكيد : عارف
محمود : انت فرقت ايه عن اى واحد.معندوش ضمير يا صاحبى .. ايه الفلوس زغللت عنيك
على : تفتكر يا محمود لو قولت لواحد بشخصية سالم انا مش موافق على الفلوس وانا ها اقف جمبها ها يقولى تعالى فى حضنى .. هو له غرص من الا عمله وانا فهمت غرضه ايه انت محامى شغل مخك
محمود : فهمنى فى ام الليله دى بما انه وبيخبط على راسه .. واقف مش عايز يشتغل
على : هو قالك ان الوقت غير معلوم .. يعنى ممكن افضل جمبها لحد ما تبقى عروسه .. فا خايف استغل حبها او اطمع فى ثروتها واتجوزها وعشان كدا عمل العقود دى تتضمن له انى ها افضل تحت ايده ويوم ما العب بديلى كدا والا كدا مع شمس يفضحنى قدامها ويعرفها اد ايه انا ندل وهى عندى مجرد عقد وفلووس
محمود : انتو مجانين البت عندها 13 سنه
على ضحك بصوت عالى : كلها سنتين تلاته وتعرف يعنى ايه حب وجواز .. وغير كدا الا زى سالم دا بيفكر ل20 سنه قدام .. مش زينا ما بيفكروش فى بكرا حتى اهدى يا محمود انا ها اعمل الا انا عايزه
محمود : وافرد حبتها يا صاحبى بجد
على بأستهتار : انت مجنون دا اختى بخاف عليها ونفسى اطير وابقى جمبها وعمرى ما فكرت فى الكلام الفارغ الا بتفكر فيه .. وغير كدا مش انا الا اتجوز واحده تكسر عينى بفلوسها .. المهم دلوقتى ابقى جمبها زى ما وعدتها ودا الا يفرق معايا
محمود : الله المستعان وزى ما تيجى مش ها تفرق كتير
على : على رايك .. ياله نجرب الشقه وبيضحك الراجل عايزنا فورما يلا
محمود : دا انا ها اطلع من الفورمه دى وادخل الفورمه دى وها اجنن امه
على : 😂😂😂😂 وربنا لو ركز معاك ليتجنن .. ياله يا راجل
مر الشهر وفعلا كل حاجه فى محمود وعلى اختلفت 180 درجه وطول الشهر بيدربو تدريبات عنيفه جدا .. والعضلات بقت بارزه وواضحه فى جسمهم جدا وشكلهم الرجولى فرق فى كل حاجه .. جهز سفر على لشمس لمده اسبوع واحد .. وسافر لها ووصل للمستفى الا هى محجوزه فيها .. دخل اوضتها بشويش وقعد جمبها وهى نايمه رافضه الاكل والكلام وكل حاجه
على قرب من ودنها : شموسه وحشتينى
شمس اول ما سمعت صوته لفت وشها واتفاجئت بعلى فى هيئه مختلفه تماما .. حضنته وفضلت تعيط جااامد وتضربه .. وعلى مبتسم وعيونه دمعت مع الابتسامه وبيحضنها بقوته
شمس : اه يا على انتى ها تفعصنى
على ضحك بصوت مسموع وعدلها : اصلك وحشتينى قوووى .. كدا انا قولت انتى اتعالجتى
شمس : ازاى وانا مش جمبك .. انت بقت كدا ازاى كلك عضلات
على وقف ولف : ايه رايك .. مش لازم تبقى زى قويه وتعملى عضلات
شمس هزت راسها : اه عايزا ابقى زيك ومعاك على طول من غير عضلات اصلى بنت
على مسك وشها بين ايديه : واحلى البنات .. لازم تبقى اقووى منى .. انا ها اجيلك على طول ومش ها اسيبك بس مش ها ينفع اقعد معاكى
شمس : ليه ياعلى
على : عشان انا اشتغلت وماسك قضايا كبيره يا شمس فا كل ما أفضى ها اجيلك على طول اتفقنا مش انتى كان نفسك ربنا يعوضنى واعيش فى مكان كويس
شمس : اه نفسى تبقى احسن واحد .. بس ما تبعدش عنى
على : لو بعدت اونكل مجدى ها يجبنى عشان هو الا جابنى ليكى وخرجنى من الحبس الا حبسهولى خالك
شمس بغل : هو حبسك
على : اه دا ها يبقى سر بينا الدكتور مجدى هو الا بيخرجنى من تحت ايده
شمس بذكاء : وبتشتغل ازى
على : الصراحه يا شمس .. مجدى كلمه وهو بيسمح ليا اشوف شغلى وبيبعت رجالته معايا انا ومحمود وبيرجعنا تانى تحت عنيه
شمس : وانت مهربتش ليه .. ليه سايبه يعمل فيك كدا
على : عشان خاطرك .. اعرف اخبارك ازاى .. أجيلك ازاى .. لازم استحمل عشانك .. بس انا زعلان منك
شمس : عشان زعلتك قبل ما اسافر
على : لا ... رافضه تتعالجى ليه
شمس لفت ايديها على دراعه وسندت براسها : خلاص ادام انت جمبى ها اتعالج .. كنت خايفه انت كمان تسيبنى .. اصل كل الا بحبهم يا على بيسيبونى وعيطت اوعى تتخلى عنى
على : ابدا .. عمرى ما ها اسيبك ابد . مش انا وعدتك ..
شمس : وعلى ما بيخلفش وعده
على : ايه رايك نخرج نتفسح وناكل مع بعض العك الا هنا
شمس بضحكه : انا جعانه
على بعصبيه مزيفه : يا ولاد التربنتين .. سايبينك جعانه دا انا ها اطلع تربنتين امهم
شمس ضحكتها ملت الاوضه : يعنى ايه تربنتين امهم
على بيهز راسه : مش عارف انتى عارفه
شمس بتهز راسها : لا مش عارفه
على : طيب ياله قووومى بسرعه عشان نهرب من المستشفى ونطلع نتفسح .. وفعلا لبست وعلى عمل تمثليه انهم بيهربوو وفضلو طول الطريق يضحكوو ... اتمشى بيها واتغدو مع بعض وبعدين رجع المستشفى .. غيرت هدومها ورجعت على السرير
على قعد قدامها : انا ها امشى .. وانتى بقى نامى
شمس : خليك جمبى لحد ما انام وقربت لاكتر مكان بتحس بيه بالامان هو حضنه ..
على : فضل جمبها لحد ما راحت فى النوم .. وقاام من جمبها براحه ومشى .. فضل كل يوم على الوضع دا لحد ما سافر ... رجع للحياه الجديده الا سالم فرضها عليه بطريق غير مباشر .. واثبت نجاحه بجداره قدام سالم هو ومحمود .. تمر شهور وسنين وهو ما بيتخلاش عن شمس ابدا وعلى طول عندها وبيكبر جواها فكرة ان سالم والدنيا كلها اتخلت عنها ولازم تقوووى عشان تقدر تاخد حقها وتحرر ابوها وهى نفسها تتحرر.. وكل ما يلاقيها صحيا كويسه .. يبتدى يدربها على الرياضه لحد ما ادمنتها .. وخصوصا مع على .. وهبه مهونه عليها كتيرر فى الغربه الا عاشوها سوا و شمس كبرت وتمت ال20 سنه وبقت اجمل بكتير من شموسه الصغيره بتقضى وقت فى المستفى ووقت فى شقه بتاعتها هى وهبه
شمس بتلبس وبتجهز نفسها باللبس الرياضى
هبه : ايه راحه تقابلى على اكيد
شمس : اكيد طبعا اناما بصدق يجى .. قولتلك كتيرر تعال اتدربى معايا انتى الا بروطه
هبه بكل فخر : واتعب نفسى ليه .. انا كدا حلووه وزى القمر ورقيقه مش زيك بقيتى جعفر .. انتى عارفه يا شموسه
شمس : بعد الا قولتيه ليكى عين تقولى شمس .. عايزا ايه
هبه : هو محمود صاحبه الا معاه فى الصور والا انتى فلقانى بيه فى كل رواياتك مش ها يجى زياره مره ويخلى عنده دم
شمس : 😂😂😂 اصلا احنا التلاته ماعندناش دم .. ثم كمان انتى مش بتكلمه معايا على الفيس وساعلت بتردى عليه بدالى عايزا ايه تانى
هبه بتفكير : عايزاه يزورنا بدال ما احنا مرمين لوحدنا يجى يشوف احنا محتاجين حاجه .. على بيدربك وهو يدربنى
شمس ضحكت جامد : فكره بردو ..وسعيلى كدا بقى .. ونزلت جررى ركبت عربيتها وراحت مكان بعيد عن الانظار وكله اشجار وخضره بتدور بعيونها لقت الا غمى عيونها من ورا .. مسكت ايده ونطت وهى بتلف قدامه .. علوووشى انت اتاخرت ليه
على : 😂😂 انا مرمى هنا بقالى ساعه يا دكتوره
شمس بدلع : لسا ما بقتش دكتوره بس قريب ان شاء الله وانت معايا
على بأبتسامه : ان شاء وقلع التيشرت وربط رباط على معصم ايده وشمس بتجهز نفسها . بدئو يسخنوو شويه وبعدين جريو سافه كبيره جدا .. وقفو فى مكان وعلى بيدرب شمس
شمس بتقرب وبتضرب على جااامد .. ولفت ومن ضهره بحركه منها كانت ماسكه على من راسه ووقعته فى الارض
على بنهجه : اهدى شويه شكلك شايفانى راضى
شمس قومته : اسفه يا على والله ما اقصد
على بفرحه : لا انا مبسوط من التقدم والمستوى العالى
شمس بتكبر وبتقرب عليه : دا مش جديد عليا يا علوشى
على ابتسم وبيرجع لورا خبط فى الشجره .. وشمس بتبصله ومركزه قوووى مع عيونه .. لا معاااه كله وكانها اول مره تشوفه فيها .. وبتلقائيه وحركه لا اراديه قربت اكتر وحضنت وسطه بايديها
على تنح وحس ان فى حاجه مش مظبوطه لان خلاص بقى فى حدود فى التعامل بينه وبين شمس . وعمره ما فكر فيها تفكير ممكن يحرك مشاعره ناحيتها او بمعنى اصح مش بيسمح لنفسه يطمع فيها
على بصوت هامس : شمس
شمس بقت غريبه ومغيبه تماما .. ورفعت ايديها وبتمشيها على وشه وهو عيونه متعلقه بيها وبهمس لعلى حاسه انى اول مره اشوفك او اعرفك . انت ازاى دخلت حياتى وبقيت كل حياتى
على بضعف وتاه فى ملامحها وكانه اول مره ياخد باله انها كبرت وبقت عروسه و معاه وفى حضنه.. وفضل على وضعه هو وهى صمت وتأمل لحياتهم وعلاقتهم مع بعض .. ومره واحده مسك وشها جااامد وباسهااا بشغف رهيب وحب وعشق سنين بس مش ظاهر مدفون جواه .. والغريب ان شمس بادلته احساسه وبتضمه اكتر لها . وفى لحظه الاتنين فتحو عيونهم وكأن حاجه ضربتهم كل واحد قلم على وشه وشمس بعدت وهى متنحه وباصه لعلى وحطت ايديها على شافيفها .. وهو بيبص لها ولنفسه ومش فاهم حصل ايه وازاى
شمس بارتباك : انا لازم امشى .. اصل هبه لوحدها وانا كنت ولفت وشها وطارت من قدام على الا قعد على الارض بإهمال وحزن كبيررر .. وقع فى الا طول الوقت بيحاول ما يقعش فيه .. تحذير محمود وكلامه ها يطلع صح .. ها يعمل ايه . يكمل والا يهرب ..
شمس طول الطريق بتلوم نفسها وبدأت تعيط . الحاجه الوحيده الا كانت عايزا تبعد عنها الحب .. مش عايزا تحس بمشاعر تضعفها او توقفها .. لا مش عايزا تبعد عن على فى يوم من الايام صعب عليها تتصدم فيه او ما تكملش معاه .. روحت ودخلت الاوضه بسرعه ودخلت الحمام وبتاخد شاور .. وفضلت فى البانيوو .. بتحاول تقاوم مشاعرها مش قادره
على مكانه ما بيتحركش ... عدى عليه وقت كبير
و بصوت عالى : استغفر الله .. اه يارب انا تعبت .. ها اخسرها للابد لو سالم عرف كان كفايه عليا انى بشوفها ومعاها .. ليه كل حاجه فى حياتنا فيها عقد .. استغفر الله وميل براسه ومد ايده فى جيبه البنطلون لما تليفونه رن وكانت شمس ... اتردد انه يرد وبعدين رد فى الاخر
شمس بصوت طالع بالعافيه : انت فين
على : زى ما سيبتينى
شمس : قاعد عندك ليه
على : خايف ورجلى مش شايلانى
شمس : من ايه
على : منك وعليكى .. خايف تبعدى عنى . انا اسف
شمس عيطت وبتاخد نفسها بصوت عالى : وانا مش عايزاك تبعد او حاجه فى يوم تجبرنا نبعد عن بعض .. انت احلى حاجه فى حياتى
على بكسره : وها افضل على طول بقدملك الحلو وبتمناه ليكى . بس مش ها ينفع نقرب اكتر من كدا .. لازم نبعد عن الطريق دا
شمس : بس انا بحبك .. انا اكتشفت انك كل الحياه الا بعيشها .. ازاى نبعد
على : اه يا شمس منك اه ... انا مش قدك .. انتى فين وانا فين .. انتى بعيده قوووى بالنسبه ليا .. ارجوكى
شمس : ارجوك انت
على : انا لازم اقفل
شمس بعياط اكتر : انا ولا حاجه من غيرك .. انا شمس الا كانت كل يوم بتنام فى حضنك من غير خوف ولا فهم انت ايه بالنسبه ليا وينفع اكون معاك والا لاء.. برغم ان والدى ووالدتى كانو دايما بيبعدو عنى اى حد غريب .. عارف كل الا فى دماغى انى خايفه ومرعوبه ولقيت حصن اقدر اهرب فيه انت ومش حد غيرك ودى كانت ارادة ربنا من البدايه .. لا انت جيت فى طريقى قصد ولا انا
على بألم ورافع راسه ودموعه نازله : خايف اجرحك فى يوم وتبعدى عنى
شمس : ليه ياعلى .. ليه تجرحنى اذا كانت انت الا بتداوى جرحى .. اوعى تقنعنى بعكس على الا اعرفه ابدا .. انا بحبك ومش ها اخبى ها اعلن دا للدنيا بحالها فى الوقت المناسب
على : ارجوكى يا شمس أجلى الموضوع دا دلوقتى سبيه لوقته ولظروفه
شمس : اختار دلوقتى يا تبقى معايا يا ضدى
على بصوت عالى : ليه يا شمس ليه انتو صاعبين كدا .. ليه الاجبار
شمس : عشان حبك خدنى بالقوه ليك .. وانت علمتنى ان الا اتاخد بالقوه يرجع بنفس الطريقه .. ها معايا والا عليا
على : مش ها اقدر اكون غير معاكى .. اموت وانا مش معاكى ياكل دنيتى
شمس بضحكه وبتقلد على : قشطه يا معلم كدا بقت اخر حلاوه
على ضحك جااامد : كدا ها ندخل فى الحيطه
شمس : مش مهم المهم اكون معاك .. حلوو مع بعض ..وحش مع بعض
على : الله المستعان يا شموسه .. انا لازم اقفل .. لا إله إلا الله
شمس : محمد رسول الله
وفضلو على الوضع دا بيقربو من بعض وعلى بينفذ اتفاقه وبينقل كل تفكير شمس لسالم ما عدا حبهم او قربهم من بعض .. 6 شهور وهما خلاص بقو كيان واحد وعلى رافض يفكر فى الاجاااى ابدا وفى يوم شمس اتفقت معاه اتفاق وبدأت تخطط لهم .. هى الوحيده الا عارفه خبايا ومداخل ومخارج الفيلا وكل شئ بالتفصيل وعارفه مين العدو والحبيب .. رجع على القاهره ودخل على سالم
سالم : اهلا يا على حمدالله على السلامه .. اتفضل
على : الله يسلمك يا باشا .. شمس خلاص نوت
سالم : كنت متاكد انها ها تبتدى تفكر اليومين دول
على بأستفسار : اشمعنا يعنى
سالم : عشان خلاص قربت تتحرر من تحت ايدى كلها 6 شهور وتتحكم هى فى املاكها كلها
على بفهم : اه .. هى طلبت طلب غريب .. بس انا فهمت هى عايزا ايه
سالم : ايه هو الطلب
على : هى بتاكد ليا برغم فديوهات والدها انه جوا الفيلا و اتنين بتثق فيهم جدا ممكن يساعدونا .. بس هى مش عايزا تخرجه دلوقتى
سالم : اكيد عشان لو كامل خرج من تحت ايديهم دلوقتى ها يهربو والموضوع كله ها ينتهى او هايتم من بعيد
على : الله ينور عليك .. بس شمس صدمتنى لما قالتلى ان حازم اخو فريده بتثق فيه جدا هو وعم عبده الطباخ الا ممكن يساعدونا ويحافظو على كامل
سالم بتفكير : ممكن يكون كلامها صح .. لان فعلا فى يوم اتفاجئت بحازم جاى يقولى انا جايلك من طرف كامل بأمارة الاوراق والكارت الا مع شمس
على بأهتمام : وانت عملت ايه
سالم : تطردته وبيتراقب لان استنتجت انهم اكيد عارفين ان كل شئ مع شمس وغير كدا ايه الا عرفه ان شمس عندى وهو عارف انهم اتخلصو منها ولما اكتشفو انها عايشه هربت مع واحد غريب .. فا دا شككنى فيه .. انه جاااى يعرف اذا كان ليا يد بإختفاء شمس والا لاء
على هز راسه : طيب تمام .. انا ها اعرف اجيبه بطريقتى ولو فعلا قالى على مكان كامل الا شمس قالتلى عليه يبقى فعلا لسا نضيف .. اما عم عبده
سالم : ما تقلقش منه لان عبده مش ها يبيع دم مليكا ودا الا مقعده لحد دلوقتى .. بس ايه الخطه
على : عايزا محمود يقع فى سكه فريده ويمثل عليها الحب
سالم ضحك جااامد : هى فريده يهمها .. دى خبيثه وحويطه
على : مش مهم .. ها نجرب ومش ها نخسر حاجه
سالم : ها تستفاد ايه .. فريده حتى لو حبت محمود لا يمكن ها تقوله سرها
على : انا مش عارف وجهة نظر شمس .. بس بيتهيئلى لو محمود نجح ف المهمه دى ها يبقى فرد جديد لينا جوا الفيلا وضل لفريده .. وكمان شمس بتاكد ليا ان وجود محمود مهم جدا هناك لانه ها يسهل خروج ابوها بأمان
سالم : وليه مش انت
على : خافت يكون حد من رجالة فريده شافنى وانا بهرب بشمس واتكشف
سالم : منطق بردو .. وبعدين
على : هى اختارت اسم غريب يتعمل بيه بطاقه لمحمود
سالم : اشجينى بنت اختى طلعت مش سهله
على ضحك : الله اكبر يا يا باشا
سالم رفع حاجبه : خايف عليها منى
على بيتوه : لا ابدا فى مثل بيقولك ما يحسد المال إلا اصحابه .. ما علينا هى عايزا الاسم يكون البرنس
سالم فضل يضحك كتيررر جدا ويسقف وعلى ضحك على ضحكه : البرنس .. وبيتخن صوته ايوووا يا برنس لا افهمها دى بقى
على : بتقولى فريده دايما بيلفت نظرها الحاجات الغريبه ودايما بتعلق على الاسماء ودا لحظته فيها جدا .. فلما تسمع اسم البرنس ها يعلق معاها ومش بسهوله ها تنساه لان الموقف الا ها يدخل بيه لسا مش عارفين امتى وازاى
سالم هز راسه بإعجاب : حلووو الكلام دا جدا وعجبتنى الفكره مبدئيا .. بس محمود ها يوافق
على : محمود عنده استعداد يعمل اى حاجه لشمس . فا ما تقلقش منه
سالم : ولو حب فريده فعلا .. انت عارف ها يفضل اد ايه
على : عارف شمس قالتلى لو دخل الدور دا على فريده ها يكمل معاها لحد نزولها مصر وساعتها ها يخرجو كامل من الفيلا وشمس تظهر لهم
سالم بذكاء : يعنى 6 شهور .. وفريده جميله وصاحبك ممكن يضعف
على : لا يبقى لسا ما تعرفش محمود .. ما علينا احنا ها نعرض عليه الفكره ونشوف التنفيذ اهم حاجه الاوراق الا تخصه والبطاقه الجديده لان فريده مش ها يفوتها حاجه زى كدا
سالم : ها ابلغ محمد بكل دا وهو يطلع الورق بمعرفته لان كل شئ ها يتم تحت نظرهم هما ويبقى شمس فى السليم ما تتحاسبش قانونى
على : يعنى ها تدخل امن الدوله فى الموضوع
سالم : هو داخل اصلا . ودا افضل عشان ما نقعش فى مشاكل قانونيه .. وبالنسبه لحازم ها يعرف بشخصية محمود الحقيقيه
على : لا .. لا يمكن نعرفه عشان واحد بأخلاق حازم مش ها يقبل ابدا على اخته وضع زى دا ومش ها يفهم ان مفيش علاقه وعشان كل حاجه تبان طبيعى
سالم : تمام
على قااام : تمام . انا ها اروح واقعد مع محمود افهمه الليله كلها وارد عليك
سالم : تمام
على روح ووصل عند باب الشقه وفتح الباب واتصدم وبصوت عالى : يادى النيله
